Carro válí tú xíniñúʼuyó ña̱ natúʼunyó xíʼin na̱ yiví xa̱ʼa̱ Ndióxi̱

Xa̱a̱ yáʼaka u̱xu̱ ku̱i̱ya̱ ki̱xáʼayó xíniñúʼuyó tú carro válí ña̱ natúʼunyó xíʼin na̱ yiví xa̱ʼa̱ Ndióxi̱. Ndiʼi na̱ yiví xíto tú carro válí yóʼo tá ndítanú chí calle. Tá xa̱a̱ kánindichiyó iin tú carro loʼo yóʼo chí calle, ndiʼi na̱ yiví xítona miíyó ta xa̱a̱ kúnda̱a̱-inina ndáana kúúyó. Liviníva tú carro válí yóʼo ta saátu va̱ása yo̱ʼvi̱ kuniñúʼuyónú. Iin ñá hermana ñá íyo chí Polonia ñá naní Asenata káchiñá: “Kǒo ku̱a̱ʼáníví ña̱ʼa kúúmií tú carro válí yóʼo, soo liviníva náʼa̱nú. Ta saátu va̱ása íxayo̱ʼvi̱ña xíʼinyó ña̱ kanindichiyónú calle ni ña̱ kuniʼiyónú ku̱ʼu̱nyó nda̱a̱ ndáaka lugar”.

¿Á xa̱a̱ sava yichi̱ ndáka̱tu̱ʼún miíún ndáa ki̱ʼva ku̱vaʼa tú carro válí yóʼo?

¿Ndáa ki̱ʼva nda̱kaxinna ixava̱ʼananú?

Tá ku̱i̱ya̱ 2001, na̱ Cuerpo Gobernante ni̱ka̱ʼa̱nna xíʼin na̱ hermano na̱ ndóo chí Francia ña̱ ná ndukúna inkaka ki̱ʼva ña̱ va̱ʼa natúʼunna xa̱ʼa̱ Ndióxi̱ nu̱ú xíka ku̱a̱ʼá na̱ yiví. Ku̱a̱ʼá ña̱ʼa xi̱niñúʼuna ña̱ ke̱ʼéna ña̱yóʼo, tá kúú maleta ña̱ kúúmií llanta xíʼin carro válí tú xíniñúʼuna tá xáʼa̱nna sátána ña̱ va̱ʼa natúʼunna xíʼin na̱ yiví, ta yóʼotu xi̱taánva̱ʼana tutu. Tándi̱ʼi, na̱ hermano na̱ káchíñu Betel nda̱kaxinna ndáa ki̱ʼva koo tú carro válí yóʼo, ta na̱ hermano xi̱niñúʼuna túyóʼo ku̱a̱ʼání ku̱i̱ya̱.

Tá xi̱niñúʼu na̱ hermano tú carro válí yóʼo chí Francia, va̱ʼaní xi̱kuyatin na̱ yiví ta xi̱kiʼinna tutu. Xa̱ʼa̱ ña̱kán, tá ku̱i̱ya̱ 2011 na̱ Cuerpo Gobernante ni̱ka̱ʼa̱nna xíʼin na̱ hermano ña̱ ná kuniñúʼuna tú carro válí xíʼin mesa nu̱ú chindósona tutu ña̱ va̱ʼa natúʼunna xíʼin na̱ yiví xa̱ʼa̱ Ndióxi̱ chí Nueva York (Estados Unidos). Na̱ precursor na̱ ke̱ʼé prueba yóʼo ki̱ʼinna kuenta ña̱ va̱ʼaní tú carro válí yóʼo. Tá kúú, va̱ʼa xi̱xaʼa̱nnú xíʼinna nda̱a̱ ndáaka nu̱ú xi̱kuni̱na ku̱ʼu̱nna. Ta saátu ki̱ʼinna kuenta ña̱ xi̱xiniñúʼu keʼéna savaka ña̱ʼa xíʼinnú ña̱ va̱ʼa viíka koonú. Xa̱ʼa̱ ña̱kán ni̱ka̱ʼa̱nna xa̱ʼa̱ sava ña̱ʼa ña̱ kivi nasa̱ma. Carro válí tú i̱xava̱ʼana tá xa̱ʼa̱, tú yitu̱n xi̱kuunú, ña̱kán xi̱ ixayo̱ʼvi̱níña xíʼinna ña̱ ndaana á nuuna xíʼinnú nu̱ú íyo escalera. Ña̱kán ndu̱kúna inka ki̱ʼva ña̱ keʼénanú ña̱ va̱ʼa va̱ása ve̱eníka koonú, ta saátu ña̱ va̱ʼa kǒo nduvanú tá ndeéní xíka ta̱chí. Ke̱ʼétuna llanta ña̱ náʼnuka ña̱ kuñuʼu xa̱ʼa̱nú ña̱ va̱ʼa kakanú xíʼinna nda̱a̱ ndáaka nu̱ú ku̱a̱ʼa̱nna. Ta saátu i̱xava̱ʼana iin caja loʼo chí sa̱tánú ña̱ va̱ʼa kuñuʼu tutu.

Va̱ʼaní na̱túʼun na̱ hermano xíʼin na̱ yiví xíʼin tú carro válí yóʼo. Xa̱ʼa̱ ña̱kán, tá ku̱i̱ya̱ 2012 na̱ Cuerpo Gobernante ni̱ka̱ʼa̱nna ña̱ kixáʼana kuniñúʼuna carro válí yóʼo iníísaá ñuyǐví. Ke̱ʼéna trato xíʼin iin fábrica ña̱ va̱ʼa ixava̱ʼana ku̱a̱ʼání tú carro válí yóʼo, ta kuniñúʼuna ña̱ʼa ña̱ va̱ása ve̱ení xíʼin ña̱ va̱ása kama ndíʼi-xa̱ʼa̱.

Nani yáʼa ku̱i̱ya̱, nása̱makava ki̱ʼva ña̱ íyo tú carro válí yóʼo ña̱ va̱ʼa viíka koonú. Tá kúú, nda̱a̱ tá ku̱i̱ya̱ 2015 ku̱vaʼa iin plástico ña̱ kundasi sa̱tánú tá kúún sa̱vi̱. Iin ñá hermana ñá íyo chí Georgia ñá naní Dina káʼa̱nñá ña̱ va̱ʼaníva ña̱ plástico yóʼo. Ña̱yóʼo káʼa̱nñá: “Kǒo ña̱ ndóʼo tutu ña̱ ñúʼu ini tú carro válí yóʼo saáchi ña̱ plástico yóʼo chíndeétáʼanña xíʼinnú ña̱ va̱ása ndaxinú á chiinú”. Tá ku̱i̱ya̱ 2017, ka̱na cartel magnético sava nu̱ú tu̱ʼun ña̱ kuniñúʼuna xíʼin tú carro válí yóʼo. Iin ta̱ hermano ta̱ naní Tomasz ta̱ íyo chí ñuu Apolonia káchira: “Xi̱ ixayo̱ʼvi̱níña xíʼinndi̱ tavándi̱ cartel ña̱ xi̱kuumií ña̱ kisín, soo cartel magnético ña̱ chi̱ndaʼána vitin va̱ʼaníkaña chi va̱ása yo̱ʼvi̱ xíniñúʼuyóña. Tá ku̱i̱ya̱ 2019, na̱samana sava ña̱ʼa ña̱ xíniñúʼuna ña̱ íxava̱ʼana tú carro válí yóʼo, ta xa̱ʼa̱ ña̱ ke̱ʼéna ña̱yóʼo va̱ása ndíʼi-xa̱ʼa̱ kama tú carro válí yóʼo.

¿Ndáa ki̱ʼva kúú ña̱ sátándi̱nú?

Iin kuití fábrica kúú nu̱ú íxava̱ʼana tú carro válí yóʼo ta tándi̱ʼi chíndaʼánanú ku̱a̱ʼa̱nnú ndiʼi ñuu nu̱ú ndóo na̱ hermano. Iin tá iin tú carro válí yóʼo ya̱ʼvinú 43 dólar, soo saátu cháʼvina ña̱ va̱ʼa chindaʼánanú ku̱ʼu̱nnú inka ñuu. Xa̱a̱ yáʼaka 420,000 tú carro válí yóʼo chíndaʼána ndaʼa̱ na̱ congregación na̱ íyo iníísaá ñuyǐví ta xa̱a̱ yáʼaka 16 millón ña̱ dólar xíniñúʼundi̱ xíʼin tú carro válí yóʼo.

Ña̱ va̱ʼa viíka kuniñúʼundi̱ xu̱ʼún ña̱ táxi na̱ hermano, ku̱a̱ʼání tú carro válí yóʼo sátándi̱ chi saá kúú ña̱ loʼoka ya̱ʼvinú. Ta vitin na̱ congregación xa̱a̱ kivi satána sava pieza túyóʼo tá xa̱a̱ ndíʼi-xa̱ʼa̱ña nu̱úka ña̱ satána iin tú xa̱á.

Tá xítona tú carro válí kúnda̱a̱-inina xa̱ʼa̱ Ndióxi̱

Kúsi̱íní-ini na̱ hermano ña̱ xíniñúʼuna tú carro válí yóʼo ña̱ nátúʼunna xíʼin na̱ yiví. Ñá Martina ñá íyo chí ñuu Ghana káchiñá: “Ku̱a̱ʼání kúú ki̱ʼva ña̱ nátúʼunyó xíʼin na̱ yiví xa̱ʼa̱ Ndióxi̱, soo siʼna miíyó kúú na̱ kúyatin nu̱úna ña̱ va̱ʼa natúʼunyó xíʼinna. Soo kútóoníi̱ kuniñúʼi̱ tú carro válí yóʼo saáchi mií na̱ yiví kúú na̱ kúyatin nu̱úyó ña̱ va̱ʼa natúʼunyó xíʼinna. Ndiʼi na̱ yáʼa ta xítona carro válí yóʼo kúnda̱a̱-inina xa̱ʼa̱ Ndióxi̱”.

Iin ta̱a ta̱ íyo iin ñuu ña̱ kíndo̱o chí África ku̱yatinra nu̱ú níndichi iin tú carro loʼo ta ki̱ʼinra sava tutu ña̱ íyo tu̱ʼun miíra. Tá ni̱ya̱ʼa iin semana ndi̱kóra nu̱ú ndíta na̱ hermano xíʼin iin tú carro loʼo ta ni̱ka̱ʼa̱nra xíʼinna: “Xa̱a̱ sa̱ndíʼii̱ ka̱ʼvii̱ ndiʼi tutu ña̱ ku̱a̱ʼa̱n xíʼi̱n. Ndáyáʼviní ña̱ va̱xi nu̱úña, xa̱ʼa̱ ña̱kán kuniʼii̱ña ku̱ʼi̱n ñui̱ ña̱ va̱ʼa ná kaʼvi na̱ veʼi̱ña”. Ki̱ʼva 500 kilómetro xi̱kindo̱o ñuu nu̱ú xi̱ndoo na̱ veʼera. Tá ni̱ya̱ʼa u̱vi̱ yo̱o̱ ndi̱kó tuku ta̱ ta̱a yóʼo nu̱ú na̱ hermano na̱ ndíta xíʼin tú carro válí ta ni̱ka̱ʼa̱nra xíʼinna: “Xa̱a̱ sa̱ndíʼina ka̱ʼvina tutu yóʼo chí ñui̱ ta ku̱tóonína ña̱ káʼa̱nña, ta ni̱ka̱ʼa̱nna ña̱ kúni̱na koona testigo Jehová. Soo íyo sava ña̱ kúni̱na kunda̱a̱-inina xa̱ʼa̱. Tá kúú, xa̱a̱ kúnda̱a̱va-inina ña̱ xíniñúʼu ki̱ʼvi níína ini ti̱kui̱í ña̱ va̱ʼa ndakuchina, soo ñuu nu̱ú ndóona kǒo nda̱a̱ ni iin yu̱ta. ¿Á xíniñúʼu kixina nda̱a̱ yóʼo ña̱ va̱ʼa ndakuchina?”. Na̱ hermano na̱ ndíta xíʼin tú carro loʼo kán ni̱ka̱ʼa̱nna xíʼin iin ta̱ precursor ta̱ káʼa̱n tu̱ʼun táʼan ña̱ káʼa̱n ta̱ ta̱a yóʼo ña̱ va̱ʼa ná sanáʼa̱rara xa̱ʼa̱ Ndióxi̱. Nani saá ki̱xáʼara sánáʼa̱ ni̱ʼirara xa̱ʼa̱ ña̱ káʼa̱n Biblia.

Kúsi̱íní-iniyó xítoyó ndáa ki̱ʼva xíniñúʼuna tú carro válí yóʼo ña̱ “natúʼunna tu̱ʼun va̱ʼa xa̱ʼa̱ Reino Ndióxi̱ iníísaá nu̱ú ñuʼú” (Mateo 24:14). Va̱ʼa kúva̱ʼa ndiʼi tú carro válí yóʼo xa̱ʼa̱ ña̱ táxi ndiʼi na̱ hermano na̱ íyo iníísaá ñuyǐví donación, ta ku̱a̱ʼání yichi̱ kéʼéna ña̱yóʼo chí nu̱ú donate.jw.org. Tíxa̱ʼvindó xa̱ʼa̱ ña̱ va̱ʼaní-inindó.