¿Á ndiʼi-xa̱ʼa̱ na̱ íxandi̱va̱ʼa xíʼin inkana xa̱ʼa̱ ña̱ sáa̱-inina xíninana? | ¿Ndáaña káʼa̱n Biblia?

Íyoní ku̱a̱chi xa̱ʼa̱ ña̱ sáa̱ní-ini na̱ yiví xínitáʼanna, xa̱ʼa̱ ña̱yóʼo ndiʼi ki̱vi̱ íyo ku̱a̱chi. Sava na̱ yiví íxandi̱va̱ʼana xíʼin inkana xa̱ʼa̱ ña̱ síín ñuu ke̱ena, xa̱ʼa̱ religiónna, xa̱ʼa̱ color ku̱ñuna, xa̱ʼa̱ ña̱ kúúna ta̱a á ñaʼá, á xa̱ʼa̱ inkaka ña̱ʼa. Xa̱ʼa̱ ña̱ sáa̱ní-ini na̱ yiví xínitáʼanna ku̱a̱ʼánína yíʼvina, savana túkue̱ʼe̱na xa̱ʼa̱ ña̱ káninana ta kǒo kívi nandóso-inina xa̱ʼa̱ ña̱ ndo̱ʼona, ta nda̱a̱ xáʼnína savana.

Ña̱ Biblia xa̱a̱ ni̱ka̱ʼa̱nña ndáa ki̱ʼva koo na̱ yiví tiempo vitin: “Va̱ása kuʼvi̱-inina kunina na̱ veʼena [...], ndi̱va̱ʼaní koo inina, va̱ása kuʼvi̱-inina kunina ña̱ va̱ʼa” (2 Timoteo 3:1-5). Tá saá, ¿á kixaa̱ iin ki̱vi̱ ña̱ ndiʼi-xa̱ʼa̱ ña̱ sáa̱-inina xínitáʼanna ta kǒo kaʼní-táʼankana? ¿Ndáaña káʼa̱n Biblia xa̱ʼa̱ ña̱yóʼo?

Ndiʼi-xa̱ʼa̱ ña̱ sáa̱-inina xínitáʼanna ta kǒo kaʼní-táʼankana

Ña̱ Biblia káʼa̱nña ña̱ kuchiñuva Ndióxi̱ sandíʼi-xa̱ʼa̱ra na̱ yiví na̱ kéʼé ña̱ kini, ta keʼévaraña.

• “Saáchi ndiʼi-xa̱ʼa̱ na̱ kéʼé ña̱ va̱ása va̱ʼa, soo [...] na̱ vitá-ini, ndakiʼinna ñuʼú yóʼo ta kundoona nu̱úña ta kusi̱íní-inina saáchi va̱ʼaní kundoona” (Salmo 37:9-11). Kǒo taxika Ndióxi̱ ña̱ ixandi̱va̱ʼa na̱ yiví xíʼin inkana.

• “[Ndióxi̱] ndaya̱kúnra ti̱kui̱í nu̱úna, ta va̱ása kuvikana, ni va̱ása kusuchíka-inina, ni va̱ása kuakukana, ni va̱ása xo̱ʼvi̱kana” (Apocalipsis 21:4). Sandáʼa Ndióxi̱ ndiʼi na̱ xóʼvi̱, na̱ ndákava-ini xíʼin na̱ ndóʼo inkaka kue̱ʼe̱.

• “Ndióxi̱ [...], sandátakura” na̱ ni̱xi̱ʼi̱ (Hechos 24:15). Ku̱a̱ʼání na̱ yiví ndataku, ta saátu sandátaku Ndióxi̱ na̱ xa̱ʼnína xa̱ʼa̱ ña̱ sáa̱-inina xíninana.

¿Ndáaña keʼéyó tá sáa̱-iniyó xíniyó inkana á tá sáa̱-inina xínina miíyó?

Ña̱ Biblia káʼa̱nña xíʼinyó ña̱ ku̱a̱ʼání ña̱ va̱ʼa ndakiʼinyó chí nu̱únínu, soo saátu sánáʼa̱ña miíyó ña̱ kǒo sa̱a̱-iniyó kuniyó inkana. Koto ndáaña káʼa̱n ña̱ Biblia xa̱ʼa̱ pregunta ña̱ ndáyáʼviní yóʼo:

• ¿Ndáaña kivi keʼéyó tiempo vitin ña̱ va̱ʼa kǒo sa̱a̱-iniyó kuniyó inkana? Koto ndáaña káʼa̱n Biblia xa̱ʼa̱ ña̱yóʼo nu̱ú revista La Atalaya ña̱ naní “Rompamos el ciclo del odio”.

• ¿Nda̱chun táxi Ndióxi̱ xóʼvi̱ní na̱ yiví? Káxiníva káʼa̱n Biblia xa̱ʼa̱ ña̱yóʼo. Koto video ña̱ naní ¿Nda̱chun táxi Ndióxi̱ ña̱ íyoní tu̱ndóʼo ñuyǐví yóʼo?