Kampa moixtoma se keski tlajtoli
A B C D E F G H I J K L M N O P Q S T U Y Z
A
Acaya.
Ipan iTlajkuilol Dios ika Griego kiampa kiiljuiaj se tlali tlen Roma kinauatiyaya uan eltoya ika sur tlen tlali Grecia. Katli nopaya tekichiuayayaj itstoyaj ipan altepetl Corinto. Ipan tlali Acaya eltoya nopa tlali tlen kiiljuiaj Peloponeso uan nojkia nopa tlali tlen mokaua tlatlajko Grecia (Hch 18:12).
achtouiejketl.
Ni tlajtoli kiijtosneki iachtouikone se tlakatl. Uejkajkia kema moijkuilok Biblia, katli achtouiejketl tlauel kipatiitayayaj ichampoyouaj. Kema nopa tetaj mikiyaya, nopa achtouiejketl kinyakanayaya ichampoyouaj. Ni tlajtoli nojkia motekiuia kema achtoui tlakatiyaya se piltlapialtsi tlen okichtli (Éx 11:5; 13:12; Gé 25:33; Col 1:15).
akatl.
Kiampa kintokaxtiaj miak xiuitl tlen moskaltia kampa tlaxolontok. Ipan miak textos kiijtosneki nopa xiuitl tlen kiiljuiaj Arundo donax (Job 8:11; Is 42:3; Mt 27:29; Ap 11:1). Xikita AKATL TLEN IKA TLATLAMACHIUAJ
alabastro.
Kiampa kiiljuiyayaj pilfrascojtsitsi kampa kiajokuiyayaj perfume tlen kichijchiuayayaj ika se tetl tlen onkayaya nechka altepetl Alabastrón ipan Egipto. Kichijchiuayayaj kechpitsajtsi para kuali kitentsakuasej uan kiampa amo kisaskia nopa perfume tlen tlauel patiyo eliyaya. Kema panok tonali, nojkia kiampa kitokaxtijkej nopa tetl tlen ika kichijchiuayayaj (Mr 14:3).
alma.
Tlajtoli hebreo néfesh uan griego psykhḗ. Kema tijtlachiliaj ipan Biblia kenijkatsa motekiuijtok ni tlajtoli, tikitaj kiijtosneki eyi tlamantli 1) maseualmej, 2) tlapialmej o 3) tonemilis o tlapialmej ininnemilis (Gé 1:20; 2:7; Nú 31:28; 1Pe 3:20; nojkia ipan notas). Kema Biblia kamanalti tlen maseualmej, nopa tlajtoli néfesh uan psykhḗ kiijtosneki tlen uelis tikitskis, tlen nesi uan tlen miki, uan amo kitekiuia kej sekinok religiones kitekiuijtokej ni tlajtoli. Ipan ni Biblia motlajtolkuepki nopa tlajtoli psykhḗ kej kiijtosneki ipan sejse textos, kej “nemilistli”, “se akajya”, “maseuali”, “ika nochi moyolo”, o kemantika san kitekiuiaj se tlajtoli kej “ya”, “ta”, “inijuantij”, “tojuantij”. Ipan se keski textos, nopa tlajtoli alma nesi ipan notas pampa nojkia ueliskia kiampa motlajtolkuepas. Kema motekiuia nopa tlajtoli ipan notas moneki tijkuamachilisej kej nikaj moixtoma. Kema kiijtoua se akajya kichiua se tlamantli ika nochi ialma, kiijtosneki kichiua ika nochi inemilis, ika nochi iyolo o nelia mosentlalia ipan nopa tlamantli (Dt 6:5; Mt 22:37). Ipan se keski textos, nopa tlajtoli néfesh uan psykhḗ kineki kiijtos tlen kiyoltilana o tlen kineki se maseuali. Nojkia kineki kiijtos kema se akajya miki o itlakayo se katli mijki (Nú 6:6; Pr 23:2; Is 56:11; Ag 2:13).
amamimili.
Eliyaya se amatl ueueyak tlachijchiuali ika papiro o kuetlaxtli. Nopaya tlajkuilouayayaj san ipan se lado uan kimimilouayayaj ipan se kuauitl. ITlajkuilol Dios kiijkuilojkej uan kiixkopinkej ipan amamimili, kiampa eliyaya nopa libros kema moijkuilok Biblia (Jer 36:4, 18, 23; Lu 4:17-20; 2Ti 4:13).
amén.
Kiijtosneki ‘kiampa ma eli’ o ‘temachtli’. Kisa ipan tlajtoli hebreo ʼamán, tlen kiijtosneki ‘eli temachtli’. Kiampa kiijtouayayaj para kinextisej kuali kiitayayaj tlen se akajya kitenkauayaya, kema momaijtouayayaj o kema kiijtouayayaj se tlamantli tlen melauak. Ipan Apocalipsis kiampa kiiljuiaj Jesús (Dt 27:26; 1Cr 16:36; Ap 3:14).
amo kuali ajakatl; demonio.
Se espíritu tlen amo ueli tikitaj uan kipia más chikaualistli que maseualmej. Ipan Génesis 6:2, kiniljuiaj “ikoneuaj Dios katli melauak” uan ipan Judas 6, kiniljuiaj “ángeles”. Dios amo kinchijchijki para ma kichiuakaj tlen amo kuali. Eliyayaj ángeles katli ininselti kitlapejpenijkej elisej ikualankaitakauaj Dios pampa ayokmo kichijkej tlen ya kiijtoua ipan nopa tonali kema Noé itstoya, uan kipaleuijkej Satanás para kiixpanosej Jehová (Dt 32:17; Lu 8:30; Hch 16:16; Snt 2:19).
amo pinauaj tlajtlakolchiuasej.
Tlajtoli griego asélgueia. Kiijtosneki tlen kichiua se akajya tlen ika tlauel kiixpano itlanauatiljuaj Dios uan kinextia yon kentsi pinaua o amo majmaui kichiuas nopa tlamantli. Tlen kichiua kinextia amo tlatlepanita o hasta kinkualankaita katli tlayakanaj uan amo kitlepanita tlanauatili. Ni kiijtosneki kema se akajya tlauel tlajtlakolchiua (Gál 5:19; 2Pe 2:7).
ángel.
Tlajtoli hebreo, malʼákh, uan ika griego, ágguelos. Nochi ome tlajtoli kiijtosneki ‘tlayolmelajketl’, pero kema motlajtolkuepa “ángel” kiijtosneki se katli Dios kititlani ma tlayolmelauati (Gé 16:7; 32:3; Snt 2:25; Ap 22:8). Nopa ángeles elij espíritus katli kipiaj chikaualistli uan ipa itstoyaj kema Dios kinchijchijki maseualmej. Biblia nojkia kintokaxtia “tlauel miakej ángeles”, “ikoneuaj Dios” uan “sitlalimej tlen kauanij ika ijnalok” (Dt 33:2; Job 1:6; 38:7). Dios amo kinchijchijki para ma kinpiakaj ininkoneuaj, inijuantij sesentsitsij kinchijchijki. Itstokej kipano 100 millones ángeles (Da 7:10). Biblia kiijtoua sejse ángel kipia itoka uan amo elij sanse kej sekinok. Inijuantij amo moueyimatij, yeka amo kikauaj ma kinueyichiuakaj, uan miakej hasta amo kiijtouaj inintoka (Gé 32:29; Lu 1:26; Ap 22:8, 9). Amo kipiaj sanse tlanauatili uan kichiuaj miak tlamantli tekitl, sekij tlatekipanouaj iixpa iueyi silla Jehová, tematiltiaj tlen Dios kiijtoua, kinpaleuiaj Jehová itekipanojkauaj katli itstokej ipan Tlaltipaktli, kintlatsakuiltiaj katli Dios kiijtoua moneki kintlatsakuiltisej uan tlapaleuiaj ma momoyaua nopa kuali tlamachtili (2Re 19:35; Sl 34:7; Lu 1:30, 31; Ap 5:11; 14:6). Teipa, tlateuisej iuaya Jesús ipan Armagedón (Ap 19:14, 15).
apóstol.
arcángel.
Kiijtosneki ‘katli kinyakana ángeles’. Nopa eyi letras arc- tlen ika peua, kiijtosneki ‘tlayakanketl’. Ni tlamantli techpaleuia tijmatisej itstok san setsi arcángel, uan nojkia kiampa tikijtouaj pampa Biblia kitokaxtia arcángel san setsi uan amo miakej. Biblia kiijtoua nopa arcángel itoka Miguel (Da 12:1; Jud 9; Ap 12:7).
Areópago.
Se tlachikili uejkapantik tlen altepetl Atenas, mokauayaya nechka kampa kiiljuiyayaj Acrópolis. Nojkia kiampa kinixmatiyayaj nopa tekichiuanij katli nopaya mosentiliyayaj. Se tonali, se keskij ixtlamatinij tlen kiniljuiaj epicúreos uan estoicos kiuikakej Pablo kampa Areópago para ma kiixtoma tlen kineltoka (Hch 17:19).
asélgueia.
Xikita AMO PINAUAJ TLAJTLAKOLCHIUASEJ.
Asia.
Ipan iTlajkuilol Dios ika Griego, kiampa kiiljuiaj se tlali kampa Roma tlanauatiyaya kampa nojkia eltoya nopa tlali tlen nama tikixmatij kej Turquía uan nojkia se keski piltlaltsitsij kej Samos uan Patmos. Éfeso eliyaya nopa altepetl tlen más ueyi (Hch 20:16; Ap 1:4).
atsonpoliuilistli; teatsonpoliuiltia.
Kiijtosneki kema senkistok o nejmaxtik kikalakiaj se akajya ipan atl. Jesús kinnauatik itokilijkauaj ma moatsonpoliuiltikaj. Ipan iTlajkuilol Dios nojkia kiijtoua tlen nopa atsonpoliuilistli tlen Juan, atsonpoliuilistli ika ichikaualis Dios, atsonpoliuilistli ika tlitl uan sekinok (Mt 3:11, 16; 28:19; Jn 3:23; 1Pe 3:21).
auilnemilistli.
Tlajtoli griego pornéia. Ni tlajtoli motekiuia ipan iTlajkuilol Dios kema kamanalti tlen Dios amo kipaktia kema omej motekaj sansejko. Kiijtosneki kema se akajya momekatia, kema monamaka, kema motekaj sansejko pero amo mosiuajtijtokej o monamiktijtokej, kema omej tlakamej o omej siuamej motekaj sansejko uan kema motekaj ika se tlapiali. Ipan Apocalipsis, kamanalti tlen nopa religión tlen amo melauak katli eli kej se auilnenkasiuatl uan kiixmatij kej “Ueyi Babilonia”, nopaya kiixnextia kenijkatsa mouika ininuaya tlanauatianij para ma kimakakaj tlanauatili uan ma kipaleuikaj ika tomij (Ap 14:8; 17:2; 18:3; Mt 5:32; Hch 15:29; Gál 5:19). Xikita AUILNENKASIUATL; AUILNENKATLAKATL.
Axkualtlakatl.
Nojkia kiampa kitokaxtiaj Satanás, nopa Diablo, katli kiijixnamiki Dios uan itlanauatiljuaj tlen xitlauak (Mt 6:13; 1Jn 5:19).
B
Baal.
Nopa dios katli Canaán euanij kiueyichiuayayaj. Kiitayayaj kejuak eliyaya iteko iluikaktli uan nopa dios katli kichiuayaya ma uetsi atl uan ma tlaeli. Nojkia kiampa kintokaxtiyayaj sekinok dioses katli amo tlauel ipati eliyayaj. Nopa tlajtoli ika hebreo kiijtosneki ‘tekojtli’ (1Re 18:21; Ro 11:4).
Belcebú.
Nojkia kiampa kitokaxtiaj Satanás, katli kinyakana amo kuali ajakamej o demonios. Uelis kiampa mokajki pampa kipatlakej nopa tokajyotl Baal-Zebub, katli eliyaya nopa dios Baal tlen filisteaeuanij kiueyichiuayayaj ipan altepetl Ecrón (2Re 1:3; Mt 12:24).
C
Caldea.
Uejkajkia kiampa kiiljuiyayaj nopa tlali tlen eltok kampa moxexeloua ueyatl Tigris uan Éufrates; uan nojkia kiampa kiniljuiyayaj katli nopaya itstoyaj. Teipa nojkia kiampa pejkej kitokaxtiaj tlali Babilonia uan katli nopaya itstoyaj. Nojkia kiniljuiyayaj caldeos katli momachtiyayaj ciencia, tlen uejkajkia panok, sekinok tlajtoli uan momachtiyayaj kenijkatsa moliniaj tlen eltok iluikak, pero nojkia tetlajchiuiyayaj uan kintlachiliyayaj sitlalimej para kiijtosej tlake panoskia teipa (Esd 5:12; Da 4:7; Hch 7:4).
Canaán.
Noé iixui uan nopa najpa konetl tlen kipixki Cam. Nopa 11 uejueyi familias katli eliyayaj iteipaixuiuaj Canaán, teipa mochantijkej ipan nopa tlali tlen mokaua ika kampa kisa Tonati tlen nopa mar Mediterráneo, tlatlajko tlali Egipto uan Siria. Nopaya kiiljuijkej “tlali Canaán” (Le 18:3; Gé 9:18; Hch 13:19).
César.
Inintsonkiska tlanauatianij tlen Roma tlen teipa nojkia kiampa kiniljuiyayaj. Ipan Biblia nesi inintoka se keskij tlen nopa tekichiuanij, kej Augusto, Tiberio uan Claudio. Maske Nerón itoka amo nesi, nojkia kiiljuiaj César. Ni tlajtoli nojkia motekiuia ipan iTlajkuilol Dios ika Griego para kinixnextis tekichiuanij uan katli kipiaj tlanauatili ipan se altepetl (Mr 12:17; Hch 25:12).
Chachapalchijketl.
Se akajya katli kichijchiua chachapali, platos uan sekinok tlamantli ika sokitl. Ika tlajtoli hebreo kiijtosneki ‘katli kichijchiua’. Biblia miakpa kamanalti tlen kenijkatsa se chachapalchijketl kitekiuia sokitl para kiixnextis kenijkatsa Jehová kinyakana maseualmej uan altepemej (Is 64:8; Ro 9:21).
chikaualistli; espíritu.
Nopa tlajtoli ika hebreo rúaj, uan ika griego pnéuma, miakpa motlajtolkuepa kej “chikaualistli” o “espíritu” uan kineki kiijtos miak tlamantli. Nochi kiijtosneki tlen maseualmej amo uelij kiitaj, uan nesi kenijkatsa tekiti. Nopa tlajtoli ika hebreo uan griego uelis kiijtosneki 1) nopa ajakatl, 2) tlen kichiua ma yoltokaj maseualmej uan tlapialmej, 3) tlen kiyololinia se maseuali para ma kichiua o ma kiijto se tlamantli, 4) tlajtoli tlen Dios o amo kuali ajakamej kichiuaj ma tematiltikaj, 5) ángeles uan nojkia amo kuali ajakamej, uan 6) ichikaualis Dios o espíritu santo (Éx 35:21; Sl 104:29; Mt 12:43; Lu 11:13).
circuncisión.
Kineki kiijtos kema kiyakapantekiliaj ikuetlaxo tlen ipiltlakayo se okichpil. Abrahán uan nochi ikoneuaj monekiyaya mochiuilisej circuncisión, pero Cristo itokilijkauaj ayokmo moneki kiampa kichiuasej. Ipan se keski textos kampa motekiuia ni tlajtoli san kiixnextia se tlamantli (Gé 17:10; 1Co 7:19; Flp 3:3). Kemantika se akajya kiiljuiyayaj incircunciso pampa kichikoitayayaj pampa euayaya ipan seyok altepetl kampa amo kiueyichiuayayaj Dios.
codo.
Tlen ika tlatlamachiuayayaj, tlen eliyaya desde ininajkolmolik hasta iyakapaj ininmakpil tlen más ueueyak. Israeleuanij momajtoyaj kitekiuiaj se codo tlen iuexka eliyaya 44,5 centímetros, pero nojkia kitekiuiyayaj seyok codo más ueueyak, tlen iuexka eliyaya 51,8 centímetros (Gé 6:15; Lu 12:25).
cortina.
Yejyektsi yoyomitl tlen kiijtsontoyaj tlen kipiayaya querubines. Nopa yoyomitl kixelouayaya kampa Tlatsejtseloltik uan kampa Más Tlatsejtseloltik ipan nopa yoyonkali uan nojkia ipan teokali (Éx 26:31; 2Cr 3:14; Mt 27:51; Heb 9:3). Nojkia onkayaya cortinas kampa kalakiyayaj ipan nopa tabernáculo uan kalteno (Éx 26:36; 27:16).
Cristo.
Cristo itokilijkauaj.
Dios kiampa kintokaxtik katli momachtiyayaj tlen Cristo tlamachtiyaya (Hch 11:26; 26:28).
D
Decápolis.
Se keskij altepemej griegos tlen achtoui eliyaya matlaktli (mokixtia ipan tlajtoli griego déka, tlen kiijtosneki ‘matlaktli’, uan pólis, tlen kiijtosneki ‘altepetl’). Nojkia kiampa kiixmatiyayaj nopa tlali tlen mokaua ika kampa kisa Tonati ipan mar tlen Galilea uan ueyatl Jordán, kampa eltoyaj miakej tlen nopa altepemej. Nopaya tlauel tlanamakayayaj uan kimoyauayayaj tlen momajtoyaj kichiuaj griegos. Jesús panok ipan nopa tlali pero amo ijkuilijtok tlaj panok ipan se tlen nopa altepemej (Mt 4:25; Mr 5:20).
denario.
Diablo.
diezmo.
Se diez por ciento tlen maseualmej temakayayaj kej se regalo para Dios (Mal 3:10; Dt 26:12; Mt 23:23). ITlanauatil Moisés kiijtouayaya levitas monekiyaya kiselisej sejse xiuitl se diez por ciento tlen nochi tlen tlakiyaya ipan inintlal israeleuanij uan nojkia tlen uakaxmej uan borregojmej tlen tlakatiyayaj. Levitas nojkia monekiyaya temakasej se diez por ciento tlen nochi tlen kiseliyayaj para ma mopanoltikaj sacerdotes katli eliyayaj iteipaixuiuaj Aarón. Nojkia, maseualmej temakayayaj sekinok diezmos. Cristo itokilijkauaj amo moneki temakasej diezmo.
dracma.
Ipan iTlajkuilol Dios ika Griego, kineki kiijtos se platatomij tlen kichijchiuayayaj griegos, uan ipan nopa tonali ietika eliyaya 3,4 gramos. Ipan iTlajkuilol Dios ika Hebreo, kiijtouaj onkayaya se dracma tlachijchiuali ika oro tlen persas kitekiuiyayaj uan eliyaya sanse kej nopa tomij tlen kiiljuiyayaj dárico (Ne 7:70; Mt 17:24).
E
epicúreos.
Katli kitokiliyayaj nopa ixtlamatketl Epicuro, katli euayaya Grecia (tlakatki ipan xiuitl 341 kema ayamo ualajtoya Jesús, uan mijki ipan xiuitl 270 kema ayamo ualajtoya Jesús). Ya moiljuiyaya se akajya monekiyaya itstos san para moyolpakiltis (Hch 17:18).
escribas.
Se akajya katli kimaixkopinayaya iTlajkuilol Dios ika Hebreo. Kema Jesús itstoya ipan Tlaltipaktli eliyayaj tlakamej katli kuali momachtijtoyaj nopa Tlanauatili tlen Moisés. Inijuantij amo kiselijkej Jesús (Esd 7:6, nota; Mr 12:38, 39; 14:1).
estoicos.
Se keskij ixtlamatinij griegos katli moiljuiyayaj se akajya ueliskia yolpakis tlaj moyakanaskia ika tlen moiljuiyaya uan tlaj kitlepanitaskiaj tlen eltok ipan Tlaltipaktli. Inijuantij moiljuiyayaj se akajya katli kuali tlalnamiki, amo motekipachoua ika tlen kitlaijiyouiltia o ika tlen ueliskia moyolpakiltis (Hch 17:18).
Éufrates.
Ueyatl tlen más uejka onasi uan tlauel kipatiitaj, tlen eltok ika sur uan kampa kalaki Tonati ipan Asia, uan eli se tlen nopa ome ueyatl tlen más pankisa ipan Mesopotamia. Achtoui nesi ipan Génesis 2:14; eli se tlen nopa naui ueyatl tlen Edén. Miakpa kiiljuiaj “Ueyatl” (Gé 31:21). Nopa ueyatl eliyaya tlen kinepanouayaya nopa tlali tlen kimakatoyaj Israel, tlen mokua ika norte (Gé 15:18; Ap 16:12).
eunuco.
Ni tlajtoli kiijtosneki se tlakatl katli kikaparojtokej. Inijuantij kitekipanouayayaj o kimokuitlauiyayaj nopa siuatlanauatijketl o isiuajuaj nopa tlanauatijketl. Ni tlajtoli nojkia kiijtosneki se tlakatl katli kipiayaya uejueyi tekitl kampa tekichiuayaya se tlanauatijketl, maske amo kikaparojtoyaj. Kemantika san kiixnextia katli amo mosiuajtiaj o amo monamiktiaj pampa kinekij kipaleuisej iTlanauatijkayo Dios, nopa kiijtosneki monauatiaj pampa mosentlaliaj nojua más kitekipanosej Dios (Mt 19:12; Est 2:15; Hch 8:27).
F
faraón.
Kiampa kiniljuiyayaj tlanauatianij tlen Egipto. Ipan Biblia nesi inintoka makuili faraones (Sisac, So, Tirhacá, Nekó y Hofrá); uan sekinok amo kiijtoua inintoka, kej nopa faraones katli kinixmatkej Abrahán, Moisés uan José (Éx 15:4; Ro 9:17).
fariseos.
Ipan achtoui siglo eliyayaj katli kitokiliyayaj se tlamachtili tlen moxelojtoya tlen religión judía. Maske amo eliyayaj sacerdotes, tlauel kitlepanitayayaj iTlanauatil Moisés uan kiitayayaj tlen tlamachtiyayaj katli uejkajkia itstoyaj sanse ipati kej nopa Tlanauatili (Mt 23:23). Amo kinekiyayaj griegos ma kimoyauakaj tlen momajtoyaj kichiuaj, uan kuali momachtijtoyaj nopa Tlanauatili uan tlen momajtoyaj kichiuaj katli uejkajkia itstoyaj, yeka kipiayayaj miak tlanauatili ika maseualmej (Mt 23:2-6). Se keskij eliyayaj tekichiuanij katli kipiayayaj más Tlanauatili o Sanedrín. Nochipa kitlaijiljuiyayaj Jesús pampa amo kitlepanitayaya sábado yon tlen momajtoyaj kichiuaj, uan nojkia pampa mouikayaya ininuaya tlajtlakolchiuanij uan katli tlainamayayaj impuestos. Se keskij fariseos, kej Saulo katli euayaya Tarso, mochijkej Cristo itokilijkauaj (Mt 9:11; 12:14; Mr 7:5; Lu 6:2; Hch 26:5).
G
Gehena.
Ika griego kiampa kiiljuiyayaj nopa atlajtli Hinón, tlen eltoya ika sur uan kampa kalaki Tonati, kampa achtouia eltoya Jerusalén (Jer 7:31). Ni eltoya kalixpa tlen nopa altepetl uan nopaya kitlatiyayaj tlasoli. Teokamalouanij kiijtojtoyaj ipan nopa atlajtli kitemaskiaj inintlakayo mijkatsitsij (Jer 7:32; 19:6). Amo onka yon se tlamantli tlen kinextia tlaj kinmajkauayayaj ipan Gehena maseualmej o tlapialmej para ma kintlatikaj kema nojua yoltoyaj o ma kintlaijiyouiltikaj. Uajka, nopa amo kiixnextia kampa nochipa kintlaijiyouiltiaj ika tlitl katli mijkej. Jesús uan itokilijkauaj kitekiuijkej tlajtoli Gehena para kiixnextisej nopa “ompa mikilistli”, tlen kiijtosneki kema kitsontlamiltiaj se akajya para nochipa (Ap 20:14; Mt 5:22; 10:28).
griego.
Inintlajtol katli itstoyaj Grecia; nojkia se maseuali katli tlakajtoya ipan Grecia o tlen ualayaya ipan se familia tlen euayaya nopaya. Ipan ITlajkuilol Dios ika griego kiijtosneki miak tlamantli: kiijtosneki katli amo eliyayaj judíos o katli kichuayayaj tlen momajtoyaj kichiuaj griegos uan kitekiuiyayaj inintlajtol (Joe 3:6; Jn 12:20).
H
hebreo.
Ni tlajtoli pejki motekiuia ika Abrán (Abrahán) para ma nesi amo eliyaya sanse kej amorreos katli itstoyaj nechka. Teipa nojkia kiampa kiniljuijkej iteipaixuiuaj Abrahán tlen tlakatkej ika iixui Jacob, uan nojkia kiampa kiiljuijkej nopa tlajtoli tlen kamanaltiyayaj. Kema Jesús itstoya, nopa tlajtoli hebreo kitekiuiyaya miak kamanali tlen mokixtijtoya ika arameo uan eliyaya nopa tlajtoli tlen kitekiuiyayaj Cristo uan itokilijkauaj (Gé 14:13; Éx 5:3; Hch 26:14).
Hermes.
Se dios tlen kiueyichiuayayaj ipan Grecia, eliyaya ikone Zeus. Maseualmej moiljuiyayaj nopa sekinok dioses kititlaniyayaj ma tematilti tlen inijuantij kiijtouayayaj uan eliyaya se dios katli kuali tlamachtiyaya. Yeka ipan altepetl Listra, maseualmej moiljuijkej Pablo eliyaya Hermes (Hch 14:12).
Herodes.
Inintsonkiska se keskij tlanauatianij tlen Roma kintlaliyaya ma kinnauatikaj judíos. Herodes el Grande tlauel kiixmatiyayaj pampa kikualchijchijki nopa teokali ipan Jerusalén uan nojkia pampa kinekiyaya kimiktis Jesús uan yeka tlanauatik ma kinmiktikaj miakej konemej (Mt 2:16; Lu 1:5). Herodes Arquelao uan Herodes Antipas, ikoneuaj Herodes el Grande, kintekimakakej ma tlanauatikaj ipan se keski tlali kampa inintata tlanauatijtoya (Mt 2:22). Antipas kitekimakakej kej gobernador, maske maseualmej kiiljuiyayaj tlanauatijketl, uan tekichijki desde nopa eyi xiuitl uan tlajko kema Jesús tlajtolmoyajtinenki hasta tlen moijtoua ipan Hechos capítulo 12 (Mr 6:14-17; Lu 3:1, 19, 20; 13:31, 32; 23:6-15; Hch 4:27; 13:1). Teipa, se iángel Dios kimiktik Herodes Agripa I, iixui Herodes el Grande, kema san tlanauatijtoya se kentsi tonali (Hch 12:1-6, 18-23). Ikone, Herodes Agripa II, pejki tekichiua uan tlanauatik hasta kema judíos moajkomankej para kinteuisej romaeuanij (Hch 23:35; 25:13, 22-27; 26:1, 2, 19-32).
I
ichikaualis Dios; espíritu santo.
Se ueyi chikaualistli tlen amo nesi uan tlen Dios kitekiuia para kichiuas tlen mosentlalijtok. Eli tlatsejtseloltik o santo pampa uala tlen Jehová, katli san ya kichiua nochi tlen xitlauak uan senkistok tlapajpaktik, nojkia pampa Dios kitekiuia para kichiuas tlen eli tlatsejtseloltik (Lu 1:35; Hch 1:8).
iKone David.
Ilírico.
Se tlali tlen Roma kinauatiyaya tlen eltoya ika norte uan kampa kalaki Tonati tlen Grecia. Pablo asito hasta nopona kema tlajtolmoyajtinenki, pero amo xitlauak momati tlaj nopaya tlajtolmoyajki o tlaj san asito nopona (Ro 15:19).
iljuitl kema judíos kiilnamikiyayaj kimaktilijtoyaj Dios nopa teokali.
Kema kiilnamikiyayaj kitlapajpakchijtoyaj nopa teokali pampa Antíoco Epífanes kisokiuijtoya. Nopa iljuitl peuayaya ipan tonali 25, metstli kislev, uan uejkauayaya chikueyi tonali (Jn 10:22).
Iljuitl tlen Pantsi tlen Amo Kipia Levadura.
Ipan se xiuitl, israeleuanij kichiuayayaj eyi iljuitl tlen más ipati. Ni eliyaya nopa achtoui iljuitl tlen kichiuayayaj. Peuayaya ipan tonali 15, metstli nisán, ika ualmostla kema ya mochijtoya Pascua, uan uejkauayaya chikome tonali. Maseualmej san ueliyayaj kikuaj pantsi tlen amo kipiayaya levadura o tlasonejkayotl para kiilnamikisej kema kistejkej Egipto (Éx 23:15; Mr 14:1).
Iljuitl tlen Pentecostés.
Ipan se xiuitl, kichiuayayaj ipan Jerusalén eyi iljuitl tlen más ipati. Ni eliyaya nopa ompa iljuitl tlen nochi tlakamej monekiyaya kichiuasej. Kitokaxtiaj Iljuitl kema Pixkaj o nopa “tonali kema achtoui kitekij tlen tlaki”. Nopa iljuitl mochiuayaya kema ya panotoya 50 tonali teipa tlen 16 iteki metstli nisán (Éx 23:16; 34:22; Hch 2:1).
incienso.
Se keski pilxiuitsitsij tlen kimanelojtoyaj ika kuauitl ieso tlen mijyotia, yolik tlatla uan kichiua ajuiyak ma tlamijyoti. Ipan tabernáculo uan ipan teokali kitekiuiyayaj se incienso tlen san nopaya kitekiuiyayaj tlen kichijchijtoyaj ika naui tlamantli. Kitlatiyayaj ika ijnalok uan ika tlayoua ipan nopa tlaixpamitl para incienso tlen eltoya Kampa Tlatsejtseloltik. Ipan nopa Tonali kema Kiixtsakuayayaj Tlajtlakoli kitlatiyayaj Kampa Más Tlatsejtseloltik. Kiixnextiyaya nopa tlamaijtoli tlen Dios kiselia tlen kichiuaj itekipanojkauaj. Cristo itokilijkauaj amo monekiyaya kitekiuisej incienso (Éx 30:34, 35; Le 16:13; Ap 5:8).
incircunciso.
Xikita CIRCUNCISIÓN.
Israel.
Dios kiampa kitokaxtlalik Jacob uan nopa tokajyotl nojkia motekiuik para kiampa kiniljuisej nochi iixuiuaj. Ininteipaixuiuaj nopa 12 ikoneuaj Jacob miakpa kiniljuiaj ikoneuaj Israel, altepetl Israel, tlakamej katli euaj Israel o israeleuanij. Nojkia motekiuik nopa tokajyotl Israel para kitokaxtisej nopa tlanauatijkayotl kampa itstoyaj matlaktli uejueyi familias ika norte, tlen moxelok ika tlanauatijkayotl tlen sur. Teipa kiampa pejkej kiniljuiaj Cristo itokilijkauaj katli kintlapejpenijtoyaj ika ichikaualis Dios, nopa “Israel tlen iaxka Dios” (Gál 6:16; Gé 32:28; 2Sa 7:23; Ro 9:6).
iTlajkuilol Dios.
itlamia tonali.
Ipan teokamanali o profecías, motekiuia ni tlajtoli uan sekinok, kema kiijtoua panos se keski tlamantli tlen nechka motlamiaxitis (Eze 38:16; Da 10:14; Hch 2:17). Ipan se keski teokamanali, uelis kiijtosneki se keski xiuitl uan ipan sekinok kiijtosneki miak xiuitl. Ipan Biblia, ni tlajtoli motekiuia kema kamanalti tlen “itlamia tonali” tlen mochijtok ipan Tlaltipaktli, kema Jesús tlakuepilia (2Ti 3:1; Snt 5:3; 2Pe 3:3).
iTlanauatijkayo Dios.
Xikita TLANAUATIJKAYOTL.
iTlanauatil Moisés.
Tlanauatili tlen Jehová kinmakak israeleuanij ika Moisés kema itstoyaj ipan uaktok tlali tlen Sinaí ipan xiuitl 1513 a.u.J. Miakpa, nopa achtoui makuili libros tlen ika peua Biblia kiiljuiaj Tlanauatili (Jos 23:6; Lu 24:44).
itokilijka se akajya.
Se akajya katli seyok maseuali kimachtia o kipaleuia ma kiyeko se tlamantli. Ipan ITlajkuilol Dios ika griego, ni tlajtoli motekiuia kema se akajya kineltoka uan kichiua tlen Cristo tlamachtik, pero nojkia motekiuia ika maseualmej katli kitokiliyayaj tlen tlamachtiyayaj Juan katli teAtsonpoliuitiyaya, fariseos uan Moisés (Mt 10:1; 28:19; Lu 5:33; Jn 9:28).
itsajka nopa kuakajo.
Ni eliyaya kampa nopa sumo sacerdote kiijtselouayaya inineso nopa tlapialmej tlen kinmiktiyayaj ipan nopa Tonali kema Kiixtsakuayayaj Tlajtlakoli. Ni mokixtijtok tlen se tlajtoli hebreo tlen kiijtosneki ‘kiixtsakuaj (tlajtlakoli)’ o ‘kiixpolouaj (tlajtlakoli)’. Kichijchijtoyaj ika oro uan iixko kipixtoya omej querubines, ipan sejse lado kitlalijtoyaj se. Kemantika san kiiljuiaj “iixtsajka” (Éx 25:17-22; 1Cr 28:11; Heb 9:5, nota).
iyojtsi.
J
Jacob.
Ininkone Isaac uan Rebeca. Teipa Dios kitokaxtlalik Israel. Elki ininueyitata katli itstoyaj ipan altepetl Israel (katli nojkia kiniljuiyayaj israeleuanij uan teipa kinixmatkej kej judíos). Kinpixki 12 ikoneuaj. Inijuantij uan ininteipaixuiuaj kichijkej nopa 12 uejueyi familias o tribus tlen altepetl Israel. Nopa tokajyotl Jacob nojua motekiuik kema kitokaxtiyayaj nopa altepetl Israel (Gé 32:28; Mt 22:32).
Jehová.
Ipan Biblia tlen Yankuik Tlaltipaktli motekiuia nopa tokajyotl “Jehová” 237 imiakpa ipan iTlajkuilol Dios ika Griego. Tlen uala tlatsintla kinextia kenke motlalik Dios itoka:
1. ITlajkuilol Dios ika Hebreo tlen moixkopintoya uan motekiuiyaya kema itstoyaj Jesús uan iapóstoles, kipiayaya nopa naui letras hebreas (יהוה) tlen kiiljuiyayaj Tetragrámaton tlen ika kiijkuilouayayaj itoka Dios ipan nochi texto.
2. Kema itstoyaj Jesús uan iapóstoles, nopa Tetragrámaton nojkia nesiyaya ipan iTlajkuilol Dios ika Hebreo tlen kitlajtolkueptoyaj ika tlajtoli griego.
3. ITlajkuilol Dios ika Griego kinextia Jesús miakpa kitekiuik Dios itoka uan nojkia kinnextilik sekinok (Juan 17:6, 11, 12, 26).
4. Dios kichijki iTlajkuilol ika Griego ma mopiui ika iTlajkuilol ika Hebreo, yeka amo kinamikiskia tlaj itoka Jehová san nima ixpoliuiskia ipan Biblia.
5. Ipan iTlajkuilol Dios ika Griego, Dios itoka nesi ika se tokajyotl tlen achi kototsi (Apocalipsis 19:1, 3, 4, 6).
6. Tlen uejkajkia kiijkuilojkej judíos, kinextia Cristo itokilijkauaj katli eliyayaj judíos kitekiuijkej Dios itoka ipan tlen kiijkuilojkej.
7. Se keskij ixtlamatinij katli momachtijtokej Biblia kiijtouaj uelis Dios itoka nesiyaya ipan nopa textos tlen iTlajkuilol Dios ika Hebreo tlen eltok ipan iTlajkuilol Dios ika Griego.
8. Nopa biblias tlen kitlajtolkueptokej ipan kipano 100 tlajtoli, kipia Dios itoka ipan iTlajkuilol Dios ika Griego.
Kej tikitstokej, onka miak tlamantli tlen kinextia moneki motlalis itoka Jehová kampa kinamiki ipan iTlajkuilol Dios ika Griego. Ya nopa kichijtokej katli kitlajtolkuepkej Biblia tlen Yankuik Tlaltipaktli. Tlauel kitlepanitaj Dios itoka uan kimakasij kiixpolosej se tlamantli tlen eltoya ipan amatlajkuiloli tlen uejkajkia moijkuilok (Apocalipsis 22:18, 19).
Judá.
Elki ika najpa ininkone tlen kipixkej Jacob uan Lea. Kema Jacob nechka mikiskia, kiijtok ipan ichampoyouaj Judá kisaskia se ueyi tlanauatijketl tlen tlanauatiskia miak xiuitl. Kema Jesús tlakatiko kej maseuali, elki se iteipaixui Judá. Nojkia kiampa kiiljuiaj nopa ueyi familia o tribu, uan teipa nojkia kiampa kiiljuijkej nopa tlanauatijkayotl tlen Judá. Ni tlanauatijkayotl nojkia kiiljuiyayaj tlanauatijkayotl tlen sur, nopaya itstoyaj nopa uejueyij familias tlen Judá uan Benjamín, uan nojkia itstoyaj sacerdotes uan levitas. Mokauayaya ika sur tlen nopa altepetl, kampa eltoya Jerusalén uan nopa teokali (Gé 29:35; 49:10; 1Re 4:20; Heb 7:14).
judío.
Se katli ualayaya tlen nopa ueyi familia Judá. Ni tlajtoli pejki motekiuia kema kitsontlamiltijkej nopa tlanauatijkayotl kampa itstoyaj matlaktli nopa uejueyi familias tlen Israel (2Re 16:6). Kema israeleuanij ya tlakuepilijtoyaj tlen Babilonia kiampa pejkej kiniljuiaj maske ualayayaj ipan tlen ueli ueyi familia (Esd 4:12). Teipa kiampa kiniljuijkej israeleuanij para amo ma nesi eliyayaj sanse kej sekinok altepemej (Est 3:6). Pablo kitekiuik ni tlajtoli para kiixnextis se tlamantli kema kiixtonki ipan tlanechikoli amo aka más pankisa (Ro 2:28, 29; Gál 3:28).
K
kampa Más Tlatsejtseloltik.
Kampa más tlaijtik o tlakaltech tlen nopa yoyonkali uan nopa teokali. Nopaya kitlalijtoyaj nopa kuakajo kampa eltoya tlajtolsenkaualistli. Nopa Tlanauatili tlen kimakakej Moisés kiijtouayaya san nopa sumo sacerdote ueliyaya kalaki nopaya se uelta ipan se xiuitl ipan nopa Tonali kema Kiixtsakuayayaj Tlajtlakoli (Éx 26:33; Le 16:2, 17; 1Re 6:16; Heb 9:3).
kampa tetlajtolsenkauaj.
Kemantika eliyaya kej se kuatlapechtli tlen kichijchijtoyaj kampa tlanemijya o tlanempa uan kipiayaya se keski escalones kampa tlejkoyayaj. Nopa tekichiuanij moseuiyayaj nopaya para kinkamanaljuisej maseualmej uan kinmatiltisej tlen kitlapejpenijtoyaj kichiuasej. Nopa tlajtoli “kampa Dios tetlajtolsenkaua” uan “kampa Cristo tetlajtolsenkaua” kiixnextia kenijkatsa Jehová moiljuijtok kitlajtolsenkauas maseualmej (Ro 14:10; 2Co 5:10; Jn 19:13).
kampa Tlatsejtseloltik.
Eli nopa achtoui cuarto uan tlen más ueyi tlen nopa yoyonkali uan nopa teokali. Amo eli sanse ika kampa Más Tlatsejtseloltik tlen eltok hasta tlaijtik o tlakaltech. Kampa Tlatsejtseloltik tlen nopa yoyonkali eltoya nopa tlauilketsali tlen oro, nopa tlaixpamitl tlachijchiuali ika oro kampa kitlatiyayaj incienso, nopa mesa uan nopa pantsi tlen kimaktiliaj Dios uan se keski tlamantli tlen kitekiuiyayaj uan kichijchijtoyaj ika oro; kampa Tlatsejtseloltik tlen nopa teokali eltoya nopa tlaixpamitl tlachijchiuali ika oro, nopa matlaktli tlauilketsali tlachijchiuali ika oro uan nopa matlaktli mesas kampa eltoya nopa pantsi tlen kimaktiliaj Dios (Éx 26:33; Heb 9:2).
Kampa tlauel Tlayejyektsi; Paraíso.
Se jardín kampa tlauel tlayejyektsi. Nopa achtoui jardín kichijchijki Jehová ipan Edén para ma itstokaj Adán uan Eva. Kema Jesús kuapilijtoya ipan nopa kuauitl, kiiljuik se tlen nopa tlachtekinij katli itstoya ielpa o inakastla para Tlaltipaktli mochiuaskia se paraíso. Uelis ipan 2 Corintios 12:4 kiijtosneki se paraíso tlen onkas teipa, uan ipan Apocalipsis 2:7, kiijtosneki se paraíso tlen eltok iluikak (Can 4:13; Lu 23:43).
kampa tlaueyichiuaj judíos.
Tlajtoli tlen kiijtosneki ‘tlanechikoli’ o ‘tlasentilistli’. Ipan miak textos kiijtosneki kampa judíos mosentiliyayaj para kipouasej iTlajkuilol Dios, kampa kiniljuiyayaj tlake monekiyaya kichiuasej, momaijtouayayaj o tlajtolmoyauayayaj. Kema Jesús itstoya ipan Tlaltipaktli onkayaya se kali kampa judíos tlaueyichiuayayaj ipan sejse ueyi altepetl tlen Israel, uan ipan altepemej tlen más uejueyi onkayaya más miak (Lu 4:16; Hch 13:14, 15).
kampa tlayejyektiaj.
Kampa kiyolkixtiyayaj nochi tlen pixkayayaj. Eliyaya se piltlamayantsi yaualtik tlen eltoya tlamimiltipa kampa tlaajakayaya (Mt 3:12). Xikita KEMA TLAYOLKIXTIAJ.
katli eli iKone se Maseuali.
Ipan iTlajkuilol Dios ika Hebreo, kiampa kiniljuiaj Ezequiel uan Daniel para kinextis inijuantij eliyayaj tlakamej katli mikij uan amo eliyayaj sanse kej Dios katli kiniljuiyaya tlake tematiltiskiaj (Eze 3:17; Da 8:17). Ipan amochtli Mateo hasta Juan, nopa tlajtoli katli eli iKone se Maseuali nesi 80 imiakpa, uan motekiuia kema kamanalti tlen Jesús. Kinextia inana elki se maseuali, yeka Jesús nojkia elki se maseuali uan amo san elki se ángel katli kipixki itlakayo kej maseualmej. Nojkia kinextia Jesús kichiuaskia ma moaxiti tlen kiijtoua Daniel 7:13, 14 (Mt 19:28; 20:28).
katli kiijtoua tlen panos teipa.
Se akajya katli kiijtoua uelis kiitas tlen panos teipa. Biblia kiijtoua nojkia kiampa elij nopa sacerdotes katli kitekiuiaj magia, katli kitlachiliaj sitlalimej uan sekinok (Le 19:31; Dt 18:11; Hch 16:16).
katli kimokuitlauiaj tlanauatijketl tlen Roma.
Se grupo tlen soldados tlen kintlalijtoyaj para kimokuitlauisej tlanauatijketl tlen Roma. Teipa pejkej kipiaj miak tlanauatili ipan política, yeka ueliyayaj kinpaleuiaj o kintekikixtiliaj tlanauatianij tlen Roma (Flp 1:13).
katli kintlachiliaj sitlalimej.
Se akajya katli kitlachilia kenijkatsa nejnemi Tonati, metstli uan sitlalimej uan kiampa kiijtoua tlen panos teipa (Da 2:27; Mt 2:1).
katli kipaleuiyayaj Herodes.
Nojkia kinixmatiyayaj kej herodianos. Eliyaya se partido tlen judíos katli kinpaleuiyayaj nopa tlanauatianij katli kiniljuiyayaj Herodes kema romaeuanij tlanauatiyayaj nopaya. Uelis se keskij tlen nopa saduceos nojkia itstoyaj ipan nopa partido. Nopa herodianos mopaleuijkej ininuaya fariseos para kimiktisej Jesús (Mr 3:6).
katli motlajkoketsa.
kema Cristo tlakuepilis.
Ipan se keski textos tlen uala ipan iTlajkuilol Dios ika Griego, kiijtosneki kema Jesucristo ualaskia kej se Tlanauatijketl, desde kema kitekimakakej ipan iluikak uan kema tlamis tlen mochijtok ipan ni tonali. Kema Cristo tlakuepilis amo san ualas uan nima yas. Uejkauas se keski tonali (Mt 24:3).
kema kiixtsakuayayaj tlajtlakoli.
Ipan iTlajkuilol Dios ika Hebreo, kiixtsakuayayaj tlajtlakoli ika tlapialmej tlen temaktiliyayaj uan kiampa israeleuanij ueliskiaj kinechkauisej Dios uan kiueyichiuasej. Nopa tlanauatili tlen kimakakej Moisés kiijtouayaya monekiyaya temakasej tlapialmej, uan más kiampa kichiuayayaj ipan nopa Tonali kema Kiixtsakuayayaj Tlajtlakoli tlen mochiuayaya sejse xiuitl, por itlajtlakoljuaj sejse maseuali uan nochi katli itstoyaj ipan nopa altepetl para ueliskia moyoltlalisej iuaya Dios. Tlen temaktiliyayaj kiixnextik kema Jesús temaktilik inemilis, tlen kiixtsajki para nochipa inintlajtlakoljuaj nochi maseualmej. Kiampa nochi maseualmej ueliskia moyoltlalisej iuaya Jehová (Le 5:10; 23:28; Col 1:20; Heb 9:12).
kema kimaktiliaj Dios se tlenijki.
Ofrenda tlen kimaktiliaj Dios para kinextisej kitlaskamatiliaj, para kiitasej elij tlajtlakolejkej o para sampa kuali mouikasej iuaya. Abel achtoui pejki temaktilia ofrendas, teipa maseualmej nojkia temaktilijkej miak tlamantli ofrendas uan nojkia temaktilijkej tlapialmej. Nopa tlanauatili tlen Moisés kimakakej kinchiualtiyaya ma temakakaj tlapialmej. Kema Jesús temaktilik inemilis katli eli xitlauak, ayokmo monejki temaktilisej tlapialmej. Nama, Cristo itokilijkauaj nojua temakaj kej ofrendas tlen Dios kiselia kema kiueyichiuaj (Gé 4:4; Heb 13:15, 16; 1Jn 4:10).
kema kitlapejpeniaj se akajya.
Nopa tlajtoli ika hebreo kiijtosneki ‘kiajalouaj ika aceite’, ‘kipolouaj’ o ‘kitekiliaj’. Momajtoyaj kitekiliaj aceite se akajya o se tlamantli para ma nesi kitlapejpenijtoyaj para kichiuas se tekitl tlen tlauel ipati. Ipan iTlajkuilol Dios ika griego, nojkia motekiuia nopa tlajtoli kema kiijtoua kintlapejpeniaj se keskij maseualmej ika ichikaualis Dios para ma itstokaj ipan iluikak (Éx 28:41; 1Sa 16:13; 2Co 1:21).
kema moyankuilia metstli.
Ipan calendario judío eliyaya nopa achtoui tonali tlen sejse metstli. Ipan nopa tonali mosentiliyayaj, kichiuayayaj iljuitl uan temaktiliyayaj tlapialmej. Teipa ipan nochi altepetl tlauel kipatiitakej nopa iljuitl, yeka amo tekitiyayaj ipan nopa tonali (Nú 10:10; 2Cr 8:13; Col 2:16).
kema tijtekipanouaj Dios ika nochi toyolo.
kema tlaajkomajkauaj.
Kema kikixtiliaj itlasolo se tlamantli tlen kipixkatokej. Uejkajkia kema moijkuilok Biblia, achtoui tlayolkixtiyayaj para kikixtilisej se kentsi itlasolo uan kikokototsasej ikuayo. Teipa nochi kiajkomajkauayayaj ika se tlamantli tlen nesiyaya kej se pala. Ajakatl kiuikayaya itlajsolo uan iyol uetsiyaya kampa tlayejyektiyayaj (Rut 3:2; Is 30:24; Lu 3:17). Xikita ITLASOLO uan KEMA TLAYOLKIXTIAJ.
kema tlamis tlen mochijtok ipan Tlaltipaktli.
Tonali tlen ontlami kema nojkia tlamis tlen pano ipan nochi Tlaltipaktli, tlen Satanás kinauatia. Eli sanse tonali kema Cristo tlakuepilia. Jesús kinyakanas ángeles para “kiniyokatlalisej katli amo kuajkualmej ika katli kichiuaj tlen kuali” (Mt 13:40-42, 49). Jesús itokilijkauaj tlauel kinekiyayaj kimatisej kema “tlamis tlen mochijtok ipan Tlaltipaktli” (Mt 24:3). Kema Jesús ayamo yauiyaya iluikak, kintenkauilik itokilijkauaj itstoskia ininuaya hasta ipan nopa tonali (Mt 28:20). Xikita TONALI; TLEN MOCHIJTOK IPAN TLALTIPAKTLI.
kema tlayolkixtiaj.
Kema se tlamantli tlen kipixkatokej kikixtiliaj ipetlayo uan ikuayo. Kichiuayayaj ika se ueueyak kuauitl, uan tlaj eliyaya tlauel miak uajka kitekiuiyayaj se tlamantli tlen tlapialmej kitilanayayaj, kej nopa trillo o rodillos. Kixoyauayayaj tlen kipixkatoyaj kampa tlayejyektiyayaj uan nopa tlamantli kipanoltiliyayaj iixko (Le 26:5; Is 41:15). Xikita KAMPA TLAYEJYEKTIAJ.
kichiuas ma eli tlatsejtseloltik.
kiijixnamikij Dios; apóstatas.
Ika griego nopa tlajtoli apostasía kiijtosneki ‘timouejkatlalis tlen’. Ni tlajtoli kiijtosneki ‘tijtlauelkauas’ o ‘titlaijixnamikis’. Ipan iTlajkuilol Dios ika griego motekiuia kema kiijtoua se akajya kitlauelkaua religión tlen melauak (Pr 11:9; Hch 21:21; 2Te 2:3).
kitlalisej imax ipani se akajya.
Kiampa kichiuayayaj kema se akajya kimakayayaj se tekitl tlen tlauel ipati o para kiteochiuasej, kichikauasej o kimakasej se yajatili tlen ichikaualis Dios temaka. Kemantika nojkia kitlaliyayaj ininmax ipan tlapialmej kema nechka kinmiktiskiaj para kimaktilisej Dios (Éx 29:15; Nú 27:18; Hch 19:6; 1Ti 5:22).
kiuijuitekij se akajya.
iTlajkuilol Dios ika Griego kiijtoua kiampa kintlatsakuiltiyayaj maseualmej. Kintsouitekiyayaj ika se lazo tlen kiyakailpitoyaj o ipan itejteno kipixtoya kej uitstli tlen kichijchijtoyaj ika tepostli (Jn 19:1).
kuacarro.
Uejkajkia kema moijkuilok Biblia, eliyaya kej se carreta tlen kitilanayayaj kauayojmej uan tlauel kitekiuiyayaj kema yauiyayaj ipan guerra (Éx 14:23; Jue 4:13; Hch 8:28).
kuakajo kampa eltoya tlajtolsenkaualistli.
Kuakajo tlen kichijchijtoyaj ika kuauitl tlen acacia tlen kitlamipolojtoyaj ika oro tlen kiajoktoyaj kampa Más Tlatsejtseloltik ipan yoyonkali, uan teipa kampa Más tlatsejtseloltik ipan nopa teokali tlen kichijchijki Salomón. Tlen ika motsakuayaya eliyaya senkistok oro, uan iixko kipixtoya omej querubines tlen moixnamiktoyaj. Nopaya kitlalijtoyaj nopa ome tepatlaktli tlen nopa Matlaktli Tlanauatili tlen kimakakej Moisés (Dt 31:26; 1Re 6:19; Heb 9:4).
kuatopili.
Eliyaya se kuauitl tlen kitekiuiyaya se tlanauatijketl para kinextis kipia tlanauatili (Gé 49:10; Heb 1:8).
kuauitl.
Se kuauitl ueueyak tlen kiketsayayaj, kampa kinkuapilouayayaj katli kintlatsakuiltiyayaj. Ipan se keski altepemej kitekiuiyayaj para kimiktisej se akajya o para kinextisej itlakayo kema ya miktoya, kiampa kipinaualtiyayaj ininixpa nochi maseualmej o kinmajmatiyayaj sekinok. Asiriaeuanij, katli kinixmatiyayaj pampa tlauel mosisiniyayaj kema yauiyayaj ipan guerra, kinitskiyayaj se keskij ininkualankaitakauaj uan ika se kuauitl tlayakatentili kinkuasouayayaj ipan ininijti desde tlatsintla uan pankisayaya uejkapa ipan ininyolix. Inintlanauatil judíos kiijtouayaya katli tlauel tlajtlakolchijtoya pampa kiixpanotoya se akajya ika tlen kiijtok o pampa kinueyichijtoya sekinok dioses, monekiyaya achtoui kimiktisej ika tetl o ika seyok tlamantli, uan teipa kikuapilouayayaj itlakayo ipan se kuauitl para kinmajmatisej sekinok (Dt 21:22, 23; 2Sa 21:6, 9). Romaeuanij kemantika san kiilpiyayaj katli kitlatsakuiltiyayaj ipan nopa kuauitl, yeka ueliskia panos miak tonali hasta kema mikiyaya pampa tlauel kuajkualoyaya, amikiyaya, apismikiyaya (mayankamikiyaya) o tonalmikiyaya. Sekinok maseualmej, kej Jesús, kinlavosminayayaj ininmax uan ininikxi ipan kuauitl (Lu 24:20; Jn 19:14-16; 20:25; Hch 2:23, 36). Xikita KUAUITL KAMPA TETLAIJIYOUILTIAJ.
kuauitl kampa tetlaijiyouiltiaj.
Tlajtoli griego staurós. Kiijtosneki se xitlauak kuauitl, kej kampa kikuapilojkej Jesús. Amo onka yon se tlamantli tlen kinextia nopa tlajtoli ika griego kiijtosneki se kuamapeli o cruz, kej tlen kitekiuiyayaj religiones tlen amo melauak kema Cristo ayamo tlakatiyaya. Kema motekiuia nopa tlajtoli “kuauitl kampa tetlaijiyouiltiaj”, kinextia tlen uejkajkia kikuamachiliyayaj, pampa nopa tlajtoli griego staurós, nojkia kiijtosneki kenijkatsa Jesús itokilijkauaj kintlatsakuiltiskiaj, kintlaijiyouiltiskiaj uan kinpinaualtiskiaj (Mt 16:24; Heb 12:2). Xikita KUAUITL.
kuauitl tlen kikechpanouaj.
Se kuauitl tlen kitlaliliyayaj ipan iajkol se maseuali uan kampa kikuapilouayayaj se keski tlamamali; nojkia se kuauitl tlen kintlaliliyayaj ome tlapialmej ipan ininkechkuayo (tlen más kintlaliliyayaj eliyayaj uakaxmej) para kitilanasej se tlamantli tlen ika tlapoxoniyayaj o se kuacarro. Tlatekipanouanij kitekiuiyayaj para kiuikasej tlamamali tlen tlauel etik, yeka nopa kuauitl kiixnextiyaya para san tlapik kitekipanouayayaj se akajya o kikauayaya seyok ma kiyakana, nojkia kiixnextiyaya tlauel kichiualtiyayaj ma tekiti uan kitlaijiyouiltiyayaj. Nopa tlajtoli mokixtilia o kiposteki nopa kuauitl tlen kikechpanoua kiijtosneki se akajya ayokmo eli tlatekipanojketl, ayokmo kitlaijiyouiltiaj uan ayokmo kichiualtiaj ma tekiti (Le 26:13; Mt 11:29, 30).
kuauitl tlen tlayakatentili.
Se kuauitl ueueyak tlen kampa yakatlami kipia se tepostli tlen kiyakatentijtokej tlen kiiljuiaj aguijón o chuzo. Katli tlatojtokaj kitekiuiaj para kinchiualtisej ma nejnemikaj nopa tlapialmej katli tlapoxoniaj. Tlen kiijtoua se katli kuali tlalnamiki uan kiyololinia se akajya para ma kichiua tlen kuali, eli kej nopa kuauitl tlen tlayakatentili. Nopa tlajtoli kixopeua o kiteleksa nopa kuauitl tlen tlayakatentili kiixnextia kema se toro tlen tochontik iselti mokokoua pampa amo nejnemi kema kikuasoj o kichajkouaj uan peua kixopeua nopa kuauitl (Hch 26:14, nota; Jue 3:31).
kuetlaxbolsa.
Kampa kiajokuiyayaj vino uan sekinok tlamantli tlen toyaui. Kichijchiuaj ika nochi ikuetlaxo se tlapiali kej se chivo o se borrego. Kema xokoya vino kikixtia dióxido de carbono uan kichiua ma ijiyotemi o ma moposaua nopa kuetlaxbolsa. Yeka vino tlen yankuik kiajokuiyayaj ipan kuetlaxbolsa tlen yankuik pampa ueliyaya motilana o moueyilia. Pero nopa kuetlaxbolsa tlen ya sosoltik mochiuayaya tetik uan yeka tsayaniyaya (Jos 9:4; Mt 9:17).
L
lepra.
Se fiero kokolistli tlen kintlanauiyaya ininkuetlaxo maseualmej. Ipan Biblia nopa tlajtoli lepra amo san kiijtosneki nopa kokolistli tlen nama kiampa kiixmatij, nojkia eli se tlamantli tlen tlatskiyaya ipan yoyomitl uan ipan kali (Le 14:54, 55; Lu 5:12).
leptón.
levadura.
Se tlamantli tlen kitlaliliaj harina o se tlamantli tlen atik para kixokoltisej. Kemantika eliyaya se kentsi harina tlen ipa kixokoltijtoyaj uan kiajokuiyayaj para teipa kixokoltisej más harina. Ipan Biblia, levadura kiixnextia tlajtlakoli uan tlen amo kuali. Nojkia motekiuia kema se tlamantli moskaltia maske amo nesi uan kampa ueli momoyaua (Éx 12:20; Mt 13:33; Gál 5:9).
Leví; levita.
Elki ika expa ininkone tlen kipixkej Jacob uan Lea; nopa ueyi familia nojkia kiiljuiyayaj Leví. Ya kinpixki eyij ikoneuaj: Guersón, Cohat uan Merarí. Moxexelojkej ika eyi grupos tlen más pankisayaya, nopa sacerdotes nojkia eliyayaj tlen nopa ueyi familia. Kemantika nopa tlajtoli levitas kiijtosneki nochi nopa ueyi familia, pero miakpa amo kamanalti tlen nopa sacerdotes tlen elij ifamilia Aarón. Nopa ueyi familia tlen Leví amo kimakakej se tlali ipan nopa Tlali tlen Kintenkauilijtoyaj. Kinmakakej 48 pilaltepetsitsij ipan nopa tlali tlen kinmakakej nopa sekinok uejueyi familias (Dt 10:8; 1Cr 6:1; Heb 7:11).
M
Macedonia.
Se tlali tlen eltok ika norte tlen Grecia uan kema tlanauatiyaya Alejandro Magno tlauel kiixmatkej. Yon se altepetl amo kinauatiyaya, pero teipa romaeuanij moaxkatijkej. Kema apóstol Pablo yajki Europa ika achtoui uelta, altepetl Roma tlanauatiyaya ipan Macedonia. Pablo expa yajki nopaya (Hch 16:9).
maná.
Nopa tlakualistli tlen más kikuayayaj israeleuanij ipan nopa 40 xiuitl kema itstoyaj ipan uaktok tlali. Jehová kiualtitlaniyaya uan ualnesiyaya kej ajuechtli tlen uetsiyaya mojmostla ika ijnalok, uan san ipan tonali sábado amo uetsiyaya. Kema israeleuanij achtoui kiitakej “¿Tlake eli nopa?”, tlen ika hebreo moijtoua “¿Man huʼ?” (Éx 16:13-15, 35). Ipan sekinok textos kiiljuiaj “tlakualistli tlen ualajki tlen iluikak” (Sl 78:24) uan “pantsi tlen iluikak” (Sl 105:40). Jesús nojkia kamanaltik tlen maná kema kiixnextik se tlamantli (Jn 6:49, 50).
mapeli.
Tlen ika kitlamachiuayayaj o kiyejyekouayayaj keski iuejkatlanka nopa atl. Iuexka eliyaya 1,8 metros (Hch 27:28, nota).
mauiltisej ika piltetsitsij.
Tlen momajtoyaj kichiuaj uejkajkia kema kitlapejpeniyayaj se tlamantli. Kitlaliyayaj piltetsitsij o pilkuatsitsij ininkuaxanko o kitemayayaj ipan se uajkali uan kimanelouayayaj. Tlen kikixtiyayaj kinextiyaya tlake tlamantli monekiyaya kitlapejpenisej. Achtoui momaijtouayayaj uan teipa kichiuayayaj nopa tlamantli. Ika tlajtoli hebreo uan griego uelis nojkia kiijtosneki ‘se achi’ o ‘tlen kimelaua’ (Pr 16:33; Is 57:6; Mt 27:35).
Mesías.
Tlajtoli tlen kisa ipan se tlajtoli ika hebreo tlen kiijtosneki “katli kitlapejpenijtokej”. Ika griego nopa tlajtoli eli Cristo (Da 9:25; Jn 1:41).
Mijkaostotl.
Kema peua ika letra minúscula, kiijtosneki kampa kitlalpachojtokej o kitoktokej se akajya. Kema peua ika letra mayúscula, eli sanse ika nopa tlajtoli ika hebreo Seol uan ika griego Hades. Ipan Biblia kiampa motekiuia kema kineki kiijtos kampa kejuak mosiajketstokej katli miktokej o kema amo tleno uelij kichiuaj uan amo tleno kimatij (Gé 47:30; Ec 9:10; Hch 2:31).
milagros.
mirra.
Eli ieso se keski kuauitl tlen amo uejueyi uan uitstso tlen kiiljuiaj Commiphora. Eliyaya se tlamantli tlen kitlaliyayaj nopa aceite tlen tlatsejtseloltik para kintlalilisej katli kintlapejpeniyayaj. Kitekiuiyayaj para kiajuiyaltisej yoyomitl uan camas, uan nojkia kimanelouayayaj ika aceite tlen ika texixitouayayaj uan kimanelouayayaj ika cremas tlen motlaliliyayaj ipan inintlakayo. Nojkia kitlaliliyayaj ipan itlakayo se mijkatsi kema kitlalpachoskiaj (Éx 30:23; Pr 7:17; Jn 19:39).
Mólek.
Inindios nopa ammonitas; uelis eli sanse kej Malcam, Milcom o Moloc. Uelis kiampa kiiljuiyayaj pero amo nelia eliyaya itoka. ITlanauatil Moisés kiijtouayaya monekiyaya kimiktisej katli kimaktiliskia ikoneuaj nopa dios Mólek (Le 20:2; Jer 32:35; Hch 7:43).
Moloc.
Xikita MÓLEK.
momekatia; kikajkayaua inamik.
mosaua, amo tlakua.
Kema se akajya amo kikua yon se tlamantli ipan se keski horas o tonali. Israeleuanij mosauayayaj ipan nopa Tonali kema Kiixtsakuayayaj Tlajtlakoli, kema kiixnamikiyayaj se tlaouijkayotl o kema kinekiyayaj Dios ma kinpaleui. Judíos kiixtlalijkej najpa mosauaskiaj ipan se xiuitl para kiilnamikisej se keski tlaouijkayotl tlen kinpanotoya. Cristo itokilijkauaj ayokmo moneki mosauasej (Esd 8:21; Is 58:6; Lu 18:12).
Moyolkuepa.
moyolkuij katli miktokej.
Kema se akajya miki uan teipa sampa itsto. Nopa tlajtoli ika griego anástasis kiijtosneki ‘mijkeua’ o ‘motlanana’. Biblia kiijtoua chiknaui maseualmej moyolkuikej, se tlen inijuantij elki Jesús kema Jehová kiyolkuik. Maske Elías, Eliseo, Jesús, Pedro uan Pablo kinyolkuikej maseualmej, uelkej kichiuaj pampa Dios kinmakak chikaualistli. Tlauel ipati ma moyolkuikaj “katli kichijkej tlen kuali uan katli kichijkej tlen amo kuali” para ma moaxiti tlen Dios mosentlalijtok kichiuas (Hch 24:15). Biblia nojkia kiijtoua se keskij moyolkuisej ipan iluikak uan nopa kiiljuiaj “katli achtoui moyolkuisej” o “kema achtoui moyolkuij”. Katli kiampa kiniljuiaj elij iikniuaj Jesús katli kintlapejpenijtokej ika ichikaualis Dios (Flp 3:11; Ap 20:5, 6; Jn 5:28, 29; 11:25).
N
nardo.
Aceite chichiltik tlen ajuiyak mijyotia uan tlauel patiyo eliyaya. Kikixtiyayaj tlen se xiuitl tlen kiiljuiaj espicanardo (Nardostachys jatamansi). Tlauel patiyo eliyaya, yeka kemantika kimanelouayayaj ika sekinok aceites tlen amo tlauel patiyo uan nojkia hasta tlakajkayauayayaj ika sekinok aceites tlen amo nelia nardo. Marcos uan Juan kiijtojkej Jesús kitlalilijkej “senkistok nardo” (Mr 14:3; Jn 12:3).
Nazaret ejketl.
nopa kuali tlamachtili.
O
ofrendas tlen ika kiixtsakuaj tlajtlakoli.
Eli kema se akajya temakayaya se tlapiali por itlajtlakoljuaj maske amo kinekiyaya kiampa kichiuas. Temakayayaj miak tlamantli tlapialmej, kemantika desde se toro hasta se pichón. Amo sanse temakayayaj pampa sekij tlatominpiayayaj uan sekij amo, temakayayaj tlen ueliskia kiixtsakuas inintlajtlakoljuaj (Le 4:27, 29; Heb 10:8).
ostotl tlen tlauel uejkatla.
Tlajtoli ika griego ábyssos, tlen kiijtosneki ‘tlauel uejkatla’, ‘amo kipia itsintla’ uan ‘amo kipia itlamia’. Ipan iTlajkuilol Dios ika Griego kiijtosneki kampa kitsaktokej o kej kitsaktokej se akajya. Maske uelis kiijtosneki mijkaostotl, nojkia uelis kiijtosneki sekinok tlamantli (Lu 8:31; Ro 10:7; Ap 20:3).
P
pantsi tlen kimaktiliaj Dios.
Pantsi tlen onkak kitejtekpichojtoya uan ipan sejse kipixtoya chikuasej pantsi (por nochi eliyaya 12 pantsi) tlen kitlaliyayaj ipan nopa mesa tlen nopa cuarto tlen tlatsejtseloltik ipan yoyonkali uan ipan teokali. Nojkia kiiljuiaj “pantsi tlen kitejtekpichijtokej” o “pantsi tlen kimaktiliaj Dios”. Sejse sábado kipatlayayaj ni ofrenda tlen kimaktiliyayaj Dios ika seyok tlen más yankuik. San nopa sacerdotes ueliyayaj kikuaj nopa pantsi tlen kipatlayayaj uan san kemantika kikuayayaj sekinok (2Cr 2:4; Mt 12:4; Éx 25:30; Le 24:5-9; Heb 9:2).
Pascua.
Iljuitl tlen mochiuayaya sejse xiuitl ipan tonali 14, metstli abib (tlen teipa kiixmatkej kej nisán) tlen ika kiilnamikiyayaj kema Dios kinkixtik israeleuanij ipan Egipto. Kimiktiyayaj uan kikakatsouayayaj se pilborregojtsi o se pilchivojtsi, uan teipa kikuayayaj ika xiuitl tlen chichik uan pantsi tlen amo kipiayaya levadura o tlasonejkayotl (Éx 12:27; Jn 6:4; 1Co 5:7).
pornéia.
Xikita AUILNEMILISTLI.
Q
querubín.
Ángel tlen kipia se ueyi tekitl uan kichiua tekitl tlen tlauel ipati. Amo eli sanse ika se serafín (Gé 3:24; Éx 25:20; Is 37:16; Heb 9:5).
S
sábado.
Ipan Biblia kiampa kiiljuiaj se tonali tlen judíos tlauel kipatiitayayaj sejse chikueyi uan nama nojkia kiixmatij kej sabbat. Uala tlen se tlajtoli ika hebreo tlen kiijtosneki ‘mosiajketsa’ o ‘tlamis’. Eli nopa chikompa tonali tlen ininsemana judíos (peua kema kalaki Tonati ipan viernes uan tlami kema kalaki Tonati ipan sábado). Ipan tonali sábado amo kinamikiyaya mochiuas yon se tekitl, san monekiyaya tekitisej sacerdotes ipan ichaj Dios. Sekinok iljuitl tlen mochiuayaya ipan se xiuitl nojkia kiitayayaj kej se sábado, nojkia nochi nopa xiuitl kema ya panotoya chikuasej xiuitl uan 49 xiuitl. Ipan nopa xiuitl tlen kiitayayaj kej sábado, amo tlatojtokayayaj uan nojkia amo kintlajtlaniyayaj israeleuanij ma tlaxtlauakaj tlen tlauikayayaj. ITlanauatil Moisés kiijtouayaya amo ma mochiua se keski tlamantli ipan sábado, pero teipa katli tlayakanayayaj ipan religión nojkia kipiuilijtiajkej sekinok tlamantli tlen maseualmej monekiyaya amo kichiuasej. Yeka kema Jesús itstoya, maseualmej tlauel ouij kimatiyayaj kineltokasej nochi nopa tlanauatili (Éx 20:8; Le 25:4; Lu 13:14-16; Col 2:16).
sacerdote.
Irepresentante Dios ininixpa israeleuanij; kinmachtiyaya ajkia eliyaya Dios uan itlanauatiljuaj. Nojkia eliyaya ininrepresentante israeleuanij iixpa Dios kema temaktiliyaya ofrendas, motlajkoketsayaya para kintenpaleuis uan tlajtlaniyaya por inijuantij. Kema ayamo eltoya iTlanauatil Moisés, sejse tetaj eliyaya ininsacerdote ichampoyouaj. Kema ya eltoya nopa Tlanauatili, nopa sacerdotes eliyayaj tlen ichampoyouaj Aarón, ipan nopa ueyi familia Leví, uan nopa sekinok tlakamej katli eliyayaj levitas kinpaleuiyayaj. Kema mochijki nopa yankuik tlajtolsenkaualistli, katli Dios kintlapejpenik kinchijki ma elikaj sacerdotes uan Jesucristo eli Sumo Sacerdote (Éx 28:41; Heb 9:24; Ap 5:10).
sacerdote katli kipiayaya tlanauatili.
Ipan iTlajkuilol Dios ika Hebreo nojkia kiampa kiiljuiaj nopa sumo sacerdote. Ipan iTlajkuilol Dios ika Griego, kema kiijtoua sacerdotes katli kipiayayaj tlanauatili uelis kiijtosneki nopa sacerdotes katli más pankisayayaj. Uelis eliyayaj nopa sumos sacerdotes katli ya kintekikixtilijtoyaj uan nopa tlayakananij tlen nopa 24 grupos o pamitl tlen sacerdotes (2Cr 26:20; Esd 7:5; Mt 2:4; Mr 8:31).
saduceos.
Katli kitokiliyayaj se tlamachtili tlen moxelojtoya tlen religión judía. Eliyayaj ixtlamatinij katli tlauel tlatominpiayayaj uan sacerdotes katli kipiayayaj uejueyi tekitl ipan teokali. Amo kiseliyayaj tlen fariseos momajtoyaj kichiuaj yon se keski tlamantli tlen kineltokayayaj. Amo kineltokayayaj moyolkuisej mijkatsitsij yon kineltokayayaj itstokej ángeles. Inijuantij amo kiselijkej Jesús (Mt 16:1; Hch 23:8).
salmo.
Uikatl tlen ika kiueyichiuayayaj Dios. Nojkia tlatsotsonayayaj kema uikayayaj uan kiampa kiueyichiuayayaj Jehová Dios, kej kema tlaueyichiuayayaj ininixpa sekinok ipan nopa teokali tlen eltoya Jerusalén (Lu 20:42; Hch 13:33; Snt 5:13).
Samaria.
Altepetl tlen más ipati, uan ipan 200 xiuitl nopaya itstoyaj tlanauatianij tlen Israel, nopa tlanauatijkayotl kampa itstoyaj nopa matlaktli uejueyi familias ika norte; nojkia kiampa kiiljuiyayaj nopa tlali kampa tlanauatiyayaj. Nopa altepetl kichijchijkej ipan se tepetl tlen nojkia kiiljuiyayaj Samaria. Kema Jesús itstoya, Samaria eliyaya se tlali tlen mokauayaya tlatlajko Galilea ika norte uan Judea ika sur. Kema Jesús tlajtolmoyajtinenki amo panoyaya ipan nopa tlali, pero kemantika kena panok uan kamanaltik ininuaya katli nopaya itstoyaj. Pedro kitekiuik nopa ompa llave tlen iTlanauatijkayo Dios kema samariaeuanij kiselijkej ichikaualis Dios (1Re 16:24; Jn 4:7; Hch 8:14).
samariaeuanij.
Achtouia, kiampa kiniljuiyayaj nopa israeleuanij katli itstoyaj ipan nopa tlanauatijkayotl kampa itstoyaj matlaktli uejueyi familias ika norte, pero kema nopa asiriaeuanij moaxkatijkej Samaria ipan xiuitl 740 a.u.J., nojkia kiampa kiniljuijkej sejkanok euanij katli asiriaeuanij kinuikakej nopaya. Kema Jesús itstoya, ayokmo kiampa kiniljuiyayaj pampa euayayaj ipan nopa altepetl, más motekiuiyaya ika maseualmej katli kitokiliyayaj se religión tlen pejtoya ipan altepemej Siquem uan Samaria. Katli tlaneltokayayaj ipan ni religión amo kineltokayayaj sanse tlamantli kej judíos (Jn 8:48).
Sanedrín.
Jueces katli kipiayayaj más tlanauatili ipan Jerusalén. Kema Jesús itstoya eliyayaj 71 tlakamej, itstoyaj sumo sacerdote uan sekinok katli achtouia nojkia kinmakatoyaj nopa tekitl, ininuikaljuaj o ininteixmatkauaj sumos sacerdotes, katli kinyakanayayaj judíos, tlayakananij tlen sejse tribu, tetajmej tlen uejueyi familias uan escribas (Mr 15:1; Hch 5:34; 23:1, 6).
Satanás.
Uala ipan se tlajtoli ika hebreo tlen kiijtosneki ‘tlaijixnamijketlʼ. Ika tlajtoli hebreo uan griego kemantika kiijtosneki Satanás, nopa Diablo, katli más kikualankaita Dios (Job 1:6; Mt 4:10; Ap 12:9).
Sirte.
Kiampa kitokaxtiaj kampa onkak onkalaktok mar ipan tlali, uan amo tlauel uejkatla eli. Eltok iteno mar, ipan Libia, ika norte tlen tlali África. Katli kinemiltiyayaj barcos tlauel kimakasiyayaj panosej nopaya pampa motema miak xali uan nopaya ueliskia kuatakanisej barcos. Eli mauilili pampa nopa mar ejeliuis kiuika nopa xali tlen tentok (Hch 27:17).
T
talento.
Tomij tlen kitekiuiyayaj hebreos tlen más kipiayaya ietika uan más ipati, ietika eliyaya 34,2 kilos. Nopa talento tlen kitekiuiyayaj griegos eliyaya más pilsiltsi uan ietika eliyaya se 20,4 kilos (1Cr 22:14; Mt 18:24).
tekichijketl.
Kema tlanauatiyaya altepetl Babilonia, eliyayaj tekichiuanij tlen sejse pilaltepetsitsij tlen kiixmatiyayaj tlanauatili uan kipiayayaj se kentsi tlanauatili para tetlajtolsenkauasej. Ipan altepemej kampa Roma tlanauatiyaya, eliyayaj katli kipaleuiyayaj tlanauatijketl. Ininteki eliyaya kiitasej amo ma onka kuesoli, kiitasej kenijkatsa motekiuiyaya tomij, kintlajtolsenkauasej katli kiixpanoyayaj tlanauatili uan tlanauatisej ma kintlatsakuiltikaj (Da 3:2; Hch 16:20).
teokali; templo.
Eliyaya se ueyi kali tlen eltoya ipan tlali Israel ipan altepetl Jerusalén. Kipatlak nopa tabernáculo tlen kampa ueli kiuikatinenkej kampa israeleuanij tlaueyichiuayayaj. Nopa achtoui teokali kichijchijki Salomón uan kixolejkej babiloniaeuanij. Nopa ompa teokali kichijchijki Zorobabel kema judíos tlakuepilijkej tlen Babilonia, uan teipa Herodes el Grande kikualchijchijki. Ipan Biblia, miakpa kiiljuiaj nopa templo “ichaj Jehová” (Esd 1:3; 6:14, 15; 1Cr 29:1; 2Cr 2:4; Mt 24:1).
teokamanalojketl.
Se akajya katli Dios kitekiuia para tematiltis tlen kineki kichiuas. Kiijtouayayaj tlen Dios kiniljuiyaya; amo san tematiltiyayaj tlen panoskia teipa, nojkia kiijtouayayaj tlen Jehová tlamachtia, tlen tlanauatia uan kema tetlatsakuiltiyaya (Am 3:7; 2Pe 1:21).
Teokamanalouanij.
Kema peua ika letra mayúscula kiijtosneki se tlen nopa eyi partes tlen ika judíos kixexelouayayaj iTlajkuilol Dios ika Hebreo: iTlanauatil Moisés, Teokamanalouanij uan Salmos. Nopa parte tlen kiiljuiaj Teokamanalouanij kipia nopa libros tlen kiijkuilojkej teokamanalouanij ipan iTlajkuilol Dios ika Hebreo, kej katli kiiljuiyayaj Achtoui Teokamanalouanij (nopa libros desde Josué hasta Reyes) (Lu 24:44; Jn 6:45; Hch 26:27). Kema nesi ni tlajtoli: “nopa Tlanauatili uan tlen kiijtojkej Teokamanalouanij” kiijtosneki nochi tlen eltok ipan iTlajkuilol Dios ika Hebreo (Mt 7:12; 22:40).
tepostli tlen ika tlateuiaj; armadura.
Tepostli tlen motlaliliyayaj soldados para momanauisej kema yauiyayaj tlateuiaj. Eliyaya inintepostsontsajka o casco, nopa tepostli tlen kitsakuayaya ininyolix o coraza, inintsinkechilpika, tlen kitsakuayaya inintlankuaakayo uan inintepostsajka o escudo (1Sa 31:9; Ef 6:13-17).
tetl kampa nochi motsintetonia.
Tetl tlen kitlaliyayaj inakastla se ueyi kali o kampa monamikiyaya ome tepamitl, uan tlauel tlapaleuiyaya para mosansejkotilijtos. Nopa tetl tlen más ueyi kampa motetoniyaya nopa ome tepamitl, eliyaya nopa tetl kampa nochi motsintetoniyaya. Nochipa kitlapejpeniyayaj se tetl tlen tlauel tetik kampa kitsintetoniyayaj uejueyi kali uan tepamitl tlen kiyaualouayaya se altepetl. Ni tlajtoli motekiuia para kiixnextis itsinpeualtil Tlaltipaktli. Jesús nojkia kiiljuiaj “nopa ueyi tetl kampa nochi motsintetonia” ipan tlanechikoli, tlen kiixnextia kej se kali (Ef 2:20; Job 38:6).
tetl tlen ika tisij.
Se tetl malakachtik o yaualtik tlen kitlaliyayaj ipani seyok tetl tlen ika kitisiyayaj iyol tlen kipixkayayaj. Tlatlajkotipa nopa tetl tlen eltoya tlatsintla kitlaliyayaj se kuauitl kampa momalakachouayaya nopa tetl tlen eltoya uejkapa. Uejkajkia kema moijkuilok Biblia, miakej kipixtoyaj ipan ininchaj se tetl tlen ika tisiyayaj uan siuamej kimalakachouayayaj san ika ininmax. Tlauel monekiyaya nopa tetl para kichijchiuasej pantsi tlen ika mopanoltiskiaj mojmostla, yeka iTlanauatil Moisés kiijtouayaya amo kinamikiyaya kikuilisej se akajya nopa tetl tlen ika tisiyaya para kinextis kikuepas nopa tomij tlen kitlanejtijkej. Nopa uejueyi tetl tlen ika tisiyayaj eliyayaj sanse kej nopa pilsiltsitsij, pero kimalakachouayayaj tlapialmej (Dt 24:6; Mr 9:42).
tetlajchiuiaj.
Kema maseualmej kineltokaj inintonal mijkatsitsij nojua itstokej uan kinnojnotsaj katli yoltokej ika se maseuali katli kimati kenijkatsa monojnotsas ininuaya tonaltsitsij. Nopa tlajtoli “tetlajchiuiaj” ika griego eli farmakía, tlen kiijtosneki “kema kitekiuiaj drogas”. Ni tlajtoli pejki motekiuia kema tetlajchiuiyayaj, pampa uejkajkia maseualmej kitekiuiyayaj drogas kema kintlajtlaniyayaj amo kuali ajakamej ma kinmakakaj chikaualistli para tetlajchiuisej (Gál 5:20; Ap 21:8).
tlaixkopinkayomej, kema kinueyichiuaj sekinok dioses.
Se tlaixkopinkayotl eli se teteyotl tlen kiixnextia tlen nelia eltok o tlen san maseualmej moiljuiaj, uan kitekiuiaj kema tlaueyichiuaj. Kema kinueyichiuaj sekinok dioses kiijtosneki kiueyimatij o kitlakamatij, kiikneliaj, kitekipanouaj o kimakasij, o kiueyichiuaj nopa tlaixkopinkayotl o nopa dios (Sl 115:4; Hch 17:16; 1Co 10:14).
tlaixpamitl.
Kichiuayayaj se kentsi uejkapa uan kichijchiuayayaj ika tlali, tetl tlen kitekpichouayayaj, se ueyi tetl najmaxtik o ika kuauitl tlen kialtiyayaj ika tepostli. Ipani temaktiliyayaj tlapialmej, ofrendas o incienso kema tlaueyichiuayayaj. Ipan nopa achtoui cuarto tlen nopa tabernáculo uan ipan teokali eltoya se pilsiltsi “tlaixpamitl tlachijchiuali ika oro” kampa kitlatiyayaj incienso. Kichijchijtoyaj ika kuauitl uan kialtijtoyaj ika oro. Kalixpa eltoya se “altar tlachijchiuali ika cobre” tlen eliyaya más ueyi kampa temaktiliyayaj ofrendas tlatlatili (Éx 27:1; 39:38, 39; Gé 8:20; 1Re 6:20; 2Cr 4:1; Lu 1:11).
tlaixpanoj ika tlen kiijtouaj.
tlaketsali.
Se keski tlaketsali kinchijchijkej para kiilnamikisej tlen uejkajkia panok. Kema Salomón kichijchijki nopa teokali kitlalilik tlaketsali, uan nojkia kiampa kichijki ika sekinok kali. Se keskij altepemej kampa kinueyichiuayayaj dioses tlen amo melauakej, kiketskej tlaketsalmej tlen kitekiuiyayaj para tlaueyichiuasej. Kemantika israeleuanij nojkia kiampa kichijkej (Jue 16:29; 1Re 7:21; 14:23).
Tlaketsalmej tlen Salomón.
Kema Jesús itstoya ipan Tlaltipaktli, eltoya ni tlaketsalmej ika kampa kisa Tonati ipan ikalixpa nopa teokali. Maseualmej moiljuiyayaj ni nojkia eliyaya tlen nopa teokali tlen Salomón. Nopaya nejnenki Jesús “kema tlaseseyayaya”, uan nopaya mosentiliyayaj nopa achtoui Cristo itokilijkauaj para kiueyichiuasej Dios (Jn 10:22, 23; Hch 5:12).
tlanechikoli.
Se keskij maseualmej tlen mosentiliaj para kichiuasej se tlamantli. Ipan iTlajkuilol Dios ika Hebreo, miakpa kiijtosneki nopa altepetl tlen israeleuanij. Uan ipan iTlajkuilol Dios ika Griego, miakpa kineki kiijtos nochi nopa tlanechikoli tlen Cristo itokilijkauaj, maske kemantika nojkia kineki kiijtos sejse tlanechikoli (1Re 8:22; Hch 9:31; Ro 16:5).
tlapajpaktik.
Ipan Biblia nopa tlajtoli ika hebreo uan griego tlen motlajtolkuepa kej “tlapajpaktik” amo san kiijtosneki kema se akajya amo sokiyo; nojkia kiijtosneki kichiuas kampeka amo kipias yon se tlamantli tlen amo kuali yon kichiuas se tlamantli tlen sokiyo ipan inemilis o kema tlaueyichiua. Ipan iTlanauatil Moisés kiijtosneki kema motlapajpakchiuayayaj kej kiijtouayaya nopa tlanauatili (Le 10:10; Sl 51:7; Mt 8:2; Snt 1:27).
tlapaleuijketl; siervo ministerial.
Nopa tlajtoli griego diákonos, nojkia motlajtolkuepa kej “tlatekipanojketl”. Nopa tlapaleuianij o siervos ministeriales kinpaleuiaj ueuejtlakamej ipan se tlanechikoli. Para uelis kiampa tlatekipanosej, moneki kichiuasej tlen kiijtoua Biblia (1Ti 3:8-10, 12).
tlatestigojketsa.
Kema se akajya tlatestigojketsa para kinextis se tlamantli nelnelia melauak o motenkaua nelnelia kichiuas o amo kichiuas se tlenijki. Miakpa eli kema kitenkauaj kichiuasej se tlamantli ika se akajya katli kipia tlanauatili, uan más kiampa kichiuaj ika Dios. Jehová kinextik nelnelia kiaxitis nopa tlajtolsenkaualistli tlen kitenkauilik Abrahán kema tlatestigojketski (Gé 14:22; Heb 6:16, 17).
tlatsejtseloltik.
Se kuali tlamantli tlen Jehová kipia, san ya senkistok tlapajpaktik uan tlatsejtseloltik ipan nochi tlamantli (Éx 28:36; 1Sa 2:2; Pr 9:10; Is 6:3). Kema motekiuia ika maseualmej (Éx 19:6; 2Re 4:9), tlapialmej (Nú 18:17), tlamantli (Éx 28:38; 30:25; Le 27:14), se lugar (Éx 3:5; Is 27:13), tonali (Éx 16:23; Le 25:12) uan tekitl (Éx 36:4), nopa tlajtoli ika hebreo kampa mokixtia kiijtosneki kiiyokatlalijtokej o kitlapajpakchijtokej para motekiuis ipan nopa tekitl tlen ika kiueyichiuaj Jehová, nopa Dios katli tlatsejtseloltik. Ipan iTlajkuilol Dios ika Griego nopa tlajtoli “tlatsejtseloltik” nojkia kiampa kiijtosneki. Nojkia motekiuia kema se akajya kuali monejnemiltia (Mr 6:20; 2Co 7:1; 1Pe 1:15, 16).
tlayakanketl.
Se tlakatl katli moneki kinmokuitlauis uan kintlachilis katli itstokej ipan tlanechikoli. Ika griego moijtoua epískopos, tlen kiijtosneki katli temokuitlauia uan temanauia. Nopa tlajtoli tlayakanketl uan ueuejtlakatl, kiijtosneki sanse tlamantli uan motekiuia kema se tlakatl kitekimakaj ipan tlanechikoli. Nopa tlajtoli ueuejtlakatl (ika griego moijtoua presbýteros) kinextia katli kej nopa kitekimakaj moneki kinextis tlalnamiki. Uan nopa tlajtoli tlayakanketl kinextia nopa tekitl tlen moneki kichiuas (Hch 20:28; 1Ti 3:2-7; 1Pe 5:2).
Tlayakanketl katli temaka nemilistli.
Nopa tlajtoli ika griego kampa mokixtia, kiijtosneki ‘tlayakanketl tlen más ueyi’. Kinextia nopa tekitl tlen tlauel ipati tlen Jesús kichiua para kinmakixtis maseualmej katli xitlauakej para ayokmo ma mikikaj pampa tlajtlakolejkej uan para ma kipiakaj nemilistli tlen amo kema tlamis (Hch 3:15; 5:31; Heb 2:10; 12:2).
tlen achtoui tlaki.
Achtoui itlajka se tlamantli tlen kitekij o kipixkaj. Jehová kinnauatik israeleuanij ma kimakakaj ininachtouikoneuaj, inintlapialjuaj tlen achtoui tlakatiyayaj uan nopa achtoui itlajka tlen kitoktoyaj. Nochi israeleuanij sansejko kimaktiliyayaj Dios tlen achtoui kiseliyayaj ipan nopa Iljuitl tlen Pantsi tlen Amo Kipia Levadura o tlasonejkayotl uan ipan Iljuitl tlen Pentecostés. Nopa tlajtoli kej se kuatlajkayotl tlen achtoui tlaki, nojkia motekiuia ika Cristo uan itokilijkauaj katli kintlapejpenijtokej ika ichikaualis Dios (1Co 15:23; Nú 15:21; Pr 3:9, nota; Ap 14:4).
tlen amo tlapajpaktik.
Ipan Biblia motekiuia kema kamanalti tlen se akajya o se tlamantli tlen nesi sokiyo o tlen amo kuali monejnemiltia. Miakpa nojkia motekiuia para se tlamantli tlen iTlanauatil Moisés kiijtoua amo kuali, amo xitlauak o sokiyo (Le 5:2; 13:45; Mt 10:1, nota; Hch 10:14; Ef 5:5). Xikita TLAPAJPAKTIK.
tlen Dios ayamo tematiltia.
tlen ika moajkoluijkomayayaj.
Tlakamej uan siuamej momajtoyaj moyoyontiaj ika ome yoyomitl o peseli. Achtoui mokentiyayaj se yoyomitl tlen kipiayaya imangas o túnica, (ika griego kiiljuiyayaj khiton′) tlen asiyaya hasta inintlankua o ininikxikechtla. Ipani motlaliliyayaj seyok yoyomitl tlen ika mouijkomayayaj ipan ininajkol (ika griego kiiljuiyayaj hima′tion) tlen kemantika eliyaya se yoyomitl kojkoxontik o kojkoxtaltik, pero más kitekiuiyayaj se ueyi yoyomitl tlen san xitlauak kitejtektoyaj tlen amo ouij motlaliliyayaj uan mokixtiliyayaj.
tlen kitenkauaj.
Kema se akajya kitenkauiliyaya Dios se tlenijki. Kitenkauayaya kichiuas se tlamantli, temakas se ofrenda, kichiuas se tekitl o kikauas se tlamantli maske amo eli se tlajtlakoli. Kiitayayaj sanse kej kema se akajya tlatestigojketsayaya (Nú 6:2; Ec 5:4; Mt 5:33).
tlen tlaxtlauaj para temakixtisej.
Se tlamantli tlen ika tlaxtlauayayaj para kikixtisej se akajya kampa tsaktoya, para ayokmo ma kitlatsakuiltikaj, para kimakixtisej tlen tlajtlakoli o se tlamantli tlen monekiyaya kichiuas. Amo nochipa kiixtlauayayaj ika tomij (Is 43:3). Monekiyaya tlaxtlauasej para kinmakixtisej ipan miak tlamantli. Se neskayotl, ipan altepetl Israel ininachtouikoneuaj israeleuanij katli eliyayaj okichpilmej uan tlapialmej ininachtouikoneuaj tlen okichmej eliyayaj iaxka Jehová uan kiniyokatlaliyayaj para nopa tekitl tlen ika kiueyichiuaskiaj. Monekiyaya tlaxtlauasej para kinmakixtisej uan kiampa ayokmo kichiuaskiaj nopa tlamantli (Nú 3:45, 46; 18:15, 16). Tlaj se toro katli mosisiniyaya amo kitlachiliyayaj uan kimiktiyaya se akajya, iteko nopa toro monekiyaya tlaxtlauas para momakixtis uan kiampa ayokmo kimiktiskiaj (Éx 21:29, 30). Pero kema se akajya temiktiyaya pampa kiampa kinejki kichiuas, amo kiseljuiliyayaj tlen tlaxtlauayaya para momakixtis (Nú 35:31). Biblia kiijtoua nopa tlaxtlauili tlen más ipati elki tlen Cristo tlaxtlajki kema temaktilik inemilis para kinmakixtis maseualmej katli tlaneltokaj tlen tlajtlakoli uan mikilistli (Sl 49:7, 8; Mt 20:28; Ef 1:7).
tlen xitlauak.
Ipan Biblia kiijtosneki tlen kuali, kej itlanauatiljuaj Dios kiijtoua tlake kuali uan tlake amo (Gé 15:6; Dt 6:25; Pr 11:4; Sof 2:3; Mt 6:33). Nopa tlajtoli kampa mokixtik, nojkia motlajtolkuepa kej “kichiuas tlen kuali” (Sl 7:8).
Tonali kema Dios tetlajtolsenkauas.
Tonali kema maseualmej temakasej cuenta iixpa Dios, uelis san se keski altepemej o nochi maseualmej. Nojkia uelis kiijtosneki se keski tonali kema kintsontlamiltisej nochi katli kinamiki kiampa ma kintlatsakuiltikaj. Sekinok maseualmej, kema kintlajtolsenkauasej kinpaleuis para ma kinmakixtikaj uan ma kiselikaj nopa nemilistli tlen amo kema tlamis. Jesucristo uan iapóstoles kiijtojkej para teipa asiskia se “Tonali kema Dios tetlajtolsenkauas”, kema kintlajtolsenkauaskia katli yoltokej uan nojkia katli miktokej (Mt 12:36).
tonali kema tlachijchiuayayaj.
Kiampa kitokaxtiyayaj nopa tonali kema ika ualmostla eliskia sábado. Ipan nopa tonali judíos mokualtlaliyayaj para amo tleno kichiuasej ipan sábado. Tlamiyaya kema kalakiyaya Tonati ipan nopa tonali tlen nama tikixmatij kej viernes, pampa ika tlapoyaui peuayaya sábado. Judíos kiitayayaj se tonali peuayaya uan tlamiyaya kema ya tlayouayaya (Mr 15:42; Lu 23:54).
tonali; tlen mochijtok ipan Tlaltipaktli.
Tlajtoli griego aiṓn. Motekiuia kema kamanalti tlen pano o tlen mochiua ipan Tlaltipaktli o tlamantli tlen pano san ipan se keski tonali o xiuitl. Kema Biblia kiijtoua “tlen onka ipan ni tonali”, kiijtosneki tlen panotok ipan nochi Tlaltipaktli ipan se keski tonali uan nojkia kej maseualmej monejnemiltiaj (2Ti 4:10). Ika nopa tlajtolsenkaualistli tlen mochijki ika iTlanauatil Moisés, Dios kipeualtik se tonali tlen se keskij maseualmej kiiljuiaj tonali kema tlanauatiyayaj israeleuanij o judíos. Teipa ika tlen Jesucristo kichijki pampa techmakixtiko, pejki seyok tonali tlen nojkia kinasi Cristo itokilijkauaj katli kintlapejpenijtokej ma yakaj iluikak. Kiampa pejki se yankuik tonali kampa moaxitia se keski tlamantli tlen san kiixnextijtoya nopa tlajtolsenkaualistli tlen mochijki ika iTlanauatil Moisés. Kema Biblia kiijtoua “tlen mochijtok ipan Tlaltipaktli” kiijtosneki miak xiuitl o tlamantli tlen panotok ipan Tlaltipaktli o tlen nojua panos (Mt 24:3; Mr 4:19; Ro 12:2; 1Co 10:11). Xikita KEMA TLAMIS TLEN MOCHIJTOK IPAN TLALTIPAKTLI.
toTeko itlakualis.
Se tlakualistli kampa kikuaj pantsi tlen amo kipia levadura o tlasonejkayotl uan kiijij vino, tlen kiixnextia itlakayo uan ieso Cristo. Kema moilnamiki imikilis Jesús. Biblia kinnauatia Cristo itokilijkauaj ma kiilnamikikaj, yeka nojkia kiiljuiaj Kema moilnamiki Cristo imikilis (1Co 11:20, 23-26).
túnica.
Tlakamej uan siuamej momajtoyaj moyoyontiaj ika ome yoyomitl o peseli. Achtoui mokentiyayaj se yoyomitl tlen kipiayaya imangas o túnica, (ika griego kiiljuiyayaj khiton′ ) tlen asiyaya hasta inintlankua o ininikxikechtla.
U
uaktok tlali.
Ipan Biblia amo san kiijtosneki kampa onka miak xali, nojkia kiijtosneki kampa amo aka itstok uan kampa amo tlaeli, onka miak tetl uan amo onka atl, kampa uelis tijpantis sakatl (Jer 23:10; Mr 1:4).
uapali tlen kikoyonijtoyaj.
Tlen ika kintlatsakuiltiyayaj maseualmej para amo uelis molinisej. Kemantika san amo ueliyayaj kioliniaj ininikxi. Uan kemantika kinchiualtiyaya ma kitetilijtokaj inintlakayo uan kichiuayaya ma kinkoko, uelis pampa amo kinkauiliyaya ma kiolinikaj ininikxi, ininmax uan ininkechkuayo (Jer 20:2; Hch 16:24).
ueuejtlakatl.
Se tlakatl katli ya kipia ixiui. Ipan Biblia más motekiuia kema kamanalti tlen se tlakatl katli kitekimakatokej para ma kipia tlanauatili ipan se altepetl. Ipan libro Apocalipsis nojkia motekiuia para se keskij katli itstokej ipan iluikak. Ika griego moijtoua presbýteros, uan motlajtolkuepa kej “ueuejtlakatl” kema kiijtosneki katli kintekimakatokej para ma kinyakanakaj katli itstokej ipan tlanechikoli (Éx 4:29; Pr 31:23; 1Ti 5:17; Ap 4:4).
ueyi iyolo Dios.
Nopa tlajtoli ika griego tlen uejkajkia motekiuiyaya kinekiyaya kiijtos se tlamantli tlen kualtsi o yejyektsi. Miakpa kiijtosneki se kuali regalo o kema temakaj se tlenijki ika nochi ininyolo. Kema tikijtouaj Dios kipia ueyi iyolo ika tojuantij, kineki kiijtos Dios temaka se regalo ika nochi iyolo, uan amo kichia ma kikuepilikaj se tlenijki. Kinextia Dios tlauel kipaktia temakas se tlamantli, kipia kuali iyolo uan tlauel kiniknelia maseualmej. Nopa tlajtoli griego nojkia uelis motlajtolkuepas kej “se favor” uan “regalo tlen tlauel kuali”. Kineki kiijtos se tlamantli tlen kimakaj se akajya maske amo motlanilijtok o amo kinamiki kiselis; san kiselia pampa katli temaka kipia kuali iyolo (2Co 6:1; Ef 1:7).
ueyi tlaijiyouilistli.
Nopa tlajtoli ika griego tlen motekiuia para “tlaijiyouilistli” kinextia kenijkatsa se akajya mokuesoua o tlaijiyouia pampa motetsopa ika miak tlamantli. Jesús kiijtok ipan Jerusalén onkaskia se “ueyi tlaijiyouilistli” tlen amo kema onkatoya. Nojkia miakpa kamanaltik tlen nopa “ueyi tlaijiyouilistli” tlen teipa kinasiskia nochi maseualmej, kema yaya ualaskia ika iueyitilis (Mt 24:21, 29-31). Pablo kiijtok ni tlaijiyouilistli eli se tlamantli tlen Dios kinamiki kichiuas para “kintlatsakuiltis katli amo kiixmatij Dios uan katli amo kineltokaj nopa kuali tlamachtili tlen toTeko Jesucristo”. Ipan Apocalipsis, capítulo 19 nesi Jesús kinyakana katli itstokej iluikak para kiteuisej nopa fiero tlapiali, tlanauatianij katli itstokej ipan Tlaltipaktli uan ininsoldados (2Te 1:6-8; Ap 19:11-21). Biblia nojkia kiijtoua “miakej maseualmej” momanauiaj ipan nopa ueyi tlaijiyouilistli (Ap 7:9, 14). Xikita ARMAGEDÓN.
Y
yoyonkali; tabernáculo.
Yoyonkali tlen ueliyayaj kinemiltijtinemij uan israelitas kitekiuiyayaj para tlaueyichiuasej kema ya kistoyaj Egipto. Kalijtik kitlaliyayaj nopa kuakajo kampa eltoya tlajtolsenkaualistli tlen Jehová kichijtoya, tlen kinextiyaya ya itstoya ininuaya. Nopaya kimaktiliyayaj Dios tlapialmej uan nojkia tlaueyichiuayayaj. Kemantika kiiljuiaj yoyonkali kampa mosentiliaj. Kimajmanayayaj kuauitl uan kitsakuayayaj ika yoyomitl tlen lino tlen kipixtoya querubines. Kipiayaya ome cuartos: se kiiljuiyayaj kampa Tlatsejtseloltik uan nopa seyok kampa Más Tlatsejtseloltik (Jos 18:1; Éx 25:9).
Z
Zeus.
Nopa dios tlen kinyakanayaya nopa sekinok dioses tlen kinueyichiuayayaj griegos. Ipan Listra, maseualmej moiljuijkej Bernabé eliyaya Zeus. Nechka Listra kipantijtokej se keski tlajkuiloli tlen uejkajkia kichijkej kampa ijkuilijtok “Zeus isacerdotes” uan “Zeus, nopa dios katli eli Tonati”. Nopa barco kampa Pablo kistejki tlen Malta, iixpa kipixtoya se tlaixkopinkayotl kej se teteyotl tlen “iKoneuaj Zeus”, katli eliyayaj kuatemej uan motokaxtiyayaj Cástor uan Pólux (Hch 14:12; 28:11).