Ta̱ Jesús távára na̱ íxi̱kó ini templo

Sana tá yo̱o̱ abril ña̱ ku̱i̱ya̱ 30, ta̱ Jesús ku̱a̱ʼa̱nra chí ñuu Jerusalén. Ku̱a̱ʼání na̱ yiví ku̱a̱ʼa̱n ñuu yóʼo ña̱ keʼéna vikó ña̱ Pascua. Tá xi̱keʼéna vikó yóʼo, xi̱xaʼmina kití nu̱ú Jehová ini templo. Savana níʼina kití sana miína va̱xina, soo savana mií ñuu Jerusalén xi̱satánarí.

Tá ni̱xa̱a̱ ta̱ Jesús ini templo, xi̱nira ndóo na̱ yiví íxi̱kóna kití iniña. Ini veʼe Jehová nu̱ú xi̱ndasakáʼnunara xi̱xikóna. ¿Ndáaña ke̱ʼé ta̱ Jesús tá xi̱nira ña̱yóʼo? Ki̱ʼinra iin yoʼo̱ ta ta̱vára ndikachi xíʼin si̱ndi̱ki̱ tí ñúʼu ini templo. Ta saátu sa̱ndúvara mesa nu̱ú ndósó xu̱ʼúnna ta ni̱xi̱ta̱ ndiʼi ña̱yóʼo. Ta̱ Jesús ni̱ka̱ʼa̱nra xíʼin na̱ íxi̱kó sa̱ta: “Tavá ndiʼindó ña̱ʼa yóʼo. Su̱ví veʼe nu̱ú íxi̱kóna kúú veʼe yivái̱”.

Na̱ yiví na̱ íyo ini templo nda̱kanda̱-inina tá xi̱nina ña̱ ke̱ʼé ta̱ Jesús. Na̱ discípulora nda̱kaʼánna ña̱ ni̱ka̱ʼa̱n profecía xa̱ʼa ta̱ Mesías: “Kuʼvi̱ní-inii̱ kunii̱ veʼe Jehová”.

Tá ku̱i̱ya̱ 33, ta̱ Jesús tuku ni̱xa̱ʼa̱nra ta̱vára ndiʼi na̱ ndóo íxi̱kó ini veʼe Jehová. Ni loʼo va̱ása nítaxira ña̱ kusi̱kindaana veʼe yivára.