¿Á násama Ndióxi̱ ña̱ ndákanixi̱níra?

Ña̱ káʼa̱n Biblia xa̱ʼa̱ ña̱yóʼo

Násamavaraña sava yichi̱. Tá násama na̱ yiví ña̱ kéʼéna saátu Ndióxi̱ násamara ña̱ ndákanixi̱níra xa̱ʼa̱na. Nu̱ú Biblia káʼa̱nña xa̱ʼa̱ ña̱ ke̱ʼé sava na̱ yiví, ta xíʼin ña̱yóʼo kíʼinyó kuenta ña̱ kiviva nasamara ña̱ ndákanixi̱níra xa̱ʼa̱na. Tá kúú iin yichi̱, Ndióxi̱ ni̱ka̱ʼa̱nra xíʼin ta̱ Jeremías ña̱ ná ka̱ʼa̱nra xíʼin na̱ ñuu Israel ña̱ kundoʼona xa̱ʼa̱ ndiʼi ña̱ kini ña̱ xi̱keʼéna. Soo nisaá Ndióxi̱ ni̱ka̱ʼa̱nra: “Sana kuniso̱ʼovana ta iin tá iinna sandákoona yichi̱ ña̱ va̱ása va̱ʼa ña̱ ki̱ʼinna ku̱a̱ʼa̱nna, tasaá kǒo chindaʼákai̱ tu̱ndóʼo ña̱ nda̱kanixi̱níi̱ chindaʼíi̱ nu̱úna xa̱ʼa̱ ña̱ va̱ása va̱ʼa kéʼéna” (Jeremías 26:3).

Tá ni̱ka̱ʼa̱n Ndióxi̱ ña̱ ndandikó-inira xa̱ʼa̱ castigo ña̱ ni̱ka̱ʼa̱nra taxira ndaʼa̱ na̱ ñuu Israel, ña̱yóʼo kǒo kúni̱ kachiña ña̱ va̱ása va̱ʼa íyo ña̱ nda̱kaxinra keʼéra. Tu̱ʼun hebreo ña̱ xi̱niñúʼuna kúni̱ kachiña “kusuchí-ini” ta nu̱ú savaka Biblia xíniñúʼuna tu̱ʼun “ndandikó-ini”, ta saátu kúni̱ kachiña “nasamana ña̱ ndákanixi̱nína” á “ña̱ kúni̱na keʼéna”. Iin ta̱ maestro ka̱ʼyira ña̱yóʼo: “Tá násama iin na̱ yiví ña̱ kéʼéna, saátu kivi nasama Ndióxi̱ ki̱ʼva ña̱ ndátiinra ku̱a̱chi xíʼinna”.

Soo sava yichi̱ kǒo násamaví Ndióxi̱ ña̱ ndákanixi̱níra. Ná kotoyó sava ejemplo ña̱ va̱xi nu̱ú Biblia.

• Xa̱a̱ ni̱ka̱ʼa̱nva Ndióxi̱ ña̱ taxira bendición ndaʼa̱ na̱ ñuu Israel ta ni xi̱kuni̱ ta̱ Balac ña̱ nasama Ndióxi̱ ña̱ ndákanixi̱níra kǒo níkeʼévíraña (Números 23:18-20).

• Xa̱ʼa̱ ña̱ kǒo níxiniso̱ʼoka ta̱ rey Saúl ña̱ xi̱kaʼa̱n Ndióxi̱ xíʼinra, sa̱xínuva Ndióxi̱ ña̱ ni̱ka̱ʼa̱nra, ña̱ kindaara chiñu ndaʼa̱ra (1 Samuel 15:28, 29).

• Saxínuva Ndióxi̱ ña̱ ni̱ka̱ʼa̱nra xíʼin se̱ʼera, ña̱ koora su̱tu̱ ndiʼi tiempo, kǒo nasamavíra ña̱ nda̱kaxinra keʼéra (Salmo 110:4).

¿Á kǒo káʼa̱n Biblia ña̱ kǒo nása̱mavi Ndióxi̱?

Saá íyoña, mií Ndióxi̱ káʼa̱n ña̱ kǒo nása̱mavira (Malaquías 3:6). Ta nu̱ú Santiago 1:17 káʼa̱nña ña̱ kǒo nása̱maví Ndióxi̱, “va̱ása nása̱mara nda̱a̱ táki̱ʼva nása̱ma ku̱nda̱tí” iníí ki̱vi̱. ¿Á kúni̱ kachi ña̱yóʼo ña̱ kǒo kítáʼan ña̱ káʼa̱n Biblia? Va̱ásaví, saáchi tá káʼa̱n Biblia ña̱ kǒo nása̱mara káʼa̱nña xa̱ʼa̱ ña̱ kǒo nása̱ma ki̱ʼva ña̱ íyora, ña̱ nda̱kúní ndátiinra ku̱a̱chi xíʼin ña̱ kúʼvi̱ní-inira xínira miíyó (Deuteronomio 32:4; 1 Juan 4:8). Xa̱ʼa̱ ña̱ xíni̱ra ndiʼi ña̱ʼa xa̱a̱ síín síín ña̱ʼa kivi ka̱ʼa̱nra xíʼin na̱ káchíñu nu̱úra keʼéna. Tá kúú ña̱ ni̱ka̱ʼa̱nra xíʼin ta̱ rey David tá ni̱xa̱ʼa̱nra ka̱nitáʼanra, síínva ni̱xi̱yo ña̱ ni̱ka̱ʼa̱nra xíʼinra keʼéra u̱vi̱ saá yichi̱. Soo ku̱chiñuvara ka̱nitáʼanra xíʼin na̱ sáa̱-ini xíni miíra (2 Samuel 5:18-25).

¿Á ndándikó-ini Ndióxi̱ xa̱ʼa̱ ña̱ i̱xava̱ʼara na̱ yiví?

Kǒo ndándikóví-inira, soo nisaá ndákavava-ini Ndióxi̱ tá xítora ña̱ kǒo xíín na̱ yiví kuniso̱ʼonara á tá kúndasína xínina miíra. Xa̱ʼa̱ ña̱kán, tá káʼa̱n Biblia xa̱ʼa̱ na̱ yiví na̱ ni̱xi̱yo tiempo ta̱ Noé tá kúma̱níka kuun sa̱vi̱ kini, Biblia káʼa̱nña ña̱yóʼo: “Jehová ku̱suchíní-inira xa̱ʼa̱ ña̱ i̱xava̱ʼara na̱ yiví; ta ni̱xo̱ʼvi̱ní níma̱ra xa̱ʼa̱ ña̱yóʼo” (Génesis 6:6). Ndáa táki̱ʼva xa̱a̱ ni̱ka̱ʼa̱nyó tu̱ʼun hebreo ña̱ xi̱niñúʼuna yóʼo kúni̱ kachiña “kúsuchí-ini”, saátu kúni̱ kachiña “nasamana ña̱ ndákanixi̱nína” á “ña̱ kúni̱na keʼéna”. Xa̱ʼa̱ ña̱ kininí ndu̱u na̱ yiví na̱ ni̱xi̱yo tiempo saá, Ndióxi̱ na̱samara ña̱ xi̱ndakanixi̱níra xa̱ʼa̱na (Génesis 6:5, 11). Soo, ni sa̱xóʼvi̱nína-inira kǒo nínasa̱maví ña̱ xi̱ndakanixi̱níra xa̱ʼa̱ ndiʼi na̱ yiví, chi sa̱kǎkura ta̱ Noé xíʼin na̱ veʼera tá ku̱un sa̱vi̱ kini (Génesis 8:21; 2 Pedro 2:5, 9).