एउटा पवित्र रहस्य खोलिन्छ

“यो भक्‍तिको रहस्य महान छ।”—१ तिमोथी ३:१६.

१. १ तिमोथी ३:१६ मा कुन रहस्यको वर्णन गरिएको छ?

रहस्यहरूले के तपाईंलाई मन्त्रमुग्ध पार्छन्‌? के तपाईंलाई रहस्यहरूको जाँचपड़ताल गर्न मनलाग्छ? हामी धेरै जसोलाई यी कुराहरू मनपर्छ! यसकारण, आउनुहोस्‌, हामी सँग मिलेर, सबै भन्दा महान रहस्यहरूको अनुसन्धान गर्नुहोस्‌—यो त्यो रहस्य हो जुन परमेश्‍वरको वचनमा हजारौं वर्ष देखिन्‌ बन्द थियो। यो पवित्र रहस्यले हाम्रो जीवनको, दुवै वर्तमान र भविष्यकालमा, विशेष असर पार्दछ। यो हो ‘भक्‍तिको पवित्र रहस्य’ जसको वर्णन हाम्रालागि १ तिमोथी ३:१६ मा गरिएको छ। हामी, “रहस्यहरू खोल्नुहुने” यहोवा प्रति कृतज्ञ हुनुपर्छ, किनभने उहाँले दयापूर्वक हाम्रालागि यो महान रहस्य र यसको अर्थ खोलिदिनु भएको छ!—दानिएल २:२८, २९.

२. (क) एउटा पवित्र रहस्य बारे, यहोवाले प्रथम पटक कहिले चर्चा गर्नु भयो र त्यस बेला के प्रतिज्ञाहरू गर्नु भयो? (ख) कुन प्रश्‍नहरूको उत्तर आवश्‍यक छ?

^२ साँपले हव्वालाई बहकाएर, आदम पनि हव्वाकै बाटो लागेपछि, प्रथम पटक यहोवाले एउटा पवित्र रहस्यको चर्चा गर्नु भयेको थियो। बीउ, वा “सन्तानले” शैतानको सिर कुच्याउने छ भनेर यहोवाले त्यति बेला प्रतिज्ञा गर्नु भयो। (उत्पत्ति ३:१५) यो बीउ को हो? उसले सर्पमाथि विजय कसरी गर्नेछ? के त्यसले परमेश्‍वरको सत्यता र पृथ्वीकालागि उहाँको उद्देश्‍य पुरा गर्नेछ?

३. बीउको पहिचान र उसले गर्ने कामकुरा बारे, ईश्‍वरीय भविष्यद्वाणीले के सुराक प्रदान गऱ्‍यो?

^३ समय बित्दै गएपछि, इश्‍वरीय भविष्यद्वाणीहरू द्वारा यो बीउको परिचय र भविष्यमा उसले गर्ने कामहरूको सुराकहहरू बारे प्रकाश गरिन्छ। यो बीउ अब्राहामको वंशबाट आउने रहेछ र दाऊदको राज्यमाथि उसको हक लाग्ने रहेछ र शान्तिको राजकुमार कहलिनेरहेछ। उहाँको शासन र शान्तिको वृद्धिको अन्त चाहिं कहिले हुनेछैन। (यशैया ९:६, ७; उत्पत्ति २२:१५-१८; भजन ८९:३५-३७) तर रोमी १६:२५ अनुसार, त्यो पवित्र रहस्य “सनातन देखिन्‌ गुप्त रहेको थियो।”

रहस्योद्‌घाटन

४. ई. स. २९ मा, पवित्र रहस्य कसरी खोलिन थालियो?

^४ अखिर, ४ हजार वर्ष पश्‍चात्‌, ज्ञानको प्रकाश स्फुटित भयो! कसरी? ई. स. २९ सालमा, यहून्‍नाले नासरतको येशूलाई बप्तिस्मा दिनुभयो र स्वर्गबाट परमेश्‍वरले एसो भन्‍नु भयो: “यिनी मेरो प्यारो पुत्र हुन्‌, जो सँग म खुशी छु।” (मत्ती ३:१७) बल्ल, प्रतिज्ञा गरिएको बीउ देखियो! पवित्र रहस्य, आफ्नो सारा महिमा र इश्‍वरीय भक्‍ति साथ खोलिन शुरू हुन लागेको थियो।

५. “ईश्‍वरीय भक्‍ति” के हो, र यो प्रयोगमा ल्याउनेहरूमाथि, यसले के असर पार्दछ?

^५ “इश्‍वरीय भक्‍तिले” भन्‍नाले हामी के बुझ्दछौं? मसीही युनानी शास्त्रमा यो शब्दको २० पटक प्रयोग गरिएको छ र १० भन्दा बढ़ी पटक ता पावलले तिमोथीलाई लेखेको पत्रहरूमै यसको प्रयोग भएको पाउँदछौं। इनसाइट अन दी स्क्रीपचर्स भन्‍ने प्रकाशनमा, “इश्‍वरीय भक्‍तिको” परिभाषा यस प्रकार छ: “श्रद्धा, उपासना, परमेश्‍वरको सेवा र उहाँको विश्‍वब्यापी सार्वभौमिकता प्रति भक्‍ति।” परमेश्‍वरको महिमाको रवाफ, अनन्तता, र महान सृष्टिको नानाविधता र कृतज्ञ मानिसहरूमाथि उहाँले बर्साउनु भएको आत्मिक र भौतिक वरदानहरू देखेर ईश्‍वर प्रति आकर्षित्‌ हुने हृदय बाट श्रद्धा उत्पन्‍न हुन्छ। हो, ईश्‍वरीय भक्‍तिको अभ्यास गर्ने हामी प्रत्यकले भजन संग्रहको लेखकले भजन संग्रह १०४:१ मा भने झैं, एसो भन्‍न सक्ने छौं: “हे मेरो आत्मा, यहोवालाई धन्यको भन। हे यहोवा मेरो परमेश्‍वर, तपाईं अति महान हुनुहुन्छ। तपाईंले आदर र महिमाको पोशाक पहिरिनुभएको छ।” (दी न्यु वर्ल्ड ट्रान्सलेशन).

६.(क) यहोवाका उपासकहरू र मसीहीजगतका गिरजाघरहरूमा गयेर बसी मात्र दिनेहरूको बीच के भिन्‍नता छ? (ख) पावलले रोमी ११:३३, ३४ मा के भने र यसलेगर्दा के प्रश्‍नहरू उठछन्‌?

^६ हाम्रो ईश्‍वरीय भक्‍ति व्यक्‍त गर्नु पर्छ र यो सो कामहरू द्वारा व्यक्‍त हुन्छ। यस सम्बन्धमा, साँचो परमेश्‍वर, यहोवाका उपासकहरू, मसीहीजगतका बिलाउँदै गएका गिरजाहरूको बेञ्चमा बस्ने सदस्यहरू भन्दा धेरै नै बेग्लै छन्‌। पृथ्वीका धेरै जसो मानिसहरूकालागि, धर्म भन्‍नेकुरो—तिनीहरूको धर्म छ भने पनि—एउटा औपचारिकता हो। एका तिर, आफ्नो वरिपरिको भ्रष्ट संसार सँग मिल्ने जीवन शैली बिताउन र अर्को तिर पवित्र देखा पार्नकालागि, धर्म एउटा कपटवेशमात्र हो। तिनीहरूलाई, परमेश्‍वर को हुनुहुन्छ भन्‍ने कुरा सम्म थाह छैन। यस प्रकारका मानिसहरूले प्रेरित्‌ १७:३२ मा उल्लेखित्‌, एउटा “अन्जान परमेश्‍वरको” उपासना गर्ने एथेनीहरूलाई पावलले भनेका यी शब्दहरूमा ध्यान दिन अत्यन्त आवश्‍यक छ: “जसको भक्‍ति तपाईंहरू नजानीकन गर्नुहुन्छ, उहाँकै विषयमा म तपाईंहरूलाई बताउँछु।” र यो तेजस्वी परमेश्‍वरको विषयमा पावलले रोमी ११:३३, ३४ मा एसो भन्‍नु भयो: “अहा! परमेश्‍वरको बुद्धि र ज्ञान, दुवैका सम्पत्ति कस्तो गहीरो छ! उहाँका इन्साफ कति अगम छ र उहाँका मार्ग अभेद्य छ! किनभने ‘प्रभुको [यहोवाको, दी न्यु वर्ल्ड ट्रान्सलेशन] मनलाई कसले जानेको छ? अथवा उहाँको सल्लाहकार को भएको छ?’” यसकारण, हामीले परमेश्‍वरका मार्गहरू कसरी थाह लगाउन सक्छौं? ‘ईश्‍वरीय भक्‍तिको पवित्र रहस्य’ बारे शिक्षा लिएर। तर त्यो हामी कसरी गर्ने?

७. यो “ईश्‍वरीय भक्‍तिको पवित्र रहस्य निश्‍चयनै महान छ” भन्‍नु किन उचित्‌ छ?

^७ १ तिमोथी ३:१५ मा, परमेश्‍वरको घरबारलाई “जीवित परमेश्‍वरको मण्डली र सत्यको खामा र समर्थक” कहलाइएकोछ। यस घरबार भित्र बस्ने, परमेश्‍वरका सेवकहरूको जिम्मेवारीको वर्णन, प्रेरित्‌ पावलले सर्व प्रथम गर्नु हुन्छ। त्यस पछि, उहाँले, १६ वाँ पदमा यो एउटा कुरा थप्नु हुन्छ: “भक्‍तिको रहस्य महान छ।” हो, यो रहस्य महान छ, किनभने यो रहस्य फुकाल्न, ईश्‍वरीय-भक्‍ति वास्तवमा के हो भनेर प्रदर्शन गर्न र साँचो उपासनमा यसको कस्तो महत्वपूर्ण स्थान छ भनेर सबैलाई देखाउन, यहोवाले आफ्नो एकमात्र पुत्र पठाउनु भयो। ईश्‍वरीय भक्‍तिको यो पवित्र रहस्य येशूको पार्थिव जीवन शैलीमा प्रदीप्त भएको छ। यहोवाका सबै प्रेमीहरूले ख्रीष्टलाईनै आफ्नो विश्‍वास र जीवनको आधार बनाउनु पर्छ किनभने उहाँ ईश्‍वरीय-भक्‍तिको आदर्श हुनुहुन्छ। तर येशूले ईश्‍वरीय-भक्‍तिको पवित्र रहस्य कसरी खोल्नु भयो?

छ कणहरू

८. (क) १ तिमोथी ३:१६ मा पावलले वर्णन गरेको पवित्र रहस्यका छ कणहरू के हुन्‌? (ख) प्रकाश हुनु भएको “उहाँ” को हुनुहुन्छ?

^८ ईश्‍वरीय प्रेरणा द्वारा, पावलले यो प्रश्‍नको उत्तर दिनुहुन्छ। यहाँ, १ तिमोथी ३:१६ मा, उनले यो पवित्र रहस्यको ६ कणहरूको वर्णन गर्दै एसो भनेकोछ: “उहाँ [१] शरीरमा प्रकट हुनु भयेको थियो, [२] आत्मामा धर्मी ठहरिनु भयो, [३] स्वर्गदूतहरूबाट देखिनुभयो, [४] जाति जातिहरूमा प्रचारिनु भयो, [५] संसारभरि विश्‍वास गरिनुभयो, [६]महिमामा माथि ग्रहण हुनुभयो।” प्रकट हुनु भएको “उहाँ” को हुनुहुन्छ? अवश्‍य, परमेश्‍वरको इच्छा गर्न आउनुहुने, उहाँ, प्रतिज्ञा गरिएको बीउ, येशू हुनुहुन्छ। पवित्र रहस्यको उहाँ केन्द्र हुनुहुन्छ र यसैले गर्दा यो रहस्य वास्तवमा महान भएको छ।

९. १ तिमोथी ३:१६ मा “परमेश्‍वर शरीरमा प्रकट हुनुभयो” भनेर पढ़नु किन गलत हो र यसकालागि के प्रमाण छ?

^९ त्रीएकमा विश्‍वास गर्नेहरूले पवित्र रहस्यको अर्थलाई अलमल्याउने कोशिश गर्दै, १ तिमोथी ३:१६ को “उहाँ” स्वयं परमेश्‍वर हुनुहुन्छ भन्छन्‌। तिनीहरूको यो विचार किंग जेम्स ट्रानसलेशनमा अधारित्‌ छ जसमा “परमेश्‍वर शरीरमा प्रकट हुनु भयो” भनेर अनुवाद गरिएको छ। तर सबै भन्दा विश्‍वास योग्य युनानी हस्तलिपिहरूमा यो पद कसरी लेखिएको छ? ती सबै हस्तलिपिहरूमा “परमेश्‍वर” शब्द प्रयोग गर्नुको सट्टा, “उहाँ” शब्द प्रयोग गरेको पाइन्छ। यो पदमा “परमेश्‍वर” शब्द राख्नु, लेखनदासहरूको एउटा गलती थियो भनेर, आज धेरै पाठ्य समालोचकहरूले स्वीकारेका छन्‌। यसैकारण, अमेरिकन स्टेन्डर्ड भर्सन, दी न्यु इङ्‌गलीश बाइबल र न्यु वर्ल्ड ट्रानसलेशन जस्ता, हाल सालैमा गरिएका अनुवादहरूमा, यो ठीक अनुवाद पाउँदछौं: ‘उहाँ [अथवा, उहाँ जो] शरीरमा प्रकट हुनु भयो।’ ‘शरीरमा’ परमेश्‍वर प्रकट हुनु भएको थिएन। प्रकट हुनु हुने, परमेश्‍वरको प्रिय पुत्र र प्रथम सृष्टि हुनुहुन्‌ थियो, जस बारे प्रेरित्‌ यहून्‍नाले यस प्रकार लेखे: “अनि वचन देह हुनुआयो, र हाम्रा बीचमा अनुग्रह र सत्यले पूर्ण भई बास गर्‌यो, औ हामीले उहाँको महिमा, पिताबाट आउनुभएको एकलो पुत्रको जस्तो महिमा देख्यौं।”—यूहन्‍ना १:१४.

“शरीरमा प्रकट हुनुभएको थियो”

१०. (क) पवित्र रहस्यको प्रथम चिन्ह, येशूको बप्तिस्मामा कसरी प्रत्यक्ष भयो? (ख) येशू किन आखिरी आदम हुनु भयो?

^१० येशूले बप्तिस्मा लिनु भएको बेलामा, पवित्र रहस्यको प्रथम खण्ड प्रकाश भयो: येशू, परमेश्‍वरको अभिषिक्‍त पुत्र भएर, “शरीरमा प्रकट हुनुभयो”। यहोवा परमेश्‍वरले स्वर्गबाट आफ्नो पुत्रको जीवन मरियमको गर्भमा सारि दिनु भयो र येशू एउटा सिद्ध मानिसको रूपमा जन्मनु भयो। अर्थात्‌, १ कोरिन्थी १५:४५-४७ ले भने झैं, येशू, दोस्रो अथवा “अन्तिम” आदम—प्रथम आदमको बराबर हुनु सक्ने एउटा सिद्ध मानव प्राणी, हुनु भयो। के को लागि? सर्वप्रथम, १ तिमोथी २:५, ६ अनुसार, “अन्तिम आदम” अर्थात्‌, “ख्रीष्ट येशू, जो मानिस हुनुहुन्छ . . . उहाँले सबैको छुटकाराको मोलको निम्ति आफैलाई सुम्पिदिनुभयो।” एउटा सिद्ध मानव बलिदानको यो कानूनी आधारमा, येशूले, उहाँको राज्यमा उहाँसँग साझे हकवालाहुने १४४,००० मानिसहरू सँग, नया वाचा बाँधनु हुन्छ।—प्रकाश १४:१-३.

११. येशूको छुटकाराको बलिदानको लाभ, कस-कसले उठाउँने छन्‌?

^११ येशूको यो बलिदानको मृत्यु बाट, के अरूहरूले पनि लाभ उठाउन सक्लान? हो, लाभ उठाउनेछन्‌! १ यूहन्‍ना २:२ मा एसो भनिएकोछ: “[येशू ख्रीष्ट] हाम्रा पापको निम्ति प्रायश्‍चित्‌ हुनुहुन्छ। औ हाम्रा निम्ति मात्र होइन, [यूहन्‍ना जस्ता अभिषिक्‍त मसीहीहरूका निम्ति मात्र होइन] तर सबै संसारका निम्ति पनि।” यसकारण येशूको छुटकाराको बलिदानबाट उठने लाभहरू, १४४,००० अभिषिक्‍त मसीहीहरूमा मात्र सीमित्‌ हुनेछैनन्‌। यी लाभहरू, मानिस जातिको सर्म्पूण परिवारले उठाउन सक्नेछन्‌। येशूले दिनुभएको छुटकाराको बलिदानमाथि आफ्नो विश्‍वासको आधारमा, आज बाँचेको “ठूलो भीड़” र पृथ्वीमा पुनरूत्थान भएर आउने लाखौंले अनन्त जीवन पाउनेछन्‌। प्रकाश ७:९, १० मा भविष्यद्वाणी गरे झैं, ठूलो भीड़ले, थुमा अर्थात्‌ येशू ख्रीष्टको बगेको रगतमा विश्‍वास गर्दै, आ-आफ्ना वस्त्र धोएर, सेता पारेका छन्‌। तिनीहरू धर्मी ठहरिएका हुनाले, परमेश्‍वर सँग मित्रतामा छन्‌। आनन्दपूर्वक, तिनीहरू पवित्र रहस्यका विभिन्‍न कणहरूबारे सिक्दै, येशूको उदाहरण बमोजिम, ईश्‍वरीय भक्‍ति प्रदर्शित्‌ गर्छन्‌!

अन्य कणहरू

१२. येशू, “आत्मामा धर्मी” कसरी ठहरिनु भयो?

^१२ १ तिमोथी ३:१६ मा दिइएको दोस्रो चिन्हको विषयमा के भन्‍नु छ? येशू “आत्मामा धर्मी ठहरिनु भयो।” तर कसरी? यहोवाले आफ्नो समग्रता-कायम राख्ने पुत्रलाई मरेको अवस्था बाट बिउँताउनुभएर। यस कार्य द्वारा, येशू सम्पूर्णतया धर्मी हुनुहुन्छ र अझ उच्च ओहदाको योग्य हुनुहुन्छ भनेर परमेश्‍वरले घोषणा गर्नु भएको बराबर भयो। रोमी १:४ मा भने झैं, येशू, “पवित्रताको आत्माअनुसार मुर्दाबाट पुनरूत्थान हुनुभएकोले शक्‍तिसँग परमेश्‍वरका पुत्र ठहरिनु भयो।” यो कुरालाई पुष्टि पत्रुसले पनि आफ्नो पहिलो पत्रको तेस्रो अध्यायको १८ वाँ पदमा, एसो भन्‍नु भएकोछ: “हामीलाई परमेश्‍वरकहाँ ल्याउनलाई ख्रीष्टले पनि शरीरमा मारिएर तर आत्मामा जीवित भएर, अधर्मीहरूका निम्ति धर्मी भएर, पापहरूका निम्ति एक चोटि दुःख भोग्नुभयो।” के येशूको ईश्‍वरीय भक्‍तिको उदाहरणले तपाईंलाई परमेश्‍वर तर्फ लैजादैं छ?

१३. आफ्नो पुनरूत्थान पश्‍चात्‌, येशू कुन स्वर्गदूतहरू कहाँ देखा पर्नुभयो र तिनीहरूलाई येशूले कस्तो समाचार प्रचार गर्नु भयो?

^१३ १ तिमोथी ३:१६ अझ पढ़दै जाँदा, पावलले पवित्र रहस्यको तेस्रो चिन्हलाई यी शब्दहरूमा सङ्‌केत गरेको पाउँदछौं: “येशू . . . स्वर्गदूतहरूबाट देखापर्नुभयो।” यी स्वर्गदूतहरू को हुन्‌? “आत्मामा जीवित” हुनुभएको येशू बारे, पत्रुसले, १ पत्रुस ३:१९, २० मा यस प्रकार लेख्नु भएको छ: “जुन आत्मामा उहाँ जानुभएर झ्यालखानाका आत्माहरूलाई पनि प्रचार गर्नु भयो। तिनीहरू ती बितेका समयमा अट्टेरी भएका थिए, जब नूहको समयमा जहाज तयार होउञ्जेल परमेश्‍वरको सहनशीलता पर्खिरहेको थियो।” यहूदा ६ अनुसार, यी आत्माहरू, “आफ्नो मर्यादामा नरहने, तर आफ्ना [स्वर्गमा] घर-वार छोड़ने स्वर्गदूतहरू” थिए। तिनीहरूले स्त्री जाति सँग सम्भोग गर्नकालागि, मासु र रगतका शरीर धारण गरे। तर जब जलप्रलय आउँदा, तिनीहरू बाध्य भएर फेरि आत्मिक संसारमा गए, त्यति खेर तिनीहरू टारटरसमा अथवा एउटा अत्यन्त नीच अवस्थामा फालिए। (२ पत्रुस २:४) आफ्नो पुनरूत्थान पश्‍चात्‌, येशूले यी दूतहरूलाई प्रचार गर्नु भयो। तर के उहाँले तिनीहरूलाई एउटा मुक्‍तिको समाचार प्रचार गर्नु भयो? अवश्‍य होइन! ईश्‍वरीय भक्‍तिको विरोध गर्ने, तिनीहरूको दुष्टताको येशूले भर्त्सना गर्नु भयो। आज परमेश्‍वरका जनहरू मध्य, अनैतिकता सँग खेल्ने कोही छन्‌ भने, तिनीहरूका लागि, ती स्वर्गदूतहरू माथि घोषणा गरिएको न्याय दण्ड, एउटा चेताउनी हो!

१४. येशू “जाति जातिहरूमा प्रचारिनु” कसरी भयो?

^१४ १ तिमोथी ३:१६ को चौथो चिन्ह अनुसार, येशू “जाति, जातिहरूमा प्रचारिनुभयो।” यस चिन्हको पूर्ति कसरी भयेको छ? आफू गिरफ्तार हुनु भन्दा केही समय अघि मात्र, येशूले आफ्ना चेलाहरूलाई एसो भन्‍नु भएको थियो: “साँचो, साँचो म तिमीहरूलाई भन्दछु, जसले मलाई विश्‍वास गर्दछ, त्यसले मैंले गरेका काम पनि गर्नेछ, औ तीभन्दा ठूला काम पनि गर्नेछ, किनभने म पिता कहाँ जान्छु।” (यहून्‍ना १४:१२) यसको केहि समय पश्‍चात्‌, येशूले आफ्ना चेलाहरूमाथि, पेन्तीकोसको दिनमा, पवित्र आत्मा खन्याउनु भयो र “येशूलाई परमेश्‍वरले बिउँताउनु भयो” भन्‍ने अद्‌भूत सुसमाचार यहूदीहरूको माझमा प्रचारिनु थालियो। यस पछि सामरियाका मानिसहरूले पनि परमेश्‍वरको वचन ग्रहणा गरे र पवित्र आत्मा पाए। (प्रेरित्‌ २:३२; ८:१४-१७) ई. स. ३६ सालमा, पत्रुसले कर्नीलियस र उसको घरमा जम्मा भएका अन्यजातिका मानिसहरूलाई पनि प्रचार गरे। यस प्रकार, येशूको विषयमा सुसमाचार “जाति, जातिहरूमा प्रचारिनु” थालियो अर्थात्‌, यहूदी बाहेक अरू जातिका मानिसहरू मध्य पनि र तिनीहरू पनि पवित्र आत्माले अभिषिक्‍त भए।

१५. प्रथम शताब्दिका मसीहीहरूले ईश्‍वरीय भक्‍तिको पवित्र रहस्य बारे राम्रो सँग ज्ञान प्राप्त गरेका थिये भनेर के प्रमाण छ?

^१५ प्रेरित्‌ १२:२४ मा दिइएको वर्णन अनुसार, “प्रभुको [यहोवाको, दी न्यु वर्ल्ड ट्रान्सलेशन] वचन बढ़दै बढ़दै फैलिएर गयो।” उत्तरी ग्रीसमा, प्रेरित्‌ १७:६ को उल्लेख अनुसार, त्यस बेलाका विरोधीहरू, आजका विरोधीहरू झैं, एसो भन्दै चिच्याएछन्‌: “संसारलाई उलट पुलट पार्नेहरू यता पनि आएछन्‌।” ३० वर्ष भित्र, पावलले रोम बाट एसो भनेर लेख्न सके: “सुसमाचर . . . स्वर्गमनि भएका सारा सृष्टिमा प्रचारियो।” (कलस्सी १:२३) त्यस बेलाका मसीहीहरूले ईश्‍वरीय भक्‍तिको पवित्र रहस्य राम्रो सँग बुझेका थिये। र कति जोशिला भएर, तिनीहरूले त्यसको प्रयोग गरिरहेका थिये! राज्य प्रचार भइरहेको यो अन्तको समयमा, हामी पनि त्यो पवित्र रहस्य सिखौं र त्यसलाई प्रयोगमा ल्याउँने गरौं!

१६. पवित्र रहस्यको पाँचवाँ चिन्ह के थियो र के गतिविधि द्वारा यो स्पष्ट सँग देखियो?

^१६ प्रथम शताब्दिको प्रचारको प्रतिक्रियाले गर्दा, १ तिमोथी ३:१६ को पवित्र रहस्यको पाँचवाँ चिन्ह, विशेष रूपमा स्पष्ट भयो। येशू, “संसारभरि विश्‍वास गरिनुभयो।” पावल र तिमोथी जस्ता जोशिला प्रचारकहरूका मसीही ईश्‍वरीय भक्‍तिलेगर्दा यो हुन सक्यो। तिनीहरूले सुसमाचार एसिया माइनर, यूरोप, शायद स्पेन सम्म, त्यो बप्तिस्मा लिएको एथियोपीको मुख द्वारा, पूर्वीय अफ्रीका सम्म पुगेको हुनु सक्छ, जब पत्रुस चाहिं बेबिलनमा सेवा गरि रहेका थिए।

१७. वर्तमान आधुनिक संसारका समस्त भागमा येशूलाई विश्‍वास किन गरिन्छ?

^१७ अब हाम्रा दिन बारे के भन्‍न सकिन्छ? १९१९ साल देखिन्‌, शेष अभिषिक्‍त जनहरू ईश्‍वरीय भक्‍तिका आदर्श भएर हिड़ेकाछन्‌। येशूले बसाल्नु भएको विश्‍वासको जगलाई, यी अभिषिक्‍त जनहरूले आफ्नो दृढ़ आधार बनाएकाछन्‌। विशेषगरि १९३५ देखिन्‌, यिनीहरूले एउटा ठूलो भीड़लाई एकत्रित पार्न थालेकाछन्‌ र यो ठूलो भीड़का सदस्यहरूले “महा सङ्‌कष्ट” पार गरेर, पार्थिव प्रमोदवनमा अनन्त जीवनको आनन्द उठाउने रमाइलो आशा राखेकाछन्‌। (प्रकाश ७:९, १४) हो, येशूमा केन्द्रीत सुसमाचार, वर्तमान आधुनिक संसारको समस्त भागहरूमा प्रचार गरिएको छ। ईश्‍वरीय भक्‍ति साथ, यहोवाका ३,७००,००० साक्षीहरू आज प्रचार गरिरहेकाछन्‌ र सारा संसार भरि प्रगति भइरहेछ!

१८. येशू “महिमामा माथि ग्रहण” कसरी हुनु भयो?

^१८ त्यो पवित्र रहस्यको अझ एउटा चिन्ह बाँकी नै छ, र त्यो हो, छैठौं भाग: येशू “महिमामा माथि ग्रहण हुनुभयो।” आत्मामा जीवित हुनु भएपछि ४० दिन सम्म, येशू, मानिसको रूपमा आफ्ना चेलाहरूकहाँ देखा पर्नुभयो र तिनीहरूसँग “परमेश्‍वरको राज्यको विषयमा कुरा” गर्नु भयो। यस पश्‍चात्‌, उहाँ स्वर्ग जानु भयो। (प्रेरित्‌ १:३, ६-९) यस प्रकार, यूहन्‍ना १७:१-५ मा उल्लेखित्‌, उहाँको यो प्रार्थना पुरा भयो: “हे पिता, . . . पुत्रको महिमा गर्नुहोस, र पुत्रले तपाईंको महिमा गरोस्‌। . . . मैले पृथ्वीमा तपाईंको महिमा गरें . . . । अब हे पिता, मेरो जुन महिमा संसार हुनुभन्दा अघि तपाईंसित थियो, त्यसले मलाई तपाईं आफैसित महिमा गर्नुहोस्‌।”

१९. येशू स्वर्गमा फर्कनु हुँदा, त्यहाँ अवश्‍य के भएको हुनुपर्छ?

^१९ येशू स्वर्गमा फर्केर जानु हुँदा, त्यहाँ कति ठूलो आनन्द मनाइएको हुनुपर्छ! धेरै अघि, यहोवाले पृथ्वी सृजनु हुँदा, “स्वर्गीय जनहरू रमाहटले कराए।” (अय्यूब ३८:७) तर यहोवाको सार्वभौमिकताको भक्‍त संरक्षक फेरि तिनीहरूको माझमा फर्केर आउँनुहुँदा, तिनीहरू अझ कति आनन्दित भएको हुनुपर्छ!

२०. येशूले यस प्रकारको उच्च नाउँ किन प्राप्त गर्नु भयो र पृथ्वीमा हुनुहुँदा उहाँले के गर्नुभयो?

^२० हिब्रु १:३, ४ मा, विजयी येशूको विषयमा पावलले एसो भन्‍नु हुन्छ: “पापको शुद्धि गर्नु . . . [भए पछि, उहाँ] उच्च स्थानमा महामहिमको दाहिने बाहुलीपट्टि विराजमान हुनुभयो। उहाँ स्वर्गदूतहरूभन्दा त्यत्तिनै उत्तम ठहरिनुभएको छ, जत्ति कि उहाँले तिनीहरूभन्दा उत्तम नाउँ अधिकारमा प्राप्त गर्नुभएको छ।” अधार्मिक्‍ता माथि विजय प्राप्त गर्नु भएको हुनाले, ख्रीष्टले त्यो नाउँ पाउँनु भयो। परमेश्‍वरको यो पुत्रले साँच्चैनै, पृथ्वीमा ईश्‍वरीय भक्‍तिको मार्गलाई ज्योतिर्मय पारि दिनुभयो। अनन्त जीवन पाउने अरू सबैकालागि पनि उहाँले एउटा आदर्श छाड़नु भयो। स्वर्गमा, परमेश्‍वरको दाहिने हात तर्फ येशू महिमित्‌ हुनुभएपछि, ईश्‍वरीय भक्‍तिको पवित्र रहस्य, त्यसका सम्पूर्ण चिन्हहरू समेत, खोलियो। (w90 1/15)

ईश्‍वरीय भक्‍तिको पवित्र रहस्य सिक्ने

“तिमीहरूले उहाँको पाइलामा टेकेर हिंड़नलाई एक उदाहरण तिमीहरूलाई दिएर ख्रीष्टले पनि तिमीहरूका निम्ति दुःख भोग्नुभयो।”—१ पत्रुस २:२१.

१. ‘ईश्‍वरीय भक्‍तिको पवित्र रहस्य’ बारे यहोवाको उद्देश्‍य के थियो?

“ईश्‍वरीय भक्‍तिको यो पवित्र रहस्य” अब रहस्य रहेन! (१ तिमोथी ३:१६) यो रहस्य, झुटो धर्मका, त्रीएक जस्ता, सधैं गुप्त रहने रहस्यहरू भन्दा कति फरक छ! ती रहस्यहरूलाई कसैले पनि बुझ्न सक्दैनन्‌। तर, येशूको व्यक्‍तित्व द्वारा प्रकट भएको पवित्र रहस्यलाई, ज्यादा से ज्यादा विस्तृत रूपमा प्रचार होस्‌ भन्‍ने उद्देश्‍य, यहोवाले रच्नु भएको छ। येशू स्वयं, परमेश्‍वरको राज्यको जोशिलो प्रचारक हुनु भएर, उहाँ एउटा सर्वश्रेष्ठ उदाहरण हुनुभएकोछ। उहाँले प्रचार गर्नु भएको समाचार र उहाँको शिक्षा दिने विधिबाट हामी धेरै कुरा सिक्न सक्ने छौं।

२. येशूको सेवकाईलाइ, छुटकाराको बलिदान भन्दा ठूलो महत्व, किन दिइएको छ? (मत्ती २०:२८)

^२ अब हामी, येशू “शरीरमा प्रकट हुनुभएको” कुरालाई अझ बढ़ी ध्यान दिउँ। (१ तिमोथी ३:१६) मत्ती २०:२८ मा, येशू, “सेवा पाउनालाई होइन, तर सेवा गर्न र धेरैको उद्धारको निम्ति आफ्नो प्राण दिनालाई आयो” भनेर लेखिएको छ। यहाँ, उहाँको छुटकाराको बलिदानले भन्दा, उहाँको सेवाले बढ़ी प्राथमिकता पाएको छ। किन? अदनको बगैंचामा, धूर्त सर्प द्वारा, मानिस जाति माथि यहोवाको सार्वभौमिकताको न्यायोचित अधिकारलाई चुनौती दिइयो। अर्थात्‌, परमेश्‍वरको सृष्टिनै त्रुटिजनक छ र परीक्षामा पर्दा, कुनै मानिस पनि परमप्रधान प्रति वफादार रहिरहने छैन भनेर आरोप लगाइयो। (अय्यूब १:६-१२; २:१-१० तुल्ना गरेर हेर्नुहोस्‌) तर एक जना सिद्ध मानिस, “आखिरी आदम” हुनु भएर, येशूले दोष रहितको आफ्नो सेवकाई द्वारा, शैतानलाई दुष्ट, मिथ्याभाषी साबित गर्नु भयो। (१ कोरिन्थी १५:४५) यस बाहेक, यहोवाको सार्वभौमिकताको विजय मनाउदै, परमेश्‍वरको “मुख्य कर्ता र मसीहा” हुनु भएर, “सारा पृथ्वीलाई धार्मिकतामा न्याय गर्न”, येशूले आफ्नो योग्यताको पनि प्रमाण दिनु भयो।—प्रेरित्‌ ५:३१; १७:३१.

३. येशूले शैतानको चुनौतीलाई पूर्णतया खण्डन कसरी गर्नुभयो?

^३ शैतानले गरेको निन्दा र चुनौतीलाई येशूले सम्पूर्णतया झुटो साबित गरिदिनु भयो! सारा इतिहासमा, कुनै मानिसले पनि यति भक्‍त भएर—ठट्टा, कोर्रा र मानसिक र शारिरिक क्लेश सहँदै— परमेश्‍वरको सेवा गरेको थिएन। परमेश्‍वरको पुत्र भएको हुँदा, ख्रीष्टले ईश्‍वर-निन्दाको अभियोग सहनु पर्‌यो। तर यी सबै क्लेशहरू बाहेक, एउटा क्रुर र अपमानजनक मृत्यु भोग्नु पर्दा पनि, उहाँ आफ्नो पिता प्रतिको भक्‍तिमा दृढ़ र अटल हुनुहुन्‌ थियो। येशू आज्ञाकारी हुनुभएर, “काठको मृत्यु सम्मै आफूलाई होच्याउनुभयो। त्यसैकारणले पनि परमेश्‍वरले उहाँलाई अति उच्च पार्नुभयो, र उहाँलाई त्यो नाउँ प्रदानगर्नुभयो जो हरेक नाउँ भन्दा उच्च छ।” भनेर पावलले, फिलिप्पी २:८, ९ मा लेख्नु भएको छ। येशूले विषालु मिथ्याभाषी, शैतानको असली रूपको पर्दा फास गरि दिनु भयो!

४. येशू, संसारमा सत्यको साक्षी दिन आउनु भएको हो भनेर उहाँले पिलातुसलाई किन भन्‍न सक्नुभयो?

^४ यसकारण, केही वर्ष सम्म मात्रको जोरदार प्रचारको अन्तमा, येशूले पिलातुसलाई, निर्भयतासाथ यो गवाही दिन सक्नु भयो, “म राजा हुँ भनी तपाईंनै भन्‍नुहुन्छ। सत्यको निम्ति गवाही दिन म यस संसारमा आएको हुँ। र यसैको निम्ति म जन्मेको हुँ। सत्य जो छ, हरेकले मेरो सोर सुन्छ।” (यूहन्‍ना १८:३७) पेलेस्टाईन भरि, राज्यको सुसमाचार प्रचार गर्ने काममा, येशूले अत्युत्तम ईश्‍वरीय भक्‍ति प्रदर्शन गर्नुभयेको थियो। उहाँले आफ्ना चेलाहरूलाई पनि जोशिला प्रचारकहरू हुने प्रशिक्षण दिनु भयो। उहाँको उदाहरणले आज पनि हामीलाई उहाँको पाइलामा हिड़ने कस्तो प्रेरणा दिइ रहेछ!

हाम्रा महान आदर्शबाट शिक्षा प्राप्त गर्न

५. येशूलाई ध्यानपूर्वक हेरेर, हामी ईश्‍वरीय भक्‍ति बारे के सिक्न सक्छौं?

^५ ईश्‍वरीय भक्‍ति साथ यहोवाको इच्छा गरेर, हामीले पनि शैतानलाई झुट साबित गर्न सक्ने छौं। हामीले जस्तै परीक्षाहरूको सामना गर्नु परेतापनि, ती कहिले पनि, येशूले अनुभव गर्नु भएको क्लेश र अपमानको बराबर हुनेछैन। यसकारण, हामी आफ्ना आदर्शबाट शिक्षा लिने गरौं। हिब्रू १२:१, २ मा दिइएको प्रोत्साहनमा भने झैं, हाम्रा सामने राखिदिएको दौड़ धीरजसँग दौड़ौं औ “विश्‍वासका कर्त्ता र सिद्ध तुल्याउनुहुने येशूलाई हेरौं।” ईश्‍वरीय भक्‍तिको जाँचमा, आदम असफल भयो, तर सबै जाँचहरूको सफलतासाथ सामना गर्न सक्ने पृथ्वीको एक जना मानिस, येशू हुनु भयो। मृत्यु सम्मै, उहाँ “पवित्र, निष्कपट, निष्कलङ्‌क, पापीहरूबाट अलग” हुनु भयो। (हिब्रू ७:२६) दोषरहितको समग्रता साथ, उहाँले आफ्ना शत्रुहरूलाई एसो भन्‍न सक्नु भयो, “तिमीहरूमध्य कसले मलाई पापको दोष लगाउनसक्छ?” येशूले शैतानको चुनौतीलाई त्यसैमाथि फाल्दै, यो घोषणा गर्नुभयो: “संसारको शासकको . . . ममाथि केही अधिकार छैन।” [न्यु वर्ल्ड ट्रानस्लेशन] र उहाँलाई विश्‍वासघात गरेर पक्राउमा पार्न अघि, चेलाहरूलाई दिनु भएको अन्तिम भाषणको आखिरमा उहाँले एसो भन्‍नु भयो: “ढाढ़स गर, मैले संसारलाई जितेको छु।”—यूहन्‍ना ८:४६; १४:३०; १६:३३.

६. (क) मानिस जातिलाई कुन प्रकारको विश्रामको खाँचो छ भन्‍ने कुरा, येशूलाई किन थाह छ? (ख) येशूले कुन हद सम्म ईश्‍वरीय भय प्रकट गर्नुभयो?

^६ यहाँ पृथ्वीमा, शरीरमा प्रकट हुनुहुँदा, “स्वर्गदूतहरू भन्दा केही कम” हुनु भएर, मानिसहुनुको अर्थ के हो भन्‍ने कुरा अनुभव गर्नु भयो। (हिब्रू २:७) उहाँ मानव कमजोरीहरू सँग परिचित हुनुभयो र यसलेगर्दा, हजार वर्षकालागि, मानिसजातिको राजा र न्यायाधीश हुने उहाँ योग्यको हुनुभयो। “हे सबै मेहनत गर्ने र बोझले दबिएका हो! मकहाँ आओ, म तिमीहरूलाई विश्राम दिनेछु।” भन्‍नुहुने परमेश्‍वरको यो पुत्रलाई, मानिस जातिको निम्ति कुन प्रकारको विश्राम आवश्‍यक छ, राम्रो सँग थाहा छ। (मत्ती ११:२८) हिब्रू ५:७-९ ले हामीलाई एसो भन्दछ, “आफ्ना शरीरका दिनमा जसले बेसरी कराई, आँसु बगाएर उहाँलाई मृत्युबाट बचाउन सक्नुहुनेसँग प्रार्थना र अन्तरबिन्ती गर्नुभयो, र उहाँको भक्‍तिको भयले गर्दा उहाँको सुनाइभयो। उहाँ पुत्र हुनुहुन्थ्यो, तापनि उहाँले भोग्नुभएको शासनाद्वारा उहाँले आज्ञा पालन गर्न सिक्नुभयो। औ सिद्ध तुल्याईकन उहाँको आज्ञा मान्‍नेहरू सबैका निम्ति उहाँ अनन्त मुक्‍तिको कर्त्ता हुनुभयो।” घृणास्पद सर्पबाट “कुर्कुच्चोमा” चोट खाए झैं, मानव मृत्युको अनुभव गर्दै धीरजधरनु परेतापनि, येशू डगमगाउनु भएन। (उत्पत्ति ३:१५) येशूले जस्तै, हामीले पनि, मृत्यु सम्मै भएतापनि, ईश्‍वरीय भय प्रदर्शन गरौं। यहोवाले हाम्रा बिन्तीहरू सुनिदिनुहुनेछ र हामीलाई मुक्‍ति प्रदान गर्नुहुनेछ भनेर हामी निश्‍चिन्त होउँ।

‘धार्मिकताका लागि बाँचौं’

७. १ पतरस २:२१-२४ को अनुसार येशू कुन तरिकाले हाम्रो निम्ती जीवनु भयो, अनि कसरी उसको जीवन तरिकाले हामीलाई प्रभाव पार्दछ?

^७ शरीरमा प्रकटहुनु भएको बेलामा, येशूले ईश्‍वरीय भक्‍तिको पवित्र रहस्य, वफादारीसाथ उघार्नु भयो। १ पत्रुस २:२१-२४ मा एसो भनेको पाउँदछौं: “यसैको निम्ति तिमीहरू बोलाइएका हौ। किनभने तिमीहरूले उहाँको पाइलामा टेकेर हिड़नालाई एक उदाहरण तिमीहरूलाई दिएर ख्रीष्टले पनि तिमीहरूका निम्ति दुःख भोग्नुभयो, जसले नता कुनै पाप गर्नुभयो, न उहाँको मुखमा छलको कुरा पाइयो। जसले गाली खाएर आफूले फेरि गाली गर्नुभएन। दुःख भोगेर धम्काउनुभएन, तर धर्मसँग इन्साफ गर्नेकहाँ आफैलाई सुम्पिदिनुभयो। हामी पापको लेखि मरेर धार्मिकताको लेखि बाँचौ भनि उहाँले आफ्नै शरीरमा हाम्रो पाप काठमाथि बोक्नुभयो। उहाँकै चोटहरूमा तिमीहरू निको भयौ।” येशूको उदाहरणमा ध्यान दिंदा, हामीले पनि ईश्‍वरीय भक्‍तिको पिछा गर्ने, समग्रता पालन गर्ने र उहाँ झैं, धार्मिकताको लेखि बाँच्ने, प्रेरणा पाउँछौं!

८. येशू झैं, हामी पनि धार्मिकताका निम्ति कसरी बाँच्न सक्छौं?

^८ येशू वास्तवमा धार्मिकताको लेखि बाँच्नु भयो। भजन ४५:७ मा उहाँको विषयमा यो भविष्यद्वाणी भएको थियो: “तपाईंले धार्मिकता मन पराउनुभएको छ र दुष्टताको घृणा गर्नु भयेको छ।” येशूमा यी शब्दहरूको प्रयोग गर्दै, प्रेरित्‌ पावलले हिब्रू १:९ मा एसो भन्‍नु भयो: “तपाईंले धार्मिकतालाई प्रेम गर्नुभएको छ, र अधर्मलाई घृणा गर्नुभएको छ।” ईश्‍वरीय भक्‍तिको यो पवित्र रहस्य हामीले बुझेको हुनाकारण, हामीले पनि सधैं, येशूले झैं, धार्मिकताको प्रेम गरौं र खराबीको घृणा गरौं। मसीही नैतिकता, जसमाथि आज शैतानको संसार बाट ठूलो आक्रमण आइपरेको छ र, परमेश्‍वरको सङ्‌गठन भित्रकाहरू र बाहिरकाहरूसँगको हाम्रो व्यवहारमा, यहोवाका सही सिद्धान्तहरूको पालना गर्दै, धार्मिकताको निम्ति बाँचने फैसला गरौं। साथै, हामी परमेश्‍वरको वचनबाट आत्मिक आहार नियमित रूपमा लिने गरौं, ताकि ईश्‍वरीय अन्तरदृष्टि प्राप्त गर्न सकेर, शैतान र त्यसका भ्रमात्मक चालहरूको मुकाबिला गर्न सकौं!

९. सेवकाईमा येशूको जोशलाई के ले बढ़ावा दियो र यस सम्बन्धमा झूटो धर्म-गुरूहरू बारे के भन्‍न सकिन्छ?

^९ येशू, उहाँको सेवामा जोशिलो हुने, एउटा अर्को कारण पनि थियो। त्यो के हो? मत्ती ९:३६ मा हामी यस प्रकार पढ़दछौं, “तर भीड़हरूलाई देखेर उहाँको हृदय तिनीहरूका निम्ति दयाले भरियो। किनभने तिनीहरू गोठालो नभएका भेड़ाहरू जस्तै हैरान भई तितर-बितर भएका थिए।” यसकारण, येशूले “तिनीहरूलाई धेरै कुराको शिक्षा दिन लाग्नुभयो।” (मर्कूस ६:३४) एसो गर्नुपर्दा, उहाँलाई झुटो धार्मिक-गोठालाहरूको दुष्टता र व्यवस्थाहीनताको भण्डाफोर पनि गर्न आवश्‍यक पर्‌यो। मत्ती १५:७-९ अनुसार, येशूले केही धर्म-गुरूहरूलाई एसो भन्‍नु भएको छ: “ए कपटी हो, यशैयाले तिमीहरूका विषयमा यसो भनेर ठीक ठीक अगमवाणी बोले, ‘यस जातिले आफ्ना ओठले मेरो आदर गर्दछ। तर तिनीहरूको हृदय मबाट टाढ़ा छ। औ मानिसहरूका आदेशहरू तिनका सिद्धान्त जस्तागरी, तिनीहरू व्यर्थमा मेरो उपासना गर्दछन्‌।’”

एउटा खेदलाग्दो रहस्य

१०. “अधर्मको यो रहस्यले” आज कसलाई सङ्‌केत्‌ गर्दछ र तिनीहरू कुन कुराको दोषी छन्‌?

^१० येशूले झुटो धर्म-गुरूहरूको विरोध गर्नु भएझैं, आज हामी पनि, ईश्‍वरीय भक्‍तिको पवित्र रहस्यको विरूद्धमा खड़ा भएको रहस्य देखेर खेद प्रकट गर्दछौं। २ थिस्सलोनिकी २:७ मा, पावलले त्यसलाई, “अधर्मको रहस्य” भनेर सम्बोधन गरे। ई.स. प्रथम शताब्दिमा त्यो एउटा रहस्य थियो, किनभने सबै प्रेरितहरूको मृत्यु पश्‍चात्‌, धेरै समय पछि मात्र, यो रहस्य खोलिने थियो। आज त्यो रहस्यले मसीही जगतका धर्मगुरूहरूलाई सङ्‌केत गर्दछ, जसले परमेश्‍वरको धार्मिक राज्यको सुसमाचार प्रचार गर्नु भन्दा, राजनीतिमा भाग लिन रूचाएकाछन्‌। तिनीहरूको माझमा प्रशस्त कपट पाइन्छ। मसीही जगतका, प्रोटेस्टेन्ट सम्प्रदायहरूका टेलिभिजन प्रचारकहरू एउटा ज्वलन्त उदाहरण हुन्‌: आफ्नै बगाललाई ठगेर खाने, ती नक्कली पण्डितहरू हुन्‌, जसले करोड़ौं डलरका साम्राज्य खड़ा गरेका छन्‌, वेश्‍याहरू सँग गैरकानूनी सम्बन्ध राख्छन्‌, आफ्नो करतुतहरू उधारिन्दा, नक्कली आँसु बहाउँछन्‌ र फैरि पैसा, जहिले पनि अझ पैसाको माँग गर्छन्‌। रोमन क्याथोलिक धर्मका भ्याटिकनमा पनि, नाजायज राजनैतिक सम्बन्ध, बाहिरी देखावटी आडम्बर र भ्रष्ट आर्थिक चलनहरूले व्याप्त, एउटा नमीठो परिस्थिति पाउँछौं।

११. मसीही जगत्‌का धर्मगुरूहरू र महान बेबिलनको सम्पूर्ण भागलाई के हुनेछ?

^११ निःसन्देह, मसीही-जगतका धर्म-गुरूहरू नै यो “पापको मानिस” हो! (२ थिस्सलानिकी २:३) वेश्‍या जस्तै महान बेबिलनको यो भाग पनि सम्पूर्णतया सबैको सामने, झुटो धर्मका अरू अङ्‌गहरू जस्तै, नाङ्‌गो र उजाड़ हुनेछ। प्रकाश १८:९-१७ मा भने झैं, राजनीतिज्ञहरू र व्यापारीहरू [बैंकका मालिकहरू] एसो भन्दै रूनेछन्‌: “हाय, हाय, त्यो ठूलो शहर!” ईश्‍वरीय भक्‍तिको तेजस्वी र ज्योतिर्मय पवित्र रहस्यको सामने, महान बेबिलन र त्यसका रहस्यहरू सबै उजाड़ भएर जानेछन्‌।

१२. येशूले धार्मिकतालाई प्रेम गर्नु भएको हुनाकारण, के गर्नुभयो?

^१२ येशूले धार्मिकतालाई प्रेम र अधर्मलाई घृणा गर्नुभएको हुनाले साँचो उपासनाका लागि, उहाँ आफ्नो ज्यानको माया नगरी, परिश्रम गर्नु हुन्‌थियो। परमेश्‍वरको अभिषिक्‍त पुत्रको हैसियतमा, प्रथम पटक यरूशलेम जानु भएको बेलामा, उहाँले मन्दिरबाट व्यापारीहरू र पैसा साट्‌नेहरूलाई एसो भन्‍नु हुँदै, बाहिर लर्घानुभयो: “यहाँबाट यी लैजाओ! मेरा पिताको घर व्यापारको घर न तुल्याओ!” (यूहन्‍ना २:१३-१७) मन्दिरमा फेरि अर्को पटक जानु हुँदा, विरोधगर्ने यहूदीहरूलाई, येशूले एसो भन्‍नुभयो: “तिमीहरू ता आफ्ना पिता, शैतानका तर्फबाटका हौ, औ आफ्नै पिताका अभिलाषा गर्ने इच्छा गर्छौ। त्यो ता शुरूदेखिनै हत्यारा थियो, र सत्यमा ठहरेन। किनभने त्यसमा सत्य छँदैछैन। त्यसले झूट बोल्दछ भने त्यो आफ्नैतर्फबाट बोल्दछ, किनभने त्यो झूट र झूटको पिता हो।” (यूहन्‍ना ८:४४) येशूले ती धर्मगुरूलाई खुल्लम-खुल्ला, मिथ्यावादी र शैतानका पुत्रहरू घोषितगर्नु भएर ठूलो साहस प्रकट गर्नु भयो!

१३. (क) येशूले अधर्म प्रति घृणा विशेषगरी कहाँ व्यक्‍त गर्नुभयो? (ख) येशूले उहाँको समयका शास्त्री र फरीसीहरूका भर्त्सना गर्नु भए झैं, आजका व्यव्स्थाहीन धर्मगुरूको पनि भर्त्सना गर्नु किन उचित हुनेछ?

^१३ सर्प जस्ता ती शास्त्रीहरू र फरीसीहरूको येशूले बिझनेगरी भर्त्सना गर्नुभएर, अधर्म प्रति उहाँले आफ्नो घृणा प्रकट गर्नु भयो। यसको सबै भन्दा राम्रो उदाहरण हामी मत्ती २३ मा पाउँदछौं। यस अध्यायमा उहाँले तिनीहरूलाई “सात” पटक धिक्करानु भएको छ। तिनीहरूलाई ‘चून लाइराखेका चिहानहरू’ सँग तुलना गर्नु भयो, जसको ‘भित्रपट्टि भने कपट र अत्याचारले’ भरिएको थियो। यस प्रकारको अधर्मको दबावमा परेका मानिसहरूलाई छुटकारा दिन, येशू खूबै चाहनुहुनथियो! “ए यरूशलेम, ए यरूशलेम! जसरी कुखुरीले आफ्ना चल्लाहरूलाई पखेटामनि बटुल्छ, त्यसरीनै कत्ति पल्ट मैले तेरा बालकहरूलाई बटुल्ने इच्छा गरें, तर तैंले मानिनस्‌। हेर, तिमीहरूको घर तिमीहरूको निम्ति उजाड़ छोड़िनेछ।” (पद्य ३७, ३८) हाम्रा दिनका धर्मगुरू पनि यस्तै प्रकारका भर्त्सनाका योग्य छन्‌, किनभने, २ थिस्सलोनिकी २:१२ अनुसार, तिनीहरू ‘सत्यमा विश्‍वास नगर्ने, तर अधर्ममा खुशी मान्‍नेहरू’ हुन्‌। पृथ्वीमा छँदा येशूले वफादारी साथ प्रदर्शन गर्नुभएको ईश्‍वरीय-भक्‍तिको ठीक विपरित, तिनीहरूको अधर्म, छ।

परमेश्‍वरको न्यायवचनहरूको घोषणा गर्ने

१४. ईश्‍वरीय भक्‍तिको पवित्र रहस्यको मूल्याङ्‌कन गर्छौं भने, हामीले के गर्नु पर्छ?

^१४ ईश्‍वरीय भक्‍तिको पवित्र रहस्यकोलागि हामीले मुल्याङ्‌कन गरेका छौं भने, हामी सधैं नै येशूको पाइलामा हिड़ने कोशिश गर्नु पर्छ। उहाँ झैं, यशैयाले ६१:२ मा वर्णनगरेका, “यहोवाको ग्रहणयोग्य वर्ष र हाम्रा परमेश्‍वरको बदला दिने दिनको, हामीले पनि जोसिला भएर घोषणा गर्नु पर्छ। साथै, “सबै विलापगर्नेहरूलाई सान्त्वना” दिने काममा पनि हामी आफूले सक्दोभर जोसिलो भएर काम गरी नै रहौं। यहोवाका जोरदार न्याय-वचनहरूको घोषणा जसरी येशूले, उहाँ पृथ्वीमा छँदा, साहस साथ गर्नु भयो, त्यसरीनै आज पनि प्रहरीधरराका लेखहरू र रेवेलेशन—इट्‌स ग्रेन्ड क्लाइमेक्स एट हेन्ड! भन्‍ने पुस्तक द्वारा प्रकाशित्‌ गरिएका, यहोवाका जोरदार वाणीहरूको घोषणा गर्न ठूलो साहसको आवश्‍यक्‍ता पर्ने छ। हामी निडर साथै समझदार भएर प्रचार गर्नु पर्छ। हाम्रा “वचन नूनले स्वादिलो पारेको जस्तै” हुनु आवश्‍यक छ, जसले गर्दा धार्मिकता प्रति झुकाव भएका मानिसहरू आकर्षित्‌ हुनेछन्‌। (कलस्सी ४:६) येशूको ईश्‍वरीय भक्‍तिको उदाहरणबाट शिक्षा लिएको हुनाकारण, यहोवाले अह्राउनु भएको काम पूरा गर्‌यौं भनेर, समयमा नै हामीले पनि रिर्पोट गर्न सकौं।—मत्ती २४:१४; यूहन्‍ना १७:४.

१५. परमेश्‍वरको पवित्र रहस्यको सम्बन्धमा, १९१४ देखिन्‌ के भएको छ?

^१५ उहाँ शरीरमा प्रकट हुनु भएको बेला, येशू एउटा कस्तो महान उदाहरण हुनुहुन्‌थियो! ईश्‍वरीय भक्‍तिको पवित्र रहस्य उहाँमा स्पष्ट सँग पूरा भएको देखियो! यहोवाको नाउँलाई उहाँले निर्भयतासाथ ऊँचा पार्नु भयो! र उहाँले यस प्रकार आफ्नो समग्रता पालन गर्नुभएकोमा उहाँको पिताले उहाँलाई कति महान पुरस्कार दिनु भयो! तर परमेश्‍वरको पवित्र रहस्य यति मात्र होइन। १९१४ साल देखिन्‌ हामी “प्रभुको दिनमा” छौं। (प्रकाश १:१०) प्रकाश १०:७ मा भने झैं, यो ‘सुसमाचार अनुसार, परमेश्‍वरको रहस्य खतम हुने’ यो बेला हो। स्वर्गीय आवाजहरूले यो घोषणा गरेकाछन्‌: “पृथ्वीको राज्य हाम्रा प्रभुको [यहोवाको] भएको छ, उहाँले सदा सर्वदा राज्य गर्नुहुनेछ।” (प्रकाश ११:१५) यहोवाले मसीही राजा, येशू ख्रीष्टलाई, उहाँ सँग सह-शासक हुनकालागि, आफ्नो महिमाको सिंहासनमा स्थापित्‌ गर्नु भएको छ!

१६. राजा हुनसाथै, येशू ख्रीष्टले स्वर्गमा, ईश्‍वरीय भक्‍तिको कदर कसरी गर्नुभयो?

^१६ परमेश्‍वरको सह-शासकको हैसियतमा, येशूलाई त्यो नवजात्‌ राज्यमा माइकल पनि भनिन्छ। (माइकलको अर्थ हो “परमेश्‍वर जस्तो को छ?”) कुनै पनि विरोधी तत्व परमेश्‍वरको बराबर हुन सफल हुने छैन र यो कुरा, भर्खरै राज्याभिषेक हुनुभएका राजाले, पुरानो सर्प, शैतान र त्यसका दूतहरूलाई तल पृथ्वीमा फालिदिनु भएर, प्रमाणित्‌ पार्नुभयो। (प्रकाश १२:७-९) हो, येशूले जसरी पृथ्वीमा ईश्‍वरीय भक्‍तिको कदर गर्नु भयो, त्यसरी नै स्वर्गमा पनि गर्नु हुन्छ। झूटो धर्म र शैतानका दुवै दृश्‍य र अदृश्‍य सङ्‌गठनको सर्वनाश नगरूञ्जेल, येशूले आराम लिनुहुने छैन।

१७. १९१४ देखिन्‌, मत्ती २५:३१-३३ को पूर्ति कसरी भइरहेको छ?

^१७ १९१४ देखिन्‌, मत्ती २५:३१-३३ मा उल्लेखित्‌, येशूको अगमवाणीको पूर्ति द्वारा परमेश्‍वरको पवित्र रहस्य अझ ज्योतिर्मय भएको छ। यो भविष्यद्वाणीमा येशू एसो भन्‍नु हुन्छ: “तर जब मानिसको पुत्र स्वर्गदूतहरू समेत आफ्नो महिमामा आउला, तब आफ्नो महिमाको सिंहासनमा बस्नेछ। औ उसको सामु सबै देशका मानिसहरू जम्मा हुनेछन्‌, र जसरी गोठालोले भेड़ालाई बाख्राबाट छुट्याउँछ, उसरीनै उसले तिनीहरू एकलाई अर्कोबाट छुट्याउनेछ। औ उसले भेड़ाहरूलाई आफ्नो दाहिने हातपट्टि, तर बाख्राहरूलाई देब्रेपट्टि राख्नेछ।” स्वर्गमा, आफ्नो उच्च स्थानबाट, यो महिमावान राजा, न्यायाधीश र ईश्‍वरीय भक्‍तिको समर्थकले सर्वप्रथम, अधर्मको मानिस र महान बेबिलनका अन्य भागहरू र त्यस पछि, शैतानको दुष्ट पार्थिव सङ्‌गठनका बाख्रा जस्ता समर्थकहरूमाथि बदला लिनु हुनेछ। यस पश्‍चात्‌, शैतानलाई अगाध खाँदमा बन्द गरिनेछ। (प्रकाश २०:१-३) तर भेड़ा जस्ता “धर्मीहरूले” चाहिं अनन्त जीवन पाउँनेछन्‌। (मत्ती २५:४६) ईश्‍वरीय भक्‍तिको पिछा गर्नुभएर, तपाईं पनि त्यो धन्यको समूहमा हुन सक्नुहोस्‌!

१८. ईश्‍वरीय भक्‍तिको पवित्र रहस्यको सम्बन्धमा, कुन कुराको आनन्दमय सौभाग्य हाम्रो हो?

^१८ प्रकाश १९:१० ले हामीलाई “परमेश्‍वरको उपासना” गर्नु भन्दछ। किन? “किनकि,” त्यस पद अनुसार, “येशूको साक्षी, अगमवाणीको आत्मा हो।” त्यसकारण, प्राचीन समयका धेरै प्रेरित्‌ अगमवाणीहरूले येशूको विषयमा साक्षी दियेको छ! र जसै यी अगमवाणीहरू पूरा हुँदै गए, परमेश्‍वरको पवित्र रहस्य अझ स्पष्ट हुँदै आयो। ईश्‍वरीय भक्‍तिको यो पवित्र रहस्य येशूमा पूरा भएको देखेर, हामी आज रमाउँदछौं। परमेश्‍वरको राज्यका नम्र सेवकहरू भएर, उहाँका पाइलामा टेकेर हिड़ने ठूलो सौभाग्य हामीले पाएका छौं। हो, सुसमाचार अनुसार, परमेश्‍वरको सम्पूर्ण पवित्र रहस्य बुझ्ने र घोषणा गर्ने काममा भाग लिन पाएकोमा, हामी आफूलाई प्रतिष्ठित ठान्दछौं! (w90 1/15)