3 Yohani

1 Mulopwana awuuluvala,* wa Kaiyu, oosiveliwa, yoowo kinamusivelaaka mweeparipari.

2 Oosiveliwa, kinnavekela wi soothene ititelele oweecela phaama nave wi okhaleno ekumi yaphaama, hiiha ntoko okhanlaawe phaama hiihaano. 3 Tiwi kaatepa ohakalala vancipale vaavaa anna yaarwiilaaya nave yeerela onamoona wi onnapharelela eparipari, nave wi onnatitelela weeca mu eparipari. 4 Nkaano ohakalala* otokotoko opwaha ola: Wiiwa wi anamwane aka annatitelela weeca mu eparipari.

5 Oosiveliwa, onnooniherya ororomeleya mwa yeeyo oneeraawe wa anna, naamwi ohaasuwenle. 6 Yaawo aheerela onamoona sa osivela waa vamiithoni va muloko. Khwoo, waahoole waakhaviheryaka vamukwahani vaya mmukhalelo woocicimiheya ntoko Muluku onakhweleiye. 7 Ntakhara waari wa nthowa na nsina nawe awo apwanhaayawo, ehaakhenle echu wa achu a maloko. 8 Mwawiihiiha, hiyo ninnaphwanela wooniherya owaakhela aleco wa anna si yaala, wi nikhale anamuteko akhwaaya mu eparipari.

9 Koorepela ekaarata muloko, nyenya Tiyotrefe, yoowo onasiveliwa okiraathi mmapuro oopacerya veeri vaya, haneemererya echu wa hiyo mwa ncicimiho. 10 Ti nthowa nene karwa weiwo, kinahaalaaka othokororya ichu seiha owo oneereiye, sawootha seiho onamwaramwaxeiye vooloca sa hiyo.* Ahikhwaaneliwaka ni yeela, owo onnakhooca owaakhela anna mwa ncicimiho; nave onneererya waahiiha ni owiikara mmulokoni yaale anachuna owaakhela.

11 Oosiveliwa, ohitakiheryeke yeeyo eri yoonanara, nto otakiheryeke yeeyo eri yaphaama. Yoole oneerano yaphaama onarweela wa Muluku. Yoole oneerano yoonanara hamoonne Muluku. 12 Timetriyu onnalociwa phaama ni oothene awo, ophitaanyerya eparipari ene. Chiryene, hiyaano tho ninnamweerela onamoona, nave woosuwela wi onamoona nnavahaahu ti weeparipari.

13 Kaakhalano ichu sincipale wi koorepele, nto nkinachuna weerano va epapeli ni etinta. 14 Nyenya kinnaweherya owoona moohilekela, nave nnahaala oloca noonanaka.

Murecele okhale ni weyo.

Asinthamwene annoovonyerya mooni aya. Ovahererye mooni aka wa mmoha ti mmoha a asinthamwene.