Liivuru Oopacerya a Matharihelo

29 Vano, Mwene Tavite aaloca ni muloko woothene wa achu ariki: “Mwanaka Solomoni, yoowo Muluku omuthanlileiye, mmiravo nave haano mavyakelo,* nave muteko mutokweene, woona wi empa* eyo, heni ekhale ya muchu nyenya ntakhara Yehova Muluku. 2 Nave koopaka owetha waka kipakaka marehereryo a oteka empa ya Muluku aka, kimvahereryaka ooru wa anamuteko analapa ni ooru, eparata wa anamuteko analapa ni eparata, muchove wa anamuteko analapa ni muchove, muthipo wa anamuteko analapa ni muthipo, ithaapwa wa anamuteko analapa ni ithaapwa hiiha ntoko maluku a okisi, maluku oothataanyano vachayani ni arkamasa, maluku makhaani a musaiko ni maluku a mukhalelo woothene oochuneya, vamoha ni maluku a alapastru mancipale. 3 Wa nthowa na osivela empa ya Muluku aka, ohiya soothene ihe kivanhaaka ntakhara empa yaweela, kinnavaha tho muhakhu aka ene wa ooru, ni wa eparata ntakhara empa ya Muluku aka. 4 Ophitaanyerya italentu* macikhwi mararu* sa ooru so Ofiri, vamoha ni italentu macikhwi mathanu nameeli* sa eparata yoorehereryiwa, wi irehereryiweno ixiri sa empa. 5 Ooru wa anamuteko analapa ni ooru, eparata wa anamuteko analapa ni eparata, vamoha ni muteko woothene onalampwa ni alipa oohana. Vano, taani olelo oniivaha wi aruuheke yoovaha ntakhara Yehova?”

6 Mwa yeeyo, asitokweene a imusi sa makholo, asitokweene a mahimo a Isarayeli, ahooleli a makhuuru macikhwi ni ahooleli a makhuuru masana, vamoha ni ahooleli a miyaha sa mwene yaarwa ni murima wa wiiveleela. 7 Awo yaavaha ntakhara muteko wa empa ya Muluku eeparipari italentu macikhwi mathanu* sa ooru itarku* macikhwi khumi,* italentu macikhwi khumi* sa eparata, italentu macikhwi khumi ni thanu nararu* sa muchove vamoha ni italentu macikhwi nsana* nimoha sa muthipo. 8 Muchu ori oothene aarino maluku asisapo aanavaha mu nipuro nookhapelelamo muhakhu wa empa ya Yehova, nenlo naavareryeliwa ni Xehiyeli Muxersoni. 9 Achu yaanahakalala opaka sooveleela moolakelela, woona wi awo yaapaka sooveleela moolakelela wa Yehova ni murima woothene, nave tho mwene Tavite aatepa ohakalala.

10 Voocharela, Tavite aamucicimiha Yehova vamiithoni va Muloko woothene. Tavite aaloca ariki: “Mucicimihiwe nyuwo Yehova Muluku a Isarayeli, nikholo nahu, okhala wookhala.* 11 Khwoo Yehova, otokweene, owerya, oreera, ovuwa, ni ocicimiheya ti sawinyu woona wi ichu soothene sa wirimu ni sa veelaponi yavathi ti sawinyu. Omwene ti wawinyu, Yehova. Nyuwo muri avasuluxa ntoko muhooleli a ichu soothene. 12 Muhakhu ni ovuwa ti sawinyu, nave munnalamula ichu soothene; mu ntata nanyu wookhalamo owerya ni otokweene nave munnawerya winnuwiha ni olipiha ichu soothene. 13 Nave vano, Muluku ahu, ninnathamalela ni ocicimiha nsina nanyu nooreera.

14 “Vano, miyaano kaani nave achu aka taani wi enavaha sooveleela soolakelela seiha? Ntakhara ichu soothene inarweela wa nyuwo, nave nnoovahaani yeeyo enarweela mmatani mwanyu. 15 Tiwi, hiyaano nri anamarwa vamiithoni vanyu, ni aweeceeca, ntoko makholo ahu oothene. Mahiku ahu a veelaponi yavathi ari ntoko muuruxi, ehirivo ewehereryo. 16 Khwoo Yehova Muluku ahu, muhakhu woothene yoola nreherenryaahu wi etekiwe empa ntakhara nsina nanyu naweela, onarweela mmatani mwanyu, nave woothene ti wawinyu. 17 Koosuwela phaama Muluku aka, wi nyuwo munnaalikhela murima nave munnahakalala ni ororomeleya. Ni murima aka woothene,* koopaka sooveleela soolakelela ichu soothene seiha, nave miyaano kiri oohakalala owoona achu anyu yaawo ari vaavaa epakaka soovaha soolakelela wa nyuwo. 18 Khwoo Yehova Muluku a Aparahamu, Isaki, ni Isarayeli makholo ahu, mukhapelela mmurimani mwa achu anyu nchuno nenla ni muupuwelo okhala wookhala, nave mutikitheryeele murima aya wa nyuwo. 19 Nave mumvahe murima wawaakhwanela* mwanaka Solomoni, wi aweryeke ochariha malamulo anyu, sawuupuxerya sanyu, ni mathoriheryo anyu ni weerano ichu soothene seiha wi ateke empa ya Muluku wa yeeyo kipankaaka marehereryo.”

20 Voocharela, Tavite aaloca ni muloko woothene ariki: “Vano mmucicimihe Yehova Muluku anyu.” Nave muloko woothene waamucicimiha Yehova Muluku a makholo aya nave waahuurama ni okokhora vamiithoni va Yehova ni va mwene. 21 Nave awo yaatitelela ovaha mikucho wa Yehova ni ovaha mikucho soopahiwa wa Yehova mu nihiku noocharela: Asaana amope aasilopwana ncikhwi nimoha,* asaana a ipucepuche ncikhwi nimoha,* ipucepuche seelopwana ncikhwi nimoha,* vamoha ni soovaha saya sa soowurya; awo yaavaha mikucho mincipale ntakhara Isarayeli oothene. 22 Mu nihiku nenle, awo yaalya ni owurya vamiithoni va Yehova ni ohakalala otokweene. Nave ekwaha yanaawiili yaamweera Solomoni mwaana a Tavite okhala mwene nave emuthanla vamiithoni va Yehova ntoko muhooleli, vamoha ni Satoki ntoko mulipa a mukucho. 23 Solomoni aakiraathi va munyukhu wa Yehova ntoko mwene mu nipuro na apapa awe Tavite, nave owo aanakhumelela phaama. Aisarayeli oothene yaanamwiiwelela yoowo. 24 Asitokweene oothene, anakhoco oowerya, vamoha ni anamwane oothene a mwene Tavite yaanamwiiwelela mwene Solomoni. 25 Nave Yehova aamunnuwiha Solomoni mmukhalelo wootikhiniha vamiithoni va Isarayeli oothene nave aamvaha omwene woocicimiheya yoowo aahaatinko okhalano mwene a Isarayeli ahaakumve Solomoni.

26 Mwawiihiiha, Tavite mwaana a Yese aahilamulela o Isarayeli woothewene. 27 Nave elukuluku* ya olamulelo awe o Isarayeli saari iyaakha makhumi maxexe.* O Heporoni owo aalamulenle iyaakha thanu napiili, nave o Yerusalemu owo aalamulenle iyaakha makhumi mararu ni iyaakha raru.* 28 Nave owo aakhwa uuluvanlexa, alyilevo ni ekumi yawaaca,* muhakhu, ni ovuwa; mwanawe Solomoni aakhala mwene mu nipuro nawe. 29 Yaweereya ya mwene Tavite, ovinyerya omapacereryo ophiyerya wookuchulani, erempwale mu soorepela sa Samuwele mulipa awoona, Natani mulipa a miririmu ni Kati mulipa awoona. 30 Soorepela soothene seiha inaloca sa olamulelo awe woothene, owerya wawe ni ichu seiho saamweenre mu elukuluku awe, ni Isarayeli, vamoha ni mamwene oothene oorukurerya.