Luka

4 Yesu asaren’ye munepa waweela, aakhuma o Yortano, nave munepa waamukeriha otakhwani 2 akhala weiwo mahiku makhumi maxexe* nave aaheehiwa ti Musaserya. Owo haalyile echu mmahiku yaale; mwawiihiiha, emanle mahiku yaale, aavoliwa etala. 3 Elukuluku ene yeele, Musaserya aalocano ariki: “Waari mwaana a Muluku, olamulele nluku nla wi nthatuwe epaau.” 4 Nto Yesu aahaakhula: “Yoorempwa: ‘Muchu hanakhala mukumi wanthowa na epaau pahiru.’”

5 Voocharela, Musaserya aamukeriha vasulu amooniha omwene woothene wa elapo yavathi mu elukuluku vakhaani. 6 Nave Musaserya aalocano ariki: “Kinamoovaha owerya ni ncicimiho na omwene woothene yoola, nthowa nawi koovahiwa, nave kinamvaha yoowo kinamuchunaaka. 7 Wakhala wi wookokhora wi okilape ekwaha emoha pahi, soothene iha sinamukhala sawaa.” 8 Nto Yesu aamwaakhula ii: “Yoorempwa: ‘Ti Yehova Muluku aa, onaphwanelaawe omulapela, nave ti yooworu pahi onaphwanelaawe omukokhorela.’”

9 Voocharela, Musaserya aamukeriha o Yerusalemu nave anweliha vasulu* va empa ya Muluku, alocano ariki: “Waari mwaana a Muluku, wiimorihele vathi, 10 woona wi yoorempwa: ‘Owo onamwaarumiha ankeelo awe wa weyo, wi yookhapelele,’ 11 nave, ‘Awo anamookaphula mmatani mwaya, wi nnaani naa nihimane nluku.’” 12 Yesu aamwaakhula: “Yoolociwa wi: ‘Ohimweehe Yehova Muluku aa.’” 13 Mwawiihiiha, Musaserya amanle omweeha mwa makhalelo yaala oothene, aamuhiya ophiyerya elukuluku ekina yoophwanelela.

14 Yesu aakookela o Kalileya mwa ikuru sa munepa. Nave ovuwa wawe waahunlaana makupa oothene oorukurerya. 15 Owo tho aapacerya ohusiha mu sinakooka mwaya, nave achu oothene yaanamucicimiha.

16 Voocharela, Yesu aaya o Nasareti weiwo unnunweiyewo, nave mu nihiku na Sapata, owo aavolowa mu nipuro na malapelo* ntoko yookhovelela awe, eemela wi aalakhanye. 17 Mwawiihiiha, aavahereryiwa eroolu ya mulipa a miririmu Yesaya, nave aatapurunxeiye, aaphwanya makupa waarempwevo masu ala: 18 “Munepa wa Yehova ori mwa miyo, vawi ookithanla wi kilaleerye michaka saphaama wa oohaawa. Ookiruma wi kilokohe woopoliwa wa akapuro, ohula miitho aachu oohoona, ni owoopola yaale anahooxiwa, 19 wi kilaleerye eyaakha yaweemereryiwa* ya Yehova.” 20 Mwa yeeyo, aakhunyanya eroolu, amukookiherya mulipa ookhapelela, aya akiraathi; nave achu oothene mu nipuro na malapelo* yaananwehaxa yoowo. 21 Nave Yesu aapacerya waaleela ariki: “Olelo, ahaakhwanela masu a mu Soorepa mmanlaanyu wiiwa.”

22 Oothene yaanamweerela onamoona waphaama nave yaanatikhiniheya ni masu ooreera yaakhuma mwaano mwawe, enaloca eriki: “Ola tahi mwaana a Yosefe?” 23 Mwa yeeyo, owo aahi wa yaawo: “Moohikhwa minikwa, nyuwo munampharihela masu ala wa miyo: ‘Mulipa a murece, wiipenuxe mukhataa. Weereno tho wenno mu elapo aa, soothene niiwalaahu wi woheerano o Kafarnawu.’” 24 Nto owo aalocano ariki: “Chiri kinnooleelaani wi, haavo mulipa a miririmu onaakheliwa phaama mweelapo awe. 25 Kinnooleelaani tho wi: O Isarayeli yaahikhalawo anaamukhwele ancipale mmahiku a Eliya, vaavaa erimu yaawaliwaaya mu iyaakha raru ni miyeeri mithanu nammoha nave elapo yoothene yeele yaasareya etala. 26 Naamwi hiihaa, Eliya haarummwe wa mmoha a athiyana yaale, nto aarummwe pahi wa naamukhwele mmoha o Sarefa, elapo yo Sitoni. 27 Nave tho yaakhalavo alipa a mareca ancipale o Isarayeli mmahiku a mulipa a miririmu Eliseu; nto haavo mmoha mano aapenuxiwe,* pahiru Namani o Siriya.” 28 Oothene yaawo yaawiriyana ichu seiha mu nipuro na malapelo,* yaatepa onanariwa, 29 awo yaavinya, emwiikarela Yesu okhwipi wa epooma, emukeriha oxerexere wa mwaako yoowo waatekiwevo epooma aya, wi emukakhele wawiixawo. 30 Nyenya Yesu aavira veeri vaya, apwahavo.

31 Voocharela Yesu aakhuruwela o Kafarnawu epooma yo Kalileya. Weiwo owo aanaahusiha awo mu nihiku na Sapata, 32 nave achu yaanatikhiniheya ni mukhalelo awe wa ohusiha, vawi owo aaloca ni owerya. 33 Mu nipuro nenle na malapelo,* aakhalamo mulopwana aarino nsololo, nave aanakhuwela ni nsu noovuwa ariki: 34 “Khaa! Tiheeni onachunaawe ni hiyaano, Yesu Munaasareti? Orwenle onitoloxa? Kohoosuwela phaameene wi weyaano wa Aweela a Muluku.” 35 Nyenya Yesu aasamela nsololo ariki: “Omaale, nave khuma mwa yoowo.” Mwawiihiiha, nimanle omuuwiha mulopwana veeri va muloko, nsololo naamuhiya nihimphoreihale. 36 Hiihaa, oothene yaatikhina, epacerya oloca yaawoyaawo eriki: “Ala masu a mukhalelo taani? Mwa ikuru ni owerya onnalamulela minepa soonanara, chiri inakhuma!” 37 Mwawiihiiha, ovuwa wawe waahunlaana mapuro oothene oorukurerya.

38 Aakhummeiye mu nipuro na malapelo,* Yesu aaya vaate va Simoni. Asookora a Simoni yaaniiceliwa feepiri mutokweene nave achu yaamveka Yesu wi aakhaviherye. 39 Yesu aawaacamela, amusamela feepiri nave feepiri aahaahiya. Moohilekela awo yaavinya, epacerya waacelekhela yaawo.

40 Nsuwa nneelaka, oothene yaarino achu yiiceliwa ireca soohiyanahiyana, yaahaakeriha wa Yesu. Owo aanampenuxa mmoha ti mmoha moorweela wa waakuherya matata awe. 41 Masololo tho yaanakhuma mwa achu ancipale, ekhuwelaka eriki: “Weyaano wa Mwaana a Muluku.” Nto Yesu aanasamela, nave heemererya wi eloceke, woona wi yaanasuwela wi owo aari Kristu.

42 Nto waaxilaayavo, Yesu aavinya aya otakhwani meekheiye. Nyenya muloko wa achu waapacerya omwaavya,* nave waamphwannyaaya waaheererya omuhiiha wi ahaahiye. 43 Yesu aaloca wa yaawo: “Kinnaphwanela tho olaleerya michaka saphaama sa Omwene wa Muluku mu ipooma ikina, ntakhara ti yeela kirumiheliwaaka.” 44 Mwawiihiiha, owo aaya olaleerya mmapuro a malapelo* o Yuteya.