UJehova Uyababusisa Abathethelela Abanye

 1. UJehova ubathembisani abantu abaphendukayo?

LANXA uJehova enguMdali wethu, enguMahluleli wethu njalo esinika imithetho, uphinda abe nguBaba wethu osithandayo. (Hubo. 100:3; Isaya. 33:22) Nxa singamonela besesiphenduka uyenelisa ukusithethelela futhi uzimisele ukwenza njalo. (Hubo. 86:5) Wasebenzisa umphrofethi u-Isaya ukuthi atsho amazwi la aduduzayo: “Lanxa izono zenu zibomvu gebhu, zizakuba mhlophe nke njengongqoqwane.”—Isaya. 1:18.

 2. Kumele senzeni nxa sifuna ukuba lobudlelwano obuhle labanye?

² Silesono yikho singacaphulana ngesikutshoyo lesikwenzayo. (Jak. 3:2) Kodwa singaba lobudlelwano obuhle nxa singafunda ukuthethelelana. (Zaga. 17:9; 19:11; Mat. 18:21, 22) Nxa singaphambaniselana ezintweni ezincane uJehova ukhangelele ukuthi sithethelelane. (Kol. 3:13) Kumele senze njalo ngoba yena usithethelela “ngesihle.”—Isaya. 55:7.

 3. Sizaxoxa ngani esihlokweni lesi?

³ Esihlokweni lesi sizabona ukuthi lanxa silesono, singayilingisela indlela uJehova asithethelela ngayo. Yiziphi izono okumele sizibikele abadala? Kungani uJehova efuna sithethelele abanye? Sifundani kubafowethu labodadewethu abathwala nzima ngenxa yezono zabanye?

 4. (a) Inceku kaJehova kumele yenzeni nxa ingenza isono esikhulu? (b) Abadala kumele benzeni nxa bexoxa lomuntu owonileyo?

⁴ Izono ezinkulu kumele zibikelwe abadala. Ezinye zakhona ziqanjwa ku-1 Khorinte 6:9, 10. Umuntu owenza isono esikhulu uyabe ewephule okuzwayo umthetho kaNkulunkulu. Kuyabe kumele akhuleke kuJehova ecela ukuthi amthethelele njalo aye ebadaleni bebandla. (Hubo. 32:5; Jak. 5:14) Yiwuphi umsebenzi abadala abalawo? Phela uJehova nguye yedwa olamandla okuthethelela izono ngokupheleleyo futhi lokhu ukwenza esebenzisa inhlawulo.b Kodwa unike abadala umsebenzi wokuhlola besebenzisa iMibhalo ukuthi umuntu owonileyo angaqhubeka yini esebandleni. (1 Khor. 5:12) Nansi eminye imibuzo okumele bazame ukuthola impendulo zayo: Umuntu lo wone ngabomo yini? Uqale wahlela yini ukwenza isono? Ubeselomkhuba wokwenza isono leso yini? Kulobufakazi yini obutshengisa ukuthi uyaphenduka kumbe obokuthi uJehova usemthethelele?—ImiSeb. 3:19.

 5. Okwenziwa ngabadala kunceda njani?

⁵ Nxa abadala bexoxa lalowo owonileyo bafuna ukwenza isinqumo esifanana laleso esesenziwe ezulwini. (Mat. 18:18) Lokhu kulinceda njani ibandla? Kuyalivikela ngoba isoni esingaphendukiyo siyasuswa ebandleni ukuze singaphambanisi ezinye inceku zikaJehova. (1 Khor. 5:6, 7, 11-13; Tit. 3:10, 11) Kanti njalo lokhu kunganceda owonileyo aphenduke ukuze athethelelwe nguJehova. (Luk. 5:32) Abadala bayamthandazela owonileyo becela uJehova ukuthi amncedise aphinde aqine ekukhonzeni.—Jak. 5:15.

 6. Kuyenzeka yini ukuthi uJehova amthethelele umuntu osusiweyo? Chasisa.

⁶ Nxa umuntu engaphenduki uyasuswa ebandleni. Nxa ephule umthetho kahulumende abadala abamvikeli esandleni somthetho. UJehova uyazivumela iziphathamandla ukuthi zahlulele njalo zijezise loba ngubani owephula umthetho kungelani lokuthi uyaphenduka kumbe hatshi. (Rom. 13:4) Kodwa kungathi dlwe emuntwini lo abesephenduka njalo aguquke, uJehova uzimisele ukumxolela. (Luk. 15:17-24) Uzamxolela lanxa enze izono ezimbi kakhulu.—2 ImiLan. 33:9, 12, 13; 1 Tim. 1:15.

 7. Kutshoni ukuxolela umuntu osoneleyo?

⁷ Kuyaduduza ukwazi ukuthi akusimlandu wethu ukukhetha kumbe ukutsho ukuthi umuntu owonileyo kumele athethelelwe yini. UJehova nguye okhethayo ukuthi uzamthethelela yini loba hatshi. Kodwa kukhona okumele sikhethe ukukwenza. Ngezinye izikhathi umuntu angasonela abesexolisa. Kodwa kungenzeka angaxolisi. Lanxa kunjalo singakhetha ukumxolela ngokungaqhubeki simbambele isikhwili kumbe simzondele. Lokhu kungathatha isikhathi ikakhulu nxa umuntu lo esizwise ubuhlungu obukhulu. INqabayokulinda kaSeptember 15 1994 yathi: “Nxa uthethelela umuntu okoneleyo akutsho ukuthi uyavumelana lalokho akwenzileyo kodwa kutsho ukuthi uyitshiyela uJehova indaba. UnguMahluleli olungileyo wendawo yonke njalo uzayahlulela kuhle ngesikhathi esifaneleyo.” Kungani uJehova esikhuthaza ukuthi sithethelele abanye lokuthi sithembe ukuthi uzayahlulela kuhle indaba?

 8. Nxa sithethelela abanye siyabe sitshengisa njani ukuthi siyambonga uJehova ngesihawu asitshengisa sona?

⁸ Nxa sithethelela abanye siyabe sitshengisa ukuthi siyambonga uJehova ngesihawu asitshengisa sona. Komunye umzekeliso uJesu wafanisa uJehova lenkosi eyacitsha isikwelede esesabekayo seyinye inceku, eyayingasoze yafa yenelisa ukusibhadala. Kodwa inceku le ayizange iyitshengise isihawu inceku eyayilesikwelede sayo esincane kakhulu. (Mat. 18:23-35) Lapha uJesu wayesifundisa ukuthi sizabathethelela abanye nxa simbonga sibili uJehova ngesihawu asitshengisa sona. (Hubo. 103:9) Eyinye iNqabayokulinda yakudala yathi: “Singaze sibathethelele kangaki abanye asisoze sibathethelele ngendlela uNkulunkulu athethelela ngayo lasitshengisa ngayo isihawu ngoKhristu.”

 9. Ngobani uJehova abatshengisa isihawu? (UMathewu 6:14, 15)

⁹ Abathethelela abanye labo bazathethelelwa. UJehova ubatshengisa isihawu labo abatshengisa abanye isihawu. (Mat. 5:7; Jak. 2:13) UJesu wakwenza kwacaca lokho lapho efundisa abafundi bakhe ukukhuleka. (Bala uMathewu 6:14, 15.) UJehova laye wakwenza kwacaca lokhu emazwini awatshela inceku yakhe uJobe. Indoda le ethembekileyo yayizwiswe ubuhlungu obukhulu yilokho okwakukhulunywe ngu-Elifazi loBhilidadi loZofa. UJehova watshela uJobe ukuthi abathandazele. Esekwenzile lokho uJehova wambusisa.—Jobe. 42:8-10.

10. Kusilimaza njani ukubamba isikhwili? (U-Efesu 4:31, 32)

¹⁰ Ukubamba isikhwili kuyalimaza. Ukubambela omunye isikhwili kufanana lokuthwala umthwalo osindayo. UJehova kafuni sizithwalise nzima ngomthwalo lo kodwa ufuna sithole impumuzo ebakhona nxa singawethula. (Bala u-Efesu 4:31, 32.) Usikhuthaza ukuthi ‘sixwaye ukuzonda njalo sifulathele intukuthelo.’ (Hubo. 37:8) Kuyanceda ukulalela amazwi la. Ukubamba isikhwili kungasigulisa njalo kuphambanise indlela esicabanga ngayo. (Zaga. 14:30) Ukubamba isikhwili kufanana lokunatha itshefu sizitshela ukuthi izalimaza omunye. Kodwa nxa sithethelela abanye siyabe sizinceda. (Zaga. 11:17) Sizahlaliseka njalo siqhubeke sikhonza uJehova sithokoza.

11. IBhayibhili lithini ngokuphindisela? (URoma 12:19-21)

¹¹ Ukuphindisela ngokukaJehova. UJehova kasivumeli ukuthi siphindisele nxa othile esonele. (Bala uRoma 12:19-21.) Isono esilaso senza sehluleke ukubona indaba ngendlela uJehova ayibona ngayo. (Heb. 4:13) Ngezinye izikhathi indlela esizizwa ngayo ingenza sicine sisahlulela ngendlela engaqondanga. UJehova waphefumulela uJakhobe ukuthi abhale amazwi la: “Ukuzonda komuntu akukulethi ukulunga kukaNkulunkulu.” (Jak. 1:20) Siyaqiniseka ukuthi uJehova uzakwenza okulungileyo ayilungise indaba.

12. Singatshengisa njani ukuthi siyayithemba indlela uJehova ahlulela ngayo?

¹² Nxa sithethelela abanye siyabe sitshengisa ukuthi siyayithemba indlela uJehova ahlulela ngayo. Nxa singatshiya indaba ezandleni zikaJehova siyabe sitshengisa ukuthi siyamthemba ukuthi uzalungisa wonke umonakalo obangelwe yisono. Emhlabeni omutsha asithembisa wona bonke ubuhlungu esabuzwiswa ngabantu ‘abuyikukhunjulwa kumbe bufike engqondweni.’ (Isaya. 65:17) Kodwa nxa umuntu othile esizwise ubuhlungu singenelisa yini ukungambambeli isikhwili? Ake siboneni ukuthi abanye bakwenze njani lokhu.

13-14. Ufundeni ngokuthethelela kulokho okwenzakala kuTony loJosé?

¹³ Abafowethu labodadewethu abanengi bakhethe ukuxolela abantu ababazwise ubuhlungu obukhulu. Lokhu kubancede njani?

¹⁴ UTonyc ohlala ePhilippines wathi engakabi nguFakazi kaJehova wezwa ukuthi umnewabo wayebulewe ngenye indoda okuthiwa nguJosé. Ngalesosikhathi uTony wayelolaka, elodlakela njalo ezimisele ukuphindisela. UJosé wabotshwa njalo wapika ngenxa yalokho ayekwenzile. Ngokuhamba kwesikhathi kwathi uJosé esekhululiwe ejele uTony wafunga ukuthi uzamzingela ambulale, waze wathenga lombhobho wokumdubula. Ngalesosikhathi uTony waqalisa ukufunda iBhayibhili laboFakazi bakaJehova. Uthi, “Ngafunda ukuthi kumele ngitshintshe njalo ngixole.” Ngokuhamba kwesikhathi uTony wabhabhathizwa njalo waba ngumdala webandla. Wamangala esizwa ukuthi uJosé laye wayesenguFakazi kaJehova. Bathi behlangana bagonana njalo uTony watshela uJosé ukuthi usemxolele. UTony uthi intokozo aba layo esexolele uJosé yayingachasiseki. UJehova wambusisa sibili uTony ngenxa yokuthi wayezimisele ukuthethelela.

15-16. Ufundeni ngokuthethelela kulokho okwenzakala kuPeter loSue?

¹⁵ Ngo-1985 uPeter loSue bathi besemhlanganweni webandla kwadubuka ibhomba eWolu yoMbuso. Kulendoda ethile eyayilifake lapho. USue walimala kakhulu okokuthi wasala engasaboni njalo engasezwa endlebeni futhi engasenelisi ukuzwa iminuko.d UPeter loSue babehlala bezibuza ukuthi kambe ngumuntu bani ongenza ulunya olungaka. Ngemva kweminyaka eminengi indoda eyayifake ibhomba eWolu yabotshwa njalo yagwetshelwa ugodo. UPeter loSue bathi bebuzwa ukuthi babeyixolele yini indoda leyo bathi: “UJehova uyasifundisa ukuthi ukubamba isikhwili kungasigulisa, kusilimaze njalo kusenze singacabangi kuhle. Yikho sahle samcela ukuthi asincedise singaqhubeki simzondele kodwa siqhubeke ngempilo zethu.”

¹⁶ Kulula yini ukuthi bayixolele indoda le futhi bangaqhubeki beyizondele? Hayi. Baqhubeka besithi: “Ngezinye izikhathi siyacaphuka nxa uSue esethwala nzima ngenxa yokulimala kwakhe. Kodwa kasiqhubeki sicabanga ngakho, yikho kubalula ukuthi ulaka lwehle. Singatsho sikhululekile sibili ukuthi nxa indoda eyafaka ibhomba eWolu yoMbuso ingavuka inguFakazi sizayamukela. Okwenzakale kithi kusifundise ukuthi lokho okutshiwo liBhayibhili kwenza sikhululeke sibili. Kuyasiduduza lokwazi ukuthi sokuseduze ukuthi uJehova aqede bonke ububi.”

17. Ufundeni ngokuthethelela kulokho okwenzakala kuMyra?

¹⁷ UMyra waba nguFakazi esetshadile njalo eselabantwana ababili abancane. Kodwa umkakhe kazange afune ukuba nguFakazi. Ngokuhamba kwesikhathi wafeba njalo watshiya imuli yakhe. UMyra uthi: “Umkami wathi esesitshiyile ngasala ngisizwa lokho okuzwiwa yilabo abazwiswa ubuhlungu ngumuntu abamthandayo. Ngethuka, ngasala ngiphelelwe, ngadana, ngazisola njalo ngazonda.” Lanxa umtshado wabo waphela uMyra wasala esizwa ubuhlungu ngalokho umkakhe ayekwenzile. Uqhubeka esithi: “Ngaqhubeka ngikhathazekile njalo ngizondile futhi ngananzelela ukuthi lokhu kwasokuphambanisa ubungane bami loJehova kanye labanye.” Khathesi uMyra uthi kasamzondelanga njalo kamfiseli lutho olubi. Ulethemba lokuthi ngelinye ilanga uzakuba nguFakazi kaJehova. UMyra kasazihluphi ngokwenzakala kudala kodwa useziqhubekela ngempilo ecabangisisa ngezinto ezinhle uJehova azithembisileyo. Wafundisa abantwabakhe ababili baba ngoFakazi bakaJehova. Khathesi uMyra uyathokoza ngokukhonza uJehova ndawonye labantwabakhe lemuli zabo.

18. Kuyini esiqiniseka ngakho?

¹⁸ Kuyasiduduza ukwazi ukuthi akusimlandu wethu ukutsho ukuthi abantu bahlulelwe njani. Lo ngumsebenzi kaJehova ngoba nguye uMahluleli Omkhulu. (Rom. 14:10-12) Siyamthemba ukuthi uzahlala esahlulela ngendlela eqondileyo. (Gen. 18:25; 1 AmaKho. 8:32) Kasoze enze loba yini engalunganga.

19. UJehova uMahluleli Omkhulu uzakwenzani?

¹⁹ Sisilindele ngabomvu isikhathi lapho uJehova azaqeda khona bonke ububi obubangelwe yisono. Ngalesosikhathi bonke ubuhlungu buzaphela. (Hubo. 72:12-14; Isam. 21:3, 4) Asisoze siphinde sizikhumbule izinto ezasizwisa ubuhlungu. Okwakhathesi siyambonga uJehova ngokwenza senelise ukumlingisela ngokuthethelela abanye.