¿Ndáaña kúú tu̱ʼun Ndióxi̱? ¿Á kivi ka̱ʼa̱nña xa̱ʼa̱ iin na̱ yiví?

Ña̱ káʼa̱n Biblia xa̱ʼa̱ ña̱yóʼo

Tá káʼa̱n Biblia xa̱ʼa̱ “tu̱ʼun Ndióxi̱”, ña̱ káʼa̱nña xa̱ʼa̱ kúú ndiʼi ña̱ kúni̱ra ná kunda̱a̱-iniyó xa̱ʼa̱ (Lucas 11:28). Tá káʼa̱n Biblia xa̱ʼa̱ “Tu̱ʼun Ndióxi̱” ta saátu xa̱ʼa̱ “ta̱ kúú tu̱ʼun”, na̱ káʼa̱nña xa̱ʼa̱ kúú iin na̱ yiví (Apocalipsis 19:13; Juan 1:14).

Ña̱ káʼa̱n Ndióxi̱. Tá xi̱kaʼa̱n na̱ profeta xa̱ʼa̱ iin ña̱ʼa, xi̱kaʼa̱nna ña̱ kúúña tu̱ʼun Ndióxi̱. Tá kúú, tá xi̱natúʼun ta̱ profeta Jeremías xa̱ʼa̱ iin ña̱ʼa, xi̱kaʼa̱nra: “Ña̱yóʼo kúú ña̱ ni̱ka̱ʼa̱n Jehová xíʼi̱n” (Jeremías 1:4, 11, 13; 2:1). Tá kúma̱níka kunda̱a̱-ini ta̱ Saúl ña̱ nda̱kaxin Ndióxi̱ miíra ña̱ koora rey, ta̱ Samuel ni̱ka̱ʼa̱nra ña̱yóʼo xíʼinra: “Íyo iin ña̱ ni̱ka̱ʼa̱n Ndióxi̱ xíʼi̱n ña̱ xíniñúʼu ka̱ʼi̱n xíʼún” (1 Samuel 9:27).

Iin na̱ yiví. Sava yichi̱ tá káʼa̱n Biblia xa̱ʼa̱ “ta̱ kúú tu̱ʼun”, káʼa̱nña xa̱ʼa̱ ta̱ Jesucristo. Ña̱yóʼo kivi ka̱ʼa̱nña xa̱ʼa̱ra tá ni̱xi̱yora chí ndiví ta saátu tá ki̱xira nu̱ú ñuʼú yóʼo. ¿Nda̱chun va̱ʼa kúnda̱a̱-iniyó ña̱ káʼa̱nña xa̱ʼa̱ ta̱ Jesús? Ná kotoyó sava ña̱ káʼa̱n xa̱ʼa̱ ña̱yóʼo.

• Ta̱ kúú tu̱ʼun kúú ta̱ nu̱ú va̱ʼa i̱xava̱ʼa Ndióxi̱. “Tá xa̱ʼa̱, ta̱ kúú tu̱ʼun xa̱a̱ íyora, [...] ta̱kán ni̱xi̱yora tá xa̱ʼa̱ xíʼin Ndióxi̱” (Juan 1:1, 2). Ta̱ Jesús kúú “ta̱ nu̱ú va̱ʼa na̱kuva̱ʼa nu̱ú ndiʼika ña̱ʼa; [...] ta̱yóʼo kúú ta̱ xa̱a̱ ya̱chi̱ka íyo nu̱ú ndiʼika ña̱ʼa” (Colosenses 1:13-15, 17).

• Ta̱ kúú tu̱ʼun ni̱xa̱a̱ra ndu̱ura iin na̱ yiví ta ni̱xi̱yora nu̱ú ñuʼú yóʼo. Juan 1:14 káchiña: “Ta̱ kúú tu̱ʼun ni̱xa̱a̱ra ndu̱ura iin na̱ yiví ta ni̱xi̱yora xíʼinyó”. Ta̱ Jesucristo “sa̱ndákoora ndiʼi ña̱ xi̱kuumiíra ta ni̱xa̱a̱ra ndu̱ura nda̱a̱ táki̱ʼva íyo na̱ yiví ta ndu̱ura iin esclavo” (Filipenses 2:5-7).

• Ta̱ kúú tu̱ʼun kúúra se̱ʼe Ndióxi̱. Nu̱ú mií versículo ña̱ káʼa̱n ña̱ ni̱xa̱a̱ ta̱ kúú tu̱ʼun ndu̱ura iin na̱ yiví, ta̱ apóstol Juan ni̱ka̱ʼa̱nkara ña̱yóʼo: “Xi̱niyó ndee̱ ña̱ kúúmiíra, nda̱a̱ táki̱ʼva íyo ndee̱ ña̱ táxi ta̱ kúú yivá ndaʼa̱ se̱ʼera ta̱ mitúʼun” (Juan 1:14). Ta suvi mií ta̱ Juan kúú ta̱ ni̱ka̱ʼa̱n ña̱ “kúú ta̱ Jesús se̱ʼe Ndióxi̱” (1 Juan 4:15).

• Ta̱ kúú tu̱ʼun kúúmiíra ña̱ va̱ʼa táʼan ña̱ kúúmií Ndióxi̱. Ña̱ Biblia káʼa̱nña xa̱ʼa̱ ta̱ tu̱ʼun yóʼo ña̱ “xi̱kuura iin ndióxi̱” (Juan 1:1). Ta̱ Jesús “náʼa̱ra ña̱ káʼnu ña̱ kúúmií Ndióxi̱ ta nda̱a̱ táki̱ʼva kéʼé mií Ndióxi̱ saá kéʼéra” (Hebreos 1:2, 3).

• Ta̱ kúú tu̱ʼun kúúra rey. Ña̱ Biblia káʼa̱nña xa̱ʼa̱ ta̱ kúú Tu̱ʼun Ndióxi̱ ña̱ “ndósó ku̱a̱ʼání corona xi̱níra” (Apocalipsis 19:12, 13). Káʼa̱ntuña xa̱ʼa̱ra ña̱ kúúra “Rey nu̱ú na̱ xáʼndachíñu ña̱ kúúna rey, ta kúúra ta̱ xáʼndachíñu nu̱ú nda̱a̱ ndáaka na̱ chíñu” (Apocalipsis 19:16). Ta Biblia káʼa̱ntuña xa̱ʼa̱ ta̱ Jesús ña̱ kúúra “Rey nu̱ú na̱ xáʼndachíñu ña̱ kúúna rey, ta xáʼndachíñura nu̱ú nda̱a̱ ndáaka na̱ chíñu” (1 Timoteo 6:14, 15).

• Ta̱ kúú tu̱ʼun kúú ta̱ níʼi tu̱ʼun Ndióxi̱. Na̱ níʼi tu̱ʼun Ndióxi̱ kúú na̱ xíniñúʼura ña̱ ka̱ʼa̱nna xa̱ʼa̱ ña̱ kúni̱ra xíʼin inkana. Ta ta̱ Jesús va̱ʼaníva ke̱ʼéra chiñu yóʼo. Miíra ni̱ka̱ʼa̱n ña̱yóʼo: “Yivái̱ ta̱ chi̱ndaʼá yi̱ʼi̱ kúú ta̱ ni̱ka̱ʼa̱n xíʼi̱n xa̱ʼa̱ ndáaña xíniñúʼu ka̱ʼi̱n saátu ndáaña xíniñúʼu sanáʼi̱ [...]. Ña̱kán ndiʼi ña̱ káʼi̱n, káʼi̱nña nda̱a̱ táki̱ʼva ni̱ka̱ʼa̱n yivái̱ xíʼi̱n” (Juan 12:49, 50).