Tlen kiijkuilok Lucas

4 Uajka Jesús kiselik ichikaualis Dios,* uan kistejki tlen ueyatl Jordán uan ichikaualis Dios kiyakantiajki kampa uaktok tlali, 2 nopaya itstoya 40 tonali, uan Diablo kinejki kichiuas ma tlajtlakolchiua. Amo tleno kikuajtoya, yeka kema panok nopa 40 tonali, mayanki. 3 Uajka Diablo kiiljuik: “Tlaj tiiKone Dios,* xikiljui ni tetl ma mokuepa tlakualistli”.* 4 Uan Jesús kinankilik: “Ijkuilijtok: ‘Amo san tlakualistli kipaleuia ma yolto se akajya’”.

5 Uajka Diablo kiuikak kampa tlauejkapa uan san ipan se tlalochtli* kinextilik nochi altepemej tlen onka ipan Tlaltipaktli. 6 Uan Diablo kiiljuik: “Nimitsmakas ininricojyo nochi ni altepemej uan nimitskauas xikinnauati, pampa nechmakatokej nopa tlanauatili uan na nijmaka katli na nijneki. 7 Yeka, tlaj san sempatsi tinechueyichiuas, nochi elis moaxka”. 8 Jesús kinankilik: “Ijkuilijtok: ‘Xijueyichiua Jehová* moDios uan san yaya xijtekipano’”.

9 Uajka Diablo kiuikak Jerusalén, kiketski kampa más tlauejkapa tlen nopa teokali uan kiiljuik: “Tlaj tiiKone Dios, ximomajkaua desde nikaj para tlatsintla, 10 pampa ijkuilijtok: ‘Ya kinnauatis iángeles ma mitsmanauikaj’, 11 uan ‘Mitsmatsakuilisej, kiampa amo timoikxikokos ika se tetl’”. 12 Jesús kinankilik: “Nojkia ijkuilijtok: ‘Amo xijchiua se tlamantli san pampa tijneki tikitas tlaj moDios Jehová* mitspaleuis’”. 13 Uajka kema Diablo ya tlantoya kitemolia kenijkatsa kichiuas ma tlajtlakolchiua, kikajtejki, uan kichixtoya kema sampa ueliskia kichiuas ma tlajtlakolchiua.

14 Uajka Jesús, ika ichikaualis Dios, tlakuepilik Galilea. Uan ipan nochi nopa tlali kimatkej tlen kichiuayaya. 15 Nojkia pejki tlamachtia kampa tlaueyichiuaj judíos, uan nochi maseualmej kiuejkapantlaliyayaj.

16 Teipa yajki Nazaret, kampa moskaltijtoya, uan kej momajtoya kichiua ipan sábado, kalajki kampa tlaueyichiuayayaj judíos uan moketski para tlapouas. 17 Uajka kimakakej nopa amamimili tlen teokamanalojketl* Isaías. Ya kitlapok uan kipantik kampa ijkuilijtoya: 18 “Jehová* nechmakak ichikaualis pampa nechtlapejpenik para nikinmatiltis nopa kuali tlamachtili katli amo tleno kipiaj. Nechtitlanki para nitematiltis kinmajkauasej* tlatekipanouanij uan sampa tlachiasej katli amo tlachiaj, para kinmakixtisej katli tlaijiyouiaj, 19 para nitematiltis nopa tonali kema Jehová* tlateochiuas”. 20 Teipa, kimimilok nopa amamimili, sampa kimakak katli tlapaleuiyaya kampa tlaueyichiuaj judíos uan moseuik. Nochi katli nopaya itstoyaj, san kisentlajtlachiliyayaj. 21 Uan pejki kiniljuia: “Nama moaxitia tlen kiijtoua iTlajkuilol Dios tlen namantsi inkikajkej”.

22 Nochi pejkej kamanaltij kuali tlen ya uan mosentlachiliyayaj ika nopa tlajtoli yejyektsitsij tlen kisayaya ipan ikamak. Kiijtouayayaj: “Ni ikone José, ¿axke?”. 23 Uajka kiniljuik: “Temachtli innechiljuisej ni tlajtoli: ‘Tepajtijketl, ta moselti ximopajti’. Uan inkiijtosej: ‘Nojkia nikaj ipan moaltepe xijchiua tlen tijkajkej tijchijki ipan Capernaúm’”. 24 Nojkia kiniljuik: “Temachtli niinmechiljuia, yon se teokamanalojketl kuali kiseliaj ipan ialtepe. 25 Nelia niinmechiljuia, ipan Israel itstoyaj miakej siuamej katli ya miktoya ininueue kema itstoya Elías uan amo uetski atl eyi xiuitl uan tlajko, uan onkak se ueyi mayantli ipan nochi nopa tlali. 26 Pero Elías amo kititlankej ika yon se tlen nopa siuamej, san kititlankej kampa nopa siuatl katli ya miktoya iueue tlen altepetl Sarepta, ipan tlali Sidón. 27 Nojkia, kema itstoya teokamanalojketl Eliseo, ipan Israel itstoyaj miakej katli kipiayayaj lepra.* Pero ya amo kichikajki yon se tlen inijuantij; san kichikajki Naamán katli euayaya Siria”. 28 Uajka, nochi katli kikajkej nopa tlamantli kampa tlaueyichiuayayaj judíos, tlauel kualankej. 29 Yeka moketstejkej, nimantsi kikixtijkej Jesús tlen nopa altepetl, uan kiuikakej kampa más tlauejkapa tlen nopa tepetl kampa kichijchijtoyaj ininaltepe, para kikuamajkauasej uan ma mokuatokati.* 30 Pero ya panotikiski tlatlajko kampa inijuantij uan yajki.

31 Teipa ixtemok Capernaúm, se altepetl tlen tlali Galilea. Sejse sábado nopaya kinmachtiyaya maseualmej, 32 uan mosentlachiliyayaj kema kikakiyayaj kenijkatsa tlamachtiyaya, pampa kamanaltiyaya ika tlanauatili. 33 Kampa tlaueyichiuayayaj judíos itstoya se tlakatl katli kipixtoya se amo kuali ajakatl,* uan ya chikauak kuatsajtsik: 34 “¿Tlake tijchiua nikaj Jesús, katli tieua Nazaret? ¿Tiualajtok titechtsontlamiltiki? Kuali nijmati ta tieli katli Dios kiualtitlanki”. 35 Pero Jesús kiajuak nopa amo kuali ajakatl uan kiiljuik: “Ximokamatsakua uan xikisa tlen ni tlakatl”. Uajka nopa amo kuali ajakatl kitlauisok tlalchi nopa tlakatl kampa itstoyaj maseualmej, uan kiski tlen itlakayo uan amo kikokok. 36 Kema kiitakej nopa, nochi mosentlachilijkej uan pejkej moiljuiaj: “¡Xijkakikaj kenijkatsa kamanalti! Kinnauatia amo kuali ajakamej ika tlanauatili uan chikaualistli, ¡uan inijuantij kisaj tlen maseualmej!”. 37 Uan nochi tlen Jesús kichiuayaya, momoyajki ipan nochi nopa tlali.

38 Kema kiski kampa tlaueyichiuayayaj judíos, Jesús kalajki ichaj Simón. Uan imona Simón chikauak totoniayaya, uan kiiljuijkej ma kipaleui. 39 Uajka mopachok kampa uilantoya,* kichikajki uan ayokmo totonixki.* Nopa siuatl nimantsi mejki uan pejki kintlachijchiuilia.

40 Kema tiotlakixki, nochi katli kinpixtoyaj ipan ininchaj kokoyanij ika miak tlamantli kokolistli, kinuikakej kampa Jesús. Uan ya kinchikajki kema kitlalik imax ipan sejse nopa kokoyanij. 41 Nojkia, miakej maseualmej kinkixtilik amo kuali ajakamej, uan kema kisayayaj chikauak kuatsajtsiyayaj: “¡Ta tiiKone Dios!”. Pero ya kintlakaualtiyaya uan amo kinkauayaya ma kamanaltikaj, pampa nopa amo kuali ajakamej kimatiyayaj ya eliyaya nopa Cristo.

42 Ika ijnalok, kistejki kampa itstoya uan yajki kampa tlatsitsikatok. Pero miakej maseualmej pejkej kitemouaj uan asitoj hasta kampa itstoya, uan kinejkej kitsakuilisej para amo ma kinkajteua. 43 Pero ya kiniljuik: “Nojkia moneki nitematiltis nopa kuali tlamachtili tlen iTlanauatijkayo Dios ipan sekinok altepemej, pampa yeka nechualtitlankej”. 44 Yeka nojua tlajtolmoyajtinenki kampa tlaueyichiuaj judíos ipan tlali Judea.