प्रेषितहरूका कार्य
६ त्यसबेला जब चेलाहरूको सङ्ख्या बढ्दै गइरहेको थियो, तब हरेक दिन खाना बाँड्दा+ ग्रीकभाषी विधवाहरूको बेवास्ता भइरहेको हुनाले ग्रीकभाषी यहुदी चेलाहरूले हिब्रूभाषी यहुदी चेलाहरूविरुद्ध गनगन गर्न थाले। २ त्यसकारण १२ प्रेषितले सबै चेलालाई बोलाएर भने: “परमेश्वरको वचन सिकाउन छोडेर टेबुलमा खाना बाँड्नु हाम्रो लागि उचित हुँदैन।+ ३ त्यसैले भाइहरू हो, पवित्र शक्ति र बुद्धिले भरिपूर्ण भएका+ अनि राम्रो नाम कमाएका+ सात जना मानिस तपाईँहरूमाझ छान्नुहोस् र हामी तिनीहरूलाई यस महत्त्वपूर्ण काममा नियुक्त गर्नेछौँ।+ ४ तर हामी भने प्रार्थना गर्ने र परमेश्वरको वचन सिकाउने काममा समर्पित हुनेछौँ।” ५ यो कुरा सबै चेलालाई चित्त बुझ्यो अनि तिनीहरूले स्तिफनसलाई छाने, जो विश्वास र पवित्र शक्तिले भरिपूर्ण थिए। त्यसैगरि तिनीहरूले फिलिप,+ प्रखरस, निकनोर, तिमोन, पर्मिनास र धर्म परिवर्तन गरेर यहुदी बनेका एन्टिओकका निकोलाउसलाई पनि छाने। ६ तिनीहरूले यिनीहरूलाई प्रेषितहरूकहाँ लगे अनि प्रार्थना गरेपछि ती प्रेषितहरूले आफ्नो हात यिनीहरूमाथि राखे।+
७ फलस्वरूप परमेश्वरको वचन फैलँदै गयो+ र यरुसलेममा चेलाहरूको सङ्ख्या झन्-झन् बढ्दै गयो+ अनि पुजारीहरूको ठूलो जमातले पनि विश्वास गर्न थाल्यो।+
८ अब परमेश्वरबाट अनुग्रह र बल पाएका स्तिफनसले मानिसहरूसामु ठूलठूला आश्चर्यजनक कार्य अनि चमत्कारहरू गर्दै थिए। ९ तर ‘स्वतन्त्र दलको सभाघर’ भनिने समूहका केही मानिस अनि केही साइरेनीवासीहरू, अलेक्जेन्ड्रियालीहरू अनि सिलिसिया र एसियाका कोही-कोही मानिसहरू स्तिफनससित विवाद गर्न आए। १० तर तिनी जुन बुद्धि र पवित्र शक्तिको साथमा बोलिरहेका थिए, त्यससामु तिनीहरू टिक्न सकेनन्।+ ११ तब तिनीहरूले मानिसहरूलाई यसो भन्न गुप्तमा उक्साए: “यसले मोसा र परमेश्वरको निन्दा गरेको हामीले सुनेका छौँ।” १२ तिनीहरूले मानिसहरू, धर्मगुरुहरू र शास्त्रीहरूलाई भड्काए अनि एक्कासि आएर तिनलाई जबरजस्ती पक्रे र यहुदी न्यायपरिषद्सामु लगे। १३ तिनीहरूले झूटा साक्षीहरू अघि सारेर यसो भन्न लगाए: “यस मानिसले यो पवित्र ठाउँ र मोसाको व्यवस्थाविरुद्ध बोल्न छोड्दैन। १४ उदाहरणका लागि, त्यो नासरी येसुले यस ठाउँलाई भत्काउनेछ अनि हामीले मोसाबाट पाएको रीतिथितिलाई परिवर्तन गर्नेछ भनेर यसले भनेको हामीले सुनेका छौँ।”
१५ अनि यहुदी न्यायपरिषद्मा हुनेहरू सबैले एकटक लगाएर तिनलाई हेरे। उनीहरूले तिनको अनुहार स्वर्गदूतको जस्तै देखे।