Munovha Masoko Kuitira Co Kutarira zvo Musongano Upenyu no Mushando
NJIKU 2-8 JA MAIO
UPFUMI HUNOVHA MU SOKO RA MWARI | 1 SAMUELI 27-29
“Zvakaithwa ndi Dhavhidhi Pamukuvo wo Hondo”
it-1 164
Akishi
Pa vhaza mbiri Dhavhidhi paainga ecitiza Sauri, iyena wakawana kokutizira kuna Mambo Akishi. Pa vhaza yokutanga Dhavhidhi paakavoniwa inga muvengi, iyena wakajiita inga anopenga, ngo kudaro mambo Akishi wakatendera kuti apinde. (1 Sam. 21:11-16; Ndu. 34:Cimusoro; 56:Cimusoro) Pa vhaza yocipiri, Dhavhidhi wakaenda no masoca ake anokwana 600 kubatanija no mbhuri yake, ngo kudaro mambo Akishi wakamutendera kuti agare ku Zikragi. Nopapera gore no mweji murongomuna novari kondhoyo, mambo Akishi wairangarira kuti Dhavhidhi wainga ecihwisana no madhorobha o ku Judheya, asi Dhavhidhi wainga eciambira Vajeshuri, Vagerezi no Vaamereki. (1 Sam. 27:1-12) Dhavhidhi wakakwanisa kamare kucengeja mambo Akishi, zvokuti iyena wakaguma pakuita Dhavhidhi inga muvonereri wake Vafiristi pavainasirira kuti vaende kohwisana na Mambo Sauri. Asi pamukuvo wokupejisira, vatungamiriri vo Vafiristi vakazovhunja Dhavhidhi no vanarume vake kuti vahwirire ku Zikragi. (1 Sam. 28:2; 29:1-11) Dhavhidhi paakava mambo, wakaenda kohwisana no Vagati, asi zvinovoneka kuti mambo Akishi aazivi kuraiwa. Iyena wakararama mbhera kutonga ka mambo Soromona.—1 Maj. 2:39-41.
Majaha, Mungaitenyi Kuti Muthembiwe ngo Vamweni?
8 Vonanyi cineso cimweni cakasongana na Dhavhidhi. Paakapera kuzojwa kuti ave mambo, iyena wakadikana kuvetera makore akawanda kuti atange kutonga inga mambo wo Judha. (1 Samueli 16:13; 2 Samueli 2:3, 4) Waro, zvicinyi zvakabesera Dhavhidhi pamukuvo uwu? Kusiyapo kugara akasuruvara kuti ngenyi aaripi kutonga, iyena wakabatikana ngo zvaaikwanisa kuita. Inga muezaniso, paainga mu nyika yo Vafiristi ecitiza mambo Sauri, wakashandisa mukana wondhowo kuti aite hondo no vavengi vo Vaiziraeri. Ngo kuita kwake kudaro, iyena wakakwanisa kujivirira Vaiziraeri ku vavengi vavo.—1 Samueli 27:1-12.
it-2 354 ¶6
Kunyepa
Kuvereketa manyepo i zviro zvinorambiswa ngo Bhaibheri, asi izvi azvirevi kuti mundhu anovangirijwa kunanga masoko okadi kuna vaya vacina citendehwa co kumazwa. Ngo iyo ndava Jesu wakapangira eciti: “Mucadopa imbhwa zviro zvakacena, mucadokhandirira nghumba maperora enyu, kuti jitame kumacika-cika, perapo josika joviya kuzomuruma.” (Mat. 7:6) Ngo iyo ndava Jesu nguva jimweni, aazivi kunanga masoko ese no kudavira vandhu vamweni kudari zvirozvo zvaizovisa zvineso. (Mat. 15:1-6; 21:23-27; Joh. 7:3-10) Ngo kudaro, zvakaita Abhirahama, Izaqui, Rahabhi na Elizeu zvokutama kunanga masoko ese kana aisisira kuna vandhu vainga vacikashandiri Jehovha, azvizivi kuvoniwa kuva zvakashata.—Gn. 12:10-19; cip 20; 26:1-10; Jox. 2:1-6; Jak. 2:25; 2 Maj. 6:11-23.
Upfumi hwo Kumujimu
w10 1/1 20 ¶5-6
Vakafa Vangakwanisa Kutibesera?
Amborangariranyi ngo pamusoro pa izvi. Bhaibheri rinonanga kuti mundhu paanofa ‘kufema kwake kunopera,’ ohwirira ku mavhu, ‘njiku yondhoyo basa rake rinopera.’ (Nduyo 146:4) Sauri pamwepo na Samueri vaizviziva kuti Jehovha anonyenya vaya vanopsaka kubhuya no vandhu vakafa. Sauri wakatobesera jinja rake kuti risiye zviro zvinobatanija masaramuso.—VaLevi 19:31.
Amborangariranyi basi. Nokwainga kuti muporofita Samueri wainga ecirarama inga mujimu, kureva kuti iyena waizophwanya mutemo wa Mwari, wopsaka nyanga kuti akwanise kubhuya na Sauri? Jehovha wainga akaramba kubhuya na Sauri. Kureva kuti nyanga yaizovangirija Mwari wo Masimba Ese kuti abhuye na Sauri ecishandisa Samueri waingaya wakafa? Haiwa. Tino cokwadi cokuti “Samueri” uu wakavoniwari ndi Sauri aacaingepi muporofita wa Mwari, asi wainga mujimu wakashata kana dhimoni.
NJIKU 9-15 JA MAIO
UPFUMI HUNOVHA MU SOKO RA MWARI | 1 SAMUELI 30-31
“Kumbiranyi Simba Kuna Jehovha”
w06 1/8 28 ¶12
Kuthya Jehovha Kunovisa Mudakaro!
12 Ngo kuthya kwake Jehovha, Dhavhidhi wakaita zvizinji kusiyapo basi kutama kuita zvakashata. Kuthya uku kwakamuvangisa no kumubesera kuti aite zviro ngo ungwaru paisongana no zvineso. Pa mukuvo unokwana kuita gore no mweji murongomuna, Dhavhidhi no vandhu vake vaigara vakafindara ku Zikragi ngo kuthya Sauri, mu ndharaundha yo Vafiristi. (1 Samueli 27:5-7) Njiku imweni, vanarume va Dhavhidhi pavainga vacipo, maphanga o dhorobha ro Vaamereki akangwina mu dhorobha, voripisa no kutora vana vadoko, vanakaji no zvifuyo zvavo. Dhavhidhi no vanarume vake pavakahwirira vovona zvainga zvaiitika, vakacema maningi. Kusuruvara uku kwakaita kuti vanarume va Dhavhidhi vanyangajwe maningi zvokuti vakaguma pakuda kufura Dhavhidhi ngo mapuwe. Pikija Dhavhidhi wainga akanyangajwa, asi izvi azvizivi kumusiya acina cokuita. (Mazwi Akangwara 24:10) Kuthya kwake Jehovha kwakamubesera kuti apsake besero rake, ngo kudaro, iyena “wakawana simba ka Tenji Mwari wake.” Ngo besero ra Mwari, Dhavhidhi no vanarume vake vakaenda koteverera Vaamereki, vokwanisa kuwana zvese zvainga zvaruzika.—1 Samuel 30:1-20.
w12 15/4 30 ¶14
Jehovha Anozotingwarira Mbhera Kumagumo
14 Dhavhidhi wakasongana no mugariro jinonesa maningi mu upenyu hwake. (1 Sam. 30:3-6) Masoko ake akafemehwa anonasa kuvonesa kuti Jehovha wainasa kuziva mazwiro ake. (Verenganyi Nduyo 34:19; 56:9.) Mwari anonasavo kuziva mazwiro edu. Patinonga tino mwoyo ‘wakakhuvazika’ no ‘patinopera simba,’ iyena anokhwedera kwatiri. Izvi zvinotivangisa inga zvakavangisavo Dhavhidhi paakaimba kuti: “Nditambe, ndidakare mu rudo hwenyu! Ngokuti makavona urombo hwangu, makaziva kuxuphwa kwangu.” (Ndu. 31:8) Jehovha anoita zvizinji kusiyapo basi kuvona mugariro wedu. Iyena anotitondoja no kutipa vangiso. Njira imwe yaanoita ndiyona izvi ngo yo kushandisa musongano jedu.
Upfumi hwo Kumujimu
w05 15/3 24 ¶8
Fundo Guru Ratinowana mu Bhuku ra Samueli Wokutanga
30:23, 24. Cisungo ici ciri wari pana Bziverengo 31:27, cinotatija kuti Jehovha anodakarira maningi vaya vanoita mabasa okubesera mu ungano. Ngo kudaro, azvinenyi kuti mabasa api omakapuwa, maitenyi “ngo mwoyo wese, inga muri kuzviitira Jehovha, kuciripi mundhu.”—Vakorose 3:23.
NJIKU 16-22 JA MAIO
UPFUMI HUNOVHA MU SOKO RA MWARI | 2 SAMUELI 1-3
“Tinojijenyi ngo Ndumbo ya Dhavhidhi?”
w00 15/6 13 ¶9
Reremejanyi Vaya Vanotungamirira Pakati Penyu
9 Kureva kuti Dhavhidhi wakaneseka maningi paaishaishwa kutajwa? Dhavhidhi wakadeketerera kuna Jehovha eciti: “Vajipi vanonditeverera.” (Nduyo 54:5) Wakafunungura mwoyo wake kuna Jehovha eciti: “Mwari wangu, ndisujunurenyi ku vavengi vangu . . . Vavangi vanoungana kuti varhwe neni, ndicikazivi kuposa nokuti kuxaixa, Tenji Mwari, ndicina ndava, ivona vanogogoma no kujinasirira. Mukanyi! Vianyi kondibesa, ringiranyi!” (Nduyo 59:2-5) Makambojizwavo kudaro njiku iriyese? Kureva kuti ariwese ano cigaro wakambomuvisira zvineso pikija imwimwi amuzivi kuita zvakashata? Dhavhidhi aazivi kumbotama kureremeja Sauri. Sauri paakafa, Dhavhidhi aazivi kudakara, asi wakaimba ndumbo yo rufu, yaiti kudari: “Sauli na Jonatani, vakadiwa no kuxamiswa, avazivi kuparajwa mu kupona . . . Vaigogomesesa inga hokotora, vaivanga kupinda mbondoro. Tombozana jo vaIsraeli, cemanyi ngo ndava ya Sauli.” (2 Samueli 1:23, 24) Dhavhidhi wakakhombija muezaniso wakanaka maningi wo kureremeja Sauri, uwo wainga wakakhetwa ndi Jehovha, pikija kuti Sauri wainga ecishaisha kumutaja kamare.
w12 15/4 10 ¶8
Kutama Kugondeka—Citatijo co Mukuwo Wokupejisira!
8 Bhaibheri rinobhuyazve ngo vandhu vazinji vakava vakagondeka. Ngativone muezaniso wo vandhu vaviri vakava vagondeka no zvatingajija ndivona. Ngatitange ngo kubhuya ngo mwanarume umwe wakava wakagondeka kuna Dhavhidhi. Jonatani mwana wo dangwe ra Mambo Sauri, ndiyena waizova mambo wo jinja ro Iziraeri, asi izvi azvizivi kuzoitika ngokuti Jehovha wakazosana Dhavhidhi kuti ave Mambo. Jonatani wakareremeja cisungo ici ca Jehovha. Iyena aazivi kuva no thima nem aazivi kuvona Dhavhidhi inga muvengi. Kusiyapo izvi, “mwoyo wa Jonatani wakadisisa Davidi,” womupikira kuti waizova wakagondeka kwaari. Jonatani wakaguma pakupa Dhavhidhi hanju yake, banga rake, uta hwake no bhande rake, ecitatija nderemejo yake no kugondeka. (1 Sam. 18:1-4) Wakaita zvese zvaikwanisa kuti avangise Dhavhidhi, zvokuti wakaguma pakudira upenyu hwake pa ngozi ngo kuda kubesera Dhavhidhi, wakaita izvi paainga ari pamwepo na Sauri. Jonatani wakananga kamare kuna Dhavhidhi kuti: “Iwewe unozotonga panyezuru po vaIsraeli, neni ndinozoita wocipiri wako.” (1 Sam. 20:30-34; 23:16, 17) Ngo iyo ndava pasure po kufa ka Jonatani, Dhavhidhi wakatatija kusuruvara kwake no rudo hwake ngo kuimba ndumbo yo ciriro.—2 Sam. 1:17, 26.
Upfumi hwo Kumujimu
it-1 1248 ¶1
Hama
Gama rokuti “hama” rinoshandiswazve pakuda kunangira vandhu vakabatana pa cinangwa cimweco. Inga muezaniso, Mambo Hirau wo ku Tiro, wakadanija Mambo Soromona kuti hama. Aazivi kuita izvi basi ngo kuti vainga no zvigaro zvakaezana, asi ngokuti vese vovari vainga no cinangwa cimweco, co kupsaka matabwa kubatanijavo no zviro zvimweni zvaidiwa kuitira kuvakwa ko themberi. (1 Maj. 9:13; 5:1-12) Dhavhidhi wakatara kudari: “Vonanyi kunaka no kudakajisa kwabzo kugara pamwepo inga hama no hama.” Dhavhidhi wakatara izvi ecida kuvonesa kuti asipi basi vandhu vakabahwa vese vangava vakabatana. (Ndu. 133:1) Kuva no zvido zvimwezvo ndizvona zvakatora Dhavhidhi kuti adanije Jonatani inga hama yake. (2 Sam. 1:26) Pikija vandhu vano zvido zvafanana, asi zvido izvi zvova zvakashata, vangaguma pakudanijwa kuti hama no hama.—Mazwi 18:9.
NJIKU 23-29 JA MAIO
UPFUMI HUNOVHA MU SOKO RA MWARI | 2 SAMUELI 4-6
“Endereranyi Mberi Mecithya Kunyangajisa Jehovha”
w05 15/5 17 ¶8
Fundo Guru Ratinowana mu Bhuku ra Samueri Wocipiri
6:1-7. Pikija Dhavhidhi wainga no cido cakanaka, kueja kwake kuthwara bhokiso ro citenderano pa ngoro kwainga kuri phurusa mutemo wa Mwari. Izvi zvakazoviisa muviyo wakashata. (Exodo 25:13, 14; Bziverengo 4:15, 19; 7:7-9) Zvakaitikari na Uza pasure po kubata bhokiso ro citenderano zvinokhombija kuti zvido zvakanaka azvicinji mutemo ja Mwari.
w05 1/2 27 ¶20
Jehovha Nguva Jese Anoita Zvakanaka
20 Atidikani kukanganwa kuti Uza waizviziva kuti iyena acaidikana kuita zviro mu njira iyi. Arka yaimirira kuvepo ka Jehovha. Mutemo wainanga kuti vandhu vacikazivi kutendehwa avacaidikana kuipsasa. Iwona wakasiyazve pacena kuti vaya vaizotama kuzwira mutemo uu vaidikana kutongehwa kufa. (Bziverengo 4:18-20; 7:89) Ngo kudaro, kuthwahwa ko arka iyi, akucaidikana kuvoniwa inga ciro cicikasisiri. Izvokadi kuti Uza wainga ari Murevhi (pikija kuti wainga aciripi mupiri), ngo kudaro, waidikana kuziva zvainangwa ngo Mutemo. Kusiyapo izvi, ko makore manganani akakhirira, arka yainga yakatohwa kwendeswa ku muzi wa babake, kuti ive yakajiviririka. (1 Samueli 6:20–7:1) Arka yakagareyo ko makumanomwe o makore, perapo Dhavhidhi wakazosunga kwenda koitora. Kangaije kuvhira pa udoko hwake, Uza waiziva mutemo jaibhuya ngo pamusoro po Arka.
w05 1/2 27 ¶21
Jehovha Nguva Jese Anoita Zvakanaka
21 Inga zvanangwa pakutanga, Jehovha anokwanisa kuvona zviri mu mwoyo. Ngokudaro, Soko rake rinosanangura mugariro wa Uza kuva zviro “zvakashata.” Kangaije Jehovha wakavona mugariro wakashata wainga na Uza ucikanaswi kunangwa mu Bhaibheri. Kureva kuti Uza waizvitutumaja mbhera kutama kureremeja mugano wainga wakadihwa ndi Jehovha here? (Mazwi Akangwara 11:2) Kureva kuti kufambisa ngoro yaingaya yakapakija arka yainga ku muzi kwake kwakaita kuti azvitutumaje? (Mazwi Akangwara 8:13) Kureva kuti rutendo hwake hwainga hwakaderera maningi, oguma pakurangarira kuti Jehovha aacainga no simba ro kubatirira arka yaimiriraya kuvepo kwake? Azvinenyi hazvo kuti ngozvapi zvakamuitisaro, asi tingava no cokwadi cokuti Jehovha wakaita zvakanaka. Kangaije Jehovha wakavona zvainga mu mwoyo wa Uza zvakamuita kuti amuuraye ciriporipoco.—Mazwi Akangwara 21:2.
Upfumi hwo Kumujimu
w96 1/4 29 ¶1
Nguva Jese Khandiranyi Muthwaro Wenyu Kuna Jehovha
Inga mambo, Dhavhidhi wakava no ndava pa rufu uhwu. Zvakazoita Dhavhidhi zvinovonesa kuti pikija mundhu ano ushamwari hwakanaka na Jehovha, angaguma pakuita zviro mu njira yakashata paanonga ari pa muejo. Pakutanga Dhavhidhi wakanyangajwa. Perapo wakatanga kuthya. (2 Samueli 6:8, 9) Kugonda kwake Jehovha kwakaguma pakuejwa. Zvakaitisa kuti Dhavhidhi atame kuzwira Jehovha ngozvokuti pa mukuvo uwu iyena aazivi kupsaka besero ra Jehovha. Kureva kuti izvi nguva jimweni zvinotiitikiravo? Kureva kuti tinopa ndava Jehovha ngo zvineso zvinovepo ngo kutama kwedu kuzwira ndhungamiriro jake?—Mazwi Akangwara 19:3.
NJIKU 30 YA MAIO–5 YA JUNHO
UPFUMI HUNOVHA MU SOKO RA MWARI | 2 SAMUELI 7-8
“Jehovha Wakaita Citenderano na Dhavhidhi”
w10 1/4 20 ¶3
“Umambo Hwako Unozova Wakavanga”
Jehovha wakadakara maningi ngo cido co mwoyo wese cainga na Dhavhidhi. Mwari wakaguma pakuita citenderano naye, cokuti mukati mo mubarihwana wake, maizobuda wiya waizotonga kwenda no kwenda. Natani wakananga ngo pamusoro po cigondiso ca Mwari kuna Dhavhidhi, eciti: “Mbhuri yako no umambo hwako bzinozogara mukuvo wese pambeji pangu, dendemaro rako rinozogara mbhera narini.” (Vhesi ya 16) Ndiyani anozogara kwenda no kwenda pa citenderano ici, ndi wiya anozotonga mbera narini?—Nduyo 89:21, 30, 35-37.
w10 1/4 20 ¶4
“Umambo Hwako Unozova Wakavanga”
Jesu wo ku Nazareta wainga mubarihwana wa Dhavhidhi. Pa kuziviswa kubahwa kwa Jesu, ngirozi yakananga kudari: “Jehovha Mwari anozomupa cigaro co umambo ca baba wake, Dhavhidhi, iyena anozova Mambo wo nyumba ya Jakobe mbhera narini, Umambo hwake ahuzovi no magumo.” (Ruka 1:32, 33) Ngo kudaro, citenderano cakaitihwa Dhavhidhi, cakakwanirisika kuna Jesu. Ngo iyo ndava, iyena anotonga haiwa ngo kusanwa ngo vandhu, asi ngo cigondiso cakaitwa ndi Mwari co kuti iyena atonge kwenda no kwenda. Ativhiri kukanganwa nee padoko kuti zvingodiso zva Mwari zvinokwanirisika basi.—Isaia 55:10, 11.
w14 15/10 10 ¶14
Ivanyi no Rutendo Wakavanga ku Umambo hwa Mwari
14 Vonanyi kuti Jehovha wakagondesenyi Mambo Dhavhidhi ku mukuvo wo Vaiziraeri paakaita citenderano naye. (Verenganyi 2 Samueli 7:12, 16.) Jehovha wakaita citenderano ici na Dhavhidhi, pamukuvo wokuti iyena wainga mambo ku Jerusarema, ecimugondesa kuti Mesiya waizoviya ecivha ku mubarihwana wake. (Ruka 1:30-33) Ngo njira iyi, Jehovha wakanasa kujekesa kuti mwana uwu, waizoviya ngo jinja rapi. Wakajekesazve kuti mundhu umwe wo mubharihwana wake waizosanwa kuti ave pa kadera yo Umambo. (Ezekieli 21:25-27) Ecishandiswa Jesu, umambo hwa Dhavhidhi unozogara mbera narini. Kunasa kunanga, “mubarihwana wake unozogara mbhera narini, dendemaro rake rinodari inga zuva.” (Nduyo 89:35-38) Hina, utongi hwa Mesiya unozova wakarurama, zviito zvawo zvinozova zvo kwenda no kwenda!
Upfumi hwo Kumujimu
it-2 1165 ¶1
Njiku jo Kupejisira
Ciporofita ca Bharami. Vaiziraeri vainga vacito vanghwina mu nyika yo Cipikihwa, apo muprofita Bharami wakavhunja mambo Bharaki kudari: “Viai, ndinozokuzivisa bzo rinozoita jinja iri ku jinja rako, ngo mukuvo unozoza. . . . Nyereji inobva ka jakobe, mambo anozobuda mu lsraeli; Mambowo anozocikacika musoro yo vaMoabi, anozophwanyaphwanya madendhenya o vana vese va Xeti.” (Bziv. 24:14-17) Pakukwanirisika kokutanga ko ciporofita ici, kwakavoneka kuti “nyereji” kana ndhondho yainga mambo Dhavhidhi uwu wakanyisa Vamowabhi. (2 Sam. 8:2) Mukufamba ko nguva, kukwanirisika ko divi rimweni ro ciporofita ici ngo pamusoro po “mukuvo unozoza,” kana njiku jo kupejisira kwakatanga ngo kutonga kwa mambo Dhavhidhi. Zvecivoneka kuti Dhavhidhi waimirira Jesu inga mambo, ciporofita ici cinoshandavo apo Jesu paanozoparaja vavengi vake.—Isaia 9:7; Nduyo 2:8, 9.
NJIKU 6-12 JA JUNHO
UPFUMI HUNOVHA MU SOKO RA MWARI | 2 SAMUELI 9-10
“Dhavhidhi Wakatatija Rudo Ucikacinji”
w06 15/6 14 ¶6
Hina, Mungawana Mudakaro
Dhavhidhi wakatara kudari: ‘Anodakara wiya anobesa murombo.’ Iyena wakaenderera mberi eciti: “Mu njiku yo khombo, Tenji Mwari anomuponesa. Tenji Mwari anomungwarira; anomupa uhomi no kudakara mu nyika.” (Nduyo 41:3, 4) Unyasha wakavonesa Dhavhidhi kuno Mefibhosheti, mwana wakaremara wa Jonatani, shamwari yo pa mwoyo ya Dhavhidhi, imuezaniso unodikanwa kuvoneswa kuno vatami.—2 Samueli 9:1-13.
w05 15/5 17 ¶12
Fundo Guru Ratinowana mu Bhuku ra Samueli Wocipiri
9:1, 6, 7. Dhavhidhi wakakwanirisa cigondiso caakaita. Na itusuvo tinodikana kuvangisira kuti tikwanirise zvatinonanga.
w02 15/2 14 ¶10
Vakahwisana no Muzwa mu Muviri
10 Makore maganani no akhirira, mambo Dhavhidhi wakavonesa unyasha kuno mefibhosheti, ngo ndava yo rudo wainga nawo kuna Jonatani. Dhavhidhi wakapa Mefibhosheti munda jese jainga ja Sauri, perapo wakagaja Ziba mubeseri wa Sauri kuti angwarire munda iji. Dhavhidhi wakatizve kuna Mefibhosheti: “Unozoha njiku jese pa tafura rangu.” (2 Samueli 9:6-10) Pacina kukana-kana, kunaka mwoyo kwa Dhavhidhi kwakapungura kuhwajihwa kwainga na Mefibhosheti ngo ndava yo kuremara. Ici icijijo caushoni kamare. Na itusuvo tinodikana kuva vakanaka mwoyo kuno vaya vano muzwa mu muviri.
Upfumi hwo Kumujimu
it-1 291
Mupungu
Vandhu vakawanda vo mu nguva jo kare, kubatanijavo Vaiziraeri, vaivona mupungu inga ciro caivavonesa kuti ivanarume kamare. Mutemo waakapa Jehovha kuno Vaiziraeri wairabisa “kugunda ku mbhiri ko mupungu,” mumbhiripiri mo njeve no mumajiso. (VaLevi 19:27; 21:5) Mutemo uwu wakapuwa Vaiziraeri ngokuti ku majinja amweni aainga acikanamati Jehovha, cirovejeso co kugunda caiitwa inga manamatire wo zvimwari zvo manyepo.
NJIKU 13-19 JA JUNHO
UPFUMI HUNOVHA MU SOKO RA MWARI | 2 SAMUELI 11-12
“Mucatendera Kuti Zvido Zvakashata Zvimuvonerere”
Imwimwi Mungakwanisa Kutiza Murau ja Sathana!
10 Ngo ndava yo kudisisa zviro zvakawanda, zvakaita kuti Mambo Dhavhidhi vakanganwe zvese zvavakapuwa ndi Jehovha, zvakadari inga upfumi, kuva kwake mundhu waizivika maningi no kunyisa vavengi vakawanda. Dhavhidhi waibongesera maningi kamare, wakananga kuti zvipuwo zvese zva Mwari azvicaiverengeka. (Nduyo 40:6) Asi pa kufamba ko nguva, iyena wakakanganwa zvese zvaakapuwa ndi Jehovha. Iyena aicaidakarazve ngo zviya zvainga nazvo, waida zvakawanda. Pikija kuti Dhavhidhi wainga no vakaji vakawanda, iyena wakatendera kuti cido cakashata cimuite kuti ade mukaji wo umweni. Mwanakaji uu wainga Bhatishebha, mukaji wa Uriya Muitita. Dhavhidhi wakaita zvo vatano na Bhatishebha, inga muviyo iyena wakava no mimba. Zvakaitari Dhavhidhi zvainga zvakashata maningi, asi iyena wakaitazve zviro zvakashatisisa kamare, kuuraya Uriya. (2 Samueli 11:2-15) Asi Dhavhidhi wainga ecirangarirenyi? Kunanga kuti iyena wairangarira kuti Jehovha aripi kumuvona? Pikija kuti Dhavhidhi wakashandira Jehovha ko makore akawanda iyena wakaguma pakuva no cido co kuva no zviro zvakawanda. Inga muviyo, iyena wakatambujika maningi. Zvinodakajisa ngo zvokuti iyena wakatendera kuposa kwake, wokhauya. Iyena wakadakara ngo kuregerehwa ndi Jehovha.—2 Samueli 12:7-13.
Ngenyi Tinodikana Kuzwira Jehovha ngo Mwoyo Wese zve Tingazviitisa Kudini?
15 Kusiyapo kuva musoro wo mbhuri basi, Jehovha wakagaja Dhavhidhi inga musoro wo jinja rese ro Iziraeri. Inga Mambo, Dhavhidhi wainga no mutoro jakawanda. Nguva jimweni, iyena aacainasa kushandisa ushoni simba rake inga mambo. (2 Samueli 11:14, 15) Asi, Dhavhidhi wakakhombija kuzwira Jehovha ngo kutendera kuashira mbhangiro. Iyena wakadurura mwoyo wake kuna Jehovha, ngo kumubvunja mazwiro ake. Cimwenizve, waiita zvese zvaaikwanisa kuti azwire mbhangiro ya Jehovha. (Nduyo 51:3-6) Mukuengejera, Dhavhidhi waijidodokesa maningi, zvokuti waitendera kuashira mbhangiro jo vanarume pomwe no jo vanakaji. (1 Samueli 19:11, 12; 25:32, 33) Dhavhidhi wakajijira ngo zvishaishi zvake, tevere wakaita kuti kunamata kwake Jehovha kuve pakutanga.
Tenderanyi kuti Mutemo no Zviambi zva Mwari Zviroveje Hana Yenyu
7 Atibvhiri kutanga tatambujika ngo kuphwanya mutemo ja Mwari kuti tizozive zvakashata no zvakanaka. Tingajija ngo zvakaposa vamweni kareko. Muezaniso iji jakatahwa mu Bhaibheri. Mazwi Akangwara 1:6, inoti: “Muzivi ngaazwe no kuengejera uzivi hwake.” Uzivi wondhowo unobva kuna Mwari zve hwakanaka kupinda uri wese hao! Inga muezaniso, rangariranyi matambujikire akaita Dhavhidhi pasure po kutama kuzwira Jehovha wohura na Bhate-shebha. (2 Samueli 12:7-14) Pamunoverenga ciitiko ici, jibvunjisenyi kudari: ‘Dhavhidhi waizotizisa kudini matambujiko aya? Zvicinyi zvandaizoitavo kudari ndainga pa mugariro wake? Kudari ndaiejwa kuti ndiite uhure ndaizoita inga ndi Dhavhidhi kana inga ndi Josefa?’ (Genesi 39:11-15) Tikanasa kurangarira ngo pamusoro po muviyo jakashata jo cishaishi, tinozoenderera mbheri ‘tecinyenya bzakaxata.’
Upfumi hwo Kumujimu
it-1 653 ¶3
Dhavhidhi
Jehovha wainga ecivona perapo wakazovonesa shwiro yese iya. Kudari Jehovha wainga wakatendera kuti cishaishi cakaitwa ndi Dhavhidhi na Bhatishebha citongwe ngo vatongi, mukuzwirana no mutemo wa Mosi, vashaishi vese vovaviri vaizouraiwa, mwana waidaro kubahwa waizouraiwavo na mai wake. (Dt. 5:18; 22:22) Ngokudaro, Jehovha wakatonga shwiroyo perapo wakaitira unyasha Dhavhidhi ngo ndava yo citenderano co Umambo caakaita (2 Sam. 7:11-16), ngokutizve Dhavhidhi watatijavo unyasha kuno vamweni (1 Sam. 24:4-7; ezanisanyi Jak. 2:13) pomwe ngo ngava yo kukhauya kwaanovona Mwari kuno vaya vanoshaisha. (Ndu. 51:3-6) Asi ivona vakawana muviyo wo cishaishi cavo. Ecishandisa muporofita Natani Jehovha wakati: “Pa muzi pako kamare ndinozoita kuti pabude khombo kouri.”—2 Sam. 12:1-12.
NJIKU 20-26 JA JUNHO
UPFUMI HUNOVHA MU SOKO RA MWARI | 2 SAMUELI 13-14
“Kutama Kujibata ka Amoni Kwakamuendesa mu Ngozi”
it-1 31
Abhusaromi
Kuraiwa kwa Amoni. Kuseja kwaita Tamari, hambzaji ya Abhisaromi, kwakaita kuti nevanji vake vo dhodha vakasiyana ndi mai, vaemure hambzaji yake. Ngo kunyepejera kuti ari kuwaja, Amoni wakakwanisa kuita kuti vatumire Tamari kuenda komubikira, pondhopo wakamujipa. Pakupera kuita zvondhozvo, rudo wakashata wainga na Amoni kuna Tamari, wakazocinja otanga kumunyenya, wakatumira kuti Tamari andihwe mu gwanja. Tamari wakaparura nguvo yake yaimuvonesa kuti wainga mwana wo mbandwe wa mambo, perapo wojidira marota mu musoro, woenda kowanana na Abhisaromi hama yake. Paakavona hambzaji yake wakamukira kufiningira Amoni, kuvonesa kuti Abhisaromi wakavona zvido zvainga no hama yake. Pikija zvakadaro, Abhisaromi wakadurujira hambzaji yake kuti itame kunanga ciro, perepo wakamutora woenda kogara naye kumuzi kwake.—2 Sam. 13:1-20.
Vangisanyi Kujibata Kwenyu
11 Bhaibheri rinotipavo muezaniso jo vandhu vacizivi kucijikira pa muejo wo kuita ruvatano hucizivi kurungama. Zve muezaniso jondhojo jinovonesa muviyo jakashata jinoviiswa ngo kutama kujibata. Kudari muri pa mugariro wakadari inga wa Kim, rangariranyi upenji wo mujaha anonangwa pa Mazwi Akangwara cipauko co 7. Rangariranyivo ngo pamusoro pa Amoni, no nyatwa yakaviiswa ngo mufambiro wake. (2 Samueli 13:1, 2, 10-15, 28-32) Vabari vangabesera vana vavo kuti vave no mugariro wo kujibata no ungwaru ngo kubhuya ngo muezaniso iji pa kunamata ko mbhuri.
it-1 31 ¶6
Abhisaromi
Sure ko makore maviri, Abusaromi wakakoka vese vana va mambo na mambo Dhavhidhi kuti vaungane mu Bari-hazori, kuenda kondhoyo kwaipeja makiromita anokwana 22, wecivha ku Jerusarema. Apo babake pavakaramba kuendeyo, iyena wakavangirija kuti vatumire Amoni pa ndau yavo. (Mazwi 10:18) Pa mabuso aya, apo Amoni paainga warejera ngo ndava yo vhinyu, Abhisaromi wakatumira varanda vake kuti vamuuraye. Vana vamweni vakahwirira ku Jerusarema, Abhisaromi wakaenda ku majicekuru ake ku umambo hwo Geshuri, ku divi ro jombe ro Garireya. (2 Sam. 13:23-38) “Banga” rainga rakanangwa ngo muporofita Natani rainga recinghwina mu “nyumba” ya Dhavhidhi.—2 Sam. 12:10.
Upfumi hwo Kumujimu
g04 12/22 8-9
Mushovo wo Kuseja Kunosisira
Ngatibhuyenyi ndi Abhisaromi umwe wo mwana wa Dhavhidhi. Iyena wakavonesa kuva mundhu acikasisiri, pikija wainga wakaseja maningi. Bhaibheri rinoti ngo pamusoro pake: “Pakati po vaIsraeli vese apacaingepi no mundhu wakaseja inga Abusaromi, waifanera kusimbwa kwese: kubvira soka mbhera musoro bzese bzainga bzakanaka.” (2 Samueli 14:25) Kujikuja kwa Abhisaromi no kuda zviro zvakawanda kwakamuita kuti apandukire babake no kuvatorera utongi. Atee wakaguma pa kuvatana no vakaji vamweni vo pamutivi vababake. Inga muviyo, Abhisaromi wakacamwisa Mwari, wofa ngo manera anowaja maningi.—2 Samueli 15:10-14; 16:13-22; 17:14; 18:9, 15.
Munodakarira Abhisaromi? Atikani-kani kuti nadha. Iyena wainga mundhu wakashata mwoyo. Kuseja kwake, akuzivi kucinja kujikuja kwainga nako pomwe no kutama kugondeka nee akuzivi kumubesera kuti atame kufa. Ngo divi rimweni, mu Bhaibheri muno muezaniso jakawanda maningi jo vandhu vainga no ruzivo no vakanaka, asi aribhuye ngo mavonekero avo. Izvo zvinovonesa kuti, zvaisisira maningi kwainga kuseja kwavo ko mukati.
NJIKU 27 YA JUNHO–3 YA JULHO
UPFUMI HUNOVHA MU SOKO RA MWARI | 2 SAMUELI 15-17
“Abhisaromi Wakapanduka ngo Ndava yo Kujikuja”
it-2 692
Vafambisi vo ngoro
Cainga cirovejeso co ku Oriente kuti vafambisi vo ngoro vamweni, vagogome kumbeji ko ngoro yo umambo kuti vanasirire gwanja no kuzivisa kuviya kwa mambo pomwe no kubesera pa zvinodikana. (1 Sam. 8:11) Abhisaromi na Adhoniya vakaitavo zvondhozvo ngo kutevejera cirovejeso ici, kuti vaengejere nduma ngo ndava yo kupandukira kwavo, vakatora vafambisi vo ngoro vanokwana kuita 50 kuti vafambe pambeji po ngoro javo.—2 Sam. 15:1; 1 Maj. 1:5.
w12 15/7 13 ¶5
Shandiranyi Mwari wo Rusujunuko
5 Mu Bhaibheri muno muezaniso jakawanda jo vandhu vakakwevejera vandhu vamweni mu njira yakashata. Umwe wo muezaniso ngo wa Abhisaromi mwana wa Dhavhidhi. Iyena wainga mwanarume wakaseja maningi. Asi pa kufamba ko nguva, Abhisaromi wakaemurira zviro zvakawanda, woguma pa kuda utongi wa babake zviro zvokuti aacaifanera, zvaakaitaro zvakatojana no zvakaitwa ndi Sathana. Paainga ecieja kutora umambo hwa babake, waizviitisa inga kuti waineseka ngo vaiziraeri, ecinanga kuti mambo aacaineseka ngo vandhu. Kudari inga zvakaitwa ndi Sathana mu munda wo Edheni, Abhisaromi wakajivonesa inga wakanaka maningi, pa nguva yondhoyo ecishoresa babake.—2 Sam. 15:1-5.
it-1 1138
Hebroni
No pakhirira makore akati-kuti, Abhisaromi wakahwirira Hebroni, naari kondhoyo wakatanga kupandukira babake kuti atore umambo. (2 Sam. 15:7-10) Kangaije Abhisaromi wakasana kutanga kuita basa rake rokupandukira ku dhorobha ro ku Hebroni, ngo ndava yokuti ndikona kwaakakurira, nokutizve rainga dhorobha guru ro Judha yo kare. Asi pa kufamba ko nguva, muzukuru wa Dhavhidhi Robhowamu wakavakisa dhorobha iri. (2 Kron. 11:5-10) Pa kupera kuparajwa ko dhorobha ro Judha ngo Vabhabhironi no kuhwirira ko Vajudha kuvha ku uranda, Vajudha vamweni vakaenda koogara ku Hebroni (Kiriati-arbha).—Nee. 11:25.
Upfumi hwo Kumujimu
Muno Gwinyiso Nazvo Here?
11 Ingaguma nguva yo kuti tingatohwajihwa ngokuti vandhu vari kundhandhanisa masoko akashata ngo pamusoro pedu okuti divi rimwe rao asipi okadi. Izvi ngo zvakaitika na Mefibhosheti. Mambo Dhavhidhi, no kukova kwese, wakapa Mefibhosheti munda jese jainga ja cekuru wake, Sauri. (2 Samueli 9:6, 7) Asi, pa kufamba ko nguva Dhavhidhi wakazwa zviro zvakashata zvecinangwa ngo pamusoro pa Mefibhosheti. Iyena aazivi kuda kupsakisisa dangani ndizvona zve wakatorera zvese Mefibhosheti. (2 Samueli 16:1-4) Dhavhidhi paakazobhuya naye, wakazwisisa kuti iyena wainga waposa. Perapo wakapa Mefibhosheti zvimwe zvo zviro zvake. (2 Samueli 19:24-29) Kudari Dhavhidhi naakatora nguva kuti ave no gwinyiso razvo kunja ko kukasika kuita ciri cese acina masoko akakwana, Mefibhosheti acaizotambujika ngo kushaisha kutajwa uku.