Tá xáʼa̱nyó reunión náʼa̱yó ña̱ va̱ʼa ña̱ kúúmiíyó

1, 2. a) ¿Ndáaña xíto Jehová tá xáʼa̱n na̱ yiví ña̱ Conmemoración? (Koto na̱ʼná). b) ¿Ndáaña sakúaʼayó nu̱ú artículo yóʼo?

¿NDÁAÑA xíni Jehová tá ku̱a̱ʼá na̱ yiví ndátaka ña̱ Conmemoración? Kǒo xíto kuitíra nda̱saa kúú na̱ yiví na̱ xáʼa̱n kán, chi xítora nda̱saa íyo iin iin na̱ xáʼa̱n. Xítora ndiʼi na̱ xáʼa̱n ku̱i̱ya̱ tá ku̱i̱ya̱. Sana savana xáʼa̱nna ni íyo tu̱ndóʼo nu̱úna. Inkana va̱ása xáʼa̱nna semana tá semana reunión ña̱ congregación, soo ndákanixi̱nína ña̱ xíniñúʼu ku̱ʼu̱nna ña̱ Conmemoración. Saátu xíto Jehová na̱ xáʼa̱n ña̱ yichi̱ nu̱ú, chi sana kúni̱na kunda̱a̱-inina xa̱ʼa̱ ña̱ kéʼéyó.

² Kúsi̱íva-ini Jehová ña̱ xítora ku̱a̱ʼá na̱ yiví xáʼa̱n Conmemoración (Luc. 22:19). Su̱ví ña̱ kíʼin Jehová kuenta xíʼin kúú nda̱saana xáʼa̱n chi ña̱ kíʼinra kuenta xíʼin kúú nda̱chun xáʼa̱nna. Nu̱ú artículo yóʼo sakúaʼayó xa̱ʼa̱ iin ña̱ʼa ña̱ ndáyáʼviní. Su̱ví kuití ña̱ Conmemoración xáʼa̱nyó chi saátu xáʼa̱nyó ndiʼi reunión ña̱ táxi Jehová ndaʼa̱yó. Ná kotoyó ndáaña chindeétáʼan xíʼinyó ña̱ va̱ʼa ku̱ʼu̱nyó ndiʼi reunión.

TÁ VITÁ-INIYÓ XÁʼA̱NYÓ REUNIÓN

3, 4. a) ¿Nda̱chun xáʼa̱nyó reunión? b) ¿Nda̱chun kǒo xíniñúʼu sandákooyó ku̱ʼu̱nyó Conmemoración? (1 Corintios 11:23-26).

³ Xáʼa̱nyó reunión chi saá ndásakáʼnuyó Ndióxi̱. Ta saátu xáʼa̱nyó chi kán kúú nu̱ú sánáʼa̱ Jehová miíyó. Na̱ yiví na̱ ni̱nuní kúni va̱ása kándíxana ña̱ sanáʼa̱ inkanana (3 Juan 9). Soo miíyó kúni̱yó ña̱ ná sanáʼa̱ Jehová xíʼin na̱ ñuura miíyó (Is. 30:20; Juan 6:45).

⁴ Ki̱vi̱ xáʼa̱nyó reunión, náʼa̱yó ña̱ kúúyó na̱ vitá-ini ta kúni̱yó ña̱ ná sanáʼa̱ Ndióxi̱ miíyó. Xáʼa̱nyó Conmemoración ña̱ ndakaʼányó xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó, ta su̱ví xíʼin ña̱ ndúxa kéʼéyó ña̱yóʼo chi kéʼéyó chiñu ña̱ xa̱ʼnda ta̱ Jesús tá ni̱ka̱ʼa̱nra: “Keʼékandó ña̱yóʼo ta ndakaʼánndó xa̱ʼíi̱” (kaʼvi 1 Corintios 11:23-26). Reunión yóʼo sándakaʼánña miíyó xa̱ʼa̱ ña̱ ndakiʼinyó chí nu̱únínu ta saátu sándákaʼánña miíyó ña̱ kúʼvi̱ní-ini Jehová xínira miíyó. Ta̱yóʼo xíni̱ra ña̱ su̱ví iin yichi̱ nu̱ú ku̱i̱ya̱ kuití xíniñúʼu chikaa̱ra ndee̱ xíʼinyó ta sandíkora iniyó. Xa̱ʼa̱ ña̱yóʼo táxira ña̱ íyo reunión ndiʼi semana ña̱ va̱ʼa sakúaʼakayó xa̱ʼa̱ra, ta káʼa̱nra xíʼinyó ña̱ ná ku̱ʼu̱nyó reunión. Ña̱ vitá iniyó chindeétáʼanña xíʼinyó ña̱ kuniso̱ʼoyóra tasaá taváyó tiempo ña̱ kaʼvi kúeeyó ña̱ va̱ʼa ku̱ʼu̱nyó reunión.

5. ¿Nda̱chun kúni̱ na̱ yiví na̱ vitá-ini ña̱ ná sanáʼa̱ Jehová miína?

⁵ Ndiʼi ku̱i̱ya̱, ku̱a̱ʼání na̱ yiví na̱ vitá-ini xíniso̱ʼona xa̱ʼa̱ Jehová ta kíxáʼana sákuaʼana xa̱ʼa̱ra (Is. 50:4). Savana siʼna xáʼa̱nna Conmemoración, saá kíxáʼana xáʼa̱nna ndiʼi reunión (Zac. 8:20-23). Tá kúú miíyó xíʼin na̱ sa̱kán kíxáʼa xáʼa̱n reunión kúsi̱íní-iniyó ndákiʼinyó consejo ña̱ táxi Ndióxi̱, saáchi ta̱yóʼo kúú ta̱ chíndeétáʼan xíʼinyó ta saátu sáka̱kura miíyó (Sal. 40:17). Iin ña̱ ndáyáʼvika nu̱úyó kúú ña̱ xáʼa̱nyó reunión nu̱ú inkaka ña̱ʼa, chi mií Jehová kúú ta̱ kána miíyó xíʼin se̱ʼera ta̱ Jesús, ta̱ kúʼvi̱ní-inira xínira (Mat. 17:5; 18:20; 28:20).

6. ¿Ndáaña chi̱ndeétáʼan xíʼin iin ta̱a ña̱ va̱ʼa ni̱xa̱ʼa̱nra Conmemoración?

⁶ Ku̱i̱ya̱ tá ku̱i̱ya̱ chíkaa̱yó ndee̱ ña̱ va̱ʼa kanayó na̱ yiví ña̱ ku̱ʼu̱nna Conmemoración ña̱ ndakaʼánna xa̱ʼa̱ ña̱ ni̱xi̱ʼi̱ ta̱ Jesús. Ku̱a̱ʼání na̱ yiví na̱ vitá-ini ndákiʼinna ña̱ va̱ʼa xa̱ʼa̱ ña̱ xáʼa̱nna. Ná kotoyó iin ejemplo. Xa̱a̱ íyo ku̱a̱ʼání ku̱i̱ya̱ ku̱u ña̱yóʼo, iin ta̱ hermano ta̱xira iin invitación ndaʼa̱ iin ta̱a, soo ta̱yóʼo ni̱ka̱ʼa̱nra ña̱ va̱ása kivi ku̱ʼu̱nra. Tá ñuú ña̱ koo Conmemoración nda̱kanda̱-ini ta̱ hermano yóʼo tá xi̱nira ña̱ ki̱xaa̱ ta̱yóʼo. Saátu ta̱ ta̱a yóʼo nda̱kanda̱-inira xa̱ʼa̱ ña̱ va̱ʼaní nda̱kiʼinnara, ta ki̱xáʼara xáʼa̱nra ndiʼi reunión. Ti̱xin ña̱ iin ku̱i̱ya̱ u̱ni̱ reunión kuití kúú ña̱ va̱ása níxa̱ʼa̱nra. ¿Ndáaña chi̱ndeétáʼan xíʼinra? Ta̱ hermano ta̱ ta̱xi invitación ndaʼa̱ra ni̱ka̱ʼa̱nra: “Iin ta̱ vitání-ini kúúra”. Kúnda̱a̱-iniyó ña̱ mií Jehová kúú ta̱ ka̱na miíra ña̱ va̱ʼa ndasakáʼnurara. Tiempo vitin testigo Jehová kúúra (2 Sam. 22:28; Juan 6:44).

7. ¿Ndáa ki̱ʼva chíndeétáʼan reunión xíʼin ña̱ káʼviyó Biblia xíʼinyó ña̱ vitá koo iniyó?

⁷ Ña̱ sákuaʼayó ti̱xin reunión xíʼin ña̱ káʼviyó nu̱ú Biblia chíndeétáʼanña xíʼinyó ña̱ vitá koo iniyó. Tá kúma̱níka koo Conmemoración, ti̱xin reunión káʼa̱nna xa̱ʼa̱ yichi̱ ta̱ Jesús ña̱ vitání ni̱xi̱yo inira ta nda̱a̱ ni̱xi̱ʼi̱ra xa̱ʼa̱yó. Tá xa̱a̱ ku̱nu̱mí koo ña̱ Conmemoración káʼa̱nna xíʼinyó ña̱ ná kaʼviyó ña̱ va̱xi nu̱ú Biblia, ña̱ káʼa̱n xa̱ʼa̱ ña̱ ni̱xi̱ʼi̱ ta̱ Jesús xíʼin xa̱ʼa̱ ña̱ nda̱takura. Ndiʼi ña̱yóʼo chíndeétáʼanña xíʼinyó ña̱ ná kundayáʼvi ña̱ ni̱xi̱ʼi̱ ta̱ Jesús nu̱úyó, ta saátu ña̱ vitá koo iniyó ta keʼéyó ña̱ kúni̱ Ndióxi̱ ni tá íxayo̱ʼvi̱ña xíʼinyó (Luc. 22:41, 42).

TÁ NDAKÚ INIYÓ XÁʼA̱NYÓ NDIʼI REUNIÓN

8. ¿Ndáa ki̱ʼva ni̱na̱ʼa̱ ta̱ Jesús ña̱ ndakúní ni̱xi̱yo inira?

⁸ Ta̱ Jesús ndakúní ni̱xi̱yo inira ta saátu kúni̱ miíyó keʼéyó. Ná ndakanixi̱níyó ndáa ki̱ʼva ni̱na̱ʼa̱raña tá xa̱a̱ ku̱nu̱mí kuvira. Xa̱a̱ xíni̱va ta̱ Jesús ña̱ si̱lóʼo kúma̱ní kixaa̱ na̱ sáa̱-ini xíni miíra ña̱ kundi̱va̱ʼana xíʼinra ta kaʼnínara (Mat. 20:17-19). Soo nisaá va̱ása níyi̱ʼvíra ña̱ kuvira. Tá ki̱xaa̱ ki̱vi̱ ña̱ kundoʼora ña̱yóʼo, ni̱ka̱ʼa̱nra xíʼin na̱ apóstolra na̱ ndóo xíʼinra jardín ña̱ Getsemaní: “Ndakuitandó, ta ná ku̱ʼu̱nyó chi xa̱a̱ va̱xi ta̱ ni̱xi̱kó yi̱ʼi̱” (Mat. 26:36, 46). Tá ni̱xa̱a̱ na̱ yiví ña̱ tiinnara, ta̱yóʼo ku̱yatinra nu̱ú na̱ yiví kán ta ni̱ka̱ʼa̱nra xíʼinna ña̱ miíra kúú ta̱ nándukúna, ta saátu ni̱ka̱ʼa̱ntura xíʼin na̱ soldado ña̱ ná taxina ná ku̱ʼu̱n na̱ apóstolra (Juan 18:3-8). ¿Á su̱ví ña̱ nda̱a̱ kúú ña̱ ni̱na̱ʼa̱ra ña̱ ndakúní ni̱xi̱yo inira? Tiempo vitin, tá kúú na̱ ku̱ʼu̱n chí ndiví xíʼin na̱ koo nu̱ú ñuʼú yóʼo chíkaa̱níyó ndee̱ ña̱ ndakú koo iniyó táki̱ʼva ke̱ʼé ta̱ Jesús. ¿Nda̱saa kivi ndakú koo iniyó?

9. a) ¿Nda̱chun kúú ña̱ xíniñúʼu ndakú koo iniyó ña̱ va̱ʼa ku̱ʼu̱nyó ndiʼi reunión? b) ¿Ndáa ki̱ʼva chíndeétáʼan ña̱ kéʼéyó xíʼin na̱ hermano na̱ ñúʼu veʼeka̱a? (Koto na̱ʼná)

⁹ Sana íyo ña̱ íxayo̱ʼvi̱ xíʼinyó ña̱ ku̱ʼu̱nyó ndiʼi reunión. Tá ña̱yóʼo kúú ña̱ ndóʼoyó, xíniñúʼu ndakú koo iniyó. Sava na̱ hermano kúúmiína kue̱ʼe̱, kúsuchí-inina á ndákava-inina. Inkatuna kúndeé-inina ni íxandi̱va̱ʼa na̱ veʼena xíʼinna á ña̱ kéʼé na̱ chíñu xíʼinna. Ná ndakanixi̱níyó xa̱ʼa̱ na̱ hermano na̱ ñúʼu veʼeka̱a xa̱ʼa̱ ña̱ kándíxana Ndióxi̱. ¿Á xa̱a̱ ndákanixi̱níyó ña̱ kivi chindeétáʼan ña̱ kéʼéyó xíʼinna? (Heb. 13:3). Tá xíniso̱ʼona ña̱ chíkaa̱yó ndee̱ ña̱ ndásakáʼnuyó Jehová ni íyo tu̱ndóʼo nu̱úyó chíndeétáʼanníña xíʼinna ña̱ ndakúka koo inina ta kandíxakanara. Ña̱yóʼo kúú ña̱ ndo̱ʼo ta̱ apóstol Pablo. Tá xi̱ndika̱a̱ra veʼeka̱a ñuu Roma, xi̱kusi̱íní-inira tá xi̱xiniso̱ʼora ña̱ chíkaa̱ní na̱ hermano ndee̱ ña̱ ndásakáʼnuna Ndióxi̱ (Filip. 1:3-5, 12-14). Tá si̱lóʼo kúma̱ní ña̱ kitara veʼeka̱a á tá xa̱a̱ ki̱tara ka̱ʼyira carta ña̱ Hebreos. Nu̱ú ña̱yóʼo ni̱ka̱ʼa̱nra xíʼin na̱ hermano ña̱ va̱ása xíniñúʼu sandákoona ña̱ ku̱ʼu̱nna reunión, ta ni̱ka̱ʼa̱nra: “Va̱ása sandákoondó ña̱ kuʼvi̱-inindó kuni táʼanndó” (Heb. 10:24, 25; 13:1).

10, 11. a) ¿Ndáana xíniñúʼu ka̱ʼa̱nyó xíʼin ña̱ ku̱ʼu̱nna Conmemoración? b) ¿Ndáa ki̱ʼva chíndeétáʼan Efesios 1:7 xíʼinyó ña̱ keʼéyó ña̱yóʼo?

¹⁰ Saátu náʼa̱yó ña̱ ndakú íyo iniyó tá káʼa̱nyó xíʼin na̱ veʼeyó, na̱ káchíñu xíʼinyó, na̱ káʼvi xíʼinyó á na̱ ndóo yatin xíʼinyó ña̱ ná ku̱ʼu̱nna Conmemoración. ¿Nda̱chun kéʼéyó ña̱yóʼo? Saáchi táxiyó tíxa̱ʼvi ndaʼa̱ Jehová xíʼin ta̱ Jesús xa̱ʼa̱ ña̱ ke̱ʼéna xa̱ʼa̱yó. Ta saátu kúni̱yó ña̱ ná sakúaʼana ndáaña va̱ʼa ndakiʼinna xa̱ʼa̱ ña̱ va̱ʼaní-ini Jehová, chi ta̱xira se̱ʼera ña̱ ni̱xi̱ʼi̱ra xa̱ʼa̱yó (kaʼvi Efesios 1:7; Apoc. 22:17).

¹¹ Ki̱vi̱ xáʼa̱nyó reunión náʼa̱yó inka ña̱ʼa ña̱ ndáyáʼviní. Ta mií Jehová xíʼin ta̱ Jesús ku̱a̱ʼání yichi̱ náʼa̱na ña̱yóʼo.

XÁʼA̱NYÓ REUNIÓN CHI KÚʼVI̱-INIYÓ XÍNIYÓ JEHOVÁ XÍʼIN TA̱ JESÚS

12. a) ¿Nda̱chun kúʼvi̱níka-iniyó xíniyó Jehová xíʼin ta̱ Jesús tá xáʼa̱nyó reunión? b) Nda̱a̱ táki̱ʼva káʼa̱n 2 Corintios 5:14, 15, ¿ndáa ki̱ʼva kundiku̱nyó yichi̱ ta̱ Jesús?

¹² Tá xáʼa̱nyó reunión kúʼvi̱ka-iniyó xíniyó Jehová xíʼin ta̱ Jesús. Ta, ¿nda̱chun? Saáchi tá xáʼa̱nyó reunión sándakaʼánna miíyó xa̱ʼa̱ ndiʼi ña̱ ke̱ʼéna xa̱ʼa̱yó (Rom. 5:8). Ña̱ Conmemoración kúú ña̱ sándakaʼán miíyó ña̱ kúʼvi̱ní-ini Jehová xíʼin ta̱ Jesús xínina miíyó, ta saátu ña̱ kúʼvi̱ní-inina xínina na̱ ta̱ʼán sakúaʼa xa̱ʼa̱na. Táxiníyó tíxa̱ʼvi ndaʼa̱na, ta xa̱ʼa̱ ña̱yóʼo kúni̱yó kundiku̱nyó yichi̱ ta̱ Jesús xíʼin ndiʼi ña̱ kéʼéyó ndiʼi ki̱vi̱ (kaʼvi 2 Corintios 5:14, 15). Saátu xíʼin ndiʼi níma̱yó ndásakáʼnuyó Jehová xa̱ʼa̱ ña̱ ta̱xira se̱ʼera ta̱ Jesús ña̱ ni̱xi̱ʼi̱ra xa̱ʼa̱yó. Ta xa̱ʼa̱ ña̱yóʼo ña̱ kivi keʼéyó kúú ña̱ taxiyó comentario ti̱xin reunión xíʼin ndiʼi níma̱yó.

13. ¿Ndáa ki̱ʼva na̱ʼa̱yó ña̱ kúʼvi̱ní-iniyó xíniyó Jehová xíʼin se̱ʼera ta̱ Jesús?

¹³ Náʼa̱yó ña̱ kúʼvi̱ní-iniyó xíniyó Jehová xíʼin se̱ʼera tá chíkaa̱yó ndee̱ ña̱ keʼéyó ña̱ kúni̱na. Ña̱ va̱ʼa ku̱ʼu̱nyó reunión xíniñúʼu keʼéyó ku̱a̱ʼání ña̱ʼa. Tá kúú ku̱a̱ʼá congregación kúúmiína reunión ña̱ xíyo ma̱ʼñú semana tá xa̱a̱ ndíʼi káchíñuyó tá kúnaaníyó. Ta inka reunión xíyoña tándíʼi semana, ki̱vi̱ tá ndákindee̱ na̱ yiví. ¿Á kíʼin Jehová kuenta xa̱ʼa̱ ña̱ xáʼa̱nyó reunión ni ku̱naaníyó? Kíʼinvara kuenta. Soo tá chíkaa̱yó ndee̱ ña̱ keʼéyó ndiʼi ña̱yóʼo, saá kúsi̱íníka-ini Jehová xíʼin ña̱ kéʼéyó (Mar. 12:41-44).

14. ¿Ndáa yichi̱ va̱ʼaní chi̱núu ta̱ Jesús nu̱úyó?

¹⁴ Ta̱ Jesús chi̱núura iin yichi̱ va̱ʼaní nu̱úyó xa̱ʼa̱ ña̱ xíniñúʼu keʼéyó xa̱ʼa̱ inkana ña̱ kuʼvi̱-iniyó kuniyóna. Soo su̱ví nda̱saa ni̱xi̱ʼi̱ra xa̱ʼa̱ na̱ discípulora chi saátu xi̱ndi̱ʼi̱-inira xa̱ʼa̱na nu̱úka ña̱ keʼéra ña̱ kúni̱ miíra. Saátu xi̱tavára tiempo ña̱ koora xíʼinna ni ku̱naaníra (Luc. 22:39-46). Ta saátu xi̱chindeétáʼanra xíʼin inkana (Mat. 20:28). Tá ndixa kúʼvi̱-iniyó xíniyó Jehová xíʼin na̱ hermanoyó, ku̱ʼu̱nyó Conmemoración xíʼin ndiʼi reunión.

15. ¿Ndáana kúni̱kayó chindeétáʼanyó xíʼin?

¹⁵ Ndiʼiyó na̱ ñuu Ndióxi̱ inkáchi ndásakáʼnuyó Jehová, ta kúsi̱íní-iniyó ña̱ xíniñúʼuyó tiempoyó xíʼin ndee̱yó ña̱ va̱ʼa kanayó na̱ yiví ña̱ va̱ʼa ná ndasakáʼnunara. Soo ña̱ kúni̱kayó kúú ña̱ chindeétáʼanyó xíʼin na̱ sa̱ndákoo ña̱ ndasakáʼnuna Ndióxi̱ (Gál. 6:10). Náʼa̱yó ña̱ kúʼvi̱-iniyó xíniyóna tá káʼa̱nyó xíʼinna ña̱ ná ku̱ʼu̱nna ndiʼi reunión, ta saátu ña̱ ná ku̱ʼu̱nna Conmemoración. Táki̱ʼva kéʼé Jehová xíʼin ta̱ Jesús, kúsi̱íní-iniyó ña̱ ndándikó tuku na̱ sa̱ndákoo ña̱ ndásakáʼnuna Ndióxi̱ (Mat. 18:14).

16. a) ¿Ndáa ki̱ʼva chikaa̱yó ndee̱ xíʼin táʼanyó, ta ndáa ki̱ʼva chíndeétáʼan reunión xíʼinyó? b) Tá xíyo Conmemoración, ¿nda̱chun ndáyáʼviní ndakaʼányó xa̱ʼa̱ tu̱ʼun ña̱ ni̱ka̱ʼa̱n ta̱ Jesús ña̱ va̱xi nu̱ú Juan 3:16?

¹⁶ Ti̱xin loʼo ki̱vi̱ xíniñúʼu ku̱ʼu̱nyó taxiyó invitación ndaʼa̱ ndiʼi na̱ yiví ña̱ va̱ʼa ku̱ʼu̱nna Conmemoración xíʼinyó, ña̱ koo xi̱kuaá lunes 22 tí marzo 2027 (koto recuadro ña̱ naní “¿Á kanayó inkaka na̱ yiví?”). Ndiʼi tiempo xíniñúʼu chikaa̱yó ndee̱ xíʼin táʼanyó ña̱ va̱ʼa ku̱ʼu̱nyó ndiʼi reunión, chi xa̱a̱ ku̱yatinní ndiʼi-xa̱ʼa̱ ñuyǐví yóʼo. Xa̱ʼa̱ ña̱yóʼo xíniñúʼu ku̱ʼu̱nyó ndiʼi reunión ta ña̱yóʼo chindeétáʼan xíʼinyó ña̱ va̱ʼa na̱ʼa̱yó ña̱ vitá íyo iniyó, ña̱ ndakú íyo iniyó ta saátu ña̱ kúʼvi̱-iniyó xíni táʼanyó (1 Tes. 5:8-11). Ná na̱ʼa̱yó nu̱ú Jehová ta saátu nu̱ú se̱ʼera ta̱ Jesús ña̱ táxiyó tíxa̱ʼvi ndaʼa̱na xa̱ʼa̱ ña̱ kúʼvi̱-inina xínina miíyó (kaʼvi Juan 3:16).