Saweeriwa ti Arummwa

2 Variyari va Efesta ya Pentekoste, oothene yaari vamoha, mu nipuro nimoha. 2 Mootutuxa waahiiweya oruma orweela wirimu, yoowo waalikana ni echeku etokweene, nave waasareya mpa moothemwene mummo yaakiraanthaayamo. 3 Yaahooneya wa yaawo malumi ntoko makalume a mooro, nave yaakawanyeya wa mmoha ti mooha a yaawo. 4 Hiihaa, oothene yaasareya munepa waweela, nave epacerya oloca ilocelo soohiyanahiyana,* hiiha ntoko munepa waaweerihaaya oloca.

5 Mu elukuluku yeele, Ayuta oothene oomucicimiha Muluku oorweela maloko oothene a veelaponi yavathi yaari o Yerusalemu. 6 Mwawiihiiha, vaavaa yiiwalaaya oruma yoowo, muloko woothene waathukumana, nave waatikhina woona wi muchu ti muchu aanawiiwa oohuserya elocaka mu elocelo awe. 7 Mweeparipari, oothene yaatikhiniheya enaloca eriki: “Mano, oothene yaala analoca tahi Akalileya? 8 Vano enaweryeya hai wi mmoha ti mmoha a hiyo anawiiwa elocaka mu elocelo* awe? 9 Mwa hiyo aakhalavo achu o Partu, o Meti ni o Elami, achu o Mesopotamiya, o Yuteya, o Kapatosiya, o Pontu ni a elapo yo Asiya, 10 o Frixiya ni o Panfiliya, o Yikuputu ni o makupa o Lipiya waacamela o Sirene, nave akina a hiyo na aleco o Roma, Ayuta ni yaale eemerenrye okhala Ayuta, 11 o Kereti ni a wa Arapiya. Hiyaano noowiiwa elocaka sootikhiniha sa Muluku mu ilocelo sahu.” 12 Oothene yaatikhiniheya nave ehaleeliheya enakohana eriki: “Ela enataphulela eheeni?” 13 Nto akina yaanaaroha eriki: “Ala, ahapaliwe eviinyu yahiihaano.”*

14 Petru aaheemela vamoha ni ale khumi nammoha aloca moovuwa ariki: “Achu nyu o Yuteya ni o Yerusalemu, nwiriyane phaama nave mwiiwe masu aka. 15 Achu ala, hahapaliwe ntoko munuupuwelaanyu, woona wi ela ewora yaneeraru* ya nihiku. 16 Moohiyana, ti yeela yaalociwe moorweela wa mulipa miririmu Yoweli: 17 ‘Muluku oriye: “Mmahiku ookuchula kinarwa kiyeeherya munepa aka wa achu oothene, nave anamwane anyu aasilopwana ni aasithiyana enarwa eloca sa miririmu nave amiravo anyu enarwa ekhalano sawoona nave awunnuwelavo enarwa ekhalano sooloha, 18 ophiyerya wi kinarwa kiyeeherya munepa aka wa akapuro aka aasilopwana ni aasithiyana mmahiku yaawo, nave awo enarwa eloca sa miririmu. 19 Nave kinamweera sootikhiniha wirimu ni ineneeryo veelaponi yavathi: Nikhami, mooro ni meeku a mwiixi. 20 Nsuwa nnarwa nriipa nave mweeri onamuthatuwa nikhami nihaakumve ophiya nihiku ntokotoko ni noocicimiheya na Yehova. 21 Nave oothene yoole oni iichane nsina na Yehova onamvuluxiwa.”’

22 “Achu nyu o Isarayeli mwiiwe masu ala: Yesu, Munaasareti aari mulopwana yoowo Muluku aamutheten’yeiye wa nyuwo, moorweela wa miteko mitokweene, sootikhiniha ni ineneeryo seiho Muluku enreiye moorweela wa yoowo variyari vanyu, hiiha ntoko musuwenlaanyu. 23 Mulopwana owo, aaveleeliwe moorweela wa yoochuna* ni osuwela wa Muluku, nyuwo moomukhomela va mwiri moorweela wa matata a achu oocheka nave mmwiipha. 24 Nto Muluku aamviiha wookhwani, amvuluxa mwa masooso* a okhwa, vawi okhwa hiwaamuwerya omphara. 25 Woona wi Tavite aaloca sa yoowo ariki: ‘Ilukuluku soothene kinnamukuha Yehova ohoolo waka,* vawi owo ori omoono aka woolopwana wi kihirwe kicikinyeyeru. 26 Vanthowa na yeela, murima aka onnahakalala nave nlumi naka ninnachapa. Nave miyo* kinarwa kikhala koororomelakaani nyuwo; 27 woona wi himurwa mukihiya* o Mahiye,* naari mano himweemererya wi oororomeleya anyu oone eyuuce. 28 Nyuwaano mookisuweliha iphiro sa okumi; munarwa mukisareiha ni ohakalala vamiithoni vanyu.’*

29 “Achu nyu, anna, kinaloca kihikhwaaka minikwa sa nikholo nahu Tavite, wi yoowo ookhwa, avithiwa, nave nihiye nawe ninnooneya wa hiyo ophiyerya olelo. 30 Woona wi aari mulipa a miririmu nave aanasuwela wi Muluku aalipela wa yoowo wi mmoha a anamwane awe* aahaala okiraathi va munyukhu awe, 31 owo aahoona khalai oviihiwa mookhwani wa Kristu nave aloca sa yeeyo, wi owo haahaala onyanyaliwa o Mahiye* naari mano mwiili awe woona eyuuce. 32 Muluku omviiha mookhwani Yesu yoola, nave oothene ahu ninneerela onamoona yeela. 33 Mwawiihiiha, woona wi owo oocicimihiwa omoono woolopwana wa Muluku nave ohaakhela wa Atiithi munepa waweela waaroromelihiwe, owo ohiicha yeeyo munoonaanyu ni muniiwaanyu. 34 Tavite haawenle wirimu, nto owo aaloca ariki: ‘Yehova ooloca wa Pwiyaka: “Okiraathe o ntata naka noolopwana 35 ophiyerya kaakunhe amwiicani aa vathi va inaani saa.”’ 36 Mwawiihiiha, achu oothene o Isarayeli suwelani chiri wi Muluku oomweera Yesu Pwiya ni Kristu yoowo mwaamwiiphalaanyu va mwiri.”

37 Vano yiiwalaaya ichu seiha, yaathanana mmurimani nave emukoha Petru ni arummwa akina eriki: “Alopwana, anna, tiheeni nnaphwanelaahu weera?” 38 Petru aawaakhula ii: “Charuwani, nave mmoha ti mmoha a nyuwo apatisiwe mu nsina na Yesu Kristu, wi muleveleliwe soocheka sanyu, nave nyuwo munarwa mwaakhela yamahala ya munepa waweela. 39 Tiwi yoororomeliha ti yawinyu ni ya anamwane anyu ni oothene ari ocai, oothene yaawo Yehova Muluku ahu oneereiye awiichane wa yoowo.” 40 Ni masu makina mancipale, Petru aaheerela onamoona nave aanaalopola yaawo ariki: “Mwiivuluxe wa muyareriwo yoola wootakhala.” 41 Mwawiihiiha, yaale yeemerenrye masu awe moohakalala yaapatisiwa, nave nihiku nenle yaahaaceereryeya echu ya achu macikhwi mararu. 42 Awo yaanatitelela mmahusiheryo a arummwa, okhala vamoha,* olya vamoha ni ovekela.

43 Mweeparipari, oothene* yaanoova nave sootikhiniha sincipale ni ineneeryo saapacerya weereya moorweela wa arummwa. 44 Oothene yaawo yaaroromenle yaakhala vamoha, nave yaanuuka ichu soothene yaakhalaayano, 45 yaanatumiha ichu saya ni imaca saya nave yaanaakawela oothene ikhorowa yaakhelaaya, mwawiiwanana ni soothowa sa muchu ti muchu. 46 Nihiku ti nihiku, ni murima mmoha yaanatitelela othukumana mu empa ya Muluku, yaanalya vamoha mu ipa soohiyanahiyana, nave yaanakawana yoolya aya moohakalala ni murima weeparipari. 47 Yaanamucicimiha Muluku nave achu oothene yaanahakalala ni yaawo. Mu elukuluku emohamoha, Yehova aanatitelela owaacererya nihiku ti nihiku yaale yaavuluxiwa.