Ná sándi̱koyó-ini inkana nda̱a̱ táki̱ʼva kéʼé Ndióxi̱

1. ¿Nda̱chun xíniñúʼu sándi̱koyó-ini inkana?

NDIʼIVAYÓ xíniñúʼu ña̱ sándi̱kona-iniyó, saáchi ndíʼi̱ní-iniyó xa̱ʼa̱ ña̱ ku̱a̱ʼání tu̱ndóʼo íyo (1 Ped. 1:6). Táxiníyó tíxa̱ʼvi nda̱ʼa na̱ sándi̱ko-iniyó tá xóʼvi̱yó ta saá xíniñúʼu keʼé miíyó xíʼin inkana (Mat. 7:12). Jehová sándi̱kora-iniyó tá yáʼayó nu̱ú tu̱ndóʼo. Saá chínúura iin yichi̱ va̱ʼa nu̱úyó ña̱ sándi̱koyó-ini inkana (2 Cor. 1:3, 4; 1 Tes. 4:18). Kéʼéyó ña̱yóʼo xa̱ʼa̱ ña̱ kúʼvi̱-iniyó xíniyó na̱ hermano. Nu̱ú artículo yóʼo kunda̱a̱-iniyó 1) ndáaña káʼa̱n Biblia xa̱ʼa̱ tá káʼa̱nña ña̱ sándi̱koyó-ini inkana, 2) ndáa ki̱ʼva kivi keʼéyó ña̱yóʼo ta 3) ndáaña keʼéyó tá xíniñúʼu sandíkona-iniyó.

ÑA̱ KÁʼA̱N BIBLIA ÑA̱ SÁNDI̱KOYÓ-ININA

2. ¿Ndáaña kúni̱ kachi ña̱ sándi̱koyó-inina ña̱ ni̱ka̱ʼyi̱ tu̱ʼun griego ña̱ va̱xi nu̱ú Biblia?

² Tu̱ʼun griego ña̱ káʼa̱n ña̱ sándi̱koyó-ini inkana ña̱ va̱xi nu̱ú Biblia ku̱a̱ʼáva ña̱ kúni̱ kachiña. Kivi ka̱ʼa̱nña xa̱ʼa̱ ña̱ chikaa̱yó ndeé xíʼin inkana xíʼin ña̱ taxiyó consejo ndaʼa̱na (Rom. 12:8). Tu̱ʼun griego ña̱ ni̱ka̱ʼyi̱ ña̱ sándi̱koyó-inina, ña̱yóʼo kúni̱ kachiña ña̱ koo yatinna xíʼin inka na̱ yiví ña̱ va̱ʼa chindeétáʼanna xíʼinna. Ná ndakanixi̱níyó xa̱ʼa̱ iin na̱ yiví ña̱ ku̱a̱ʼa̱nna chindeétáʼanna xíʼin na̱ migona na̱ xóʼvi̱, ta táxina ndiʼi ña̱ xíniñúʼuna. Ni nda̱a̱ ndáaka ña̱ kéʼéna xa̱ʼa̱ na̱ migona ña̱ kéʼéna kúú ña̱ chíkaa̱na ndee̱ xíʼinna.

3. ¿Ndáa yichi̱ va̱ʼa chi̱núu ta̱ Bernabé nu̱úyó? (Koto na̱ʼná).

³ Biblia káʼa̱nña xa̱ʼa̱ iin ta̱ cristiano ña̱ va̱ʼaní xi̱sandíkora ini inkana. Ta̱yóʼo xi̱naníra José, soo na̱ apóstol Bernabé xi̱kaʼa̱nna xíʼira, ña̱yóʼo kúni̱ kachiña “ta̱ sándi̱ko-ini inkana” (Hech. 4:36). Ta ña̱yóʼo va̱ʼaní ki̱ndooña xíʼi ki̱ʼva ña̱ ni̱xi̱yora, saáchi Biblia kǒo ndíkókaña káʼa̱nña ña̱ naníra José. Ku̱a̱ʼání yichi̱ chi̱ndeétáʼanra xíʼin na̱ hermano, ta xa̱ʼa̱ ña̱yóʼo va̱ʼaní xi̱kaʼa̱nna xa̱ʼa̱ra. Tá kúú, tá ni̱xa̱a̱ ta̱ Saulo ndu̱ura cristiano ni̱xa̱ʼa̱nra chí ñuu Jerusalén ña̱ va̱ʼa ndakutáʼanra xíʼin na̱ discípulo. Soo na̱kán ni̱yi̱ʼvína nu̱úra xa̱ʼa̱ ña̱ xi̱ ixandi̱va̱ʼara xíʼinna, ¿ndáaña ke̱ʼé ta̱ Bernabé? Xi̱ndaa-inira ta̱ Saulo ta ni̱na̱ʼa̱ra na̱ apóstol nu̱úra (Hech. 9:26-28).

NDÁA KI̱ʼVA SÁNDI̱KOYÓ-INI INKANA

4. ¿Ndáa inka ki̱ʼva kivi sandíkoyó-ini inkana? (Romanos 1:11, 12).

⁴ Ná ku̱ʼu̱nyó kotoyóna. Jehová xíniñúʼura na̱ ndásakáʼnu miíra ña̱ va̱ʼa sándi̱kona-ini inkana. Tá kúú iin yichi̱ tá nda̱kavaní-ini ta̱ profeta Elías, Jehová xi̱niñúʼura iin ángel ña̱ va̱ʼa chikaa̱ra ndee̱ xíʼinra (1 Rey. 19:4-7). Ta̱ apóstol Pablo nda̱kunira ña̱ ndáyáʼviní ku̱ʼu̱nyó chikaa̱yó ndee̱ xíʼin na̱ hermano (kaʼvi Romanos 1:11, 12). Tá ná ku̱ʼu̱nyó kotoyó iinna xíniñúʼu ku̱a̱ʼá tiempo kooyó xíʼinna ña̱ va̱ʼa sándi̱koyó-inina (1 Cor. 16:7). Soo, ¿ndáaña kivi keʼéyó tá kǒo kívi ku̱ʼu̱nyó kotoyóna? Ná ndakaʼányó chi kivi chindaʼáyó mensaje nu̱úna, keʼéyó llamada á kaʼyiyó iin carta ku̱ʼu̱n ndaʼa̱na ña̱ va̱ʼa chikaa̱yó ndeé xíʼinna. Taxi ná kuniñúʼu Jehová miíún ña̱ va̱ʼa sandíkoún-ini inkana.

5. ¿Ndáaña kivi kundoʼoyó tiempo vitin?

⁵ Tiempo vitin íxayo̱ʼvi̱níkaña xíʼinyó ña̱ ku̱ʼu̱nyó kotoyó na̱ hermano ta sandíkoyó-inina tá yáʼana nu̱ú tu̱ndóʼo. Tá xi̱ndikaa̱ ta̱ Pablo veʼeka̱a chí ñuu Roma ta̱ Onesíforo ta̱ ni̱xi̱yo chí ñuu Éfeso, xi̱kunda̱a̱-inira ña̱ kivi chikaa̱nara veʼeka̱a á nda̱a̱ kivi kaʼnínara xa̱ʼa̱ ña̱ nda̱kutáʼanra xíʼin ta̱ Pablo (2 Tim. 1:16-18). Na̱ hermano na̱ ñuu Rusia ndíku̱nna yichi̱ ta̱yóʼo. Tá ndátiinna ku̱a̱chi xíʼin na̱ hermano xa̱ʼa̱ ña̱ kándíxana Ndióxi̱, ku̱a̱ʼání na̱ hermano xáʼa̱nna tribunal ña̱ va̱ʼa chikaa̱na ndee̱ xíʼin na̱yóʼo. Ni kúnda̱a̱-inina ña̱ kivi chikaa̱nana veʼeka̱a. ¿Á íyo tu̱ʼvaún ña̱ keʼún táʼan ña̱ kéʼé na̱yóʼo? Ná kaʼviyó xa̱ʼa̱ na̱ xi̱ndasakáʼnu Ndióxi̱ tiempo xi̱naʼá xíʼin na̱ íyo tiempo vitin na̱ sa̱ndíkona-ini ta xi̱kusi̱í-inina ni i̱xandi̱va̱ʼana xíʼinna.

6. ¿Ndáa ki̱ʼva kundiku̱nyó yichi̱ Jehová tá sándi̱koyó-ini iinna? (Koto na̱ʼná).

⁶ Ná kuniso̱ʼoyóna. Tá xi̱kuni̱na kaʼnína ta̱ profeta Elías, ni̱ka̱ʼa̱nra xíʼin Jehová xa̱ʼa̱ ña̱yóʼo ta va̱ʼaní xi̱niso̱ʼora miíra ni xi̱kunda̱a̱va-inira xíʼin ña̱ xi̱ndoʼora. Ni ku̱a̱ʼání yichi̱ ni̱ka̱ʼa̱n ta̱ profeta yóʼo xíʼin Jehová xa̱ʼa̱ ña̱ xi̱ndoʼora, ndiʼiva tiempo xi̱niso̱ʼora ña̱ ni̱ka̱ʼa̱nra xíʼinra (1 Rey. 19:9, 10, 14). Ná ndakanixi̱níyó xa̱ʼa̱ ta̱ profeta Habacuc. Iin yichi̱ ni̱ka̱ʼa̱nra xíʼin Jehová xa̱ʼa̱ ña̱ xi̱sandíʼi̱-inira soo su̱ví xíʼin ña̱ to̱ʼó níka̱ʼa̱nra xíʼin Ndióxi̱ soo ta̱yóʼo kǒo nísa̱a̱ra xíʼinra (Hab. 1:2, 3). Saátu tiempo vitin va̱ʼaníva xíniso̱ʼo Jehová miíyó ni xa̱a̱ kúnda̱a̱-inira ndáaña xíniñúʼuyó. ¿Ndáa ki̱ʼva kundiku̱nyó yichi̱ra? Viíní ná kuniso̱ʼoyó tá káʼa̱n na̱ hermano xíʼinyó xa̱ʼa̱ ña̱ ndóʼona (Sant. 1:19). Ná kǒo ka̱ʼnu̱yó tu̱ʼunna ta ná kǒo sa̱a̱yó tá káʼa̱nna iin ña̱ va̱ása va̱ʼa á tá ku̱a̱ʼá yichi̱ káʼa̱nna xa̱ʼa̱ ña̱ ndóʼona (Ecl. 7:9).

7. ¿Ndáa ki̱ʼva kunda̱a̱-iniyó ndáaña xíniñúʼu na̱ yáʼa nu̱ú tu̱ndóʼo?

⁷ Ná kotoyó ndáaña kúú mií ña̱ ndixa xíniñúʼuna. Jehová kivi kunda̱a̱-inira ndáaña ndóʼo iin na̱ yiví soo miíyó va̱ása kívi kunda̱a̱-iniyó. Iin ki̱ʼva ña̱ kunda̱a̱-iniyó ndáaña xíniñúʼu iin na̱ yiví kúú ña̱ viíní kuniso̱ʼoyó ña̱ káʼa̱nna. Sana kivi ndakanixi̱níyó ndáaña kúni̱yó ná keʼéna xa̱ʼa̱yó tá miíyó ná ndoʼo táʼa̱n ña̱ ndóʼona. Soo ná ndakaʼányó chi iin tá iinyó xa̱a̱ síín síín ndákanixi̱níyó. Va̱ʼaka ná taváyó tiempo ña̱ vií kuniso̱ʼoyó ña̱ káʼa̱nna xíʼinyó ta viíní ná nda̱ka̱tu̱ʼunyóna ña̱ va̱ʼa kunda̱a̱-iniyó ndáaña ndóʼona á ndáaña xíniñúʼuna (Prov. 20:5).

8. ¿Ndáa ki̱ʼva sa̱ndíko ta̱ Jesús ini ñá Marta xíʼin ñá María ta ndáaña sákuaʼayó? (Koto na̱ʼná).

⁸ Ná ndakanixi̱níyó ndáa ki̱ʼva sa̱ndíko ta̱ Jesús ini ña̱ Marta xíʼin ña̱ María tá ni̱xi̱ʼi̱ ki̱ʼvaná ta̱ Lázaro. Ni inkáchi ni̱xo̱ʼvi̱na xa̱ʼa̱ ña̱ ni̱xi̱ʼi̱ ku̱ʼvaná, viíní sa̱ndíkora-ini iin tá iinná. Tá na̱túʼun ñá Marta xíʼin ta̱ Jesús, ta̱yóʼo ni̱ka̱ʼa̱nra xíʼinñá xa̱ʼa̱ ña̱ ndataku na̱ ni̱xi̱ʼi̱, ña̱yóʼo chi̱ndeétáʼanña xíʼinñá ña̱ kandíxakañá ña̱ káʼa̱n Ndióxi̱. Tá nda̱kutáʼan ñá María xíʼin ta̱ Jesús ta xákuñá ni̱xa̱a̱ñá nu̱úra, ta̱yóʼo kǒo níka̱ʼa̱nra xíʼinñá xa̱ʼa̱ ña̱ ndataku na̱ ni̱xi̱ʼi̱. Ta̱yóʼo xa̱kura xíʼinñá ta ni̱nda̱ka̱tu̱ʼunrañá ndáa míí chi̱kaa̱na ta̱ Lázaro (Juan 11:20-35). ¿Ndáaña sákuaʼayó xíʼin ña̱yóʼo? Xa̱a̱ síín xa̱a̱ síín xíniñúʼu sandi̱koyó-ini iin tá iinna, saáchi xíniñúʼu kunda̱a̱-iniyó ndáaña xíniñúʼuna.

9. ¿Ndáa ki̱ʼva chíndeétáʼan Biblia xíʼinyó ña̱ sandíkoyó-ini inkana? (Romanos 15:4, 5).

⁹ Ná kuniñúʼuyó Biblia. Tá káʼviyó texto nu̱ú iin na̱ yiví sándi̱koyó-inina xíʼin tu̱ʼun Ndióxi̱ ta kándíxakana ña̱ koo chí nu̱únínu (kaʼvi Romanos 15:4, 5). Ta ña̱ ndátuna ndakiʼinna chí nu̱únínu chíkaa̱ña ndee̱ xíʼinna ta̱ sándi̱koña-inina (Is. 40:31). ¿Ndáa ki̱ʼva kunda̱a̱-iniyó ndáa texto kúú ña̱ kaʼviyó nu̱úna? Sava na̱ hermano xa̱a̱ kúúmiína texto ña̱ va̱ʼa chikaa̱na ndee̱ xíʼin inkana tá kúú, texto ña̱ va̱xi nu̱ú káʼa̱nña “Consuelo” nu̱ú Textos bíblicos para la vida cristiana va̱ʼaní chíndeétáʼanña xíʼinna. Saátu kivi ka̱ʼa̱nyó xíʼin Jehová ña̱ ná chindeétáʼanra xíʼinyó ña̱ vií ná kuniñúʼuyó tu̱ʼunra. Espíritu santo Ndióxi̱ kivi chindeétáʼanña xíʼinyó ña̱ ndakaʼányó xa̱ʼa̱ sava texto (Juan 14:26).

10. Tá sándi̱koyó-ini inkana, ¿nda̱chun ndáyáʼviní vií ka̱ʼa̱nyó xíʼinna?

¹⁰ Vií ná ka̱ʼa̱nyó xíʼinna. Nda̱a̱ táki̱ʼva xa̱a̱ ku̱ndaa̱-iniyó tu̱ʼun griego ña̱ sandíkoyó-inina saátu kúni̱ kachiña ña̱ taxiyó consejo ndaʼa̱na. Sava yichi̱ tá sándi̱koyó-ini iinna, xíniñúʼu taxiyó consejo ndaʼa̱na ña̱ va̱ʼa nasamana ña̱ ndákanixi̱nína. Ta ña̱ va̱ʼa keʼéyó ña̱yóʼo xíniñúʼu ndakani vií xi̱níyó ndáaña ka̱ʼa̱nyó ña̱ va̱ʼa kǒo saxóʼvi̱yó inina (Prov. 12:18). Tá ni̱ka̱ʼa̱n Jehová xíʼin ta̱ Elías va̱ʼaní yichi̱ chi̱núura nu̱úyó. Ta̱ profeta yóʼo nda̱kanixi̱níra ña̱ va̱ása va̱ʼa níkeʼéra chiñu ña̱ xi̱kuumiíra ta iinlá miíra kúú ta̱ xi̱kachíñu nu̱ú Ndióxi̱ chí ñuu Israel. Jehová chi̱ndeétáʼanra xíʼinra ña̱ na̱samara ña̱ ndákanixi̱níra ta kǒo níka̱ʼa̱nra xíʼinra ña̱ va̱ása va̱ʼa íyo ña̱ xi̱ndakanixi̱níra (1 Rey. 19:15-18). Saátu miíyó kivi chindeétáʼanyó xíʼin na̱ hermano tá vií ndáka̱xinyó tu̱ʼun ña̱ ka̱ʼa̱nyó xíʼinna. Viíní ná ka̱ʼa̱nyó tá táxiyó discurso á tá táxiyó comentario ti̱xin reunión. Saá kúú ña̱ chikaa̱yó ndee̱ xíʼin na̱ hermano ta ndasandakúyó inina.

11. Na̱ yáʼa nu̱ú tu̱ndóʼo, ¿ndáaña xíniñúʼuníkana? (1 Juan 3:18).

¹¹ Ná chindeétáʼanyó xíʼinna. Sava yichi̱ kǒo xíniñúʼu sándi̱ko kuitíyó ini na̱ xóʼvi̱ (kaʼvi 1 Juan 3:18). Va̱ʼaní yichi̱ chi̱núu ta̱ Bernabé nu̱úyó saáchi ni̱xi̱kóra ñuʼú ña̱ xi̱kuumiíra ta ta̱xira xu̱ʼún ndaʼa̱ na̱ apóstol ña̱ va̱ʼa chindeétáʼanna xíʼin na̱ hermano na̱ sa̱kán nda̱kuchi chi ndáʼviní ni̱xi̱yona (Hech. 4:36, 37). Saátu kéʼé na̱ hermano tiempo vitin. Iin ñá hermana ñá ñuu Polonia ñá naní Gabriela, nda̱kavaní-iniñá tá ku̱unní sa̱vi̱ ta ndi̱ʼi-xa̱ʼa̱ veʼeñá. Ñáyóʼo káchiñá: “Xíʼin na̱ yivái̱ ni̱xi̱yoi̱, ni̱yi̱ʼviníndi̱ ta ni̱ndi̱ʼi̱ní-inindi̱. Nda̱kanixi̱níi̱ ndáaña keʼéndi̱ ña̱ va̱ʼa ndasaviíndi̱ veʼendi̱. Ku̱a̱ʼání na̱ hermano ki̱xina chi̱ndeétáʼanna xíʼinndi̱ ta ti̱xin iin ki̱vi̱ ku̱a̱ʼání ña̱ʼa sa̱ndáʼana. Ña̱ ndo̱ʼondi̱ yóʼo chi̱ndeétáʼanña xíʼi̱n ña̱ kandíxakai̱ Jehová saáchi va̱ʼaní níʼira yichi̱ nu̱ú na̱ ñuura ña̱ va̱ʼa sandíkona-ini na̱ xóʼvi̱”.

12. ¿Ndáa ki̱ʼva chíndeétáʼanyó xíʼin na̱ hermano tá kúndeé-iniyó yáʼayó nu̱ú tu̱ndóʼo?

¹² Ná kundeé-iniyó tá yáʼayó nu̱ú tu̱ndóʼo. Ta̱ Pablo ni̱ka̱ʼa̱nra xíʼin na̱ cristiano na̱ ñuu Tesalónica xa̱ʼa̱ ña̱ kúndeé-inina xíʼin ña̱ nda̱kú íyo inina xíʼin Ndióxi̱, ña̱yóʼo sa̱ndíkoña-inira ta chi̱kaa̱ña ndee̱ xíʼinra. Tá ki̱ʼinra kuenta ña̱ ke̱ʼéra xa̱ʼa̱na va̱ʼaníva chi̱ndeétáʼanña xíʼinna (1 Tes. 3:5-8). Ta saátu ku̱ndaa̱-inira ña̱ kivi chikaa̱ra ndee̱ xíʼin na̱ hermano nda̱a̱ na̱ kǒo xíni̱ miíra tá nda̱kú ná koo inira xíʼin Jehová ni ná ya̱ʼara nu̱ú tu̱ndóʼo (Col. 2:1, 2). Ta ki̱ʼva saá íyo tiempo vitin, na̱ hermanoyó kúsi̱íní-inina tá kíʼinna kuenta ña̱ chíndeétáʼan Jehová xíʼinna ña̱ kundeé-inina ya̱ʼana nu̱ú tu̱ndóʼo.

13. ¿Ndáaña xíniñúʼu keʼéyó ta nda̱chun?

¹³ Kúee ná koo iniyó. Ni chíkaa̱yó ndee̱ ña̱ sandíkoyó-ini iin na̱ hermano, sana su̱ví ndi̱ku̱n chindeétáʼanña xíʼinna. Biblia táxiña consejo yóʼo ndaʼa̱yó: “Ndakundeéndó sandíkondó-ini táʼanndó”. Ña̱yóʼo kúni̱ kachiña ña̱ ndiʼi tiempo ná keʼéyóña (1 Tes. 5:11). Ña̱kán xíniñúʼu kúee koo iniyó ta kǒo ndakava-iniyó (1 Tes. 5:14). Soo tá miíyó xíniñúʼu ña̱ sandíkona-iniyó, ¿ndáaña kivi keʼéyó?

NDÁAÑA KEʼÉYÓ TÁ XÍNIÑÚʼU SANDÍKONA-INIYÓ

14, 15. ¿Ndáaña xíniñúʼu keʼéyó tá ndíʼi̱ní-iniyó?

¹⁴ Ná ka̱ʼa̱nyó xíʼin Jehová. Tá ndíʼi̱ní-iniyó ná ka̱ʼa̱nyó xíʼin Jehová ña̱ ná sandíkora-iniyó (Sal. 94:19). Káxi ná koo ña̱ ka̱ʼa̱nyó xíʼinra xa̱ʼa̱ ña̱ sándi̱ʼi̱-iniyó (Sal. 62:8). Xa̱a̱ kúnda̱a̱va-inira ndáaña xíniñúʼuyó tá kúma̱níka ka̱ʼa̱nyó xíʼinra soo tá káʼa̱nyó xíʼinra xa̱ʼa̱ ndiʼi ña̱ ndóʼoyó, náʼa̱yó ña̱ kándíxayóra. Jehová ndákuiinra ña̱ káʼa̱n na̱ nda̱kú íyo ini xíʼinra (Mar. 11:24). Filipenses 4:6, 7 sándakaʼánña ña̱yóʼo miíyó: “Ndukúndó ña̱ xíniñúʼundó [nu̱ú Ndióxi̱] tá ná keʼéndó ña̱yóʼo, Ndióxi̱ va̱ʼaní sandíkora-inindó, ta nda̱a̱ miíndó kǒo kunda̱a̱-ini ndáa ki̱ʼva sandíkora-inindó”.

¹⁵ Ná ka̱ʼa̱nyó xíʼinna ña̱ ná chindeétáʼanna xíʼinyó. Ná ka̱ʼa̱nyó xíʼin iin na̱ migoyó á iin na̱ anciano na̱ xa̱a̱ xu̱xa-ini xíʼin tu̱ʼun Ndióxi̱ xa̱ʼa̱ ña̱ ndóʼoyó. Na̱ hermano kivi sandíkona-iniyó soo kǒo kivi kunda̱a̱-inina ndáaña ndóʼoyó á ndáaña xíniñúʼuyó tá kǒo káʼa̱nyó xíʼinna (Prov. 14:10). Ña̱kán ná ka̱ʼa̱nyó xíʼinna ña̱ ná kuniso̱ʼona miíyó á ña̱ ka̱ʼa̱nna xíʼinyó xa̱ʼa̱ texto á artículo ña̱ chi̱ndeétáʼan xíʼin miína.

16. Tá chíkaa̱na ndee̱ xíʼinyó, ¿ndáaña kivi ka̱ʼa̱nna xíʼinyó ta ndáaña xíniñúʼu ndakaʼányó xa̱ʼa̱?

¹⁶ Kúee ná koo iniyó ta ná koo káʼnu-iniyó xa̱ʼa̱na. Tá chíkaa̱ na̱ hermano ndee̱ xíʼinyó sana ka̱ʼa̱nna ña̱ va̱ása va̱ʼa xíʼinyó. Tá kúú kivi ka̱ʼa̱nna á keʼéna iin ña̱ʼa ña̱ kivi sandákava-iniyó nu̱úka ña̱ chikaa̱na ndee̱ xíʼinyó. Tá saá ná kuu, kúee ná koo iniyó xíʼinna (1 Cor. 13:4, 7). Ná ndakaʼányó xa̱ʼa̱ ña̱ káʼa̱n Santiago 3:2: “Na̱ kǒo kíʼvi ku̱a̱chi xíʼin tu̱ʼun ña̱ káʼa̱nna, na̱ kǒo ku̱a̱chi kúúmií kúúna”. Ña̱kán ná kiʼinyó kuenta xíʼin ña̱ va̱ʼa ña̱ kéʼé na̱ hermano xa̱ʼa̱yó. Ná ndakaʼányó chi “na̱ yiví kúni̱vana keʼéna ña̱ va̱ʼa, soo vitánína” (Mat. 26:41).

17. ¿Ndáaña xíniñúʼu keʼéyó?

¹⁷ Ndiʼivayó xíniñúʼu ña̱ ná chikaa̱na ndee̱ xíʼinyó ta sandíkona-iniyó, saáchi ndóoyó ki̱vi̱ nu̱ú ndíʼi ta yo̱ʼvi̱níka koo ña̱yóʼo saáchi na̱ sáa̱-ini xíni Ndióxi̱ sa̱a̱ka-inina kunina miíyó. Ña̱kán ná chikaa̱yó ndee̱ ña̱ sandíkoyó-ini táʼanyó.