¿Ndáa ki̱’va ndani̱’íyó religión ña̱ nda̱a̱?

Ña̱ káʼa̱n Biblia xa̱ʼa̱ ña̱yóʼo

Biblia káʼa̱nña xíʼinyó ndáa ki̱ʼva ndani̱ʼíyó religión ña̱ nda̱a̱, ta xíniñúʼuña tu̱ʼun yóʼo tá káʼa̱nña xa̱ʼa̱ ña̱yóʼo: “Xíʼin ña̱ kéʼéna ndakunindó na̱yóʼo. Ña̱ nda̱a̱ kúú ña̱ va̱ása kivi ndakayayó uva ni higo ndaʼa̱ tú iñú” (Mateo 7:16). Kamaní ndákuniyó ndáátu kúú tú uva xíʼin tú iñú xa̱ʼa̱ ku̱i̱ʼi ña̱ táxinú. Ta saátu íyo religión, chi xíʼin ña̱ kéʼéna kivi ndakuniyó ndáana ñúʼu religión ña̱ nda̱a̱, ta ndáana ñúʼu religión vatá.

1. Religión ña̱ nda̱a̱ sánáʼa̱ña ña̱ nda̱a̱ ña̱ va̱xi nu̱ú Biblia, ta su̱ví ña̱ ndákanixi̱ní na̱ yiví (Juan 4:24; 17:17). Sánáʼa̱ña ndáaña ndóʼoyó tá xíʼiyó ta saátu ña̱ ndátuyó kooyó ndiʼi tiempo ñuyǐví xa̱á (Salmo 37:29; Isaías 35:5, 6; Ezequiel 18:4). Ta saátu káʼa̱nña xa̱ʼa̱ ndiʼi ña̱ vatá ña̱ sánáʼa̱ na̱ veʼe-ñu̱ʼu (Mateo 15:9; 23:27, 28).

2. Religión ña̱ nda̱a̱ chíndeétáʼanña xíʼin na̱ yiví ña̱ kuyatinna nu̱ú Ndióxi̱ ta saátu ña̱ kunda̱a̱-inina ña̱ ki̱vi̱ra kúú Jehová (Salmo 83:18; Isaías 42:8; Juan 17:3, 6). Ta saátu sánáʼa̱ña ña̱ mií Ndióxi̱ kúni̱ra ña̱ kooyó migora ta va̱ása xíka íyora nu̱úyó, chi kúni̱ra ña̱ kunda̱a̱-iniyó xa̱ʼa̱ra (Santiago 4:8).

3. Religión ña̱ nda̱a̱ sánáʼa̱ña ña̱ mií Ndióxi̱ ta̱xira se̱ʼera ta̱ Jesucristo ña̱ kuvira xa̱ʼa̱ na̱ yiví ña̱ va̱ʼa sakǎkurana (Hechos 4:10, 12). Na̱ ndásakáʼnu Ndióxi̱ xíniso̱ʼona chiñu ña̱ xáʼnda ta̱ Jesús ta chíkaa̱na ndee̱ ña̱ keʼéna ña̱ ni̱ka̱ʼa̱nra (Juan 13:15; 15:14).

4. Religión ña̱ nda̱a̱ iinlá Reino Ndióxi̱ ndáa-iniña ta su̱ví na̱ chíñu ñuyǐví yóʼo. Xa̱ʼa̱ ña̱kán na̱ ndíku̱n religión ña̱ nda̱a̱ nátúʼunna xíʼin inka na̱ yiví xa̱ʼa̱ Reino Ndióxi̱ (Mateo 10:7; 24:14).

5. Religión ña̱ nda̱a̱ sánáʼa̱ña na̱ yiví ña̱ ná kuʼvi̱-inina kunitáʼanna (Juan 13:35). Ta sánáʼa̱ña na̱ yiví ña̱ ná ixato̱ʼó-táʼanna ni nda̱a̱ ndáaka raza kúúna, culturana, tu̱ʼun káʼa̱nna á nda̱a̱ ndáaka nu̱ú ke̱ena (Hechos 10:34, 35). Ta ndiʼi na̱ ñúʼu yóʼo kúʼvi̱-inina xínina na̱ yiví ta kǒo xáʼa̱nna nu̱ú ku̱a̱chi (Miqueas 4:3; 1 Juan 3:11, 12).

6. Kǒo xu̱ʼún kíʼin na̱ ñúʼu ti̱xin religión ña̱ nda̱a̱, ta ni kǒo iin título ña̱ ndáyáʼviní ndákiʼinna (Mateo 23:8-12; 1 Pedro 5:2, 3).

7. Na̱ ñúʼu ti̱xin religión ña̱ nda̱a̱ va̱ása kíʼvina xíʼin ña̱ política (Juan 17:16; 18:36). Soo xíniso̱ʼovana ña̱ káʼa̱n na̱ chíñu ta íxato̱ʼónana, chi kéʼéna ña̱ káʼa̱n Biblia: “Taxindó ndaʼa̱ ta̱ César [á ndaʼa̱ na̱ chiñu] ña̱ʼa ña̱ kúú kuentara, ta taxindó ndaʼa̱ Ndióxi̱ ña̱ʼa ña̱ kúú kuenta Ndióxi̱” (Marcos 12:17; Romanos 13:1, 2).

8. Na̱ ñúʼu ti̱xin religión ña̱ nda̱a̱ ndiʼi tiempo kéʼéna ña̱ káʼa̱n Ndióxi̱, ta su̱ví loʼo kuití tiempo kéʼénaña. Ta chíkaa̱na ndee̱ keʼéna ña̱ káʼa̱n Biblia xíʼinna (Efesios 5:3-5; 1 Juan 3:18). Kúsi̱í-inina ña̱ káchíñuna nu̱ú Ndióxi̱ ta̱ si̱í-ini ta kǒo na̱ íxandúxa xíʼinna keʼénaña (1 Timoteo 1:11).

9. Loʼo kúú na̱ ñúʼu ti̱xin religión ña̱ nda̱a̱ (Mateo 7:13, 14). Va̱ása ndáyáʼviví ña̱ kéʼé na̱yóʼo nu̱ú na̱ yiví, saáchi sákukaʼanna nu̱úna ta íxandi̱va̱ʼana xíʼinna xa̱ʼa̱ ña̱ kéʼéna chiñu Ndióxi̱ (Mateo 5:10-12).

“Ndíku̱i̱n religión ña̱ kúni̱ miíi̱”

Sana ndákanixi̱níyó ña̱ va̱ʼa ndiʼiva religión, ta kivi ku̱ʼu̱nyó ña̱ kúni̱ miívayó, soo i̱yoní keʼéyó ña̱yóʼo. Chi Biblia káʼa̱nña ña̱ koo iin tiempo ña̱ na̱ yiví kundiku̱nna na̱ níʼi yichi̱ ti̱xin veʼe-ñu̱ʼuna, saáchi na̱yóʼo sánáʼa̱na ña̱ kútóo na̱ yiví kuniso̱ʼona ta kǒo sána̱ʼa̱na ña̱ nda̱a̱ (2 Timoteo 4:3). Biblia káʼa̱nña xíʼinyó ña̱ ná chikaa̱yó ndee̱ ña̱ kundiku̱nyó religión ña̱ nda̱a̱ ña̱ va̱ása kuumií ña̱ yaku̱a̱, ña̱ kúni̱ Ndióxi̱ ná kundi̱kunyó, ni ku̱a̱ʼání na̱ yiví kǒo xíínna kundi̱kunna ña̱yóʼo (Santiago 1:27, Juan 15:18, 19).