“Su̱ví ñuyǐví yóʼo kúú nu̱ú xáʼndachíñui̱”

Tá ni̱xi̱yo ta̱ Jesús nu̱ú ñuʼú yóʼo na̱túʼunra xa̱ʼa̱ iin Reino. Xíʼin tu̱ʼun ña̱ ni̱ka̱ʼa̱nra ta saátu xíʼin ña̱ ke̱ʼéra ni̱na̱ʼa̱ra ndáaña keʼé Reino yóʼo xa̱ʼa̱ na̱ yiví: sandíʼi-xa̱ʼa̱ña ndiʼi tu̱ndóʼo ña̱ íyo nu̱ú ñuʼú yóʼo ta nda̱a̱ ni iin na̱ chíñu na̱ íyo nu̱ú ñuʼú yóʼo ta̱ʼán kuchiñuna keʼéna ña̱yóʼo. Ná kotoyó nda̱chun kúú ña̱ káʼa̱nyó ña̱yóʼo.

Ña̱ ni̱ka̱ʼa̱n ta̱ Jesús

• “Su̱ví ñuyǐví yóʼo kúú nu̱ú xáʼndachíñui̱” (Juan 18:36). Káxiní ni̱ka̱ʼa̱n ta̱ Jesús ña̱ su̱ví na̱ yiví kúú na̱ taxi nda̱yí ndaʼa̱ra ña̱ kaʼndachíñura ta ni va̱ása kundiku̱nra ki̱ʼva ña̱ xáʼndachíñu na̱yóʼo. Saáchi mií Ndióxi̱ kúú ta̱ taxi nda̱yí ndaʼa̱ra ña̱ kaʼndachíñura.

• “Yivándi̱ ta̱ íyo chí ndiví, ná [...] kixaa̱ ki̱vi̱ ña̱ kaʼndachíñún. Ná koo ña̱ kúni̱ miíún, táki̱ʼva íyo chí ndiví, saá ná koo nu̱ú ñuʼú yóʼo” (Mateo 6:9, 10). Ti̱xin oración yóʼo sa̱náʼa̱ ta̱ Jesús na̱ xi̱ndiku̱n miíra ña̱ iinlá Reino Ndióxi̱ kúú ña̱ ndasavií ndiʼi tu̱ndóʼo ña̱ íyo nu̱ú ñuʼú yóʼo ta su̱ví na̱ chíñu na̱ íyo nu̱ú ñuʼú yóʼo kúú na̱ kuchiñu keʼéña. Reino yóʼo kúú ña̱ kixáʼa kaʼndachíñu chí nu̱únínu ta va̱ása kaʼndachíñuka na̱ yiví tasaá va̱ʼaní kundooyó iníísaá nu̱ú ñuʼú yóʼo ndiʼi tiempo (Daniel 2:44).

• Tá kúni̱ún kunda̱a̱ka-iniún xa̱ʼa̱ Reino Ndióxi̱ ta saátu ndáaña keʼéña chí nu̱únínu, koto video ña̱ naní ¿Ndáa ki̱ʼva kaʼndachíñu Ndióxi̱?

Ña̱ ke̱ʼé ta̱ Jesús

• “Ta̱ Jesús na̱kunda̱a̱-inira ña̱ xa̱a̱ ku̱nu̱mí kixi na̱ yiví xa̱ʼa̱ra ta ixandúxana xíʼinra ña̱ ku̱ʼu̱nra xíʼinna ña̱ ndasanara rey, ta tuku ke̱e mitúʼunra ku̱a̱ʼa̱nra chí yuku̱” (Juan 6:15). Ta̱ Jesús va̱ása níxiinra ki̱ʼvira xíʼin ña̱ política. Saátu va̱ása níchindeétáʼanra xíʼin nda̱a̱ ni iin na̱ chíñu ni xi̱kuni̱na ndasanara rey.

Xa̱ʼa̱ ña̱ sa̱kúaʼayó ndáaña ke̱ʼé ta̱ Jesús, ¿á xíniñúʼu ki̱ʼvi na̱ ndíku̱n ta̱ Jesús xíʼin ña̱ política? Ña̱ va̱ʼa kunda̱a̱ka-iniún xa̱ʼa̱ ña̱yóʼo kaʼvi artículo ña̱ naní “¿Debe la religión involucrarse en la política?”.