¿Nda̱chun xi̱niñúʼu kuvi ta̱ Jesús?
Ña̱ káʼa̱n Biblia xa̱ʼa̱ ña̱yóʼo
Ta̱ Jesús ni̱xi̱ʼi̱ra ña̱ va̱ʼa ixakáʼnu-ini Ndióxi̱ xa̱ʼa̱ ku̱a̱chiyó tasaá ni̱ʼíyó ña̱ kutakuyó ndiʼi tiempo (Romanos 6:23; Efesios 1:7). Saátu xa̱ʼa̱ ña̱ nda̱kú ni̱xi̱yo ini ta̱ Jesús tá ni̱xi̱ʼi̱ra, ni̱na̱ʼa̱ra ña̱ saátu kivi nda̱kú koo iniyó xíʼin Ndióxi̱ ni yáʼayó nu̱ú tu̱ndóʼo (Hebreos 4:15).
¿Nda̱chun ndákiʼinyó ña̱ va̱ʼa xa̱ʼa̱ ña̱ ni̱xi̱ʼi̱ iin ta̱a kuití xa̱ʼa̱yó? Ná kotoyó.
Ta̱ Jesús ni̱xi̱ʼi̱ra xa̱ʼa̱yó “ña̱ va̱ʼa ndoo ku̱a̱chiyó” (Colosenses 1:14).
Ta̱ Adán kúú ta̱ nu̱ú i̱xava̱ʼa Ndióxi̱ ta va̱ása níxi̱kuumiíra ku̱a̱chi. Soo kǒo níxiinra kuniso̱ʼora ña̱ ni̱ka̱ʼa̱n Ndióxi̱ ta ni̱ki̱ʼvira ku̱a̱chi. Xa̱ʼa̱ ña̱kán na̱ se̱ʼera kúú xo̱ʼvi̱ xa̱ʼa̱ ña̱yóʼo. Biblia káʼa̱nña xíʼinyó ña̱ xa̱ʼa̱ ku̱a̱chi iin ta̱a, ku̱a̱ʼánína ni̱xa̱a̱na ndu̱una na̱ yiví ku̱a̱chi (Romanos 5:19).
Su̱ví ta̱ yiví ku̱a̱chi níxi̱kuu ta̱ Jesús ta va̱ása níki̱ʼvira ku̱a̱chi. Xa̱ʼa̱ ña̱kán kúú ña̱ ni̱so̱kóra miíra xa̱ʼa̱ ku̱a̱chiyó (1 Juan 2:2). Xa̱ʼa̱ ña̱ i̱xaso̱ʼo ta̱ Adán sa̱kíʼvira ku̱a̱chi ndiʼi na̱ yiví. Soo xa̱ʼa̱ ña̱ ni̱xi̱ʼi̱ ta̱ Jesús ndiʼi na̱ kándíxa miíra kivi ndoo ku̱a̱china.
Nda̱a̱ táki̱ʼva ni̱xi̱yo ta̱ ni̱xi̱íko miíyó ndaʼa̱ ku̱a̱chi saá ni̱xi̱yo ta Adán, soo nda̱a̱ táki̱ʼva ni̱xi̱yo ta̱ nda̱satá miíyó saá ni̱xi̱yo ta̱ Jesús chi ni̱xi̱ʼi̱ra xa̱ʼa̱yó. Ña̱kán, tá iinyó “ni̱ki̱ʼvi ku̱a̱chi, íyo iin ta̱ chíndeétáʼan xíʼinyó ta íyora xíʼin yiváyó: ta̱yóʼo kúú ta̱ Jesucristo ta̱ nda̱kúní-ini” (1 Juan 2:1).
Ta̱ Jesús ni̱xi̱ʼi̱ra “tasaá ndiʼi na̱ kándíxa miíra va̱ása ndiʼi-xa̱ʼa̱na chi kutakuna ndiʼi tiempo” (Juan 3:16).
Ndióxi̱ i̱xava̱ʼara ta̱ Adán ña̱ va̱ʼa kutakura ndiʼi tiempo soo tá ni̱ki̱ʼvira ku̱a̱chi, Ndióxi̱ ni̱ka̱ʼa̱nra xíʼinra ña̱ kuvira. Xa̱ʼa̱ ña̱ ni̱ki̱ʼvi ta̱ Adán ku̱a̱chi kúú ña̱ “ni̱ki̱ʼvi ku̱a̱chi ñuyǐví yóʼo ta xa̱ʼa̱ ku̱a̱chi yóʼo kúú ña̱ xíʼi̱yó, tasaá kúú ña̱ ki̱xáʼa xíʼi̱ ndiʼi na̱ yiví chi ndiʼina ni̱ki̱ʼvi ku̱a̱chi” (Romanos 5:12).
Soo xa̱ʼa̱ ña̱ ni̱xi̱ʼi̱ ta̱ Jesús ndiʼi na̱ kándíxa miíra kivi ndoo ku̱a̱china ta va̱ása kuvina. Biblia káchiña ña̱ “nda̱a̱ táki̱ʼva ki̱xáʼa ku̱a̱chi xáʼndachíñuña ta saátu ña̱ xíʼi̱yó, saátu ña̱ va̱ʼa-ini Ndióxi̱ xáʼndachíñuña ña̱ va̱ʼa ná xa̱a̱ na̱ yiví nduuna na̱ kǒo ku̱a̱chi nu̱ú Ndióxi̱. Ta xa̱ʼa̱ ña̱yóʼo kúú ña̱ ndakiʼinna ña̱ kutakuna ndiʼi tiempo tíxa̱ʼvi tátayó Jesucristo” (Romanos 5:21).
Ña̱ nda̱a̱ kúúña, kǒo na̱ táku ndiʼi tiempo vitin. Soo Ndióxi̱ káʼa̱nra ña̱ taxira ña̱ kutaku na̱ yiví na̱ kéʼé ña̱ va̱ʼa ndiʼi tiempo. Saátu sandátaku Ndióxi̱ na̱ ni̱xi̱ʼi̱ tasaá ni̱ʼína ña̱ va̱ʼa xa̱ʼa̱ ña̱ ni̱xi̱ʼi̱ ta̱ Jesús (Salmo 37:29; 1 Corintios 15:22).
Xa̱ʼa̱ ña̱ va̱ʼaní ka̱ndíxa ta̱ Jesús Ndióxi̱, ni̱na̱ʼa̱ra ña̱ kivi nda̱kú koo ini na̱ yiví xíʼin Ndióxi̱ ni yáʼana nu̱ú tu̱ndóʼo (Filipenses 2:8).
Xa̱ʼa̱ ña̱ kǒo níxi̱kuumií ta̱ Adán ku̱a̱chi kǒo níxi̱kuumiíra kue̱ʼe̱ ta viíní xi̱ndakanixi̱níra. Soo ta̱ Adán xi̱kuni̱ra kuumiíra ña̱ kǒo níxiniñúʼu kuumiíra ta i̱xaso̱ʼora nu̱ú Ndióxi̱ (Génesis 2:16, 17; 3:6). Tá ni̱ya̱ʼa tiempo, ta̱ Ndi̱va̱ʼa ta̱ sáa̱ní-ini xíni Ndióxi̱, ni̱ka̱ʼa̱nra ña̱ nda̱a̱ ni iin na̱ yiví va̱ása xa̱a̱na kandíxana ña̱ káʼa̱n Ndióxi̱ tá kǒo táxira ña̱ va̱ʼa ndaʼa̱na, ta ni̱ka̱ʼa̱ntura ña̱ va̱ása nda̱kú koo inina xíʼin Ndióxi̱ tá xíniñúʼu kuvina (Job 2:4). Soo ni kǒo ku̱a̱chi níxi̱kuumií ta̱ Jesús, ndiʼi tiempo xi̱niso̱ʼora ña̱ ni̱ka̱ʼa̱n Ndióxi̱ xíʼinra ta nda̱kú ni̱xi̱yo inira xíʼinra ni xi̱niñúʼu xo̱ʼvi̱níra, kukaʼan nu̱úra ta kuvira (Hebreos 7:26). Xíʼin ña̱yóʼo ni̱na̱ʼa̱ra ña̱ kivi nda̱kú koo ini iin na̱ yiví xíʼin Ndióxi̱ ni ná ya̱ʼana nu̱ú tu̱ndóʼo.
Ña̱ ndáka̱tu̱ʼún savana xa̱ʼa̱ ña̱ ni̱xi̱ʼi̱ ta̱ Jesús
¿Nda̱chun xi̱niñúʼu xo̱ʼvi̱ ta̱ Jesús ta kuvira ña̱ va̱ʼa sakǎkura na̱ yiví? ¿Nda̱chun ta̱xi Ndióxi̱ ña̱ kundoʼora ña̱yóʼo?
Tu̱ʼun Ndióxi̱ káchiña: “Saáchi ña̱ cháʼviyó xa̱ʼa̱ ku̱a̱chi kúú ña̱ xíʼi̱yó” (Romanos 6:23). Xi̱kunda̱a̱va-ini ta̱ Adán xa̱ʼa̱ ña̱yóʼo chi káxiní ni̱ka̱ʼa̱n Ndióxi̱ xíʼinra xa̱ʼa̱ña (Génesis 3:3). Xa̱ʼa̱ ña̱kán tá ni̱ki̱ʼvi ta̱ Adán ku̱a̱chi sa̱xínuva Ndióxi̱ ña̱ ni̱ka̱ʼa̱nra xíʼinra (Tito 1:2). Ta nda̱a̱ na̱ se̱ʼe ta̱ Adán ndu̱una na̱ ku̱a̱chi ta xíʼi̱na.
Ni xíniñúʼu kuviva na̱ yiví xa̱ʼa̱ ña̱ kúúna na̱ yiví ku̱a̱chi, soo Ndióxi̱ ni̱na̱ʼa̱ra ña̱ va̱ʼaní-inira xíʼinna (Efesios 1:7). Ta xa̱ʼa̱ ña̱ chi̱ndaʼára se̱ʼera ña̱ kuvira xa̱ʼa̱ na̱ yiví ta sakǎkurana, ni̱na̱ʼa̱ra ña̱ nda̱kúní íyo ña̱ kéʼéra ta va̱ʼaní-inira.
¿Ama ni̱xi̱ʼi̱ ta̱ Jesús?
Tu̱ʼun Ndióxi̱ káʼa̱nña ña̱ ni̱xi̱ʼi̱ ta̱ Jesús “ki̱ʼva ka̱a u̱ni̱ xi̱kuaá” tá ni̱xi̱yo vikó ña̱ Pascua ña̱ xi̱keʼé na̱ judío (Marcos 15:33-37). Tá ná kotoyó calendario ña̱ xíniñúʼuyó vitin, kunda̱a̱-iniyó ña̱ ni̱xi̱ʼi̱ra 1 tí abril ña̱ ku̱i̱ya̱ 33 tiempo vitin.
¿Míí ni̱xi̱ʼi̱ ta̱ Jesús?
Xa̱ʼnína ta̱ Jesús “chí nu̱ú naní Leke xi̱ní, ta tu̱ʼun hebreo naníña Gólgota” (Juan 19:17, 18). Tá tiempo ña̱ ni̱xi̱yo ta̱ Jesús, lugar yóʼo xi̱ndikaa̱ña chí sa̱tá nama̱ ñuu Jerusalén (Hebreos 13:12). Sana nu̱ú iin xi̱kí xi̱ndikaa̱ lugar yóʼo saáchi Biblia káchiña ña̱ tá xa̱ʼnína ta̱ Jesús nda̱a̱ xíká xi̱ni savana ña̱yóʼo (Marcos 15:40). Tiempo vitin nda̱a̱ ni iinna kǒo kúnda̱a̱ káxi inina míí kíndo̱o lugar yóʼo.
¿Ndáa ki̱ʼva ni̱xi̱ʼi̱ ta̱ Jesús?
Ku̱a̱ʼánína káchiña ña̱ ni̱xi̱ʼi̱ ta̱ Jesús ndaʼa̱ iin cruz, soo Biblia káʼa̱nña ña̱ “xi̱tikaara ndaʼa̱ yitu̱n ña̱ va̱ʼa ndatavára miíyó ndaʼa̱ ku̱a̱chiyó” (1 Pedro 2:24). Na̱ ka̱ʼyi Biblia xi̱niñúʼuna u̱vi̱ tu̱ʼun griego ña̱ va̱ʼa ka̱ʼa̱nna xa̱ʼa̱ yitu̱n yóʼo: staurós xíʼin xýlon. Ku̱a̱ʼání na̱ xíni̱va̱ʼa káʼa̱nna ña̱ tu̱ʼun yóʼo káʼa̱nña xa̱ʼa̱ iin yitu̱n á poste tú níndichi ta va̱ása káʼa̱nña xa̱ʼa̱ u̱vi̱ yitu̱n tú kúu iin cruz.
¿Ndáa ki̱ʼva xíniñúʼu ndakaʼányó xa̱ʼa̱ ña̱ ni̱xi̱ʼi̱ ta̱ Jesús?
Tá ni̱xi̱yo vikó ña̱ Pascua ña̱ xi̱keʼé na̱ judío ku̱i̱ya̱ tá ku̱i̱ya̱, ta̱ Jesús nda̱takara xíʼin na̱ discípulora tá ñuú, tasaá chi̱ndúʼúra xa̱ʼa̱ ki̱ʼva ña̱ xíniñúʼu ndakaʼánna xa̱ʼa̱ ña̱ ni̱xi̱ʼi̱ra. Ta xa̱ʼndara chiñu yóʼo nu̱úna: “Kǒo sandákoondó keʼéndó ña̱yóʼo” ña̱ va̱ʼa na̱ʼa̱ndó ña̱ ndákaʼánndó xa̱ʼíi̱ (1 Corintios 11:24). Tá ni̱ya̱ʼa loʼo hora, xa̱ʼnína ta̱ Jesús.
Na̱ ka̱ʼyi Biblia ni̱ka̱ʼa̱nna ña̱ nda̱a̱ táki̱ʼva íyo iin ndikachi loʼo tí xi̱xaʼnína tá xi̱xiyo vikó ña̱ Pascua saá ni̱xi̱yo ta̱ Jesús (1 Corintios 5:7). Vikó ña̱ Pascua xi̱sandákaʼánña na̱ ñuu Israel ña̱ ni̱sa̱ñána ndaʼa̱ na̱ xi̱saxóʼvi̱ miína. Ta ki̱ʼva saátu tá ndákaʼán na̱ cristiano xa̱ʼa̱ ña̱ ni̱xi̱ʼi̱ ta̱ Jesucristo, ndákaʼánna ña̱ ni̱sa̱ñána ndaʼa̱ ku̱a̱chi ta va̱ása kuvikana. Iin yichi̱ nu̱ú ku̱i̱ya̱ xi̱keʼé na̱ judío vikó ña̱ Pascua ta xi̱keʼénaña 14 tí yo̱o̱ nisán, ta saátu na̱ cristiano na̱ ni̱xi̱yo tá siglo nu̱ú xi̱ndakaʼánna xa̱ʼa̱ ña̱ ni̱xi̱ʼi̱ ta̱ Jesús iin yichi̱ nu̱ú ku̱i̱ya̱.
Tiempo vitin ku̱a̱ʼání na̱ yiví na̱ ndóo iníísaá ñuyǐví ndákaʼánna xa̱ʼa̱ ña̱ ni̱xi̱ʼi̱ ta̱ Jesús mií ki̱vi̱ ña̱ ndákava 14 tí yo̱o̱ nisán.