Tu̱ʼun va̱ʼa ña̱ káʼa̱n tu̱ʼun Ndióxi̱: Chíndeétáʼanva Ndióxi̱ xíʼin na̱ sa̱ndákoo ñuuna

Ndiʼi ku̱i̱ya̱ ku̱a̱ʼání na̱ yiví sándakoona veʼena xa̱ʼa̱ ña̱ íyoní ku̱a̱chi á inkaka tu̱ndóʼo ñuuna ta ku̱a̱ʼa̱nna kundoona inka ñuu. ¿Á xa̱a̱ yáʼa miíún nu̱ú iin tu̱ndóʼo táʼan ña̱yóʼo? Tá saá íyoña, íyova iin na̱ kivi chindeétáʼan xíʼún: ta̱yóʼo kúú Ndióxi̱. Ta̱kán káʼa̱nra ña̱ taxira iin ña̱ va̱ʼaní ndaʼún chí nu̱únínu. Ta nu̱ú Biblia kivi sakúaʼún xa̱ʼa̱ ña̱yóʼo.

Ta̱ Christos Stylianides ta̱ xi̱kuu comisario chí Unión Europeaa káchira: “Na̱ xínu nu̱ú ku̱a̱chi xíʼin na̱ kée ku̱a̱ʼa̱n inka ñuu,b xíniñúʼunína ña̱ ná chindeétáʼanyó xíʼinna ta saátu xíniñúʼuna ña̱ ná ka̱ʼa̱nyó xíʼinna ña̱ kixaa̱va iin ki̱vi̱ ña̱ ndakiʼinna ña̱ va̱ʼa”. Tá íyo iin ña̱ va̱ʼa ndátu iin na̱ yiví ndakiʼinna chí nu̱únínu, va̱ʼaníva kúnina ta chíkaa̱na ndee̱ ña̱ kǒo ndakavaní-inina. Soo saátu xíniñúʼuna ña̱ sandíkona-inina ña̱ va̱ʼa nandóso-inina xa̱ʼa̱ ña̱ ndo̱ʼona.

Ta̱ Emmanuel ta̱ ñuu Haití káchira: “Tá ki̱tai̱ ñui̱ sa̱ndákoi̱ na̱ veʼi̱ ñuu kán, xa̱ʼa̱ ña̱kán ku̱suchíní-inii̱, ni̱yi̱ʼvíníi̱ ta ni̱ndi̱ʼi̱ní-inii̱, va̱ása níxi̱kunda̱a̱ka-inii̱ ndáaña keʼíi̱”.

¿Á xa̱a̱ ndóʼún táʼan ña̱yóʼo? Tá sa̱ndákoún veʼún, vitin kúú ña̱ xíniñúʼuníkaún ña̱ sandíkona-iniún ta ka̱ʼa̱nna tu̱ʼun va̱ʼa xíʼún. ¿Ndáa ki̱ʼva kivi chindeétáʼan tu̱ʼun Ndióxi̱ xíʼún?

Tu̱ʼun Ndióxi̱ sándi̱koña-iniyó

Biblia káchiña: “Jehovác [...] kúʼvi̱-inira xínira na̱ ke̱e inka ñuu” (Deuteronomio 10:17, 18).

Biblia káchiña: “Jehová íyo yatinra xíʼin ndiʼi na̱ kána miíra” (Salmo 145:18).

Biblia káchiña: “Ni loʼo va̱ása xíniñúʼu ndakanixi̱níyó ña̱ kéʼé Ndióxi̱ ta̱ nda̱a̱ ña̱ va̱ása va̱ʼa, [...] ndiʼi tiempo kéʼé Ndióxi̱ ta̱ kúúmií ndiʼi ndee̱ ña̱ nda̱kú” (Job 34:10, 12).

Ña̱yóʼo kúni̱ kachiña ña̱ su̱ví Ndióxi̱ kúú ta̱ táxi tu̱ndóʼo ña̱ ndóʼoyó. Su̱ví ta̱kán kúú ta̱ kúúmií ku̱a̱chi xa̱ʼa̱ ña̱ xóʼvi̱ún ta ni va̱ása chíndaʼára tu̱ndóʼo nu̱ún ña̱ va̱ʼa kotondosóra yóʼó.

Ña̱ va̱ʼa ña̱ káʼa̱n tu̱ʼun Ndióxi̱ koo chí nu̱únínu

Ña̱ Biblia káʼa̱nña xíʼinyó ndáaña va̱ʼa kúú ña̱ taxi Ndióxi̱ ndaʼa̱yó chí nu̱únínu. Koto ndáa ki̱ʼva xa̱a̱ chíndeétáʼan ña̱yóʼo xíʼin sava na̱ yiví na̱ sándakoo veʼena xa̱ʼa̱ ña̱ íyo tu̱ndóʼo ñuuna.

Biblia káchiña: Ndióxi̱ “ndaya̱kúnra ti̱kui̱í nu̱úna, ta va̱ása kuvikana, ni va̱ása kusuchíka-inina, ni va̱ása kuakukana, ni va̱ása xo̱ʼvi̱kana” (Apocalipsis 21:4).

Ña̱yóʼo kúni̱ kachiña ña̱ kixaa̱ iin ki̱vi̱ ña̱ va̱ása xo̱ʼvi̱kayó. Ndióxi̱ káʼa̱nra ña̱ sandíʼi-xa̱ʼa̱ra ndiʼi tu̱ndóʼo ña̱ sákusuchíní-iniyó tiempo vitin.

Ñá Karla ñá ñuu El Salvador káchiñá: “Si̱lóʼoní kúma̱ní ña̱ sandíʼi-xa̱ʼa̱ Ndióxi̱ ndiʼi tu̱ndóʼo xíʼin ña̱ va̱ása va̱ʼa ña̱ íyo tiempo vitin. Ña̱ kúnda̱a̱-inii̱ xa̱ʼa̱ ña̱yóʼo chíndeétáʼanña xíʼi̱n ña̱ ndakanixi̱níi̱ ña̱ kixaa̱va ki̱vi̱ ña̱ kǒoka tu̱ndóʼo koo nu̱úyó”.

Biblia káchiña: “Va̱ása ndakaʼánkandó xa̱ʼa̱ ña̱ ku̱u xi̱naʼá ta ni va̱ása ndakanika-inindó xa̱ʼa̱ ña̱ ndo̱ʼondó” (Isaías 65:17).

Ña̱yóʼo kúni̱ kachiña ña̱ kǒo ndakaʼánkayó xa̱ʼa̱ ndiʼi ña̱ sa̱xóʼvi̱ miíyó. Ndióxi̱ va̱ása taxira ña̱ ndakaʼánkaún xa̱ʼa̱ ndiʼi ña̱ va̱ása va̱ʼa ndo̱ʼún, saáchi kǒo kúni̱ra ña̱ kusuchí-iniún ndiʼi tiempo xa̱ʼa̱ ña̱ ndo̱ʼún.

Ñá Natalia ñá ñuu Ucrania káchiñá: “Ña̱ Biblia káʼa̱nña xíʼinyó ña̱ kǒo ndakaʼánkayó xa̱ʼa̱ ña̱ ni̱xo̱ʼvi̱níyó xa̱ʼa̱ ña̱ sa̱ndákooyó veʼeyó xíʼin ndiʼi ña̱ʼayó. Ña̱yóʼo chíndeétáʼanña xíʼi̱n ña̱ kundeé-inii̱ ya̱ʼi̱ nu̱ú tu̱ndóʼo ña̱ kúúmiíi̱, saáchi kúnda̱a̱-inii̱ ña̱ si̱lóʼoní kúma̱ní ña̱ ki̱xaa̱ ki̱vi̱ ña̱ va̱ʼaní koi̱”.

Biblia káchiña: “Reino Ndióxi̱ ta̱ íyo chí ndiví kixáʼaña kaʼndachíñuña [...] sandíʼi-xa̱ʼa̱ña ndiʼi na̱ chíñu yóʼo ta sakúachi válíñana” (Daniel 2:44).

Ña̱yóʼo kúni̱ kachina ña̱ iin gobierno ña̱ va̱ʼaníka ña̱ íyo chí ndiví kúú ña̱ kaʼndachíñu nu̱ú ñuʼú yóʼo. Si̱lóʼoní kúma̱ní ta sandíʼi-xa̱ʼa̱ Ndióxi̱ ndiʼi na̱ chíñu na̱ íyo nu̱ú ñuʼú yóʼo ta Reino miíra ña̱ íyo chí ndiví kúú ña̱ kixáʼa kaʼndachíñu. Tá ná kixáʼaña kaʼndachíñuña, kǒoka ku̱a̱chi koo, va̱ása kooka na̱ yiví na̱ kéʼé ña̱ va̱ása va̱ʼa, nina ña̱ va̱ʼa keʼé na̱ yiví ta va̱ʼaní koo kundoo ndiʼiyó (Miqueas 4:3, 4).

Ñá Mustafá ñá ñuu Asia káchiñá: “Va̱ʼaní kúnii̱ tá kúnda̱a̱-inii̱ ña̱ si̱lóʼoní kúma̱ní ta sandíʼi-xa̱ʼa̱ Reino Ndióxi̱ ndiʼi tu̱ndóʼo ña̱ kúúmiíyó. Tá kúú, va̱ása kooka na̱ yiví na̱ íxandi̱va̱ʼa xíʼin inkana, na̱ kúndasí xíni inkana xa̱ʼa̱ ki̱ʼva ña̱ náʼa̱na á xa̱ʼa̱ ñuu nu̱ú ke̱ena”.

Va̱ʼaní consejo va̱xi nu̱ú tu̱ʼun Ndióxi̱

Ña̱ Biblia kivi chindeétáʼanña xíʼún ña̱ loʼo tá loʼo ya̱ʼún nu̱ú tu̱ndóʼo ña̱ ndo̱ʼún. Saátu kivi chindeétáʼanña xíʼún ña̱ kusi̱í-iniún xíʼin ña̱ʼa ña̱ kúúmiíún vitin. Ña̱yóʼo kúú ña̱ xa̱a̱ chíndeétáʼan xíʼin sava na̱ sa̱ndákoo ñuuna.

Biblia káchiña: “Ni ku̱a̱ʼání kúú ña̱ʼa ña̱ kúúmií iin na̱ yiví va̱ása taxiña ña̱ kutakuna” (Lucas 12:15).

¿Ndáa ki̱ʼva kivi chindeétáʼan tu̱ʼun yóʼo xíʼún? Sana ndákanda̱ní-iniún xa̱ʼa̱ ndiʼi ña̱ ndo̱ʼún ta kúsuchíní-iniún xa̱ʼa̱ ndiʼi ña̱ʼa ña̱ sa̱ndákoún, soo ndakaʼún chi ña̱ ndáyáʼviníka kúú ña̱ tákún. Tá ná ndakanixi̱níún xa̱ʼa̱ ña̱yóʼo, va̱ása kusuchíníka-iniún xa̱ʼa̱ ña̱ʼa ña̱ sa̱ndákoún.

Ñá Natalia ñá ñuu Ucrania káchiñá: “Ndáyáʼviníka ña̱ tákuyó nu̱úka ña̱ʼa ña̱ kúúmiíyó. Sava yichi̱, ni kúúmiínívayó ña̱ʼa á xu̱ʼún, soo ña̱yóʼo kǒo chíndeétáʼanvíña xíʼinyó”.

Biblia káchiña: “Va̱ása ka̱ʼún: ‘Va̱ʼaníka ni̱xi̱yo tiempo xi̱naʼá nu̱úka tiempo vitin’” (Eclesiastés 7:10).

¿Ndáa ki̱ʼva kivi chindeétáʼan tu̱ʼun yóʼo xíʼún? Ni yo̱ʼvi̱níva ña̱ yáʼún nu̱ú, soo kǒo chitáʼún ki̱ʼva ña̱ ni̱xi̱yoún tá ya̱chi̱ xíʼin ki̱ʼva ña̱ íyoún vitin. Ña̱yóʼo kivi chindeétáʼanña xíʼún ña̱ kusi̱í-iniún ta va̱ása ndakava-iniún.

Ta̱ Eli ta̱ ñuu Ruanda káchira: “Ña̱ chíndeétáʼan xíʼi̱n ña̱ kusi̱í-inii̱ kúú ña̱ ndákunii̱ ña̱ va̱ása kivika ndikói̱ koi̱ nda̱a̱ táki̱ʼva ni̱xi̱yoi̱ tá ya̱chi̱”.

Biblia káchiña: “Nani íyo loʼo ña̱ kuxuyó xíʼin ti̱ko̱to̱yó ña̱ kundixiyó ná kusi̱í-iniyó xíʼin ña̱yóʼo” (1 Timoteo 6:8).

¿Ndáa ki̱ʼva kivi chindeétáʼan tu̱ʼun yóʼo xíʼún? Tá ná kusi̱í-iniún xíʼin ña̱ʼa ña̱ xa̱a̱ kúúmiíún, sana kǒo kundi̱ʼiníkaví-iniún.

Ta̱ Iván ta̱ ñuu Ucrania káchira: “Biblia kúú ña̱ chi̱ndeétáʼan xíʼinndi̱ ña̱ nasamandi̱ ki̱ʼva ña̱ ndákanixi̱níndi̱ ta kǒo ndákaʼánníkandi̱ xa̱ʼa̱ ña̱ʼa ña̱ sa̱ndákoondi̱. Miíi̱ xíʼin ñá síʼíi̱ kúsi̱íní-inindi̱ saáchi íyo va̱ʼavandi̱”.

Biblia káchiña: “Keʼéndó xíʼin inkana ndiʼi ña̱ kúni̱ndó keʼéna xíʼinndó” (Mateo 7:12).

¿Ndáa ki̱ʼva kivi chindeétáʼan tu̱ʼun yóʼo xíʼún? Tá chíka̱ún ndee̱ ña̱ kúee koo iniún ta saátu ña̱ va̱ʼa koo iniún, va̱ʼaníva kutáʼún xíʼin inkana. Tá saá ná keʼún, kuni̱va inka na̱ yiví kutáʼanna xíʼún ta va̱ása kundasína kunina yóʼó.

Ta̱ Angelo ta̱ ñuu Sri Lanka káchira: “Tá íxato̱ʼóyó na̱ yiví, vií káʼa̱nyó xíʼinna ta náʼa̱yó ña̱ kúʼvi̱-iniyó xíniyóna, va̱ʼaníva ndákuiinna yuʼúyó. Tá kéʼéyó ña̱yóʼo saá kúú ña̱ va̱ʼaní kítáʼanyó xíʼin na̱ yiví na̱ ndóo nu̱ú íyoyó”.

Biblia káchiña: “Nda̱a̱ ndáaka ña̱ ndóʼondó ka̱ʼa̱nndó xíʼin Ndióxi̱ xa̱ʼa̱ña [...] tá ná keʼéndó ña̱yóʼo, Ndióxi̱ va̱ʼaní sandíkora-inindó, [...] ta saá kúú ña̱ kundaara níma̱ndó xíʼin ña̱ ndákanixi̱níndó” (Filipenses 4:6, 7).

¿Ndáa ki̱ʼva kivi chindeétáʼan tu̱ʼun yóʼo xíʼún? Ka̱ʼa̱n xíʼin Ndióxi̱ xa̱ʼa̱ ña̱ ndóʼún, xa̱ʼa̱ ña̱ xíniñúʼún, xa̱ʼa̱ ña̱ sáyi̱ʼví yóʼó xíʼin xa̱ʼa̱ ña̱ sándi̱ʼi-iniún. Ña̱ oración kivi sandíkoña-iniún ta saátu kivi chindeétáʼanña xíʼún ña̱ kǒo kundi̱ʼiníka-iniún xa̱ʼa̱ ña̱ ndóʼún.

Ta̱ Yol ta̱ ñuu Sudán del Sur káchira: “Tá kúúmiíi̱ iin tu̱ndóʼo káʼi̱n xíʼin Ndióxi̱ ta ndákuiinvara yuʼíi̱. Ña̱ sa̱kúaʼi̱ nu̱ú Biblia va̱ʼaní chi̱ndeétáʼanña xíʼi̱n ña̱ kǒo kundi̱ʼiní-inii̱”.

Ñá Valentina ñá ñuu Ucrania káchiñá: “Consejo ña̱ va̱xi nu̱ú Biblia kúú ña̱ chíndeétáʼan xíʼi̱n ña̱ va̱ása kundi̱ʼiní-inii̱ xa̱ʼa̱ ña̱ yáʼi̱ nu̱ú tu̱ndóʼo ña̱ yo̱ʼvi̱ní yóʼo”.

Ta̱ Emmanuel ta̱ ñuu Haití káchira: “Va̱ʼaní kúnii̱ saáchi Jehová káʼa̱nra ña̱ va̱ʼaní kundooyó chí nu̱únínu”.

¿Á kúni̱kaún kunda̱a̱-iniún ndáa ki̱ʼva sándi̱ko Biblia iniyó ta saátu ndáaña va̱ʼa kúú ña̱ káʼa̱n Ndióxi̱ taxira ndaʼa̱yó chí nu̱únínu? Ka̱ʼa̱n xíʼin iin na̱ testigo Jehová ña̱ ná ku̱ʼu̱nna sanáʼa̱na yóʼó, ta na̱yóʼo keʼénaña xíʼin ña̱ si̱í-ini ta kǒo xu̱ʼún kiʼinna ndaʼún.