“သင်တို့၏အသနားခံချက်များကို ဘုရားသခင်အား ကြားလျှောက်ကြလော့”

“အရာရာ၌ ကျေးဇူးတော်ကိုချီးမွမ်းခြင်းနှင့်တကွ ဆုတောင်းခြင်း၊ တိုးလျှိုးအသနားခံခြင်းအားဖြင့် သင်တို့၏အသနားခံချက်များကို ဘုရားသခင်အား ကြားလျှောက်ကြလော့။”—ဖိလိပ္ပိ ၄:၆၊ ကဘ။

 ၁။ ကျွန်ုပ်တို့သည် မည်သူနှင့် ဆက်သွယ်ပြောဆိုခွင့်ကို ရရှိထားကြသနည်း။ ယင်းသည် အဘယ်ကြောင့် အလွန့်အလွန်ထူးမြတ်ရသနည်း။

သင်သည် သင့်နိုင်ငံအကြီးအကဲနှင့်တွေ့ဆုံရန် ခွင့်တောင်းပါက မည်သည့်တုံ့ပြန်မှုကို သင်ရရှိမည်နည်း။ သူ၏အရာရှိထံမှ ယဉ်ကျေးစွာပြန်လည်တုံ့ပြန်မှုကို သင်ရရှိနိုင်သော်လည်း သူကိုယ်တိုင်နှင့် စကားပြောဆိုခွင့်ရရန်မှာ မဖြစ်နိုင်ပါ။ သို့သော် အကြီးမြတ်ဆုံးသောအုပ်စိုးရှင်၊ စကြဝဠာပိုင်သအုပ်စိုးရှင် ယေဟောဝါဘုရားသခင်နှင့်ပတ်သက်လျှင် ထိုသို့မဟုတ်ပါ။ ကျွန်ုပ်တို့ မည်သည့်နေရာ၌ပင်ရှိပါစေ၊ မည်သည့်အချိန်ကို ရွေးချယ်ပါစေ ကိုယ်တော့်ထံ ချဉ်းကပ်ခွင့်ရရှိကြသည်။ နှစ်သက်ဖွယ်ဆုတောင်းချက်များသည် ကိုယ်တော့်ထံသို့ အစဉ်ရောက်ရှိတော်မူမည်။ (သု. ၁၅:၂၉) အလွန်တရာကောင်းမွန်လှသည့်အချက်ပင်! ယင်းကိုလေးမြတ်သောကြောင့် ‘ဆုတောင်းသံကို နားညောင်းတော်မူသောအရှင်’ ဟုသင့်လျော်စွာခေါ်ဆိုထိုက်သော အရှင်ထံ မှန်မှန်ဆုတောင်းဖို့ လှုံ့ဆော်ခံသင့်သည် မဟုတ်လော။—ဆာလံ ၆၅:၂၊ သမ္မာ။

 ၂။ ဘုရားသခင်နားညောင်းတော်မူသော ဆုတောင်းချက်ဖြစ်ရန် အဘယ်အရာ လိုအပ်သနည်း။

^၂ သို့ရာတွင် တစ်ဦးတစ်ယောက်က ‘အဘယ်ဆုတောင်းချက်များကို ဘုရားသခင်နားညောင်းသနည်း” ဟုမေးပေမည်။ လက်ခံဖွယ်ဆုတောင်းချက်ဖြစ်ရန် လိုအပ်ချက်တစ်ခုကို သမ္မာကျမ်းစာက ဤသို့ရှင်းပြ၏– “ယုံကြည်ခြင်းမရှိလျှင် ဘုရားသခင်၏စိတ်တော်နှင့် မတွေ့နိုင်။ အကြောင်းမူကား ဘုရားသခင့်အထံတော်သို့ ချဉ်းကပ်သောသူသည် ဘုရားသခင်ရှိတော်မူသည်ကိုလည်းကောင်း၊ ကိုယ်တော်ကိုရှာသောသူအား အကျိုးပေးတော်မူသည်ကိုလည်းကောင်း ယုံကြည်ရမည်။” (ဟေဗြဲ ၁၁:၆) မှန်ပါသည်၊ ရှေ့ဆောင်းပါးတွင် ရှင်းပြခဲ့ပြီးဖြစ်သည့်အတိုင်း ဘုရားသခင်ထံ ချဉ်းကပ်ရာတွင် အဓိကကျသည့်အရာတစ်ခုမှာ ယုံကြည်ခြင်းဖြစ်သည်။ ဘုရားသခင်သည် ကိုယ်တော်ထံချဉ်းကပ်သူတို့၏ ဆုတောင်းချက်များကို နားညောင်းရန် လိုလိုလားလားရှိတော်မူ၏။ သို့သော် ကိုယ်တော်ထံချဉ်းကပ်သူတို့သည် ယုံကြည်ခြင်းရှိပြီး စိတ်ရင်းမှန်၊ သဘောထားမှန်ဖြင့် ဘုရားသခင်လက်ခံသည့်လုပ်ရပ်များ လုပ်ဆောင်ရမည်ဖြစ်သည်။

 ၃။ (က) ရှေးခေတ်က တည်ကြည်သောကျေးကျွန်များ၏ ဆုတောင်းချက်များအရ ဆုတောင်းရာတွင် အဘယ်အရာများကို တောင်းလျှောက်နိုင်သနည်း။ (ခ) ကျွန်ုပ်တို့၏ဆုတောင်းချက်သည် အဘယ်ပုံစံမျိုးဖြစ်နိုင်သနည်း။

^၃ တမန်တော်ပေါလုက သူ့ခေတ်ရှိ ခရစ်ယာန်များကို ဤသို့တိုက်တွန်းခဲ့၏– “အဘယ်အမှုကိုမျှ စိုးရိမ်ခြင်းမရှိဘဲ အရာရာ၌ ကျေးဇူးတော်ကိုချီးမွမ်းခြင်းနှင့်တကွ ဆုတောင်းခြင်း၊ တိုးလျှိုးအသနားခံခြင်းအားဖြင့် သင်တို့၏အသနားခံချက်များကို ဘုရားသခင်အား ကြားလျှောက်ကြလော့။” (ဖိလိပ္ပိ ၄:၆၊ ကဘ) သမ္မာကျမ်းစာတွင် မိမိတို့၏စိုးရိမ်ပူပန်မှုများကို ဘုရားသခင်ထံဖွင့်ဟခဲ့ကြသူတို့၏ ပုံနမူနာများစွာပါရှိသည်။ ထိုသူတို့ထဲတွင် ဟန္န၊ ဧလိယ၊ ဟေဇကိနှင့် ဒံယေလတို့ ပါဝင်ကြသည်။ (၁ ဓမ္မရာဇဝင် ၂:၁-၁၀; ၃ ဓမ္မရာဇဝင် ၁၈:၃၆၊ ၃၇; ၄ ဓမ္မရာဇဝင် ၁၉:၁၅-၁၉; ဒံယေလ ၉:၃-၂၁) ကျွန်ုပ်တို့သည် သူတို့၏ပုံနမူနာများကို တုပသင့်သည်။ ကျွန်ုပ်တို့၏ဆုတောင်းချက်များသည် ပုံစံအမျိုးမျိုးဖြစ်နိုင်ကြောင်း ပေါလု၏စကားများ၌ ဖော်ပြထားသည်ကိုလည်း သတိပြုပါ။ ကျေးဇူးတော်ချီးမွမ်းခြင်းအကြောင်း သူဖော်ပြထား၏။ ၎င်းမှာ ကျွန်ုပ်တို့အတွက် ဘုရားသခင်လုပ်ဆောင်ပေးရာကို ကျေးဇူးတင်လေးမြတ်ကြောင်းတင်ပြသည့် ဆုတောင်းချက်ဖြစ်သည်။ ယင်းတွင် ကိုယ်တော်အားချီးမွမ်းခြင်းတို့ ပါဝင်ပေမည်။ တိုးလျှိုးအသနားခံခြင်းမှာ နှိမ့်ချပြီးစိတ်အားထက်သန်စွာ တောင်းပန်ခြင်းဖြစ်သည်။ အသနားခံခြင်းသည် သတ်သတ်မှတ်မှတ်အချက်ကို တောင်းခံခြင်းဖြစ်သည်။ (လုကာ ၁၁:၂၊ ၃) ကျွန်ုပ်တို့၏ ကောင်းကင်ခမည်းတော်သည် ယင်းတို့ထဲမှ မည်သည့်နည်းနှင့်မဆို ကိုယ်တော်ထံချဉ်းကပ်သူတို့ကို ဝမ်းမြောက်စွာလက်ခံတော်မူသည်။

 ၄။ ယေဟောဝါသည် ကျွန်ုပ်တို့၏ လိုအပ်ရာများကို သိရှိတော်မူသည့်တိုင် အဘယ်ကြောင့် ကိုယ်တော်ထံ အသနားခံကြဆဲဖြစ်သနည်း။

^၄ အချို့သူတို့က ‘ယေဟောဝါသည် ကျွန်ုပ်တို့လိုအပ်ရာအားလုံးကို သိတော်မူသည်မဟုတ်လော’ ဟုမေးပေမည်။ ကိုယ်တော် အမှန်ပင်သိတော်မူ၏။ (မဿဲ ၆:၈၊ ၃၂) သို့ဖြစ်လျှင် အသနားခံခြင်းဖြင့်ချဉ်းကပ်ရန် ကိုယ်တော် အဘယ်ကြောင့် အလိုရှိတော်မူသနည်း။ ဤဥပမာကို သုံးသပ်ကြည့်ပါ– စတိုးဆိုင်ပိုင်ရှင်တစ်ဦးသည် သူ၏ဖောက်သည်တချို့အား လက်ဆောင်ပေးမည်ဟု ကမ်းလှမ်းပေမည်။ သို့သော် ဖောက်သည်,သည် လက်ဆောင်ရယူရန် ပိုင်ရှင်ထံသွားကာ ယင်းကို တောင်းယူရမည်ဖြစ်သည်။ ထိုသို့တောင်းယူလိုစိတ်မရှိသူသည် ထိုကမ်းလှမ်းချက်ကို အမှန်တန်ဖိုးမထားကြောင်း တင်ပြရာရောက်ပေမည်။ အလားတူပင်၊ ယေဟောဝါထံ အသနားမခံချင်သောသူသည် ကိုယ်တော်ပြင်ဆင်ပေးချက်ကို တန်ဖိုးမထားကြောင်း တင်ပြရာရောက်ပေမည်။ ယေရှု ဤသို့မိန့်တော်မူခဲ့၏– “တောင်းကြလော့။ ထိုသို့တောင်းလျှင် ရကြလိမ့်မည်။” (ယောဟန် ၁၆:၂၄) ထိုသို့တောင်းနေခြင်းအားဖြင့် ဘုရားသခင်ကို ကိုးစားကြောင်း တင်ပြကြသည်။

ဘုရားသခင်ထံ မည်သို့ချဉ်းကပ်သင့်သနည်း

 ၅။ ယေရှု၏နာမဖြင့်ဆုတောင်းရန် အဘယ်ကြောင့်လိုသနည်း။

^၅ မည်သို့ဆုတောင်းရမည်နှင့်ပတ်သက်၍ တိကျသောစည်းမျဉ်းများစွာ ယေဟောဝါ မဖော်ပြထားပါ။ သို့တိုင် သမ္မာကျမ်းစာတွင်ဖော်ပြထားသည့် ဘုရားသခင်ထံ သင့်လျော်သောချဉ်းကပ်နည်းကို သင်ယူဖို့လိုသည်။ ဥပမာ၊ ယေရှုသည် နောက်တော်လိုက်များအား ဤသို့သင်ပေးခဲ့သည်– “သင်တို့သည် ငါ၏နာမကိုအမှီပြု၍ ခမည်းတော်မှာဆုတောင်းသမျှတို့ကို ခမည်းတော်သည် ပေးတော်မူမည်။” (ယောဟန် ၁၆:၂၃) သို့ဖြစ်၍ ယေရှုသည် လူသားအားလုံး ဘုရားသခင်၏ကောင်းချီးခံစားရစေသည့် တစ်ခုတည်းသောလမ်းကြောင်းဖြစ်ကြောင်း အသိအမှတ်ပြုကာ ယေရှု၏နာမဖြင့် ဆုတောင်းဖို့လိုသည်။

 ၆။ ဆုတောင်းသည့်အခါ အဘယ်ကိုယ်ဟန်အနေအထား ရှိသင့်သနည်း။

^၆ ဆုတောင်းသည့်အခါ ကိုယ်ဟန်အနေအထား မည်သို့ရှိသင့်သနည်း။ ဆုတောင်းချက်များ နားညောင်းခံရရန် သမ္မာကျမ်းစာတွင် သတ်သတ်မှတ်မှတ် ကိုယ်ဟန်အနေအထားနှင့်ပတ်သက်၍ ဖော်ပြမထားပါ။ (၃ ဓမ္မရာဇဝင် ၈:၂၂၊ ကဘ; နေဟမိ ၈:၆; မာကု ၁၁:၂၅၊ ကဘ; လုကာ ၂၂:၄၁) အရေးကြီးသည်မှာ စိတ်ရင်းမှန်၊ သဘောထားမှန်ဖြင့် ဘုရားသခင်ထံ ဆုတောင်းခြင်းဖြစ်သည်။—ယောလ ၂:၁၂၊ ၁၃။

 ၇။ (က) “အာမင်” ၏အဓိပ္ပာယ်ကား အဘယ်နည်း။ (ခ) ဆုတောင်းသည့်အခါ ယင်းကို တော်လျော်စွာ မည်သို့အသုံးပြုကြသနည်း။

^၇ “အာမင်” ဟူသည့်စကားလုံး အသုံးပြုခြင်းကော အသို့နည်း။ ယင်းကို ကျွန်ုပ်တို့၏ ဆုတောင်းချက်၊ အထူးသဖြင့် လူထုရှေ့ဆုတောင်းချက်၏ သင့်လျော်သောနိဂုံးချုပ်စကားလုံးဖြစ်ကြောင်း သမ္မာကျမ်းစာက ဖော်ပြသည်။ (ဆာလံ ၇၂:၁၉; ၈၉:၅၂) ဟေဗြဲစကားလုံး အာမင် (ʼa·menʹ) သည် “ဧကန်မုချ” ဟုအဓိပ္ပာယ်ရှိသည်။ မက်ကလင်းတော့ခ်နှင့် စထရောင်းတို့၏ စွယ်စုံကျမ်းအရ ဆုတောင်းချက်အဆုံးတွင် “အာမင်” ဟုပြောခြင်းအဓိပ္ပာယ်မှာ “ဖော်ပြခဲ့သောစကားများကို အတည်ပြုခြင်း၊ ယင်းတို့ပြည့်စုံလာရန် ပန်ကြားတောင်းပန်ခြင်း” ဖြစ်သည်။ သို့ဖြစ်၍ နိဂုံးချုပ်တွင် စိတ်ရင်းမှန်ဖြင့် “အာမင်” ဟုပြောခြင်းက ဆုတောင်းသူသည် ယခုတောင်းလျှောက်ခဲ့ရာများနှင့်ပတ်သက်၍ မိမိ၏ထက်သန်သောစိတ်ခံစားချက်ကို ဖော်ပြခြင်းဖြစ်သည်။ ခရစ်ယာန်တစ်ဦးသည် အသင်းတော်တွင် ကိုယ်စားပြုဆုတောင်းပြီး ယင်းစကားလုံးဖြင့်နိဂုံးချုပ်သည့်အခါ နားထောင်နေသူတို့သည် တောင်းလျှောက်ချက်များကို လှိုက်လှိုက်လှဲလှဲသဘောတူကြောင်း “အာမင်” ကိုစိတ်ထဲမှဖြစ်စေ၊ အသံထွက်၍ဖြစ်စေ ပူးပေါင်းဖော်ပြနိုင်ကြသည်။—၁ ကောရိန္သု ၁၄:၁၆။

 ၈။ ကျွန်ုပ်တို့၏ဆုတောင်းချက်အချို့သည် ယာကုပ် သို့မဟုတ် အာဗြဟံ၏ဆုတောင်းချက်နှင့် မည်သို့ဆင်တူနိုင်သနည်း။ ယင်းက ကျွန်ုပ်တို့နှင့်ပတ်သက်၍ အဘယ်အရာကိုတင်ပြခြင်း ဖြစ်မည်နည်း။

^၈ တောင်းလျှောက်ရာများကို ကျွန်ုပ်တို့မည်မျှအလေးထားကြောင်း တင်ပြရန် ဘုရားသခင်ခွင့်ပြုသည့် အချိန်အခါများရှိပေမည်။ ကောင်းချီးရရှိရန် ကောင်းကင်တမန်တစ်ပါးနှင့် တစ်ညလုံးနပန်းလုံးခဲ့သော ရှေးဘိုးဘေးယာကုပ်ကဲ့သို့ဖြစ်ဖို့ လိုပေမည်။ (ကမ္ဘာဦး ၃၂:၂၄-၂၆) သို့မဟုတ်၊ အချို့သောအခြေအနေများတွင် ကျွန်ုပ်တို့သည် အာဗြဟံကဲ့သို့ ဖြစ်ဖို့လိုပေမည်။ အာဗြဟံသည် လောတနှင့် သောဒုံမြို့တွင် ရှိကောင်းရှိနိုင်သည့် အခြားဖြောင့်မတ်သူတို့အတွက် ယေဟောဝါထံ အထပ်ထပ်တောင်းပန်ခဲ့သည်။ (ကမ္ဘာဦး ၁၈:၂၂-၃၃) အလားတူပင် ကျွန်ုပ်တို့အဖို့ အလွန်အဖိုးထိုက်သောအရာများဖြစ်ပါက ယေဟောဝါ၏ တရားမျှတ၊ ချစ်ခင်ကြင်နာမှုတို့အပေါ်အခြေခံကာ အသနားခံတောင်းပန်နိုင်သည်။

အဘယ်အရာ တောင်းလျှောက်နိုင်သနည်း

 ၉။ ဆုတောင်းသည့်အခါ အဘယ်အရာကို အဓိကအလေးထားသင့်သနည်း။

^၉ ပေါလုက “အရာရာ၌ . . . သင်တို့၏အသနားခံချက်များကို ဘုရားသခင်အား ကြားလျှောက်ကြလော့” ဟုဆိုထား၏။ (ဖိလိပ္ပိ ၄:၆၊ ကဘ) ထို့ကြောင့် ကျွန်ုပ်တို့၏ကိုယ်ပိုင်ဆုတောင်းချက်များတွင် ဘဝကဏ္ဍအသီးသီးနှင့်ပတ်သက်ရာများ ပါဝင်ပေမည်။ သို့သော် ကျွန်ုပ်တို့ဆုတောင်းချက်တွင် အဓိကအလေးထားသင့်သည့်အရာမှာ ယေဟောဝါနှင့်စပ်ဆိုင်ရာများ ဖြစ်သင့်သည်။ ယင်းနှင့်ပတ်သက်၍ ဒံယေလသည် ပုံသက်သေကောင်းပြခဲ့၏။ ဣသရေလလူမျိုးသည် မိမိတို့အပြစ်ကြောင့် ပြစ်ဒဏ်ခံနေရသည့်အခါ ဒံယေလက သနားကြင်နာမှုတင်ပြပါရန် ယေဟောဝါထံ ဤသို့အသနားခံခဲ့၏– “နာမတော်ဖြင့်သမုတ်ခံရသည်နှင့်အညီ ကိုယ်တော်အတွက် ဆိုင်းလင့်တော်မမူပါနှင့်။ အကျွန်ုပ်၏ဘုရားသခင်။” (ဒံယေလ ၉:၁၅-၁၉၊ သမ) ကျွန်ုပ်တို့သည် အလားတူဆုတောင်းခြင်းဖြင့် ယေဟောဝါ၏နာမတော်သန့်ရှင်းမြင့်မြတ်ရေးနှင့် ကိုယ်တော်၏အလိုတော်ပြည့်စုံရေးသည် ကျွန်ုပ်တို့၏ အဓိကအလေးထားရာဖြစ်ကြောင်း ဖော်ပြပါသလော။

၁၀။ ကိုယ်ရေးကိုယ်တာကိစ္စများ တောင်းလျှောက်ခြင်းသည် သင့်လျော်ကြောင်း မည်သို့သိရသနည်း။

^၁၀ ကိုယ်ရေးကိုယ်တာကိစ္စများကို တောင်းလျှောက်ခြင်းသည်လည်း သင့်လျော်ပါသည်။ ဥပမာ၊ ဆာလံဆရာကဲ့သို့ လေးနက်သောဝိညာဉ်ရေးရာများကို နားလည်သဘောပေါက်ရန် ဆုတောင်းနိုင်သည်။ သူဤသို့ ဆုတောင်းခဲ့၏– “အကျွန်ုပ်နားလည်စေတော်မူပါ။ တရားတော်ကို စောင့်ရှောက်ပါမည်။ စိတ်နှလုံးအကြွင်းမဲ့ စောင့်ရှောက်ပါမည်။” (ဆာလံ ၁၁၉:၃၃၊ ၃၄၊ သမ္မာ; ကောလောသဲ ၁:၉-၁၁) ယေရှုသည် “သေခြင်းမှကယ်လွှတ်နိုင်တော်မူသောသူကို . . . တိုးလျှိုးအသနားခံခြင်းအပါအဝင် အသနားခံ” တော်မူခဲ့သည်။ (ဟေဗြဲ ၅:၇၊ ကဘ) ယင်းက အန္တရာယ် သို့မဟုတ် စမ်းသပ်မှုများရင်ဆိုင်ရချိန်တွင် ခွန်အားပေးပါရန် တောင်းလျှောက်ခြင်းသည် သင့်လျော်ကြောင်း ဖော်ပြခဲ့သည်။ ယေရှုသည် တပည့်များအား စံပြဆုတောင်းချက်သင်ပေးရာတွင် အပြစ်များမှခွင့်လွှတ်ပါရန်နှင့် နေ့စဉ်အစာပေးပါရန်စသည့် ကိုယ်ရေးကိုယ်တာကိစ္စများ ပါဝင်စေခဲ့သည်။

၁၁။ စုံစမ်းနှောင့်ယှက်မှုကို လက်လျှော့အရှုံးမပေးရန် ဆုတောင်းခြင်းက မည်သို့ထောက်ကူနိုင်သနည်း။

^၁၁ ယင်းစံပြဆုတောင်းချက်ထဲတွင် “အပြစ်သွေးဆောင်ရာသို့ မလိုက်မပါစေဘဲ မကောင်းသောအမှုအရာမှလည်း ကယ်နုတ်တော်မူပါ” ဟူသည့်တောင်းဆိုချက်ကို ယေရှုထည့်သွင်းဖော်ပြခဲ့သည်။ (မဿဲ ၆:၉-၁၃) နောက်ပိုင်းတွင် ကိုယ်တော် ဤသို့ညွှန်ကြားခဲ့၏– “စုံစမ်းနှောင့်ယှက်ခြင်းနှင့် ကင်းလွတ်မည်အကြောင်း ဆုတောင်းလျက်စောင့်နေကြလော့။” (မဿဲ ၂၆:၄၁) စုံစမ်းနှောင့်ယှက်မှုများ ရင်ဆိုင်ရချိန်တွင် ဆုတောင်းရန်လိုသည်။ အလုပ်တွင် သို့မဟုတ် ကျောင်းတွင် ကျမ်းစာမူများကို လျစ်လျူရှုရန် စမ်းသပ်ခံရနိုင်သည်။ သက်သေခံမဟုတ်သူများက ခရစ်ယာန်များအတွက် မသင့်လျော်သော လုပ်ဆောင်မှုများတွင်ပါဝင်ရန် ကျွန်ုပ်တို့ကို ဖိတ်ခေါ်ပေမည်။ ဖြောင့်မတ်သောမူများကို ချိုးဖောက်ရာရောက်သောအရာကို လုပ်ဆောင်ဖို့ တောင်းဆိုခံရနိုင်သည်။ ထိုအချိန်အခါမျိုးတွင် ဆုတောင်းပါဟူသည့် ယေရှု၏ညွှန်ကြားချက်ကို လိုက်နာသင့်သည်။ စုံစမ်းနှောင့်ယှက်မှုမကြုံမီနှင့် ကြုံတွေ့နေရချိန်တို့တွင် အပြစ်သွေးဆောင်ရာသို့ မကျရောက်စေရန် ဘုရားသခင်ထံ ဆုတောင်းသင့်သည်။

၁၂။ စိုးရိမ်ပူပန်မှုကိုဖြစ်စေသည့် အဘယ်အကြောင်းရင်းများက ဆုတောင်းရန် လှုံ့ဆော်ပေးမည်နည်း။ ယေဟောဝါနှင့်ပတ်သက်၍ ကျွန်ုပ်တို့အဘယ်အရာ မျှော်လင့်နိုင်သနည်း။

^၁၂ ယနေ့ ဘုရားသခင့်ကျေးကျွန်များ၏ အသက်တာတွင် ဖိစီးမှုများနှင့် စိုးရိမ်ပူပန်မှုအမျိုးမျိုး ပေါ်လာတတ်သည်။ ဖျားနာမှုနှင့် စိတ်ဖိစီးမှုများသည် လူများစွာကို စိုးရိမ်ပူပန်စေသည့် အဓိကအကြောင်းရင်းများဖြစ်သည်။ ကျွန်ုပ်တို့ဝန်းကျင်ရှိ အကြမ်းဖက်မှုအခြေအနေများက ဘဝကိုဖိစီးမှုများစေသည်။ စီးပွားရေးကျပ်တည်းမှုများက အခြေခံလိုအပ်ရာများရရှိရန် ပို၍ခက်ခဲစေသည်။ ထိုအရာများကို ယေဟောဝါထံကြားလျှောက်ကြသည့် ကိုယ်တော့်ကျေးကျွန်များ၏ဆုတောင်းသံကို နားညောင်းတော်မူကြောင်း သိရှိရခြင်းက အလွန်စိတ်သက်သာမှုဖြစ်စေသည်! ယေဟောဝါနှင့်ပတ်သက်၍ ဆာလံ ၁၀၂:၁၇ တွင်ဤသို့ဆို၏– ‘ကိုးကွယ်ရာမဲ့သောသူတို့ ဆုတောင်းခြင်းအကြောင်းကို မထီမဲ့မြင်မပြု၊ သူတို့၏ဆုတောင်းချက်ကို မှတ်တော်မူလိမ့်မည်။’

၁၃။ (က) အဘယ်ကိုယ်ရေးကိုယ်တာကိစ္စများကို ဆုတောင်းရာတွင် ထည့်တောင်းရန်သင့်လျော်သနည်း။ (ခ) ထိုသို့တောင်းလျှောက်သည့် ပုံနမူနာတစ်ခုကို ဖော်ပြပါ။

^၁၃ မှန်ပါသည်၊ ယေဟောဝါ၏အမှုတော်ဆောင်ခြင်းလုပ်ငန်း သို့မဟုတ် ကိုယ်တော်နှင့် ကျွန်ုပ်တို့၏ဆက်ဆံရေးကို ထိခိုက်စေသည့် မည်သည့်အကြောင်းအရာကိုမဆို ထည့်တောင်းခြင်းသည် သင့်လျော်ပါသည်။ (၁ ယောဟန် ၅:၁၄) အိမ်ထောင်ရေး သို့မဟုတ် အလုပ်အကိုင် သို့မဟုတ် အမှုတော်ဆောင်ခြင်းလုပ်ငန်း တိုးချဲ့ရန်တို့နှင့်ပတ်သက်၍ ဆုံးဖြတ်ချက်များချမည်ဆိုလျှင် ဘုရားသခင့်လမ်းညွှန်မှုရရန် ယင်းအကြောင်းများကို ပွင့်ပွင့်လင်းလင်း ဖော်ပြတောင်းလျှောက်ပါ။ ဥပမာ၊ ဖိလစ်ပိုင်မှ အမျိုးသမီးငယ်တစ်ဦးသည် အချိန်ပြည့်အမှုဆောင်လုပ်ငန်းတွင် ပါဝင်လိုခဲ့သည်။ သို့ရာတွင် မိမိကိုယ်ကိုထောက်ပံ့ရန် အလုပ်အကိုင်မရှိဖြစ်နေသည်။ သူဤသို့ပြောပြ၏– “စနေနေ့တစ်ရက်မှာ ရှေ့ဆောင်လုပ်ငန်းနဲ့ပတ်သက်ပြီး ယေဟောဝါဆီ သတ်သတ်မှတ်မှတ်ဆုတောင်းလိုက်တယ်။ အဲ့ဒီနေ့မှာပဲ သတင်းကောင်းဟောပြောနေတုန်း ဆယ်ကျော်သက်တစ်ဦးကို စာအုပ်တစ်အုပ်ဝေငှလိုက်တယ်။ မမျှော်လင့်ဘဲ အဲ့ဒီမိန်းကလေးက ‘တနင်္လာနေ့မနက်ကျရင် ဦးဆုံး ကျွန်မရဲ့ကျောင်းကိုသွားပါ’ လို့ပြောတယ်။ ‘ဘာဖြစ်လို့လဲ’ လို့မေးလိုက်တဲ့အခါ သူက အမြန်ဆုံးခန့်ချင်တဲ့ အလုပ်တစ်ခုရှိတယ်လို့ ရှင်းပြတယ်။ ကျွန်မသွားတော့ ချက်ချင်းပဲ အလုပ်ရခဲ့တယ်။ မြန်မြန်ဆန်ဆန်ပဲ ဆုတောင်းချက်အဖြေရခဲ့တယ်။” ကမ္ဘာတစ်ဝန်းရှိ သက်သေခံများစွာတွင်လည်း အလားတူတွေ့ကြုံမှုများ ရှိကြသည်။ သို့ဖြစ်၍ သင်၏လှိုက်လှိုက်လှဲလှဲအသနားခံချက်ကို ဘုရားသခင်ထံဖော်ပြရန် မတွန့်ဆုတ်ပါနှင့်!

ကျွန်ုပ်တို့ အပြစ်ပြုမိလျှင်ကော အသို့နည်း

၁၄၊ ၁၅။ (က) လူတစ်ဦးသည် အပြစ်ပြုမိလျှင်ပင် ဆုတောင်းရန် အဘယ်ကြောင့် မတွန့်ဆုတ်သင့်သနည်း။ (ခ) လူတစ်ဦးသည် ဝိညာဉ်ရေးတွင် ပြန်ကျန်းမာလာရန် ကိုယ်တိုင်ဆုတောင်းသည့်အပြင် နောက်ထပ်အဘယ်အရာက အထောက်အကူပြုမည်နည်း။

^၁၄ တစ်စုံတစ်ဦး အပြစ်ပြုမိလျှင် ဆုတောင်းခြင်းက မည်သို့ထောက်ကူနိုင်သနည်း။ အပြစ်ပြုမိသူအချို့သည် ရှက်ရွံ့မှုကြောင့် ဆုမတောင်းကြပါ။ သို့သော် ယင်းသည် ပညာရှိလမ်းစဉ်မဟုတ်ပါ။ ဥပမာ– လေယာဉ်မှူးများသည် မိမိတို့လမ်းပျောက်နေကြောင်း သိမည်ဆိုပါက အကူအညီရရန် လေကြောင်းထိန်းသူများနှင့် ဆက်သွယ်နိုင်သည်။ သို့သော် လမ်းပျောက်နေသော လေယာဉ်မှူးသည် မိမိလမ်းပျောက်သွားခြင်းကြောင့် ရှက်ရွံ့ပြီး လေကြောင်းထိန်းသူတို့နှင့်ဆက်သွယ်ရန် တွန့်ဆုတ်မည်ဆိုလျှင် မည်သို့ဖြစ်နိုင်သနည်း။ ဘေးအန္တရာယ်နှင့် ကြုံရနိုင်သည်။ အလားတူပင်၊ အပြစ်ပြုမိသူသည် ဘုရားသခင်ထံဆုတောင်းဖို့ ရှက်ရွံ့နေမည်ဆိုလျှင် နောက်ထပ်အန္တရာယ်များနှင့် ကြုံရနိုင်သည်။ အပြစ်ပြုမိ၍ရှက်ရွံ့ခြင်းက ယေဟောဝါထံဆုတောင်းခြင်းကို မရပ်တန့်သွားစေသင့်ပါ။ အမှန်မှာ၊ ဘုရားသခင်သည် ကြီးလေးသောအပြစ်ပြုမိသူတို့ကို ကိုယ်တော့်ထံဆုတောင်းရန် ဖိတ်ခေါ်ထားတော်မူ၏။ ပရောဖက်ဟေရှာယက သူ့ခေတ်ရှိအပြစ်သားများအား ယေဟောဝါသည် “အထူးသဖြင့် အပြစ်ကိုလွှတ်တော်မူလိမ့်မည်” ဖြစ်သောကြောင့် ကိုယ်တော်ထံဆုတောင်းကြရန် တိုက်တွန်းခဲ့သည်။ (ဟေရှာယ ၅၅:၆၊ ၇) မှန်ပါသည်၊ တစ်ဦးတစ်ယောက်သည် ‘ယေဟောဝါ၏ကျေးဇူးတော်ကို ခံရရန်’ ဦးဆုံး သူသည် အပြစ်ရှိလမ်းစဉ်ကိုရပ်ပြီး စိတ်ရင်းမှန်နှင့်နောင်တယူခြင်းအားဖြင့် ‘ကိုယ်တော်ကို စိတ်နှလုံးအကြွင်းမဲ့ တောင်းပန်’ ဖို့လိုသည်။—ဆာလံ ၁၁၉:၅၈; ဒံယေလ ၉:၁၃။

^၁၅ အပြစ်နှင့်ပတ်သက်လျှင် အခြားအကြောင်းရင်းကြောင့်လည်း ဆုတောင်းခြင်းသည် အရေးပါလာသည်။ တပည့်ဖြစ်သူယာကုပ်က ဝိညာဉ်ရေးအကူအညီလိုအပ်နေသူနှင့်ပတ်သက်၍ ဤသို့ဆို၏– “သင်းအုပ်တို့ကိုခေါ်၍ သူတို့သည် . . . သူ့အပေါ်မှာဆုတောင်းကြစေ။ . . . သခင်ဘုရားသည် သူ့ကိုထမြောက်စေတော်မူမည်။” (ယာကုပ် ၅:၁၄၊ ၁၅) မှန်ပါသည်၊ ထိုသူသည် ယေဟောဝါထံဆုတောင်းကာ မိမိ၏အပြစ်ကို ကိုယ်တိုင်ဝန်ခံသင့်သည့်အပြင် မိမိအတွက် ဆုတောင်းပေးရန် အသက်ကြီးသူများကို တောင်းခံနိုင်သည်။ ယင်းက သူ့အား ဝိညာဉ်ရေးတွင် ပြန်ကျန်းမာလာစေရန် အထောက်အကူပြုမည်။

ဆုတောင်းချက်များ၏ အဖြေ

၁၆၊ ၁၇။ (က) ဆုတောင်းချက်များကို ယေဟောဝါ မည်သို့ဖြေကြားတော်မူသနည်း။ (ခ) ဆုတောင်းခြင်းနှင့် ဟောပြောခြင်းလုပ်ငန်းသည် အနီးကပ်ဆက်နွှယ်မှုရှိကြောင်း အဘယ်အတွေ့အကြုံများက ဖော်ပြသနည်း။

^၁၆ ဆုတောင်းချက်များကို မည်သို့ဖြေကြားတော်မူသနည်း။ အချို့သောဆုတောင်းချက်များသည် မြန်မြန်နှင့် သိသိသာသာ အဖြေရရှိပေမည်။ (၄ ဓမ္မရာဇဝင် ၂၀:၁-၆) အခြားဆုတောင်းချက်များမှာမူ အချိန်အတော်ကြာပြီး ဆုတောင်းချက်အဖြေကို ခွဲခြားသိရန် ခက်ခဲနိုင်သည်။ ယေရှု၏ပုံဥပမာပါ တရားသူကြီးထံ အကြိမ်ကြိမ်သွားကာ တောင်းဆိုခဲ့သောမုဆိုးမကဲ့သို့ ဘုရားသခင်ထံ အကြိမ်ကြိမ်ဆုတောင်းရန် လိုအပ်ပေမည်။ (လုကာ ၁၈:၁-၈) ကျွန်ုပ်တို့သည် ဘုရားသခင့်အလိုတော်နှင့်အညီ ဆုတောင်းသောအခါ “ငါ့ကိုမနှောင့်ယှက်နှင့်” ဟု ယေဟောဝါသည် ဘယ်တော့မျှမိန့်တော်မူမည်မဟုတ်ကြောင်း စိတ်ချနိုင်သည်။—လုကာ ၁၁:၅-၉။

^၁၇ ယေဟောဝါ၏လူမျိုးသည် ဆုတောင်းချက်များ ဖြေကြားခံရသည့် အတွေ့အကြုံများစွာရှိကြသည်။ ယင်းကို လူထုခရစ်ယာန်ဓမ္မအမှုလုပ်ငန်းတွင် တွေ့မြင်ရလေ့ရှိသည်။ ဥပမာ၊ ဖိလစ်ပိုင်ရှိ ခရစ်ယာန်ညီအစ်မနှစ်ဦးသည် နိုင်ငံအတွင်းရှိ ဝေးခေါင်သောဒေသတစ်ခုတွင် သမ္မာကျမ်းစာစာပေများကို ဝေငှနေကြသည်။ သူတို့သည် အမျိုးသမီးတစ်ဦးအား ဝေစာဝေငှသည့်အခါ ထိုအမျိုးသမီး၏ မျက်လုံးအိမ်တွင် မျက်ရည်များပြည့်လာသည်။ “ကျွန်မကို သမ္မာကျမ်းစာသင်ပေးမယ့်သူ တစ်ယောက်ယောက် စေလွှတ်ပေးပါလို့ မနေ့ညတုန်းကပဲ ဘုရားသခင်ဆီ ကျွန်မဆုတောင်းထားတာ၊ အခု ဒါဟာ ကျွန်မဆုတောင်းချက်ရဲ့ အဖြေပဲဖြစ်မယ်” ဟုပြောသည်။ များမကြာမီ ထိုအမျိုးသမီးသည် ဘုရားသခင့်နိုင်ငံတော်ခန်းမတွင် အစည်းအဝေးများကို စတင်တက်ရောက်ခဲ့သည်။ အရှေ့တောင်အာရှရှိ အခြားဒေသတစ်ခုတွင် ခရစ်ယာန်ညီအစ်ကိုတစ်ဦးသည် အထူးလုံခြုံရေးချထားသော လူနေအဆောက်အအုံတစ်ခုတွင် ဟောပြောရန် စိုးရွံ့နေသည်။ သို့သော် ယေဟောဝါထံဆုတောင်းကာ ရဲဆေးတင်လိုက်ပြီး အဆောက်အအုံထဲဝင်သွားသည်။ တိုက်ခန်းတစ်ခုကို တံခါးခေါက်လိုက်ရာ အမျိုးသမီးငယ်တစ်ဦး ထွက်လာသည်။ ညီအစ်ကိုက သူလာရသည့်အကြောင်းရင်းကို ရှင်းပြလိုက်သောအခါ ထိုအမျိုးသမီးသည် စငိုပါတော့သည်။ ယေဟောဝါသက်သေများကို သူရှာနေကြောင်း၊ ရှာတွေ့ရန်ဆုတောင်းခဲ့ကြောင်း ပြောပြသည်။ ညီအစ်ကိုက ထိုအမျိုးသမီးအား ယေဟောဝါသက်သေတို့၏ ဒေသခံအသင်းတော်နှင့် ဆက်သွယ်မိစေရန် ဝမ်းမြောက်စွာ အကူအညီပေးခဲ့သည်။

၁၈။ (က) ကျွန်ုပ်တို့၏ဆုတောင်းချက်များ အဖြေရရှိသည့်အခါ မည်သို့တုံ့ပြန်သင့်သနည်း။ (ခ) အခါအခွင့်သင့်တိုင်း ဆုတောင်းမည်ဆိုပါက အဘယ်အရာကို ကျွန်ုပ်တို့ ယုံကြည်စိတ်ချနိုင်သနည်း။

^၁၈ ဆုတောင်းခြင်းသည် အလွန်ကောင်းမွန်လှသော ပြင်ဆင်ပေးချက်တစ်ခုအမှန်ပင်ဖြစ်သည်။ ယေဟောဝါသည် နားညောင်းရန်နှင့် အဖြေပေးရန် အသင့်ရှိတော်မူ၏။ (ဟေရှာယ ၃၀:၁၈၊ ၁၉) သို့တိုင် ကျွန်ုပ်တို့၏ ဆုတောင်းချက်များကို ယေဟောဝါမည်သို့ဖြေကြားကြောင်း မြင်တတ်ရန်လိုသည်။ ကျွန်ုပ်တို့မျှော်လင့်ထားသည့်နည်းအတိုင်း အမြဲအဖြေရမည်တော့မဟုတ်ပါ။ သို့သော် ကျွန်ုပ်တို့သည် ကိုယ်တော်၏လမ်းညွှန်ပေးမှုကို တွေ့ရှိရသည့်အခါ ကျွန်ုပ်တို့၏ကျေးဇူးတင်မှုနှင့် ကိုယ်တော်အားချီးမွမ်းခြင်းပြုရန် ဘယ်တော့မျှမမေ့သင့်ပါ။ (၁ သက်သာလောနိတ် ၅:၁၈) ထို့ပြင် “အရာရာ၌ ကျေးဇူးတော်ကိုချီးမွမ်းခြင်းနှင့်တကွ ဆုတောင်းခြင်း၊ တိုးလျှိုးအသနားခံခြင်းအားဖြင့် သင်တို့၏အသနားခံချက်များကို ဘုရားသခင်အား ကြားလျှောက်ကြလော့” ဟူသည့် တမန်တော်ပေါလု၏သတိပေးချက်ကို အစဉ်သတိရပါလေ။ မှန်ပါသည်၊ ဘုရားသခင်နှင့်ပြောဆိုဆက်သွယ်ရန် အခွင့်အရေးတိုင်းကို အသုံးပြုပါ။ ထိုသို့ပြုမည်ဆိုလျှင် ဆုတောင်းချက်အဖြေရရှိသူတို့နှင့်ပတ်သက်၍ ပေါလုဖော်ပြခဲ့သည့် ဤစကားများမှန်ကန်ကြောင်း သင်တွေ့ကြုံခံစားရမည်– “အဘယ်သူမျှကြံ၍မမီနိုင်သော ဘုရားသခင်၏ငြိမ်သက်ခြင်းသည် . . . သင်တို့၏စိတ်နှလုံးတို့ကို စောင့်မလိမ့်မည်။”—ဖိလိပ္ပိ ၄:၆၊ ၇၊ ကဘ။

သင်ဖြေဆိုနိုင်သလော

• ကျွန်ုပ်တို့၏ဆုတောင်းချက်များသည် အဘယ်ပုံစံဖြစ်နိုင်သနည်း။

• ကျွန်ုပ်တို့ မည်သို့ဆုတောင်းသင့်သနည်း။

• ဆုတောင်းချက်များတွင် အဘယ်အကြောင်းအရာများကို ထည့်သွင်းတောင်းလျှောက်နိုင်သနည်း။

• တစ်စုံတစ်ဦးသည် အပြစ်ပြုမိသည့်အခါ ဆုတောင်းခြင်း၏အခန်းကဏ္ဍမှာ အဘယ်နည်း။

[စာမျက်နှာ ၂၉ ပါ ရုပ်ပုံ]

လှိုက်လှိုက်လှဲလှဲ ဆုတောင်းခြင်းက စုံစမ်းနှောင့်ယှက်မှုကို လက်လျှော့အရှုံးမပေးရန် အထောက်အကူပြု

[စာမျက်နှာ ၃၁ ပါ ရုပ်ပုံ]

ဆုတောင်းခြင်းအားဖြင့် ကျွန်ုပ်တို့၏ ကျေးဇူးတင်မှု၊ စိုးရိမ်ပူပန်မှုနှင့် တိုးလျှိုး တောင်းခံမှုများကို ဘုရားသခင်ထံတင်ပြကြ