Noticia ña̱ chíkaa̱ ndee̱ xíʼin na̱ hermano

Miíyó na̱ testigo Jehová ndíʼi̱ní-iniyó xa̱ʼa̱ na̱ hermanoyó (1 Pedro 2:17). Ku̱a̱ʼání miíyó ndákanixi̱níyó nda̱a̱ táki̱ʼva ndákanixi̱ní ñá Tannis, iin ñá hermana ñá íyo chí Kenia. Ñáyóʼo káchiñá: “Kúsi̱íní-inii̱ tá kúnda̱a̱-inii̱ xa̱ʼa̱ ña̱ kéʼé na̱ hermano na̱ íyo iníísaá ñuyǐví”. ¿Ndáa ki̱ʼva kúnda̱a̱-ini miíyó na̱ testigo Jehová xa̱ʼa̱ ña̱ ndóʼo inka na̱ hermano? Va̱ʼa kúnda̱a̱-iniyó xa̱ʼa̱ ña̱yóʼo nu̱ú iin táʼví ña̱ naní “Noticia” ña̱ va̱xi nu̱ú jw.org ña̱ ka̱na ku̱i̱ya̱ 2013.

Ti̱xin táʼví yóʼo va̱xi noticia ña̱ nda̱a̱, ña̱ káʼa̱n xa̱ʼa̱ construcción, xa̱ʼa̱ ña̱ chíndeétáʼanna xíʼin na̱ hermano tá kúú tu̱ndóʼo xíʼin xa̱ʼa̱ inkaka ña̱ʼa ña̱ ndáyáʼvi, tá kúú ña̱ káʼa̱n xa̱ʼa̱ ña̱ kána iin Biblia xa̱á. Saátu káʼa̱nña xa̱ʼa̱ na̱ hermano na̱ ñúʼu veʼeka̱a xa̱ʼa̱ ña̱ ndásakáʼnuna Jehová. Yóʼotu kána ña̱ káʼa̱n xa̱ʼa̱ campaña ña̱ predicación xíʼin xa̱ʼa̱ ña̱ Conmemoración. Soo, ¿ndáana kéʼé chiñu yóʼo? ¿Ndáana nándukú xa̱ʼa̱ña ta ndáa ki̱ʼva íxatu̱ʼvanaña?

Na̱ kéʼé chiñu yóʼo

Na̱ káchíñu Oficina de Información Pública kúú na̱ kéʼé chiñu yóʼo. Na̱yóʼo íyona chí sede mundial ta na̱ kíʼin kuenta xíʼinna kúú na̱ Comité de Coordinadores del Cuerpo Gobernante. Ta yáʼaka 100 na̱ hermano xíʼin ná hermana chíndeétáʼan xíʼinna, ta ku̱a̱ʼánína nda̱a̱ veʼena ndóona káchíñuna. Chiñu ña̱ kéʼé na̱ hermano yóʼo kúú ña̱ káʼyina noticia yóʼo, nándukú va̱ʼana xa̱ʼa̱ña, sándaya̱ʼanaña inka tu̱ʼun ta ndáka̱xinna na̱ʼná á inkaka ña̱ʼa ña̱ kuniñúʼuna xíʼinña. Saátu xáʼa̱nna nu̱ú na̱ chíñu, nu̱ú na̱ tává noticia xíʼin na̱ maestro na̱ sánáʼa̱ universidad. Yáʼaka 80 sección ña̱ kúúmií ña̱ Información Pública ña̱ íyo ndiʼi sucursal ña̱ íyo iníísaá ñuyǐví chíndeétáʼan xíʼin departamento yóʼo.

Na̱ káchíñu Oficina de Información Pública inkáchi káchíñuna xíʼin ndiʼika na̱ káchíñu xíʼin ña̱ Información Pública ña̱ va̱ʼa ixatu̱ʼvana iin noticia. Tá kúnda̱a̱-ini na̱ hermano yóʼo xa̱ʼa̱ iin historia ña̱ kivi koo iin noticia, nándukú va̱ʼana xa̱ʼa̱ña ña̱ va̱ʼa kanaña. Ta ña̱ va̱ʼa keʼéna ña̱yóʼo, sana xíniñúʼu keʼéna entrevista á nda̱ka̱tu̱ʼunna iin na̱ xíni̱va̱ʼa. Tá xa̱a̱ kúúmiína ndiʼi ña̱ káʼa̱n xa̱ʼa̱ña, káʼyina ña̱ artículo yóʼo ta ndásaviínaña ña̱ va̱ʼa kanaña. Tándi̱ʼi, táanna na̱ʼná nu̱úña ta chíndaʼánaña ndaʼa̱ na̱ Comité de Coordinadores ña̱ va̱ʼa ná kotona á va̱ʼa íyoña.

Táxina tíxa̱ʼvi

¿Ndáaña ndákanixi̱ní na̱ hermanoyó xa̱ʼa̱ táʼví ña̱ naní “Noticia”? Iin ñá hermana ñá íyo chí Filipinas ñá naní Cheryl káchiñá: “Tá ndáko̱i̱, kútóoníi̱ kaʼvii̱ noticia ña̱ káʼa̱n xa̱ʼa̱ na̱ ñuu Ndióxi̱ xíʼin ña̱ káʼa̱n xa̱ʼa̱ na̱ hermano”.

Ku̱a̱ʼánína kútóona kaʼvina noticia ña̱ kána nu̱ú jw.org saáchi síínní íyoña nu̱ú ña̱ tává inkaka na̱ yiví. Ñá Tatiana ñá íyo chí Kazajistán káʼa̱nñá ña̱yóʼo: “Kútóoníi̱ noticia ña̱ va̱xi nu̱ú jw.org saáchi nina ña̱ nda̱a̱ káʼa̱nña xa̱ʼa̱”. Iin ñá hermana ñá naní Alma ñá íyo chí México káʼa̱nñá: “Na̱ yiví na̱ tává noticia nina ña̱ vatáva kúú ña̱ káʼa̱nna xa̱ʼa̱, soo noticia ña̱ kána nu̱ú sitio ña̱ kúúmiíyó va̱ʼaní chíkaa̱ña ndee̱ xíʼinyó”.

Noticia ña̱ kána nu̱ú sitio ña̱ kúúmiíyó va̱ʼaní chíndeétáʼanña xíʼin na̱ hermano ña̱ kandíxakana Ndióxi̱. Ta̱ Bernard ta̱ íyo chí Kenia káchira: “Noticia yóʼo va̱ʼaní chíndeétáʼanña xíʼi̱n chi túvii̱ ña̱ nda̱a̱ táki̱ʼva íyo na̱ veʼi̱ saá íyo ndiʼi na̱ hermano na̱ íyo iníísaá ñuyǐví. Tá kéʼíi̱ oración nu̱ú Jehová, va̱ʼa káʼi̱n ki̱vi̱na xíʼinra ta saátu káʼi̱n xíʼinra xa̱ʼa̱ tu̱ndóʼo ña̱ yáʼana nu̱ú”. Iin ñá hermana ñá naní Bybron ñá íyo chí Kenia káchiñá: “Kúsi̱íní-inii̱ tá xítoi̱ ña̱ kána iin artículo ña̱ káʼa̱n xa̱ʼa̱ iin Biblia ña̱ sa̱kán ka̱na, chi ña̱yóʼo sándakaʼánña yi̱ʼi̱ ña̱ kúʼvi̱ní-ini Jehová xínira ndiʼiyó”.

Nda̱a̱ noticia ña̱ káʼa̱n xa̱ʼa̱ na̱ hermano na̱ íxandi̱va̱ʼa na̱ chíñu xíʼin xa̱ʼa̱ ña̱ ndásakáʼnuna Jehová kivi chikaa̱ña ndee̱ xíʼinyó. Ña̱yóʼo kúú ña̱ káʼa̱n inka ñá hermana ñá íyo chí Kenia ñá naní Jackline: “Tá ndákanixi̱níi̱ xa̱ʼa̱ ña̱ ndakúní-ini na̱ hermano yóʼo, va̱ʼaní chíkaa̱ña ndee̱ xíʼi̱n ña̱ kandíxakai̱ Ndióxi̱. Chíka̱i̱ ndee̱ ña̱ ndakanixi̱níi̱ ndáaña kúú ña̱ chi̱ndeétáʼan xíʼin na̱ hermano yóʼo ña̱ ndakú koo inina. Ta kíʼi̱n kuenta ña̱ va̱ʼaníka chíndeétáʼan xíʼinna kúú oración, ña̱ káʼvina Biblia xíʼin ña̱ xítana”.

Iin ñá hermana ñá íyo chí Costa Rica ñá naní Beatriz táxiníñá tíxa̱ʼvi xa̱ʼa̱ ña̱ kána noticia ña̱ káʼa̱n xa̱ʼa̱ ña̱ ndeéní kúún sa̱vi̱ á xa̱ʼa̱ inkaka tu̱ndóʼo. Ña̱yóʼo kúú ña̱ káʼa̱nñá: “Ndákanda̱ní-inii̱ xíʼin ña̱ kéʼé na̱ ñuu Ndióxi̱ chi kamaní chíndeétáʼanna xíʼin na̱ yáʼa nu̱ú tu̱ndóʼo. Va̱ʼaní kéʼéna chiñu yóʼo ta náʼa̱na ña̱ kúʼvi̱ní-inina xínina na̱ hermano. Ña̱yóʼo náʼa̱ña nu̱úi̱ ña̱ ndíka̱i̱ ti̱xin ñuu Jehová”.

Kúsi̱íní-iniyó xa̱ʼa̱ ndiʼi noticia ña̱ kána nu̱ú sitio ña̱ kúúmiíyó. Xa̱ʼa̱ ña̱ kána ña̱yóʼo va̱ʼa kúnda̱a̱-iniyó xa̱ʼa̱ ña̱ ndóʼo na̱ hermanoyó na̱ íyo iníísaá ñuyǐví. Ta va̱ʼa kána ndiʼi ña̱yóʼo xa̱ʼa̱ donación ña̱ táxi iin tá iinndó, ta ku̱a̱ʼáníndó táxindó ña̱yóʼo chí nu̱ú donate.jw.org. Tíxa̱ʼviníndó xa̱ʼa̱ ña̱ va̱ʼaní-inindó.