Grupo ña̱ predicación va̱ʼaní chíndeétáʼanña xíʼinyó

1, 2. ¿Ndáaña ndákanixi̱ní sava na̱ hermano xa̱ʼa̱ grupo ña̱ predicación?

¿Á NDÁKAʼÚN ki̱vi̱ tá ni̱xa̱ún ndu̱ún publicador? Sana ni̱kusi̱íní-iniún saáchi ki̱xáʼún kítáʼún xíʼin na̱ ñuu Jehová na̱ ndásakáʼnu ki̱vi̱ra (Sal. 148:1, 2, 12, 13). Tasaá sana chi̱kaa̱na yóʼó ti̱xin iin grupo ña̱ predicación. Grupo yóʼo chíndeétáʼanña xíʼinyó ña̱ natúʼunyó xa̱ʼa̱ tu̱ʼun va̱ʼa xa̱ʼa̱ Reino Ndióxi̱ (Mat. 24:14).

² ¿Ndáaña ndákanixi̱níún xa̱ʼa̱ grupo yóʼo? Iin ñá hermana ñá naní Wendya káchiñá: “Ña̱ ndíka̱i̱ ti̱xin iin grupo va̱ʼaní chíndeétáʼanña xíʼi̱n. Na̱ hermano chíndeétáʼanna xíʼi̱n ña̱ viíka natúʼi̱n xíʼin na̱ yiví ta saátu chíndeétáʼanna xíʼi̱n ña̱ keʼékai̱ ku̱a̱ʼáka chiñu nu̱ú Ndióxi̱, ta ndiʼi na̱yóʼo kúúna migoi̱”. Iin ta̱ hermano ta̱ naní Rich káchira: “Xa̱ʼa̱ ña̱ kúi̱ superintendente ña̱ grupo ndáyáʼviní ña̱yóʼo nu̱úi̱. Tá chíndeétáʼan na̱ publicador xíʼin iin na̱ yiví ña̱ xa̱a̱na ndakuchina, ta̱ superintendente ña̱ grupo chíndeétáʼanra xíʼin na̱yóʼo ña̱ va̱ʼa xa̱a̱na keʼéna ku̱a̱ʼáka chiñu nu̱ú Ndióxi̱”. Iin ñá hermana ñá naní Dinah káchiñá: “Kúsi̱íní-inii̱ xa̱ʼa̱ ña̱ íyo grupo ña̱ predicación. Na̱ hermano na̱ ñúʼu ti̱xin grupo nu̱ú ndíka̱i̱, táki̱ʼva íyo na̱ veʼi̱ saá íyona”.

3. ¿Ndáaña ka̱ʼa̱nyó xa̱ʼa̱ nu̱ú artículo yóʼo?

³ Nu̱ú artículo yóʼo siʼna ka̱ʼa̱nyó ndáa chiñu kúú ña̱ kúúmií ta̱ superintendente ña̱ grupo ta saátu ta̱ chíndeétáʼan xíʼinra. Ta saátu ndáa ki̱ʼva kíʼinna kuenta xíʼin na̱ hermano na̱ ñúʼu ti̱xin grupo nu̱ú ndíkaa̱na. Tándi̱ʼi ka̱ʼa̱nyó ndáaña kivi keʼé iin tá iinyó ña̱ va̱ʼa chindeétáʼanyó xíʼin na̱ grupoyó. Ta saátu ka̱ʼa̱nyó ndáa ña̱ va̱ʼa ndákiʼinyó xa̱ʼa̱ ña̱ íyo grupo yóʼo.

TA̱ SUPERINTENDENTE ÑA̱ GRUPO XÍʼIN TA̱ CHÍNDEÉTÁʼAN XÍʼINRA

4. a) ¿Ndáa chiñu kúú ña̱ kéʼé ta̱ superintendente ña̱ grupo? b) ¿Ndáa ki̱ʼva kíʼinra kuenta xíʼin na̱ publicador na̱ ñúʼu ti̱xin grupo? (Koto recuadro ña̱ naní “Ña̱ kivi keʼé ta̱ superintendente ña̱ grupo”).

⁴ Iin ta̱ ancianob kúú ta̱ superintendente ña̱ grupo ta na̱ anciano kúú na̱ ndáka̱xin ta̱yóʼo ña̱ va̱ʼa chindeétáʼanra xíʼin na̱ publicador ña̱ va̱ʼa keʼékana chiñu nu̱ú Ndióxi̱. ¿Ndáa ki̱ʼva kéʼéra chiñu yóʼo? Ña̱ nu̱ú, ndíʼi̱-inira xa̱ʼa̱ na̱ hermano na̱ ñúʼu ti̱xin grupo ña̱ kíʼinra kuenta xíʼin (Prov. 27:23). Káʼa̱nra xíʼinna saáchi ndíʼi̱-inira xa̱ʼa̱na tasaá kúú ña̱ kivi chindeétáʼanra xíʼinna ña̱ kusi̱íka-inina ta kandíxakana Ndióxi̱ (Prov. 12:25; Is. 32:2; Sant. 2:15-17). Ña̱ u̱vi̱, chíndeétáʼanra xíʼin iin tá iin na̱ publicador ña̱ va̱ʼa keekana natúʼunna xíʼin na̱ yiví xa̱ʼa̱ Ndióxi̱. Saátu miíra chíkaa̱ra ndee̱ ña̱ kitara predicación xíʼin na̱ grupo. Távára tiempo ña̱ kitara xíʼin iin tá iin na̱ publicador ña̱ va̱ʼa chikaa̱ra ndee̱ xíʼinna ta sanáʼa̱rana. Tá sava yichi̱ kǒo kívi kitara xíʼin na̱ grupo, káʼa̱nra xíʼin ta̱ chíndeétáʼan xíʼinra á inka ta̱ hermano ña̱ ná kiʼinra kuenta xíʼin na̱ grupo. Ña̱ u̱ni̱, chíkaa̱ra ndee̱ xíʼin na̱ hermano na̱ xa̱a̱ nda̱kuchi ña̱ va̱ʼa xa̱a̱na kuumiíkana chiñu ti̱xin congregación (1 Tim. 3:1). Káʼa̱nra tu̱ʼun va̱ʼa xíʼin na̱ hermano, táxira consejo ña̱ va̱xi nu̱ú Biblia ndaʼa̱na ta sánáʼa̱rana ña̱ va̱ʼa xa̱a̱na koona siervo ministerial á anciano. Chiñu ña̱ kéʼé na̱ superintendente ña̱ grupo ndáyáʼviníña, ña̱kán na̱ anciano ndáka̱xin viína na̱ kivi keʼé vií chiñu yóʼo.

5. ¿Nda̱chun íxayo̱ʼvi̱ña xíʼin ta̱ superintendente ña̱ grupo ña̱ keʼé viíra chiñura?

⁵ Sava yichi̱ íxayo̱ʼvi̱vaña xíʼinna keʼéna chiñu yóʼo. Ná kotoyó ña̱ ni̱ka̱ʼa̱n ta̱ Jörg ta̱ kúú superintendente ña̱ grupo chí ñuu Alemania. Ta̱yóʼo kúúmiíra savaka chiñu ti̱xin congregación nda̱a̱ táki̱ʼva kéʼé ku̱a̱ʼá na̱ anciano. Ta̱yóʼo káchira: “Xa̱ʼa̱ ña̱ kúúmiíi̱ ku̱a̱ʼá chiñu, íxayo̱ʼvi̱ña xíʼi̱n ka̱ʼi̱n xíʼin ndiʼi na̱ publicador na̱ ñúʼu ti̱xin grupo nu̱ú ndíka̱i̱”. Iin ta̱ anciano ta̱ kúúmií 70 ku̱i̱ya̱ ta̱ naní Abel ta̱ ñuu Uganda káchira: “Ti̱xin congregación nu̱ú ndíka̱i̱ loʼova kúú na̱ anciano ta saátu na̱ siervo ministerial. Xa̱ʼa̱ ña̱kán ku̱a̱ʼá kúú na̱ hermano na̱ ñúʼu ti̱xin iin tá iin grupo ta íxayo̱ʼvi̱ña xíʼi̱n ña̱ ku̱ʼi̱n kotoi̱ iin tá iinna ta chika̱i̱ ndee̱ xíʼinna”. Ta̱ Obed, iin ta̱ kúú anciano ta̱ ñuu Surinam káchira: “Kútóoníi̱ sanáʼi̱ inkana soo xíniñúʼu tavái̱ tiempo ña̱ va̱ʼa keʼíi̱ ña̱yóʼo, ta su̱ví ndi̱ku̱n kamaví sákuaʼana kéʼéna ña̱yóʼo. Íxayo̱ʼvi̱níña xíʼi̱n ña̱ tavái̱ tiempo ña̱ sanáʼi̱ inkana”. ¿Ndáaña kivi chindeétáʼan xíʼin na̱ anciano tá ndóʼona ña̱yóʼo?

6. ¿Nda̱chun loʼo xíniñúʼu koo na̱ publicador ti̱xin iin tá iin grupo?

⁶ Loʼova xíniñúʼu koo na̱ publicador ti̱xin iin tá iin grupo ña̱ va̱ʼa chindeétáʼan ta̱ superintendente ña̱ grupo xíʼinna ta saátu ña̱ va̱ʼa kuxini̱rana. Soo tá loʼo kúú na̱ anciano na̱ ñúʼu ti̱xin congregación, ¿ndáaña xíniñúʼu keʼéna? Loʼova xíniñúʼu koo na̱ publicador ti̱xin iin tá iin grupo ña̱ va̱ʼa kǒo ixayo̱ʼvi̱ña xíʼin ta̱ superintendente ña̱ grupo ña̱ keʼé viíra chiñura. Na̱ anciano kivi nda̱kaxinna iin ta̱ siervo ministerial ña̱ va̱ʼa kiʼinra kuenta xíʼin iin grupo loʼo tiempo. Tá loʼo kúú na̱ publicador ti̱xin iin grupo, ta̱ superintendente ña̱ grupo viíníka keʼéra chiñura ña̱ kundaara na̱ hermano.

7. Tá loʼo na̱ anciano íyo, ¿ndáaña keʼé na̱ superintendente ña̱ grupo ña̱ va̱ʼa vií kiʼinna kuenta xíʼin na̱ ñúʼu ti̱xin grupona? (1 Pedro 5:2; koto na̱ʼná).

⁷ Tá iin na̱ superintendente ña̱ grupo kúún ta loʼo kúú na̱ anciano na̱ íyo ti̱xin congregación, chíkaa̱ ndeé ña̱ sanáʼún iin na̱ kivi chindeétáʼan xíʼún ña̱ va̱ʼa kundaana na̱ hermano (kaʼvi 1 Pedro 5:2). Taxi sava chiñu ndaʼa̱na. Tá kúú, kivi ka̱ʼún xíʼinna ña̱ ná tavána grupo. Ta saátu inkáchi natúʼun táʼanndó ndáaña kivi keʼéndó ña̱ va̱ʼa chindeétáʼanndó xíʼin iin tá iin na̱ publicador, ña̱ viíka natúʼunna xíʼin na̱ yiví ta saátu ña̱ vií kutáʼanna xíʼin Jehová. Ka̱ʼa̱n xíʼin ta̱ chíndeétáʼan xíʼún ña̱ va̱ʼa ku̱ʼu̱nra xíʼún ña̱ kotondó na̱ hermano. Tá kuma̱níka ku̱ʼu̱nndó kotondó na̱ hermano, ka̱ʼa̱n xíʼinra ndáa ki̱ʼva chikaa̱ndó ndee̱ xíʼinna. Tándi̱ʼi, chikaa̱ ndee̱ xíʼinra xa̱ʼa̱ ña̱ ke̱ʼéra ta saátu ka̱ʼa̱n xíʼinra ndáaña kivi viíka keʼéra. Ña̱ sánáʼúnra chindeétáʼanña xíʼinra ña̱ kivi xa̱a̱ra koora superintendente ña̱ grupo (2 Tim. 2:2). Kivi ka̱ʼún xíʼin inka na̱ hermano á xíʼin ná hermana na̱ xa̱a̱ xu̱xa-ini xíʼin tu̱ʼun Ndióxi̱, ña̱ va̱ʼa chindeétáʼanna xíʼin inkana. Tá kúú na̱ precursor xíʼin inka na̱ hermano na̱ xa̱a̱ ku̱a̱ʼá tiempo ndásakáʼnu Ndióxi̱, kivi inkáchi keena natúʼunna xíʼin na̱ publicador xa̱á. Kivi chindeétáʼanna xíʼinna ndáa ki̱ʼva kixáʼana natúʼunna xíʼin na̱ yiví, ña̱ keʼéna revisita á ña̱ kaʼvina xíʼin na̱ yiví. Vitin ná ka̱ʼa̱nyó xa̱ʼa̱ u̱ni̱ ña̱ʼa ña̱ kivi keʼé ndiʼiyó ña̱ va̱ʼa chindeétáʼanyó xíʼin na̱ ñúʼu ti̱xin grupo nu̱ú ndíkaa̱yó.

¿NDÁA KI̱ʼVA CHINDEÉTÁʼANYÓ XÍʼIN GRUPOYÓ?

8. ¿Ndáaña kivi keʼéyó ña̱ va̱ʼa chindeétáʼanyó xíʼin na̱ grupoyó? (Romanos 1:12).

⁸ Kita xíʼin grupo nu̱ú ndíka̱ún. Ña̱ inkáchi kitayó predicación xíʼin grupo nu̱ú ndíkaa̱yó saá kúú ña̱ chíkaa̱yó ndee̱ xíʼin táʼanyó (kaʼvi Romanos 1:12). Ta saátu chíndeétáʼanña xíʼinyó ña̱ kǒo yi̱ʼvíyó natúʼunyó xíʼin na̱ yiví ta ndakú koo iniyó ña̱ ka̱ʼa̱nyó xíʼinna nda̱a̱ ndáaka nu̱ú xíkayó. Soo tá xa̱ʼa̱ ña̱ káchíñuyó va̱ása táxiña tiempo ndaʼa̱yó ña̱ kitayó natúʼunyó xíʼin grupo nu̱ú ndíkaa̱yó, ¿á kivi ka̱ʼa̱nyó xíʼin na̱ káchíñuyó nu̱ú ña̱ nasamana hora ña̱ káchíñuyó? Sana ndakanda̱-iniyó xíʼin ña̱ ka̱ʼa̱nna xíʼinyó (Neh. 2:4-6). Soo tá xa̱ʼa̱ ña̱ kúúmiíyó kue̱ʼe̱ á xa̱ʼa̱ ña̱ xa̱a̱ ku̱chéeyó íxayo̱ʼvi̱ña xíʼinyó ña̱ keeyó xíʼin na̱ grupoyó. Ná ka̱ʼa̱nyó xíʼin ta̱ superintendente ña̱ grupoyó xa̱ʼa̱ ña̱yóʼo. Sana ta̱yóʼo kivi tavára grupo nu̱ú ña̱ zoom ña̱ va̱ʼa keʼéyó carta á ña̱ ka̱ʼa̱nyó xíʼin teléfono. Tá iin na̱ loʼo kúa̱an kúún ta̱ koo kue̱ʼe̱ kúúmiíún soo íxayo̱ʼvi̱ña xíʼún ña̱ kitaún natúʼún xíʼin na̱ yiví, iin ña̱ kivi keʼún kúú ña̱ taváún tiempo ña̱ va̱ʼa inkáchi kitaún xíʼin iin na̱ ndíkaa̱ ti̱xin grupo nu̱ú ndíka̱ún ndiʼi semana. Saátu kivi nasamaún ña̱ kéʼún ña̱ va̱ʼa vií kuniñúʼún tiempo ña̱ kúúmiíún (Rom. 12:11; Col. 4:5). Tá ná keʼún saá va̱ʼaníva chindeétáʼanña xíʼún. Ka̱ʼa̱n xíʼin Jehová ña̱ chindeétáʼanra xíʼún ña̱ va̱ʼa kusi̱í-iniún kitaún natúʼún xíʼin na̱ yiví (Filip. 2:13).

9. ¿Ndáaña keʼéyó ña̱ va̱ʼaníka xa̱a̱yó kutáʼanyó xíʼin na̱ hermano na̱ ñúʼu ti̱xin grupoyó? (Romanos 12:13).

⁹ Va̱ʼa ná koo iniyó. Tá va̱ʼa-iniyó viíníka kutáʼanyó xíʼin na̱ ñúʼu ti̱xin grupoyó (kaʼvi Romanos 12:13). Tá kúú kivi taxiyó veʼeyó ña̱ va̱ʼa keena predicación. Sava congregación iin tá iin grupo táxina ña̱ kuxu ta̱ xáʼa̱n táxi discurso, ni sava yichi̱ va̱ása kúnaʼa ta̱yóʼo ña̱ kuxura xíʼinna soo na̱yóʼo ndákutáʼanvana. Iin ñá hermana ñá precursora especial ñá naní Sarah káchiñá: “Tá xáʼa̱nna xíxina veʼi̱ sava yichi̱ miíi̱ sándi̱ʼi̱níi̱-inii̱ chi kúnii̱ ña̱ viíní ná koo ña̱ kuxuna. Soo chíka̱i̱ ndee̱ ña̱ kǒo ndakaniníxi̱níi̱ saá, chi ña̱ kéʼíi̱ kúú ña̱ kuxini̱ va̱ʼi̱ na̱ hermano”. Tá ná chikaa̱yó ndee̱ ña̱ kuxini̱ va̱ʼayó na̱ hermano na̱ ñúʼu ti̱xin grupoyó va̱ʼaníka xa̱a̱yó kutáʼanyó xíʼin Jehová (Neh. 8:10; Hech. 20:35).

10. ¿Ndáaña kivi keʼéyó ña̱ va̱ʼa viíka natúʼunyó xíʼin na̱ yiví xa̱ʼa̱ Ndióxi̱? (Proverbios 1:5; 27:17; koto na̱ʼná).

¹⁰ Chikaa̱ ndee̱ ña̱ viíka sánáʼún na̱ yiví. Tá ndúkúyó ki̱ʼva ña̱ viíka sánáʼa̱yó na̱ yiví kusi̱íníka-iniyó kitayó natúʼunyó xíʼin na̱ grupoyó. ¿Á íyo iin ña̱ kúni̱yó viíka keʼéyó? Kivi ka̱ʼa̱nyó xíʼin na̱ precursor á iin na̱ publicador na̱ xa̱a̱ ku̱a̱ʼá tiempo ndásakáʼnu Ndióxi̱ ña̱ ná chindeétáʼanna xíʼinyó (kaʼvi Proverbios 1:5;c 27:17).d Ná ka̱ʼa̱nyó xíʼin ta̱ superintendente ña̱ grupo xa̱ʼa̱ meta ña̱ kúúmiíyó, ta ta̱yóʼo va̱ʼaníva chindeétáʼanra xíʼinyó. Iin ñá hermana ñá naní Heather iin ñá kaʼanní nu̱ú káchiñá: “Ni̱ka̱ʼi̱n xíʼin iin ñá precursora ñá va̱ʼaní-ini ña̱ ku̱ʼu̱nñá xíʼi̱n keʼíi̱ revisita. Ñákán ku̱a̱ʼá yichi̱ xi̱taváñá tiempo ña̱ va̱ʼa kitañá xíʼi̱n, chi̱ndeétáʼanñá xíʼi̱n ña̱ kixáʼíi̱ kaʼvii̱ xíʼin iin na̱ yiví. Kúsi̱íní-inii̱ xa̱ʼa̱ ña̱ chi̱ndeétáʼanñá xíʼi̱n, ta vitin kúsi̱íní-inii̱ nátúʼi̱n xíʼin na̱ yiví”. Ku̱a̱ʼáva ki̱ʼva kivi chindeétáʼanyó xíʼin grupo nu̱ú ndíkaa̱yó ña̱ keeyó predicación.

NA̱ VA̱ʼA NDÁKIʼINYÓ TÁ NDÍKAA̱YÓ IIN GRUPO

11, 12. ¿Ndáaña va̱ʼa ndákiʼinyó tá ndíkaa̱yó ti̱xin iin grupo? Ka̱ʼa̱n xa̱ʼa̱ iin ejemplo.

¹¹ Ña̱ va̱ʼa ndákiʼinyó. Ná kotoyó ndáaña va̱ʼa ndákiʼinyó tá ndíkaa̱yó xíʼin iin grupo ña̱ predicación. Na̱ hermano va̱ʼaní kíʼinna kuenta ta chíkaa̱na ndee̱ xíʼin ná ni̱xi̱ʼi̱ yii̱, na̱ kǒo yivá tá saátu xíʼin na̱ hermano na̱ xa̱a̱ chée ta Jehová kúʼvi̱ní-inira xínira na̱yóʼo (1 Tes. 2:8; Sant. 1:27). Ta saátu sánáʼa̱na miíyó ndáa ki̱ʼva kivi viíka natúʼunyó xíʼin na̱ yiví xa̱ʼa̱ Reino Ndióxi̱. Sánáʼa̱na na̱ ta̱a na̱ xa̱a̱ nda̱kuchi ña̱ va̱ʼa kuumiína ku̱a̱ʼá chiñu ti̱xin congregación (1 Tim. 3:10).

¹² Ná kotoyó ña̱ káʼa̱n ñá Wendy ñá ni̱ka̱ʼa̱nyó xa̱ʼa̱ nu̱ú párrafo 2. Ñáyóʼo káchiñá: “Yivái̱ va̱ása níxi̱kuni̱ra koondi̱ Testigo xa̱ʼa̱ ña̱kán siʼíi̱ kǒo níxi̱kivi kitañá predicación xíʼin na̱ grupo nu̱ú xi̱ndikaa̱ñá soo yi̱ʼi̱ va̱ʼava xi̱kitai̱. Iin ñá hermana ñá xa̱a̱ chée va̱ʼaní xi̱kiʼinñá kuenta xíʼi̱n. Ku̱a̱ʼání yichi̱ inkáchi xi̱kitandi̱ xi̱natúʼunndi̱ xíʼin na̱ yiví xa̱ʼa̱ Ndióxi̱. Ña̱ sa̱náʼa̱ñá yi̱ʼi̱ va̱ʼaní chíndeétáʼanña xíʼi̱n ti̱xin ña̱ predicación ta saátu ti̱xin congregación. Ndákaʼíi̱n ña̱ va̱ʼaní consejo xi̱taxi ta̱ superintendente ña̱ grupo ndaʼíi̱ ta ña̱yóʼo chíndeétáʼanña xíʼi̱n nda̱a̱ tiempo vitin”.

13. ¿Ndáaña va̱ʼa ndákiʼinyó tá chíndeétáʼanyó xíʼin na̱ grupo nu̱ú ndíkaa̱yó? (Koto na̱ʼná ña̱ va̱xi chí nu̱ú kíxáʼa tutu yóʼo).

¹³ Grupo nu̱ú ndíkaa̱yó chíndeétáʼanna xíʼinyó. Tá kítayó nátúʼunyó xíʼin na̱ hermano na̱ ñúʼu xíʼinyó ti̱xin grupo nu̱ú ndíkaa̱yó, viíníka xáa̱yó kítáʼanyó xíʼinna (Filip. 1:27). Xa̱ʼa̱ ña̱ loʼo kúú na̱ hermano na̱ ñúʼu ti̱xin iin iin grupo, na̱ kaʼanní nu̱ú kivi vií xa̱a̱na kitáʼanna xíʼin ndiʼina (2 Cor. 6:13). Tá kúúmiíyó iin kue̱ʼe̱, tá ndákava iniyó á ni̱xi̱ʼi̱ iin na̱ veʼeyó, na̱ ñúʼu ti̱xin grupo nu̱ú ndíkaa̱yó íyo tu̱ʼvana ña̱ chindeétáʼanna xíʼinyó (1 Tes. 5:14). Tá xa̱a̱ ku̱nu̱mí kixaa̱ ña̱ gran tribulación, saá kúú ña̱ ku̱niyó ña̱ chindeétáʼanníka na̱ migoyó xíʼinyó (Mat. 24:21). Tu̱ndóʼo ña̱ kúúmiíyó va̱ása ndiʼi-xa̱ʼa̱ña soo xa̱ʼa̱ ña̱ kúʼvi̱-ini na̱ hermano xínina miíyó chíndeétáʼanña xíʼinyó ña̱ kundeé-iniyó (Prov. 17:17).

14. Tá yáʼayó nu̱ú tu̱ndóʼo, ¿ndáa ki̱ʼva chíndeétáʼan na̱ grupoyó xíʼinyó?

¹⁴ Ki̱ʼva ña̱ chíndeétáʼanna xíʼinyó. Tá kúú, tá ndíkaa̱ kue̱ʼe̱ ña̱ xíkun, tá kúún kini sa̱vi̱ á inkaka tu̱ndóʼo, tá xíniñúʼu ku̱ʼu̱nyó nu̱ú na̱ doctor, tá íxandi̱va̱ʼana xíʼinyó, tá íxama̱ní xu̱ʼún ndaʼa̱yó, na̱ hermano na̱ ñúʼu ti̱xin grupo nu̱ú ndíkaa̱yó chíndeétáʼanvana xíʼinyó. Soo tá kúma̱níka kuu ña̱yóʼo, na̱ Comité ña̱ Servicio ña̱ Congregación, nátúʼun táʼanna xíʼin na̱ superintendente ña̱ grupo, ndáaña kivi keʼéna ña̱ va̱ʼa chindeétáʼanna xíʼin na̱ hermano na̱ kúúmií kue̱ʼe̱ á na̱ kúúmií inkaka tu̱ndóʼo na̱ ñúʼu ti̱xin grupo nu̱ú ñúʼuna. Tá kúú iin tu̱ndóʼo, ta̱ superintendente ña̱ grupo ndi̱ku̱n káʼa̱nra xíʼin ndiʼi na̱ hermano na̱ ñúʼu ti̱xin grupo ña̱ kíʼinra kuenta xíʼin ña̱ va̱ʼa kunda̱a̱-inira ndáaña xíniñúʼu na̱ hermano, tá kúú, á xíniñúʼu ku̱ʼu̱nna nu̱ú na̱ doctor, á íxama̱ní ña̱ kuxuna, ti̱kui̱í koʼona, nu̱ú koona xíʼin ti̱ko̱to̱ ña̱ kundixina, tasaá va̱ʼa chindeétáʼanra xíʼinna. Tá ndóʼoyó táʼan ña̱yóʼo na̱ hermano na̱ ñúʼu ti̱xin grupo nu̱ú ndíkaa̱yó va̱ʼaní chíndeétáʼanna xíʼinyó ta ña̱yóʼo sákusi̱íníña-iniyó.

15. ¿Ndáaña xíniñúʼu keʼé ndiʼi miíyó na̱ ndásakáʼnu Jehová?

¹⁵ Nda̱a̱ táki̱ʼva xa̱a̱ ku̱ndaa̱-iniyó, ku̱a̱ʼání kúú na̱ ñuu Jehová. Chí ndiví ku̱a̱ʼání kúú na̱ ángel na̱ nda̱kú íyo ini xíʼin Ndióxi̱ íyo. Ta nu̱ú ñuʼú yóʼo, íyo 9 millón na̱ yiví na̱ ndásakáʼnu Jehová ta ku̱a̱ʼáka ku̱a̱ʼa̱n ndúuna (Zac. 8:23; Apoc. 5:11). Na̱ ángel xíʼin na̱ yiví na̱ íyo nu̱ú ñuʼú yóʼo, inkáchi nátúʼunna xa̱ʼa̱ tu̱ʼun va̱ʼa xa̱ʼa̱ Reino Ndióxi̱ (Apoc. 14:6, 7). Ná chikaa̱yó ndee̱ ña̱ kitayó xíʼin grupo nu̱ú ndíkaa̱yó ña̱ natúʼunyó xa̱ʼa̱ Ndióxi̱, chi na̱yóʼo chíndeétáʼanna xíʼinyó ña̱ ndasakáʼnuyó Jehová xíʼin ndiʼi níma̱yó (Sal. 111:1).