¿Ndáana ku̱ʼu̱n chí ndiví?
Ña̱ káʼa̱n Biblia xa̱ʼa̱ ña̱yóʼo
Ndióxi̱ nda̱kaxinra loʼo kuití na̱ nda̱kú íyo ini xíʼinra, tá ná kuvina, ndatakuna chí ndiví (1 Pedro 1:3, 4). Tándi̱ʼi nda̱kaxinrana, xíniñúʼu vií koo ña̱ kándíxanara ta saátu vií koo ña̱ kéʼéna, chi tá ná va̱ása keʼéna ña̱yóʼo va̱ása ndakiʼinna ña̱ koona chí ndiví (Efesios 5:5; Filipenses 3:12-14).
¿Ndáaña keʼéna kán?
Na̱ nda̱kaxinra yóʼo koona rey ta saátu su̱tu̱ xíʼin ta̱ Jesús ti̱xin mil ku̱i̱ya̱ (Apocalipsis 5:9, 10; 20:6). Na̱yóʼo koona na̱ chíñu xa̱á na̱ koo chí ndiví (á na̱ káʼa̱n Biblia xa̱ʼa̱ na̱ kúú “ndiví xa̱á”) ta kaʼndachíñuna nu̱ú na̱ yiví na̱ koo nu̱ú ñuʼú yóʼo (á na̱ káʼa̱nna xíʼin “ñuʼú xa̱á”). Na̱ rey yóʼo taxina ña̱ vií kooyó ta nina ña̱ va̱ʼa koo nda̱a̱ táki̱ʼva xi̱kuni̱ Ndióxi̱ tá xa̱ʼa̱ (Isaías 65:17; 2 Pedro 3:13).
¿Nda̱saana ku̱ʼu̱n chí ndiví?
Biblia káchiña 144,000 na̱ yiví ndataku ña̱ koona chí Ndiví (Apocalipsis 7:4). Ti̱xin iin visión, ta̱ apóstol Juan xi̱nira iin tí “Ndikachi [ta̱yóʼo kúú ta̱ Jesucristo tá nda̱takura] níndichirí chí yuku̱ Sion, ta 144,000 kúú na̱ ndíta xíʼinrí” (Apocalipsis 14:1-3; Juan 1:29; 1 Pedro 1:19). Yu̱ku̱ Sión ndána̱ʼa̱ña chiñu ña̱ ndáyáʼvi ña̱ ta̱xi Ndióxi̱ ndaʼa̱ ta̱ Jesús ta saátu na̱ 144,000 na̱ kaʼndachíñu xíʼinra chí ndiví (Salmo 2:6; Hebreos 12:22).
Na̱ “ka̱na Ndióxi̱ na̱ nda̱kaxinra” na̱ kaʼndachíñu xíʼin ta̱ Cristo ti̱xin Reino Ndióxi̱ saátu káʼa̱nna xíʼin na̱yóʼo “iin tiʼvi ndikachi” (Apocalipsis 17:14; Lucas 12:32). Ku̱a̱ʼáníva kúú ndikachi sana ta̱ Cristo soo loʼova kúú na̱ ndáka̱xin Ndióxi̱ ku̱ʼu̱n chí ndiví (Juan 10:16).
Ña̱ va̱ása va̱ʼa ndákanixi̱nína xa̱ʼa̱ na̱ ku̱ʼu̱n chí ndiví
Ña̱ kándíxa sava na̱ yiví: Ndiʼi na̱ kéʼé ña̱ va̱ʼa ku̱ʼu̱nna chí ndiví.
Ña̱ nda̱a̱: Nda̱a̱ táki̱ʼva ni̱ka̱ʼa̱n Ndióxi̱, ku̱a̱ʼání na̱ yiví koona nu̱ú ñuʼú yóʼo (Salmo 37:11, 29, 34).
Ta̱ Jesús ka̱chira: “Ni iin ta̱a ta̱ʼán ku̱ʼu̱n chí ndiví” (Juan 3:13). Xíʼin tu̱ʼun yóʼo ni̱na̱ʼa̱ káxira na̱ yiví na̱ ke̱ʼé ña̱ va̱ʼa na̱ xa̱a̱ ni̱xi̱ʼi̱ tá kúma̱níka kixira nu̱ú ñuʼú yóʼo, tá kúú ta̱ Abrahán, ta̱ Moisés, ta̱ Job xíʼin ta̱ David, va̱ása ku̱a̱ʼa̱nna chí ndiví (Hechos 2:29, 34). Saáchi na̱yóʼo xi̱kandíxavana ña̱ ndatakuna ta koona nu̱ú ñuʼú yóʼo (Job 14:13-15).
Na̱ ndataku chí ndiví kúú “na̱ siʼna ndataku” (Apocalipsis 20:6). Ta saátu koo na̱ inka na̱ ndataku, ta nu̱ú ñuʼú yóʼo ndatakuna.
Biblia sánáʼa̱ña Ti̱xin Reino Ndióxi “va̱ása kuvikana” (Apocalipsis 21:3, 4). Ña̱yóʼo káʼa̱nña xa̱ʼa̱ ña̱ koo nu̱ú ñuʼú yóʼo, saáchi chí ndiví kǒo na̱ xíʼi̱.
Ña̱ kándíxa sava na̱ yiví: Iin tá iin na̱ yiví ndaka̱xinna á koona chí ndiví á nu̱ú ñuʼú yóʼo.
Ña̱ nda̱a̱: Mií Ndióxi̱ kúú ta̱ ndaka̱xin ndáana ndásakáʼnu miíra kanara ku̱ʼu̱n chí ndiví (Filipenses 3:14). Ta su̱ví xa̱ʼa̱ ña̱ kúni̱ miína ndakiʼinna ña̱yóʼo (Mateo 20:20-23).
Ña̱ kándíxa sava na̱ yiví: Na̱ ndátu ndakiʼin ña̱ koona ndiʼi tiempo nu̱ú ñuʼú yóʼo su̱ví na̱ ndáyáʼvi kúúna xa̱ʼa̱ ña̱kán va̱ása kivi koona chí ndiví.
Ña̱ nda̱a̱: Na̱ koo ndiʼi tiempo nu̱ú ñuʼú, Ndióxi̱ káʼa̱nra ña̱ kúúna “na̱ ñuura”, “na̱ nda̱kaxinra” xíʼin “na̱ táxi Jehová bendición ndaʼa̱” (Isaías 65:21-23). Ta na̱yóʼo kuumiína iin chiñu ña̱ ndáyáʼviní ña̱ saxínuna ña̱ xi̱kuni̱ Ndióxi̱ tá xa̱ʼa̱: ña̱ koo na̱ yiví na̱ kǒo ku̱a̱chi kúúmií nu̱ú iin ñuʼú ña̱ liviní (Génesis 1:28; Salmo 115:16; Isaías 45:18).
Ña̱ kándíxa sava na̱ yiví: Número 144,000 ña̱ káʼa̱n Apocalipsis xa̱ʼa̱ ña̱ ndána̱ʼa̱ kúúña.
Ña̱ nda̱a̱: Ni íyo número ña̱ ndána̱ʼa̱ nu̱ú libro yóʼo, soo savaña ña̱ ndixa kúúña. Iin ña̱yóʼo kúú “12 saá ki̱vi̱ na̱ 12 apóstol tí ndikachi”. (Apocalipsis 21:14). Ná kotoyó inka ña̱ náʼa̱ número 144,000 ña̱ ndixa kúúña.
Apocalipsis 7:4 káchiña “na̱ ndakiʼin sello: 144,000 kúú na̱ nda̱kiʼinña”, Ta saátu káʼa̱nña xa̱ʼa̱ “ku̱a̱ʼání na̱ yiví, ta nda̱a̱ ni iinna va̱ása kúchiñu kaʼvi ña̱yóʼo”. Ta na̱ yiví ku̱a̱ʼá yóʼo na̱ ka̱ku kúútu na̱yóʼova (Apocalipsis 7:9, 10). Tá número 144,000 ña̱ ndána̱ʼa̱ kuití kúúña ixayo̱ʼvi̱ña xíʼinyó kunda̱a̱-iniyó ña̱ íyo u̱vi̱ grupo na̱ yiví.a
Ta saátu káʼa̱nña na̱ 144,000 Ndióxi̱ sa̱tára na̱yóʼo “ña̱ koona ña̱ʼa ña̱ nu̱ú ña̱ koo kuenta miíra” (Apocalipsis 14:4). Tá káʼa̱nña ña̱ “nu̱ú” ña̱yóʼo náʼa̱ña ña̱ loʼo kuití kúú na̱ ndaka̱xinna. Ña̱yóʼo káxi káʼa̱nña xa̱ʼa̱ na̱ ndaka̱xin Ndióxi̱ na̱ kaʼndachíñu xíʼin ta̱ Cristo chí ndiví ta kaʼndachíñuna nu̱ú na̱ yiví na̱ koo nu̱ú ñuʼú yóʼo (Apocalipsis 5:10).
a Ta̱ profesor Robert Thomas ka̱ʼyíra ña̱yóʼo xa̱ʼa̱ número 144,000 ña̱ va̱xi nu̱ú Apocalipsis 7:4: “Número yóʼo káxi káʼa̱n nda̱saa kúúña, ta su̱ví saá kéʼéna xíʼin ña̱ va̱xi nu̱ú 7:9, chi yóʼo ku̱a̱ʼání na̱ yiví káʼa̱nña xa̱ʼa̱. Tá ná ka̱ʼa̱nyó ña̱ ndána̱ʼa̱ kuití kúúña, va̱ása kunda̱a̱-iniyó nda̱saa número va̱xi nu̱ú libro yóʼo” (Revelation 1-7: An Exegetical Commentary [Comentario exegético de Revelación 1-7], página 474).