Jobe
10 “Inini ndinonyenya upenyu wangu.
Ndinozobhuya zvese zviri mu hana mwangu.
Ndinozovereketa ndecihwajihwa.
2 Ndinozovhunja Mwari kudari: ‘Mucananga kuti ndino ndava.
Ndivhunjenyi kuti muri kunditongerenyi.
3 Kunomubeserenyi kubzinyirira* mundhu,
Mecishora mabasa o nyara jenyu,
Moreremeja mazano o vakashata?
4 Imwimwi muno majiso o mundhu here,
Kana munovona inga zvinoita mundhuwo hake?
5 Njiku jenyu, jakatojana no njiku jo vanofa?
Makore enyu, akatojana no ovandhu?
6 Kuti mueje kuwana zvandinoposa
No kwenderera mberi mecipsaka zvishaishi zvangu?
7 Imwimwi munozviziva kuti inini andina ndava.
Apanazve angakwanisa kundiponesa mu nyara jenyu.
8 Nyara jenyu kamare, jakandiumba, jondiita.
Asi wari, imwimwi muri kuda kundiuraya kamare.
9 Ndapota, ceujanyi kuti imwimwi makandiita ngo mavhu.
Asi wari muri kundiita kuti ndihwirirezve ku bukuta.
11 Makandisimija ngo ganda* no mushuna,
Makandiumba ngo maphondo no mujira jakavanga.
12 Imwimwi makandipa uhomi, monditatijira rudo ucikacinji.
Imwimwi makandipa upenyu ngo kungwarira kwese.
13 Asi imwimwi makada kuzviita mucifise-fise.
Ndinozviziva kuti izvi, zvakaitwa ndimwi.
14 Nokwainga kuti ndakashaisha, imwimwi maizondivona.
Perapo amucaizoregererepi zvishaishi zvangu.
15 Kudari ndino ndava, idambukijo kwandiri.
Asi pikija ndicina ndava, inini andidadi ndizvona.
Ngokuti ndakazara ngo kupserujwa no kutambujika.
16 Kudari ndikadada, imwimwi maizondinyanga inga mbhondoro.
Perapo movonesazve simba renyu kwandiri.
17 Imwimwi munoviisa zvapupu zvakawanda kwandiri.
Moengejera ushungu hwenyu kwandiri
Matambujiko angu oengejeka mukuwo wese.
18 Waro makandibudisireni mundani?
Inini ndaidikana kufa hangu ndicito ndavoneka ngo jiso riri rese.
19 Zvaizoita inga ndicizivi kumbovepo,
Ndaizomukira kuvha mundani ndoenda mu guva.’
20 Njiku jangu asipi shoma here?
Mwari ngaandisiye ndiri ndega.
Iyena ngaavhise meso ake kwandiri, kuti ndiwane kuzorora.
21 Ndicito ndapinda, ndotama kuviyazve,
Kunyika inocidima cikuru,
22 Ku nyika yakazara ngo cidima cikuru,
Ku nyika yakati phuu ngo cidima no kutama kurongeka,
Ku nyika yokuti pikija ruvheneko, unoita inga cidima.”