Ndiʼi chiñu ña̱ kéʼéna ña̱ va̱ʼa tavána video: “Tu̱ʼun va̱ʼa ña̱ ni̱ka̱ʼa̱n ta̱ Jesús”

Xa̱a̱ xi̱kuni̱ní miíyó na̱ testigo Jehová kotoyó táʼví 1 video ña̱ naní “Tu̱ʼun va̱ʼa ña̱ ni̱ka̱ʼa̱n ta̱ Jesús”. Xa̱a̱ ku̱a̱ʼání na̱ yiví xi̱to táʼví 1 ña̱ video yóʼo, soo kúma̱níka kana inka 17 táʼvíña. Soo, ¿ndáaña kúu tá íxaa grabarna video yóʼo? Ta, ¿ndáa ki̱ʼva xa̱a̱ chíndeétáʼún xíʼinna ña̱ va̱ʼa kana video yóʼo?

Ndáandi̱ na̱ yáʼa nu̱ú video ta saátu na̱ chíndeétáʼan xíʼinna

Sucursal ña̱ íyo chí Australasia kúú nu̱ú ku̱a̱ʼáníka yichi̱ kéʼéna grabación video yóʼo, ta ki̱ʼva 50 á 80 na̱ yiví xíniñúʼuna tá kéʼéna grabación yóʼo.a Ta íxava̱ʼatuna ña̱ʼa ña̱ xíxi ndiʼi na̱ xáʼa̱n káchíñu yóʼo, ña̱ xíxina xi̱ta̱a̱n, káʼñu xíʼin xi̱kuaá. Ta xa̱a̱ ya̱chi̱ka ndáka̱xinna ndáaña kúú ña̱ taxina kuxuna. Iin ñá hermana ñá naní Esther ñá káchíñu xíʼin Departamento ña̱ kíʼin kuenta xíʼin ña̱ xíxina, káʼa̱nñá ña̱yóʼo: “Ña̱ va̱ʼa loʼo xu̱ʼún kuniñúʼundi̱, xa̱a̱ síín síín nu̱ú na̱ yiví sátándi̱ ña̱ʼa ña̱ xíniñúʼundi̱ ña̱ íxava̱ʼandi̱ comida. Ta saátu kíʼinndi̱ kuenta nda̱saa comida ixava̱ʼandi̱ ña̱ va̱ʼa kǒo ndiʼi-xa̱ʼa̱ña”. Ki̱ʼva ku̱mí dólar xíniñúʼundi̱ xíʼin ña̱ xíxi iin tá iin na̱ yiví.b

Na̱ yáʼa nu̱ú video ta saátu na̱ chíndeétáʼan xíʼinna xíniñúʼu kuxuna soo saátu xíniñúʼu kundaana miína. ¿Nda̱chun xíniñúʼu kundaana miína? Saáchi sava ki̱vi̱ niʼníní chí ñuu Australia ta ndeéní xáʼmi ñu̱ʼu á ña̱ ka̱ndii miína. Ña̱ va̱ʼa kǒo kiʼin kue̱ʼe̱ na̱ hermano ta va̱ása kuvitána xa̱ʼa̱ ña̱ niʼníní, na̱ hermano na̱ chíndeétáʼan xíʼin na̱ yáʼa nu̱ú video xa̱a̱ ya̱chi̱ka chíndósona lona ña̱ va̱ʼa koo ku̱nda̱ti̱ nu̱ú ndakindee̱na. Saátu táxina crema ña̱ kuniñúʼuna xa̱ʼa̱ ña̱ niʼníní, táxina sombrilla kuniñúʼuna xíʼin ti̱kui̱í tá koʼona. Ta̱ Kevin ta̱ káchíñu xíʼin Audio y Video, káʼa̱nra ña̱yóʼo: “Na̱ chíndeétáʼan xíʼin na̱ kéʼé grabación ña̱ video yóʼo kúú na̱ kíʼin kuenta ña̱ ná koo ndiʼi ña̱ʼa yóʼo, ta ku̱a̱ʼání na̱yóʼo kúúna voluntario na̱ chíndeétáʼan xíʼin na̱ káchíñu Betel. Vitání-inina ta kúsi̱íní-inina káchíñuna. Xa̱ʼa̱ ña̱ chíndeétáʼanna xíʼinndi̱, va̱ʼa kána ndiʼi chiñu yóʼo”.

Kéʼéndi̱ grabación inkaka lugar

Sava yichi̱ xíniñúʼu ku̱ʼu̱nndi̱ keʼéndi̱ grabación inkaka lugar, tasaá viíka koo ña̱ ya̱ʼa nu̱ú video yóʼo ta su̱ví ti̱xin Betel kuití keʼéndi̱ grabación. Saáchi tá tiempo xi̱naʼá kǒoví cable luz níxi̱yo, ni carretera ni táʼan veʼe ña̱ íyo tiempo vitin saáchi síínva ni̱xi̱yoña. Xa̱ʼa̱ ña̱yóʼo, na̱ yáʼa nu̱ú video xíʼin na̱ kéʼé grabación yóʼo xíniñúʼu ku̱ʼu̱nna lugar ña̱ xíkáva̱ʼa kíndo̱o ña̱ keʼéna grabación. Xíniñúʼu taánva̱ʼana ti̱ko̱to̱ ña̱ ndíxi na̱ yáʼa nu̱ú video xíʼin inkaka ña̱ʼa ña̱ xíniñúʼuna ña̱ va̱ʼa keʼéna grabación, saátu xíniñúʼu ku̱ʼu̱nña xíʼinna ta taánva̱ʼanaña tá xa̱a̱ xáa̱na lugar kán. Tá kúma̱níka keʼéna grabación, na̱ chíndeétáʼan xíʼin na̱ coordinador na̱ kéʼé grabación kíʼinna kuenta ña̱ ná koo luz, ti̱kui̱í koʼona xíʼin baño nu̱ú ku̱ʼu̱nna. Na̱ hermano yóʼo kíndo̱ona veʼe inka na̱ hermano na̱ íyo ñuu kán, ini hotel á inkaka veʼe.

Tá kéʼéndi̱ grabación inka lugar xíniñúʼundi̱ ku̱a̱ʼání xu̱ʼún xíʼin tiempo ta kúnaaní na̱ hermano na̱ kéʼé chiñu yóʼo. Xa̱ʼa̱ ña̱yóʼo tá ku̱i̱ya̱ 2023 na̱ Cuerpo Gobernante ni̱ka̱ʼa̱nna xíʼinndi̱ ña̱ kivi satándi̱ iin pantalla káʼnu ña̱ kuniñúʼundi̱ ña̱ keʼéndi̱ grabación, ña̱yóʼo naníña video wall ta ya̱ʼviña u̱vi̱ millón sava dólar. Nu̱ú pantalla yóʼo va̱ʼaní náʼa̱ video ta náʼa̱ña nda̱a̱ táki̱ʼva náʼa̱ iin lugar ña̱ ndixa ta xa̱ʼa̱ ña̱yóʼo viíka xíniñúʼundi̱ xu̱ʼún chi va̱ása xíniñúʼu ku̱ʼu̱nkandi̱ inka lugar ña̱ va̱ʼa keʼéndi̱ grabación. Ta̱ Darren, ta̱ kúú Comité ña̱ Sucursal ña̱ Australasia káchira: “Xa̱ʼa̱ ña̱ kéʼéndi̱ grabación xíʼin pantalla yóʼo loʼoka kúnaa na̱ yáʼa nu̱ú video, ta saátu ku̱a̱ʼáka yichi̱ kivi ndikóndi̱ keʼéndi̱ grabación. Tá kúú, tá xi̱xaʼa̱nndi̱ inka lugar ña̱ keʼéndi̱ grabación tá ku̱a̱ndiʼvi ñu̱ʼu, loʼo kuití minuto xi̱kuumiíndi̱ ña̱ va̱ʼa keʼéndi̱ña. Soo xíʼin pantalla yóʼo kivi keʼéndi̱ nda̱a̱ nda̱saaka grabación ña̱ kúni̱ miíndi̱, nda̱a̱ ná kana viíña”.

“Kǒo ndándikó-inii̱ ña̱ ni̱xa̱ʼi̱n”

Ku̱a̱ʼání na̱ hermano xíniñúʼundi̱ ña̱ va̱ʼa keʼéndi̱ grabación iin tá iin video ña̱ naní “Tu̱ʼun va̱ʼa ña̱ ni̱ka̱ʼa̱n ta̱ Jesús”. ¿Ndáa ki̱ʼva kúni na̱ hermano yóʼo xa̱ʼa̱ ndiʼi ña̱ kéʼéna ña̱ va̱ʼa kundaanana?

 Iin ñá hermana ñá ñuu Melbourne ñá naní Amber yáʼaka 700 kilómetro ni̱xa̱ʼa̱nñá ña̱ va̱ʼa chindeétáʼanñá xíʼin na̱ hermano na̱ kéʼé video yóʼo. Ñáyóʼo káchiñá: “Nani tá ni̱xa̱i̱ aeropuerto va̱ʼaní xi̱ndaa na̱ hermano na̱ káchíñu Betel yi̱ʼi̱. Ku̱a̱ʼání na̱yóʼo xi̱kaʼa̱nna xíʼi̱n ña̱ ná ku̱ʼi̱n kuxui̱ xíʼinna á ña̱ koʼi̱ iin té loʼo xíʼinna, ta saátu na̱ kéʼé grabación ni̱na̱ʼa̱na ña̱ kúni̱nína xínina yi̱ʼi̱. Kǒo ndándikó-inii̱ xa̱ʼa̱ ña̱ ni̱xa̱ʼi̱n chi ku̱a̱ʼání bendición nda̱kiʼii̱n”.

Iin ta̱ hermano ta̱ naní Derek ta̱ káchíñu xíʼin na̱ equipo na̱ kéʼé grabación, káʼa̱nra ña̱yóʼo: “Tá sa̱kán ki̱xáʼandi̱ kéʼéndi̱ chiñu yóʼo, ku̱a̱ʼání na̱ hermano ki̱xáʼa chíndeétáʼan xíʼinndi̱. Táxiníi̱ tíxa̱ʼvi ndaʼa̱ ndiʼi na̱ hermano chi xíniñúʼuna tiempona, ndee̱na xíʼin xu̱ʼúnna ña̱ va̱ʼa chindeétáʼanna xíʼinndi̱, va̱ʼaní-inina ta kútóonína chindeétáʼanna xíʼinndi̱. Ku̱a̱ʼání bendición táxi Jehová ndaʼa̱ndi̱ ta saátu ndaʼa̱ na̱ hermano na̱ chíndeétáʼan xíʼinndi̱. Kíʼinndi̱ kuenta ña̱ ndíʼi̱ní-ini Jehová xa̱ʼa̱ndi̱ xíʼin ki̱ʼva ña̱ kéʼéndi̱ chiñu yóʼo”.

Va̱ʼa távándi̱ video ña̱ naní “Tu̱ʼun va̱ʼa ña̱ ni̱ka̱ʼa̱n ta̱ Jesús”, xa̱ʼa̱ ndiʼi donación ña̱ táxindó, tá kúú ña̱ táxindó nu̱ú donate.jw.org. Tíxa̱ʼviníndó ñaniyó xíʼin ku̱ʼvayó xa̱ʼa̱ ña̱ chíndeétáʼanndó xíʼinndi̱.