Mateyu

12 Mu elukuluku yeele, Yesu eecaka aavira mmacani mwa tiriku mu nihiku na Sapata. Oohuserya awe yaavoliwa, nave epacerya omvurula tiriku emukhuuraka. 2 Afarisi yoonnaaya yeela, yaaloca ni Yesu eriki: “ Nkawoone! Oohuserya aa aneerano yeeyo ehineemeereryiwa nihiku na Sapata.” 3 Owo aawaakhula ariki: “Hamwintonko waalakhanya yeeyo Tavite vamoha ni alopwana awe yeenraaya evoliwe? 4 Wi yaavolowa mu empa ya Muluku, ekhuura ipaau sa sooveleela,* echu yeeyo yaari yooheemereryeya wa yoowo naari wa alopwana aareiyeno, nyenya pahiru eneemereryiwa wa alipa a mukucho? 5 Naari himwaalakhannye Mmalamulo wi, nihiku na Sapata alipa a mukucho annachekela nihiku na Sapata, nave ehikhalano nthowa? 6 Nyenya miyo kinnooleelaani wi, vaava ookhalavo mutokweene onapwaha empa ya Muluku. 7 Nto, waakhanle wi mohiiwexexa yootaphulela ya masu ala: ‘Kinachuna ikharari, ohiya mukucho,’ himwaahaala waathorihaka achu ahirino nthowa. 8 Tiwi, Mwaana a muchu ti Pwiya a Sapata.”

9 Avinyaka nipuro nenle, aavolowa mu nipuro naya na malapelo,* 10 nave mwemmo aakhalamo mulopwana oorakala* ntata! Nave Afarisi echunaka omphwanyerya mathowa Yesu, yaamukoha: “Onneemereryeya openuxa nihiku na Sapata?” 11 Owo aawaakhula: “Wakhala wi mmoha mwa nyuwo ookhalano epucepuche emoha, nave eyo emorela munlicini mu nihiku na Sapata, apwanne hayawo wi aviihemo? 12 Vano muchu hari oochuneyaxa opwaha epucepuche? Hiihaa, enneemereryeya ophara miteko saphaama nihiku na Sapata.” 13 Voocharela Yesu aaloca wa mulopwana: “Okola ntata naa.” Owo aahookola, nave ntata nawe naapenuwa nnalikana ni ntata nikina. 14 Nyenya Afarisi yaakhumela vaate enavaanela wi emwiiphe Yesu. 15 Aasuwenleiye yeela, aapwahavo. Achu ancipale tho yaamuchara, nave aahaapenuxa oothene yiiceliwa, 16 nyenya aaleelaka wi ehimvuwihe, 17 wi yaakhwanele yeeyo yaalociwe ni mulipa a miririmu Yesaya, yoowo aariye:

18 “Nkamooneeni namuteko aka yoowo kimuthanlilaaka, oosiveliwa aka, yoowo kinamweemereryaaka!* Kinamuhela mwa yoowo munepa aka, nave owo onamulaleya ekhaikhai wa maloko. 19 Owo harwa anavaanyihana ni achu naari okhuwela, nave tho haavo onahaala wiiwa nsu nawe mmapuro awaaciwamo. 20 Harwa antaka mutathi woothaleya, naari oxipiha nchampo nenlo nlelo nnachuwa mwiixi, ophiyerya atikithenrye wookololowa mwawaakhwanela. 21 Chiryene, maloko anamukhalano ewehereryo mu nsina nawe.”

22 Voocharela aaruuheliwa mulopwana aarino masololo, yoowo aari oohiloca ni oohoona; Yesu aampenuxa mulopwana owo, nave apacerya oloca ni woona. 23 Mwa yeeyo, muloko* woothene wa achu waatikhina, onakohana oriki: “Yoola, tahi Mwaana a Tavite?” 24 Afarisi yiiwalaaya yeela, yaaloca eriki: “Mulopwana ola oniikara masololo pahiru moorweela wa Pelsepu,* mutokweene a masololo.” 25 Asuwelaka muupuwelo aya, Yesu aahi wa yaawo: “Omwene woothene oniikawanya mukhataaya onnathatuwa milepe, nave epooma yoothene naari echoko eniikawanya mukhataaya enammwareya. 26 Moolikana, wakhala wi Satana onamwiikara Satana, owo onniikawanya mukhateiye; vano, omwene awe oni wiithipele hai? 27 Nto wakhala wi kiniikara masololo moorweela wa Pelsepu, vano anamwane anyu aniikara masololo ni ikuru sawani? Ti nthowa nene awo anahaalaaya woothorihaani. 28 Nyenya, waakhanle wi kiniikara masololo moorweela wa munepa wa Muluku, chiryene Omwene wa Muluku wohoophwanyaani. 29 Naari, taani onawerya ovolowa mpa mwa muchu akuru wi iiye ichu sawe, ahipacenrye ommaka toko? Ammaka, tonahaaleiye owerya wiiya mpa mwawe. 30 Yoowo ohiri mmakupa aka, mwiicani aka, nave yoowo ohinathukumanya ni miyo, onammwaramwaxa.

31 “Vanthowa nenla, kinnooleelaani: Soocheka soothene naari onyemula achu anapakaaya anamuleveleliwa; nto yoole onanyemula munepa wa Muluku harwa aleveleliwa. 32 Ntoko yootakiherya, yoowo oni amulocele masu oonanara Mwaana a muchu onamuleveleliwa; nyenya yoole oni alocele masu oonanara munepa waweela harwa, harwaru aleveleliwa, naari mmukhalelo yoola wa ichu,* naari mano onoorwa.

33 “Mwaala mwiri waphaama, sawiima saya sinamukhala saphaama, nto mwaala mwiri woonanara sawiima saya sinamukhala soonanara. Mwiri onasuweliwa moorweela wa sawiima saya. 34 Anamwane a ivili nyu, muni muwerye hai oloca ichu saphaama muniiha muri oonanara murima? Tiwi, eyano enaloca ichu seiho isaren’ye mmurimani. 35 Muchu aphaama, onnakumiha ichu saphaama seiho okhapelenleiye mmurimani mwawe, nto muchu oonanara murima, onnakumiha ichu soonanara seiho okhapelenleiye mmurimani mwawe. 36 Kinnooleelaani wi mu Nihiku na Othoriha, achu anamwaakhula mulacu nthowa na masu atheru aloncaaya; 37 woona wi moorweela wa masu aa onamweeriwa eekhaikhai, nave moorweela wa masu aa onamphwanyeriwa mathowa.”

38 Voocharela, alipa oorepa ni Afarisi akina yaalocano eriki: “Muhusiha, nnachuna woona eneneeryo yoorweela wa nyuwo.” 39 Nave Yesu aawaakhula ariki: “Muyareriwo woonanara ni wooraruwa* onnatitelela waavya eneneeryo, nyenya hevahiwa eneneeryo emoharu mano, voohikhala yeele ya mulipa a miririmu Yona. 40 Hiihaa ntoko Yona aakhanleiye mmirimani mwa ehopa mahiku mararu othana ni ohiyu, hiihaa tho Mwaana a muchu onamukhala vathi va echaya mahiku mararu othana ni ohiyu. 41 Nihiku na othoriha, achu o Ninevi anamvinya wi yeerele onamoona sa muyareriwo yoola ni waasomela, vawi awo yaacharuwa nthowa na olaleerya wa Yona. Nto vaava, ookhalavo mutokweene ompwaha Yona. 42 Nihiku na othoriha, mwene amwaamuthiyana a weiwo onakhumawo echeku ya murupi, onamvinya wi eerele onamoona sa muyareriwo yoola ni waasomela, vawi aakhuma weiwo elapo ekotenlaayawo wi awiriyane miruku sa Solomoni. Nto vaava, ookhalavo mutokweene ompwaha Solomoni.

43 “Munepa woonanara wakhuma mwa muchu, onneeceeca elapo yawuuma waavyaka nipuro nawiichuuwavo, nto honaphwanya. 44 Nave onnaloca: ‘Kinamukookela empa aka yeeyo kithaammaakawo,’ nave waphiya, onaphwanya ehikhaliwe, eveliwe ni ereheryiwe. 45 Voocharela onnaya owopa minepa mikina mithanu napiili soonanaraxa opwaha yoowo, inakhala mummo; hiihaa, makuchuwelo a muchu owo annatepa onanara opwaha woopaceryani. Ti yeeyo eni yeereye ni muyareriwo yoola woonanara murima.”

46 Arikimuloca ni muloko wa achu, amama awe ni asinnawe yaari vaate echunaka oloca ni yoowo. 47 Mwawiihiiha, muchu mmoha aamuleela ariki: “Amamaa ni asinnaa ari vaate, anachuna oloca ni nyuwaano.” 48 Yesu aamwaakhula yoowo ariki: “Taani ari amamaaka nave taani ari asinnaka?” 49 Ookolaka ntata wa oohuserya awe, aaloca: “Amamaaka ni asinnaka taala! 50 Oothene yoole oneera yoochuna ya Atiithi aka yaawo ari wirimu, yoowo tori munnaka, murokoraka ni amamaaka.”