Ña̱ asamblea viíní xítoyóña ta viíní xíniso̱ʼoyóña

Xa̱a̱ yáʼaka 130 ku̱i̱ya̱ kéʼé na̱ testigo Jehová asamblea ña̱ náʼnuní ku̱i̱ya̱ tá ku̱i̱ya̱. Tiempo vitin yáʼaka 40 discurso va̱xi ti̱xin asamblea, saátu yaa, entrevista xíʼin video. Ndiʼi na̱ xáʼa̱n asamblea kúsi̱íní-inina saáchi viíní yáʼa video ña̱ xítona ta saátu va̱ʼaní xíniso̱ʼona ña̱yóʼo (Lucas 2:20). Ni nda̱a̱ ndáaka nu̱ú xíyo asamblea, ¿ndáa ki̱ʼva chíndeétáʼan ña̱ donación ña̱ táxindó ña̱ viíní kana ña̱yóʼo?

Xíʼin ndiʼi ña̱ asamblea ña̱ xíyo kíʼinnína kuenta xíʼin audio xíʼin video

Ku̱a̱ʼání lugar ña̱ xíniñúʼuyó ña̱ va̱ʼa koo asamblea xa̱a̱ kúúmiíña bocina xíʼin pantalla. Tá saá, ¿nda̱chun xíniñúʼuyó equipo miíyó? Ta̱ David ta̱ káchíñu ti̱xin Departamento ña̱ Broadcasting ña̱ íyo chí Sede Mundial káchira: “Ku̱a̱ʼání ña̱ xíniso̱ʼoyó ti̱xin asamblea discurso kúúña, ta ku̱a̱ʼání lugar nu̱ú xíyo asamblea va̱ása kúúmiíña bocina ña̱ va̱ʼa vií kuniso̱ʼona yáʼaka 6 hora. Bocina ña̱ kúúmií sava estadio xíniñúʼunaña ña̱ va̱ʼa chika̱a̱na yaa á ña̱ ka̱ʼa̱n loʼo kuitína ta pantalla ña̱ kúúmiína xíniñúʼunaña ña̱ va̱ʼa na̱ʼa̱ña na̱ sísikí á inkaka ña̱ʼa. Soo tá xíyo asamblea xítoyó video ña̱ yáʼa ku̱a̱ʼá tiempo ta kúni̱yó ña̱ viíní ná kuniso̱ʼona ndiʼi ña̱yóʼo”.

Xa̱ʼa̱ ña̱ xa̱a̱ síín síín íyo iin tá iin lugar nu̱ú xíyo asamblea, na̱ hermano xíniñúʼu kotona nda̱saa pantalla xíʼin bocina kuniñúʼuna. Na̱ káchíñu ti̱xin Departamento ña̱ Broadcasting iin tá iin Betel kíʼinna kuenta ndáa ki̱ʼva káa lugar nu̱ú koo asamblea ta nda̱saa na̱ yiví ku̱ʼu̱n ña̱ va̱ʼa kotona ndáa míí koo na̱ yiví na̱ ku̱ʼu̱n asamblea. Tándi̱ʼi, na̱ hermano xítona ndáa míí kundichi bocina xíʼin pantalla ta ndáa ki̱ʼva chitáʼanna ña̱yóʼo, ta so̱ndíʼi kéʼéna iin lista nu̱ú va̱xi ndiʼi ña̱ xíniñúʼuna ña̱ va̱ʼa vií kotona asamblea.

Soo íxayo̱ʼvi̱ña xíʼin na̱ hermano tá xíniñúʼu sandáya̱ʼana iin asamblea nu̱ú ku̱a̱ʼá tu̱ʼun, saáchi na̱ intérprete xíniñúʼu kuniso̱ʼona ña̱ káʼa̱nna ta saátu kotona video. Ta tándi̱ʼi sandáya̱ʼana ña̱kán tu̱ʼun ña̱ káʼa̱n na̱ yiví na̱ xáʼa̱n asamblea ta xa̱ʼa̱ ña̱ kéʼéna ña̱yóʼo kivi kuniso̱ʼona discurso ta kotona video tu̱ʼun ña̱ káʼa̱n miína. Ta̱ David káchira: “Na̱ hermano na̱ xíniñúʼu ña̱yóʼo xíniñúʼu viíní sakúaʼana kuniñúʼunaña”.

Ku̱a̱ʼání sucursal xa̱a̱ kúúmiína pantalla xíʼin sonido ña̱ xíniñúʼuna ndiʼi ku̱i̱ya̱. Tá xa̱a̱ ndíʼi asamblea, na̱ hermano chíndaʼána ña̱yóʼo ku̱a̱ʼa̱nña inkaka lugar nu̱ú koo asamblea. Ndiʼi ku̱i̱ya̱ na̱ sucursal na̱ íyo chí Estados Unidos yáʼaka 200,000 dólara xíniñúʼuna ña̱ chíndaʼána ña̱yóʼo. Soo ni saá loʼo xu̱ʼún kúú ña̱ sándiʼina xíʼin ña̱yóʼo nu̱úka ña̱ satána ña̱ xa̱á. Ta̱ Steven, ta̱ ka̱chíñu xíʼin audio ta saátu xíʼin video ti̱xin iin asamblea ñuu Canadá káchira: “Na̱ hermano na̱ ka̱chíñu xíʼin ña̱yóʼo ki̱ʼinna kuenta ña̱ ná kǒo kuma̱ní ni iin ña̱ʼa tá kúú tornillo, tu̱chi á inkaka ña̱ʼa ta saá chindaʼánaña ña̱ ku̱ʼu̱nña inka lugar nu̱ú koo asamblea”.

Sátándi̱ equipo ta viíní ndáandi̱ña

Ku̱a̱ʼání xu̱ʼún chaʼvina tá kúni̱na ixarentana bocina xíʼin pantalla. Xa̱ʼa̱ ña̱kán sátándi̱ ña̱ xíniñúʼundi̱. Tiempo vitin pantalla ña̱ káʼnuní ña̱ káni̱ 5 metro ta súkunña 3 metro ki̱ʼva 24,000 dólar ya̱ʼviña, ta cable ña̱ micrófono ña̱ káni̱ 15 metro ki̱ʼva 20 dólar ya̱ʼviña. Tá kúma̱níka satána ña̱yóʼo, siʼnaka káʼa̱nna xíʼin Departamento ña̱ Compras ña̱ va̱ʼa kiʼinna kuenta nda̱saa xu̱ʼún kuniñúʼuna ña̱ va̱ʼa satána ña̱yóʼo (Lucas 14:28). Ta saátu ndákanixi̱nína xa̱ʼa̱ ña̱yóʼo: ¿Nda̱saa na̱ yiví kuniñúʼu ña̱yóʼo? ¿Á ndixa xíniñúʼu satáyó ña̱ xa̱á? ¿Á íyo iin lugar nu̱ú kivi chikaa̱ va̱ʼanaña? ¿Á íyo na̱ hermano na̱ xíni̱ kuniñúʼu ña̱yóʼo? ¿Á kúúmiíyó ndaʼáchíñu ña̱ va̱ʼa sandáʼayóña?

Ña̱ va̱ʼa ku̱a̱ʼáka tiempo kivi kuniñúʼuna ña̱yóʼo ta viíka kuniñúʼuna donación, sava yichi̱ xíniñúʼu sandáʼana ña̱yóʼo. Ta saátu xíniñúʼundi̱ caja ña̱ ka̱a ña̱ va̱ʼa chindaʼándi̱ equipo yóʼo ku̱ʼu̱nña inka lugar ta saá kǒo ndiʼi-xa̱ʼa̱ña. Ta sava yichi̱ xíniñúʼu sandáʼandi̱ caja yóʼo.

Programa ña̱ va̱ʼaní kúnda̱a̱-inina xíʼin ta káʼa̱n va̱ʼaña xa̱ʼa̱ Ndióxi̱

Sava na̱ yiví na̱ va̱ása kúú testigo Jehová ndákanda̱ní-inina xa̱ʼa̱ ña̱ va̱ʼaní audio xíʼin video kúúmiíyó ti̱xin asamblea. Tá kúú, iin ta̱a ta̱ káchíñu xíʼin audio ta saátu xíʼin video nu̱ú iin lugar ña̱ ndáyáʼviní ndákanda̱ní-inira xíʼin ña̱ kéʼéyó. Ta̱ Jonathan, ta̱ káchíñu xíʼin audio ta saátu xíʼin video ti̱xin asamblea káʼa̱nra ña̱yóʼo: “Tá ku̱ndaa̱-ini ta̱yóʼo ña̱ na̱ hermano na̱ káchíñu xíʼin audio ta saátu xíʼin video kǒo níkaʼvi va̱ʼana ña̱ keʼéna chíñu yóʼo nda̱kanda̱ní-inira. Tá ni̱ka̱ʼa̱nra ña̱ nda̱kanda̱ní-inira saáchi miíyó iin ki̱vi̱ sava kuití ku̱chiñuyó ke̱ʼéyó ña̱yóʼo, soo na̱ káchíñu xíʼinra u̱ʼu̱nví ki̱vi̱ sandíʼinaña”. Ti̱xin inka asamblea, ta̱ kíʼin kuenta xíʼin lugar kán ni̱ka̱ʼa̱nra: “Xa̱a̱ ku̱a̱ʼání na̱ káʼvi va̱ʼa xíʼin audio ta saátu xíʼin video kíxi lugar yóʼo, soo ndóʼó viíníka kéʼéndó chiñu yóʼo ta xíni̱níndó ndáa ki̱ʼva keʼéndóña”.

Xa̱ʼa̱ ña̱ va̱ʼaní íyo audio xíʼin video sana ndóʼún táki̱ʼva ndo̱ʼo ta̱ David ta̱ íyo chí ñuu Inglaterra, ta̱yóʼo káchira: “Kúúmiíi̱ 88 ku̱i̱ya̱, ta nani tá loʼovíi̱ ki̱xáʼi̱ xáʼi̱n asamblea ta vitin va̱ʼaníka kúnda̱a̱-inii̱ xíʼinña. Ndiʼi video liviníña ta káxiní xíniso̱ʼi̱ ndiʼi ña̱ káʼa̱nna”. Ta̱ Micheal ta̱ ñuu Nigeria káʼa̱nra ña̱yóʼo: “Vitin kǒo nda̱a̱ ni iin ña̱ʼa sási nu̱ú na̱ hermano ña̱ kuniso̱ʼona ña̱ káʼa̱nna ti̱xin asamblea”.

Tá ná ku̱ʼún asamblea regional á ña̱ especial ña̱ ku̱i̱ya̱ vitin ña̱ naní “Ná natúʼunyó xa̱ʼa̱ tu̱ʼun va̱ʼa”, ndakanixi̱ní xa̱ʼa̱ ndiʼi chiñu ña̱ ke̱ʼé na̱ hermano ña̱ va̱ʼa viíní kuniso̱ʼún ta kotoún programa yóʼo. Táxiníndi̱ tíxa̱ʼvi ndaʼa̱ndó xa̱ʼa̱ ndiʼi donación ña̱ táxindó ti̱xin salón ta saátu ña̱ táxindó nu̱ú donate.jw.org, saáchi ña̱yóʼo kúú ña̱ xíniñúʼundi̱ ña̱ va̱ʼa keʼéndi̱ ña̱yóʼo.