Mutitelele Ohipaka Makupa mu Elapo Yeela Yookawanyeya

“Mmukòkiherye Muluku eri ya Muluku.”—MATEU 22:21.

MACIPO: 33, 137

MUNANWERYA WAAKHULA?

Tiheeni Yehova onuupuweleiye vooloca sa olamulelo wa achu?

Tiheeni nnaphwanelaahu weera vaavaa onakhalaaya woovila ohipaka makupa a elapo?

Tiheeni nnahuseryaahu orweela wa akapuro oororomeleya a Yehova yahaapanke makupa a elapo?

 1. Nnii nimwiiwelele hai Muluku ni alamuleli a achu?

PIIPILIYA onnanihusiha wiiwelela olamulelo wa achu, nyenya tho onnanleela wi nnaphwanela omwiiwelela wiiliwiili Muluku. (Saweriwa T’arummwa 5:29; Tito 3:1) Onaweryeya hai? Yesu oothariha nlakiheryo nnanikhaviherya osuwela mukhalelo wa wiiwelela. Olonce wi nnaphwanela omukookiherya “Sésar eri ya Sésar, ni . . . Muluku eri ya Muluku.”^[1] (Moone masu a vathi omakuchuwelo.) (Mateu 22:21) Ninnamukookiherya “Sésar eri ya Sésar” vaavaa nniiwelelaahu malamulo a alamuleli, waakhaliha alamuleli mwa ncicimiho, ni oliva musokho. (Aroma 13:7) Nave wakhala wi mulamuleli onanleela opaka echu Muluku ohinachuneiye wi nipake, ninnakhooca opaka, nyenya mmukhalelo wa ncicimiho.

 2. Nnii nooniherye hai wi hannapaka makupa mmiyaha sa elapo?

² Mukhalelo mmoha nnamukookiheryaahu “Muluku eri ya Muluku” ori ohipaka makupa mmiyaha sa elapo yeela. Hiyaano hannapaka makupa mmiyaha seiya. (Isaiya 2:4) Woona wi Muluku onnaweemererya alamuleli olamulela, hiyaano hannawaakaaha. Hannavolowela miyaha siri soothene sa elapo naari owananawana. (Aroma 13:1, 2) Hinneererya waatoroka alamuleli, naari waakhaviherya alamuleli, nave hannapaka makupa mu othanla naari okhala mulamuleli.

 3. Ntakhara heeni ninnaphwanela otitelela ohipaka makupa a elapo?

³ Aakhalavo mathowa mancipale anamweeriha Muluku onileela ohipaka makupa a elapo. Nthowa nimoha ti nawi nnamutakiherya Yesu, yoowo ahaari “a mwelaponi.” Owo hantonko opaka makupa a elapo naari mu ikhoco. (Yohani 6:15; 17:16) Nthowa nikina ti nawi hiyaano nnakhaviherya Omwene wa Muluku. Woona wi hannaakhaviherya alamuleli, nookhalano yawuupuxerya-ya-murima yaphaama vaavaa nnalaleeryaahu wi Omwene wa Muluku onahaala omaliha makacamiho aachu. Ahooleli atheru a malapelo annapaka makupa a elapo, nave eyo ennaakawanya achu. Nyenya woona wi hannapaka makupa a elapo, nri awiiwanana ni anna ni arokora orukurerya elapo. —1 Pedro 2:17.

 4. (a) Nnasuwela hai wi onahaala okhala woovila otitelela ohipaka makupa a elapo? (b) Ntakhara heeni ninnaphwanela wiirehererya hiihaano wi ntitelele ohipaka makupa a elapo?

⁴ Akhweya nnakhala mu nipuro achu ahinawehereryaaya wi nnahaala opaka makupa a elapo. Nyenya yaacamelaka makuchuwelo a mukhalelo wa Satana, onahaala okhala woovila wa hiyo otitelela ohipaka makupa a elapo. Olelo achu ari “òhikhurumuwa” ni “òtalaveryasa”, nyenya anahaala otitelela okhala ookawanyeya. (2 Timóteo 3:3, 4) Annihu akina annavoloweliwa ni otorokeya wawaakuveya wa olamulelo mu ikulucu saya. Ti nthowa nene nnaphwanelaahu wiirehererya hiihaano wi nihipake makupa a elapo naamwi mu ilukuluku sookacamiha. Hankooni nthokororye ichu sese nnaphwanelaahu opaka wi niirehererye.

NWOONEKE ALAMULELI HIIHA NTOKO YEHOVA

 5. Yehova onuupuwela eheeni vooloca sa olamulelo wa achu?

⁵ Mukhalelo mmoha nnahaalaahu wiirehererye hiihaano wi ntitelele ohipaka makupa a elapo ori owoona alamuleli hiiha ntoko Yehova. Vaavaa Yehova aapatunxeiye achu, haavanhe owerya wi yaalamuleleke akina. (Yeremiya 10:23) Owo onawoona achu ntoko emusi emoha. Nyenya alamuleli annaakawanya achu moorweela wa wuupuwela wi nloko naya ti naphaama. Nyenya naamwi ekhalaka wi taphaama, awo hanawerya omaliha makacamiho oothene aachu. Awo tho annakhala amwiicani a Omwene wa Muluku, yoowo opacenrye olamulela mu eyaakha ya 1914. Moohilekela Omwene owo onahaala waamaliha alamuleli oothene a achu.—Mwaalakhanye Salumu 2:2, 7-9.

 6. Nnaphwanela waakhaliha hai yaale arino olamulelo?

⁶ Muluku onnaweemererya alamuleli woona wi annarehererya murecele. Eyo ennanikhaviherya olaleerya michaka saphaama sa Omwene wa Muluku. (Aroma 13:3, 4) Muluku tho onnanleela waavekelela yaale arino olamulelo wi niwerye omulapela owo mmureceleni. (1 Timóteo 2:1, 2) Vaavaa nnakhalihiwaahu moonanara nnahaala oveka nikhaviheryo naya. Ti yeeyo Paulo aapankeiye. (Saweriwa T’arummwa 25:11) Naamwi Piipiliya alocaka wi Satana tonaahoolela alamuleli, hatonko oloca wi onnamulamulela muchu ti muchu orino olamulelo. (Luka 4:5, 6) Mwawiihiiha hannaphwanela wuupuwela wi mulamuleli vyakala onahooleliwa ni Musaserya. Piipiliya onaloca wi hannaphwanela owaapa akina.—Tito 3:1, 2.

 7. Muupuwelo taani nnaphwanelaahu osepa?

⁷ Ninnamwiiwelela Muluku moorweela wa ohipaka makupa mu olamulelo wammoori, naari nikhuuru na olamulelo, naamwi miruku saya inikhaviheryaka. Ikwaha ikina hokhala wookhweya wa hiyo. Ntoko yootakiherya, muupuwele wi achu annamwaryeela olamulelo yoowo onatannya makacamiho mancipale, yaawo tho anaavolowela Anamoona a Yehova. Himwaahaala ophitaana ni alipa oomwaryeya awo, nyenya apwanne mwaahaala wuupuwela wi awo aneera yoophwanela ni oweherya wi anamukhumelela phaama? (Éfeso 2:2) Wakhala wi ninnachuna otitelela ohipaka makupa a elapo, nnaphwanela osepa moonelo wa okhaviherya makupa mamoha wi taphaama opwaha makina. Eyo enahaala okhala yawooneya mmalocelo ni mu saweera sahu.

“MUKHALE OSYAKA . . . NI AWISUMALIHA”

 8. Vaavaa onakhalaaya woovila otitelela ohipaka makupa a elapo, nnii niwerye hai okhala “osyaka” ni “awisumaliha”?

⁸ Mukhalelo wanawiili wa otitelela ohipaka makupa a elapo ori okhala “osyaka ntoko inowa ni awisumaliha ntoko ikakaiya.” (Mwaalakhanye Mateu 10:16, 17.) Ninnakhala “osyaka” vaavaa nnuupuwelaahu makacamiho a muhoolo. Nave ninnakhala “awisumaliha” vaavaa nihinapakaahu makupa a elapo mu ilukuluku sookacamiha. Hankooni nthokororye mikhalelo mikina ni yeeyo nnaphwanelaahu weera wi ntitelele ohipaka makupa a elapo.

 9. Ephoole taani nnaphwanelaahu okhalano vaavaa nnalocaahu ni akina?

⁹ Malocelo. Nnaphwanela okhalano ephoole vaavaa achu anathokororyaaya miyaha sa elapo. Ntoko yootakiherya, vaavaa nnalocaahu ni muchu sa Omwene wa Muluku, hannaphwanela oloca wi ninneemererya naari hooye muupuwelo naari moonelo wa mulamuleli naari muhooleli. Opwaha othokororya yeeyo achu anachunaaya opaka wi emalihe makacamiho aachu, mooniherye orweela Mpiipiliya mukhalelo Omwene wa Muluku onahaalaaya weerano eyo mwawiikhalelaru. Wakhala wi achu annaakaaha mwaha wammoori, ntoko othelana wa achu oophwanaphwana mwiikho naari okumiha erukulu, mwaaleele yeeyo Masu a Muluku analocaaya ni mukhalelo muneereryaanyu ochariha mu okumi anyu. Wakhala wi muchu onaloca wi malamulo makina anaphwanela oviihiwavo naari otorokiwa, hannaphwanela opaka makupa, naari omukhinyererya otoroka muupuwelo awe.

10. Nnii nsuwele hai wi ninnatitelela ohipaka makupa a elapo vaavaa nnoonaahu naari waalakhanya miselo?

¹⁰ Miselo. Ikwaha ikina sinnalociwa miselo inakhaviherya makupa mamoha. Eyo enneereya mu ilapo miselo inahooleliwaaya ni alamuleli. Wakhala wi marehereryo naari muchu onaloca miselo oopaka makupa, nnaphwanela okhalano ephoole wi nihipacerye wuupuwela mmukhalelo awo aneeraaya. Ntoko yootakiherya, mwiikohe, ‘Apwanne kinnasiveliwa owiriyana miselo sammoori sa muchu nthowa nawi kinneemererya yeeyo onaloceiye sa olamulelo?’ Wi ntitelele ohipaka makupa a elapo nsepe woona naari waalakhanya miselo inapaka makupa a elapo. Opwaha yeeyo, mweererye ophwanya miselo ihinapaka makupa a elapo. Elukuluku eri yoothene mulikanyihe yeeyo munawiriyanaanyu ni ‘moneiho wa masu a ekumi’ anaphwanyeya Mpiipiliyani.—2 Timóteo 1:13.

11. Enii ekhale hai yoovila wa hiyo ohipaka makupa a elapo wakhala wi ichu nryaahuno ti sookhweleya wa hiyo?

¹¹ Wiithukumanyerya. Vaavaa ikhorowa ni sookhalano sahu inakhalaaya sookhweleya wa hiyo, onamukhala woovila ohipaka makupa a elapo. Evinre eyaakha ya 1970 Anamoona a Yehova ancipale o Malawi yaayeleela echu eri yoothene yaaryaayano nthowa nawi yaakhooca opaka makupa a elapo. Moothananiha, akina yaakhooca oyeleela muhakhu aya. Murokora nsina nawe Ruthi onnuupuwela, “Akina yaakhala vamoha ni hiyo mu nipuro na alipa oophariwa nyenya ohoolo waya yaaphitaana ni alamuleli nave yaakookela owaani woona wi hiyaachuna oyeleela muhakhu aya.” Nyenya akapuro ancipale a Muluku haneera hiiha. Awo annatitelela ohipaka makupa a elapo, moohipwacha wakhala wi anahaala oyeleela ikhorowa ni sookhalano saya.—Ahebri 10:34.

12, 13. (a) Tiheeni Yehova onuupuweleiye vooloca sa alamuleli? (b) Nnii nsuwele hai wakhala wi ninnapacerya wiirumiha nthowa na elapo ahu?

¹² Wiirumiha. Ti wawunlaana achu okhala awiirumiha ni awiikusererya nthowa na muyareriwo, nihimo, sookhovelela, epooma naari elapo aya. Nyenya Yehova hanamoona muchu naari nikhuuru na achu okhala naphaama opwaha nikina. Wa yoowo achu oothene toolikana. Mwawiihiiha, Yehova onipanke mmukhalelo woohiyana ni akina, nave nnaphwanela opuha ni othamalela ohiyana yoola. Owo onachuna wi ncicimihe sookhovelela sahu. Nyenya tho hanachuna wi nuupuwele wi naachu aphaama waapwaha akina.—Aroma 10:12.

¹³ Hannaphwanela wiirumiha nthowa na elapo naari nloko nahu nuupuwelaka wi ti naphaama opwaha na akina. Wakhala wi nnuupuwela mmukhalelo yoola, onahaala okhala woovila wa hiyo ohipaka makupa a elapo. Eyo yaaheereya mu nsana noopacerya. Anna akina a Eheepri yaakhaliha moonanara anaamukhwele yaari Akriki. (Saweriwa T’arummwa 6:1) Nnii nsuwele hai waakhanle wi ninnapacerya wunnuwiha mukhalelo yoola wa wiirumiha? Wakhala wi munna naari murokora a nipuro nikina onnoovahaani ekano, apwanne mwawaakuveya munnaloca, ‘Hiyaano ninnapaka ichu saphaama wenno,’ nave voocharela mukhooca ekano eyo? Wakhala wi ti hiiha muupuwele ekano ela yookhweleya: “Ni wiyeviha ni n’wonaka akhwinyu ntoko atokwene anopwahani nyuwo.”—Filipi 2:3.

YEHOVA ONAMOOKHAVIHERYAANI

14. Nivekelo nnii nnikhaviherye hai, nave yootakiherya ya Piipiliya enooniherya eheeni?

¹⁴ Mukhalelo waneeraru wa ohipaka makupa a elapo ori omuroromela Yehova. Mveke munepa waweela, yoowo onahaala wookhaviheryaani ovilela ni wiihiiha. Mikhalelo seiya inahaala wookhaviheryaani wakhala wi mulamuleli onnapaka echu ehiri yoororomeleya naari yeekhaikhai. Mumveke Yehova miruku wi musuwele echu enahaala weeriha okhala woovila ohipaka makupa a elapo. Nave mumveke owo wi ookhaviheryeeni opaka yeeyo eri yaphaama mmukhalelo yoowo. (Tiyako 1:5) Akhweya munahaala ovonyeriwa mukalaposo naari olakiwa nthowa na ororomeleya wa Yehova. Wakhala hiiha, mveke olipa murima wi muwerye waatharihela akina mmukhalelo wookwakwaleya ntakhara heeni hamunapaka makupa a elapo. Muroromele wi Yehova onahaala wookhaviheryaani ovilela.—Mwaalakhanye Saweriwa T’arummwa 4:27-31.

15. Piipiliya onanikhaviherya hai otitelele ohipaka makupa a elapo? (Moone tho ekaaxa “Masu a Muluku Yaalipiha Soororomeleya Saya.”)

¹⁵ Yehova oonivaha Piipiliya wi anilipihe. Muupuwelele soorepa inahaala wookhaviheryaani otitelela ohipaka makupa a elapo. Mweererye ohuserya soorepa iho nave muupuweleleke, nthowa nawi inahaala wookhaviheryaani wakhala wi himwaanono Piipiliya. Piipiliya onanwerya olipiha ewehereryo anyu mwa yeeyo Muluku olonceiye sa omwaahiyu. Ninnachuna ewehereryo yeeyo wi nivilele wiikariwa. (Aroma 8:25) Muthanle soorepa seiyo inathariha xaxaxa ichu munachunaanyu opuha mu elapo ya hiihaano, nave mwiisaanyiherye mwemmo.

MPHURE ORWEELA WA AKAPURO OOROROMELEYA A YEHOVA

16, 17. Tiheeni nnahuseryaahu orweela wa sootakiherya sa akapuro oororomeleya a Muluku yaatitelenle ohipaka makupa a elapo? (Moone eruku yoopacerya.)

¹⁶ Echu yaneesese enahaala onikhaviherya ohipaka makupa a elapo ori wuupuwela sootakiherya sa akapuro oororomeleya a Yehova. Achu ancipale khalai yaari oolipa murima, nave yaapaka soothanla sa miruku seiyo saakhavihenrye ohipaka makupa a elapo. Muupuwele sa Satraki, Mesaki, ni Apeteneko, yaakhonce olapela yoophwaniherya yaamweemelela mulamuleli o Paapulu. (Mwaalakhanye Taniyeli 3:16-18.) Sootakiherya seiya sa Piipiliya sinnaakhaviherya Anamoona ancipale olelo okhala oolipa murima ni okhooca olapela mapantera mu ilapo anakhalaayamo. Yesu hantonko opaka makupa a elapo naari miyaha saakawanya achu. Owo aasuwela wi yootakiherya awe yaphaama yaahaala waakhaviherya oomuchara awe. Owo aaloca: “Mulipihe murima, miyo kòvotha elapo.”—Yohani 16:33.

¹⁷ Anamoona ancipale mu ilukuluku sahu annatitelela ohipaka makupa a elapo. Akina a yaawo annamaniwa, ovonyeriwa mukalaposo, ni wiiphiwa nthowa na ororomeleya waya wa Yehova. Sootakiherya saya inamunikhaviherya olipa murima. Munna mmoha o Turkiya ooloca: “Franz Reiter aari munna mmiravo yoowo aanyokiwe nthowa na okhooca opaka makupa mu ekhoco ya Hitler. Ekaarata aarepenleiye amannya ohiyu ahaakumve okhwa yaahooniherya nroromelo ntokweene wa Yehova, nave miyaano kaanachuna ochariha yootakiherya awe wakhala wi kookumanano yaweeha ntoko yeeyo.”^[2]—Moone masu a vathi omakuchuwelo.

18, 19. (a) Anna a mmuloko anyu enii yookhaviheryeeni otitelela ohipaka makupa a elapo? (b) Tiheeni mulakelenlaanyu opaka?

¹⁸ Anna ni arokora a muloko anyu anamookhaviheryaani ohipaka makupa a elapo. Mwaaleele atokweene wakhala wi muri mu nikacamiho. Anahaala woovahaani ekano yaphaama orweela Mpiipiliyani. Nave tho wakhala wi achu a mmulokoni aasuwela mukhalelo anyu, awo anahaala woolipihaani. Mwaaveke wi evekele ntakhara nyuwo. Nyenya hiyaano tho nnaphwanela waakhaviherya annihu ni ovekela ntakhara yaawo. (Mateu 7:12) Wi mphwanye masina a annihu ari mukalaposo moone mwaha ori mu jw.org oniichaniwa “Testemunhas de Jeová presas por causa de sua fé—por região,” inaphwanyeya vathi va IMPRENSA > CASOS JURÍDICOS. Muthanle masina vakhaani nave mumveke Yehova wi aakhaviherye anna ni arokora yaala wi elipe murima nave ekhale oororomeleya wa yoowo.—Éfeso 6:19, 20.

¹⁹ Vaavaa nnaacamelaahu makuchuwelo, nnaphwanela oweherya wi alamuleli anahaala onikhinyererya vancipale opaka makupa a elapo. Ti nthowa nene oryaaya wookhweleya wiirehererya hiihaano wi nihipake makupa mu elapo yeela yookawanyeya!

[Masu a vathi]

[Yooleeliherya va epaaxina 22]

Mwiirehererye hiihaano wi muhipake makupa a elapo naamwi mu ilukuluku sookacamiha

[Yooleeliherya va epaaxina 24]

Mulikanyihe yeeyo munawiriyanaanyu ni ‘moneiho wa masu a ekumi’ anaphwanyeya Mpiipiliyani

[Yooleeliherya va epaaxina 25]

Muhuserya soorepa sa Piipiliya inahaala wookhaviheryaani otitelela ohipaka makupa a elapo nave inathariha elapo yahiihaano

[Ekaaxa va epaaxina 25]

Masu a Muluku Yaalipiha Soororomeleya Saya

“Wuupuwelela soorepa sa Masiposipo 27:11, Mateu 26:52, ni Yohani 13:35 saalipiha olekecheya waka wi kikhooce okhala mukhoco. Soorepa seiya saakikhaviherya tho okhala oomaaleleya variyari va saweeha saka.”—Andriya, o Ukraniya.

“Isaiya 2:4 aakikhaviherya otitelela ohipaka makupa a Elapo variyari va yaweeha. Kaanuupuwelela okumi waphaama mu elapo ya hiihaano, vaavaa oneeraaya ohikhalevo muchu onii amukuseke kapuci wi amwiipheno mwaacamani awe.”—Wilmer, o Kolompiya.

[Ekaaxa va epaaxina 26]

MASU ATHARIHIWE

Hiyaano hannapaka makupa mmiyaha sa elapo: Hannapaka makupa a elapo naari mu ikhoco nthowa nawi nnakhaviherya Omwene wa Muluku