भजनसङ्‌ग्रह

३४ म हरसमय यहोवाको प्रशंसा गर्नेछु;

मेरो ओठले निरन्तर उहाँको प्रशंसा गर्नेछ।

 २ म यहोवामा गर्व गर्नेछु+

अनि नम्रहरूले त्यो सुन्‍नेछन्‌ र खुसी मनाउनेछन्‌।

 ३ मसँगसँगै यहोवाको महिमा गर;+

सँगै मिलेर उहाँको नाम उच्च पारौँ।

 ४ मैले यहोवालाई प्रार्थना गरेँ र उहाँले मलाई जवाफ दिनुभयो।+

उहाँले मेरा सबै डर हटाइदिनुभयो।+

 ५ उहाँको बाटो हेर्नेहरूको मुहार चम्किलो भयो;

सरममा परेर तिनीहरूले आफ्नो अनुहार छोप्नुपरेन।

 ६ यस दुःखीले यहोवालाई पुकाऱ्‍यो र उहाँले सुन्‍नुभयो।

उहाँले मेरा सबै दुःखबाट मलाई बचाउनुभयो।+

 ७ यहोवासित डराउनेहरूको चारैतिर उहाँका स्वर्गदूतले छाउनी हाल्नेछन्‌+

अनि उहाँले तिनीहरूको उद्धार गर्नुहुनेछ।+

 ८ चाखेर हेर, यहोवा कत्ति भलो हुनुहुन्छ;+

आनन्दित हो त्यो मानिस, जसले उहाँमा शरण लिन्छ।

 ९ हे यहोवाका सबै पवित्र जन हो, उहाँको भय मान

किनकि उहाँको भय मान्‍नेहरूलाई केही कुराको अभाव हुँदैन।+

१० बलिया जवान सिंहहरूसमेत खान नपाएर दुब्लाएका छन्‌

तर यहोवाको खोजी गर्नेहरूलाई असल कुराको अभाव हुँदैन।+

११ हे मेरा छोराहरू हो, आओ र मेरो कुरा सुन;

म तिमीहरूलाई यहोवाको भय मान्‍न सिकाउँछु।+

१२ तिमीहरूमध्ये कसले सुखी जीवन चाहन्छ

र लामो आयुको चाहना गर्छ?+

१३ त्यसोभए आफ्नो जिब्रोलाई खराब कुराबाट अलग राख+

र आफ्नो ओठलाई छली कुरा बोल्नदेखि रोक।+

१४ खराब काम त्याग र जे असल छ, त्यो गर;+

शान्ति खोज र त्यसको पछि लाग।+

१५ धर्मीहरूमाथि यहोवाको नजर रहन्छ+

अनि तिनीहरूले उहाँलाई गुहार्दा उहाँले आफ्नो कान थाप्नुहुन्छ।+

१६ तर ज-जसले खराब काम गर्छन्‌, तिनीहरूदेखि यहोवाले आफ्नो अनुहार फर्काउनुहुन्छ

र पृथ्वीबाट तिनीहरूको सम्झना पूरै मेटाइदिनुहुन्छ।+

१७ तिनीहरूले गुहारे र यहोवाले सुन्‍नुभयो;+

उहाँले तिनीहरूका सबै दुःखबाट तिनीहरूलाई छुटाउनुभयो।+

१८ यहोवा टुटेका हृदय भएकाहरूको नजिक हुनुहुन्छ+

र निराश भएकाहरूलाई उहाँले बचाउनुहुन्छ।+

१९ धर्मी मानिसले धेरै दुःखकष्ट* झेल्नुपर्छ+

तर यहोवाले उसलाई ती सबैबाट बचाउनुहुन्छ।+

२० उहाँले उसका सबै हड्डीको रक्षा गर्नुहुन्छ;

उसको एउटै हड्डी भाँचिएको छैन।+

२१ विपत्तिले दुष्टलाई मृत्युमा पुऱ्‍याउनेछ;

जसले धर्मी मानिसलाई घृणा गर्छ, ऊ दोषी ठहरिनेछ।

२२ यहोवाले आफ्ना सेवकहरूको जीवन बचाउनुहुन्छ;

उहाँमा शरण लिने कोही पनि दोषी ठहरिनेछैन।+