Chi̱ndeétáʼanndi̱ xíʼin na̱ hermano ku̱i̱ya̱ 2021

Tá ku̱i̱ya̱ ña̱ servicio 2021,a ndeéní xi̱ndikaa̱ pandemia ña̱ COVID-19 iníísaá ñuyǐví. Nda̱a̱ táki̱ʼva xa̱a̱ ku̱nda̱a̱-iniyó nu̱ú artículo ña̱ naní “Chiñu ña̱ kéʼéna xa̱ʼa̱ ña̱ ndíkaa̱ kue̱ʼe̱ ña̱ COVID-19”, xa̱a̱ ku̱a̱ʼání millón ña̱ dólarb xíniñúʼuyó ña̱ chindeétáʼanyó xíʼin na̱ hermano, ta ki̱ʼva 950 na̱ Comité ña̱ Socorro ku̱vaʼa.

Xa̱a̱ ku̱a̱ʼání na̱ yiví xi̱xoʼvi̱ xa̱ʼa̱ ña̱ xi̱ndikaa̱ pandemia yóʼo, soo saátu ni̱xi̱yo inkaka desastre natural, tá kúú ña̱ kininí xi̱kuun sa̱ví á saátu xa̱ʼa̱ inkaka ña̱ʼa ña̱ xi̱keʼé na̱ yiví, ta nda̱a̱ na̱ hermanoyó xi̱xoʼvi̱ xa̱ʼa̱ ña̱yóʼo. Ña̱kán, na̱ Comité ña̱ Coordinadores na̱ Cuerpo Gobernante ni̱ka̱ʼa̱nna ña̱ taxina xu̱ʼún ña̱ va̱ʼa chindeétáʼanna xíʼin na̱ hermano xa̱ʼa̱ ña̱ ndeéní xi̱ndikaa̱ pandemia, soo saátu ni̱ka̱ʼa̱nna ña̱ taxina 8 millón ña̱ dólar ña̱ va̱ʼa chindeétáʼanna xíʼin na̱ hermano na̱ xi̱yaʼa nu̱ú yáʼaka 200 desastre natural. Ná kotoyó ndáa ki̱ʼva xi̱niñúʼuna xu̱ʼún ña̱ ta̱xindó ña̱ va̱ʼa chindeétáʼanna xíʼin na̱ hermano.

Ka̱ʼndi̱ volcán Nyiragongo

Tá 22 tí mayo ña̱ ku̱i̱ya̱ 2021, ña̱ volcán Nyiragongo, ña̱ ndíkaa̱ chí República Democrática del Congo ka̱ʼndi̱ña. Xa̱ʼa̱ ña̱yóʼo, ñuʼu̱ ña̱ ta̱váña sa̱ndíʼi-xa̱ʼa̱ña veʼe, escuela xíʼin nu̱ú ndíkaa̱ ti̱kui̱í, saátu ku̱a̱ʼání ki̱vi̱ ña̱ volcán yóʼo ta̱váña ña̱ʼa ña̱ xi̱tavá ku̱e̱ʼe xíʼin na̱ yiví, ta ni̱ko̱yoña ñuu Goma ta saátu ku̱a̱ʼání yichi̱ ni̱ta̱an. Ku̱a̱ʼání na̱ yiví na̱ xi̱ndoo ñuu yóʼo sa̱ndákoona veʼena, savana nda̱kiʼinna ku̱a̱ʼa̱nna chí ñuu Ruanda.

Yáʼaka 5,000 kúú na̱ testigo Jehová na̱ sa̱ndákoo veʼena ta nda̱kiʼinna ku̱a̱ʼa̱nna inka ñuu. Savana ndi̱ʼi-xa̱ʼa̱ veʼena xa̱ʼa̱ ña̱ ka̱ʼndi̱ volcán yóʼo, ta inkatuna tá xa̱a̱ ku̱a̱ʼa̱nna ni̱ki̱ʼvi na̱ kui̱ʼná veʼena ta nda̱kiʼinna ndiʼi ña̱ʼa ña̱ xi̱kuumiína. Na̱ Comité ña̱ Socorro na̱ ni̱xi̱yo chí Ruanda xíʼin República Democrática del Congo inkáchi ki̱táʼanna ke̱ʼéna sava ña̱ʼa. Na̱ íyo chí sucursal ña̱ Congo káʼa̱nna xíʼinyó ndáaña kúú ña̱ ke̱ʼé iin na̱ Comité yóʼo: “Tá kúma̱níka ka̱ʼa̱n na̱ chíñu xíʼin na̱ yiví ña̱ keena ñuu yóʼo, na̱ Comité ki̱xáʼana ndáxaxana ña̱ kuxu na̱ hermano, ti̱kui̱í koʼona, manta, sábana xíʼin ti̱ko̱to̱ ña̱ kundixina. Ke̱ʼéna ndiʼi ña̱yóʼo ni i̱yoní kundoʼona iin ña̱ va̱ása va̱ʼa”. Iin ñuu nu̱ú ni̱xa̱a̱ yáʼaka 2,000 na̱ hermano, na̱ Comité ña̱ Socorro i̱xava̱ʼana veʼe válí ña̱ tela ña̱ va̱ʼa kundoo na̱ hermano yóʼo, ta̱xituna cubreboca ndaʼa̱na ta ni̱ka̱ʼa̱nna xíʼinna ndáaña kivi keʼéna tasaá kǒo kiʼinna ña̱ COVID-19 xíʼin cólera.

Tá ni̱ya̱ʼa u̱ni̱ yo̱o̱ na̱ hermanoyó nda̱xaxana yáʼaka 6 tonelada arroz, 6 tonelada nu̱ní, yáʼaka 8,000 litro aceite ña̱ ixava̱ʼana ña̱ kuxuna, xíʼin yáʼaka 8,000 litro ti̱kui̱í koʼona. Ña̱ va̱ʼa kǒo kuniñúʼuna ku̱a̱ʼání xu̱ʼún, na̱ sucursal sa̱tána ndiʼi ña̱ʼa yóʼo mií ñuu kán, nu̱úka ña̱ satánaña inka ñuu.

Iin ñá hermana káʼa̱nñá: “Ndeéní xi̱xoʼvi̱ndi̱”. Ña̱ xa̱á xi̱kuu veʼeñá, soo xa̱ʼa̱ ña̱ ka̱ʼndi̱ volcán ndi̱ʼi-xa̱ʼa̱ña, tándi̱ʼi ni̱xa̱ʼa̱n na̱ hermano chi̱ndeétáʼanna xíʼinñá ta sa̱ndíkona-iniñá. Vitin, ñáyóʼo káchiñá: “Tíxa̱ʼvi Jehová kúúmiíndi̱ ndiʼi ña̱ xíniñúʼundi̱. Kíʼinndi̱ kuenta ndáa ki̱ʼva kúú ña̱ nda̱kiʼin Jehová ndiʼi ña̱ sándi̱ʼi-inindi̱ tasaá kǒo xóʼvi̱níkandi̱”.

Kǒo xu̱ʼún ñuu Venezuela

Xa̱a̱ ku̱a̱ʼání ku̱i̱ya̱ ndóʼo-ini na̱ yiví na̱ ndóo ñuu Venezuela saáchi kǒo xu̱ʼún ñuu yóʼo, ña̱kán nda̱aní ya̱ʼvi ña̱ʼa ta íyonítu na̱ kui̱ʼná. Xa̱ʼa̱ ña̱yóʼo, xóʼvi̱ní na̱ hermanoyó soo na̱ ñuu Jehová chíndeétáʼanvana xíʼinna.

Ku̱i̱ya̱ ña̱ servicio ña̱ ni̱ya̱ʼa, yáʼaka iin millón sava dólar xi̱niñúʼuna ña̱ va̱ʼa satána ña̱ʼa ña̱ kuxuna xíʼin na̱ma̱ ta ta̱xinaña ndaʼa̱ na̱ xíniñúʼukaña. Na̱ sucursal ña̱ Venezuela káʼa̱nna: “Íxayo̱ʼvi̱níña xíʼinndi̱ ku̱ʼu̱nndi̱ ndakandi̱ yáʼaka 130 tonelada ña̱ kuxu na̱ hermano nda̱a̱ ñuu válí nu̱ú ndóona”. Na̱ hermano sátana sava ña̱ʼa ña̱ kǒo kama ndíʼi-xa̱ʼa̱ ña̱ chindaʼána ndaʼa̱ na̱ hermano. Na̱ sucursal yóʼo káʼa̱nkana: “Ku̱a̱ʼání ña̱ʼa sátandi̱ña tá xa̱a̱ núu ya̱ʼviña, tándi̱ʼi ndúkundi̱ na̱ loʼoka xu̱ʼún kíʼin ndaʼa̱ndi̱ ña̱ va̱ʼa ku̱ʼu̱nna ndakanaña ndaʼa̱ na̱ hermano”.

Ta̱ Leonel ndíkaa̱ra xíʼin na̱ Comité ña̱ Socorro ñuu Venezuela, ta kútóoníra chiñu ña̱ kéʼéra. Ta̱yóʼo káchira: “Kúsi̱íní-inii̱ ña̱ chíndeétáʼi̱n xíʼin na̱ hermano. Ñá síʼíi̱ ni̱xi̱ʼi̱ñá xíʼin ña̱ COVID-19, ña̱kán va̱ʼaníka kúnii̱ tá chíndeétáʼi̱n xíʼin na̱ hermano. Xa̱a̱ xítoi̱ ndáa ki̱ʼva kúú ña̱ sáxi̱nu Jehová ña̱ káʼa̱nra ña̱ kǒo sándakoondaʼa̱ra na̱ ñuura”.

Kotondó ndáaña káʼa̱n iin ta̱ hermano ta̱ xi̱ndikaa̱ xíʼin na̱ Comité ña̱ Socorro tá ya̱chi̱: “Vitin, yi̱ʼi̱ kúú ta̱ xi̱xiniñúʼu ña̱ chindeétáʼanna xíʼi̱n. Su̱ví ña̱ʼa ña̱ kuniñúʼu kuitíndi̱ nítaxina ndaʼa̱ndi̱ chi saátu na̱ hermano kán chi̱ndeétáʼanna xíʼin ñá síʼíi̱ ta saátu xíʼin miíi̱ ña̱ kǒo ndi̱ʼiní-inindi̱, sa̱ndíkona-inindi̱, xi̱ndaana ndi̱ʼi̱ ta chi̱kaa̱nína ndee̱ xíʼinndi̱”.

Sava tu̱ndóʼo kamaní kúúña, soo nisaá na̱ ñuu Jehová ndúkúna ña̱ʼa ña̱ xíniñúʼu na̱ hermano ta kama ndáxaxanaña. Ndiʼi ña̱yóʼo va̱ʼa kéʼénaña chi xíniñúʼuna donación ña̱ táxindó, tíxa̱ʼviníndó xa̱ʼa̱ ña̱yóʼo. Nu̱ú donate.jw.org kunda̱a̱-inindó ndáa ki̱ʼva taxindó donación. Tíxa̱ʼviníndó xa̱ʼa̱ ña̱ va̱ʼaní-inindó.