Opatiso—Yoolakelela Munaphwanelaanyu Okhalano!

Yesu ooloca wi Akristu anaphwanela opatisiwa. (Mwaalakhanye Mateu 28:19, 20.) Vano, opatiso tiheeni? Nave tiheeni muchu onaphwaneleiye weera wi apatisiwe?

1. Opatiso tiheeni?

Masu awi “opatiso” anarweela mmasu Ekriki enataphulela “oruweiwa” mmaahini. Ti yeela yeeren’ye ni Yesu vaavaa owo aapatisiweiye mmuhice Yortano, mwiili awe woothene waapwinihiwa mmaahini. Ninnasuwela yeela woona wi amanle opatisiwa, owo ‘aakhuma mmaahini.’ (Marko 1:9, 10) Moolikana ni Yesu, vaavaa Akristu eeparipari anapatisiwaaya, mwiili aya woothene onnaruweiwa naari opwinihiwa mmaahini.

2. Tiheeni muchu onooniheryeiye vaavaa onapatisiweiye?

Wi muchu aphwanelele opatisiwa, owo onnavekela wa Yehova amuleelaka wi onnachuna omurumeela mahiku oothene. Owo onnaroromeliha wi onahaala omulapaka pahiru Yehova nave wi opaka yookhwelaawe enahaala okhala echu yoochuneya mu okumi awe. Owo onnalakelela ‘wiikhooca mukhateiye’ ni otitelela ochara mahusiheryo ni yootakiherya ya Yesu. (Mateu 16:24) Nri nthowa na wiiveleela ni opatisiwa, muchu onaweryeiye okhalano onthamwene woolipa ni Yehova ni yaale tho anamurumeela yoowo.

3. Wi muchu apatisiwe tiheeni onaphwaneleiye weera?

Nyuwaano muhaakumve opatisiwa, ti woochuneya ohuserya sa Yehova ni okhalano nroromelo noolipa mwa yoowo. (Mwaalakhanye Ahebri 11:6.) Vaavaa munakhalaanyuno masuwelelo awaaca ni nroromelo noolipa, omusivela wanyu tho Yehova onahaala waaceereryeya. Voocharela, nyuwaano munahaala okhalano nchuno na waaleela sa yoowo ni okhala mwawiiwanana ni malamulo awe. (2 Timóteo 4:2; 1 Yohani 5:3) Vaava muchu onooniheryeiye wi onnachuna okhala wi ‘amuhakalalihe’ Yehova, owo akhweya onnalakelela oveleela ekumi awe wa Muluku ni opatisiwa.—Kolosi 1:9, 10.a

OHUSERYA MWAWIISEELA

4. Ninnahuserya sincipale orweela wa opatiso wa Yesu

Mwaalakhanye Mateu 3:13-17 wi muhuserye sincipale vooloca sa opatiso wa Yesu. Voocharela muthokororye makoho ala:

• Apwanne Yesu aari mwaana vaavaa aapatisiweiye?

• Owo aapatisiwe mmukhalelo taani? Apwanne aarimoona omiseryiwa maahi?

Amanle opatisiwa, Yesu aapacerya muteko wavameekhaaya yoowo Muluku aamvanheiye. Mwaalakhanye Luka 3:21-23 ni Yohani 6:38, nave voocharela muthokororye nikoho nla:

• Amanle opatisiwa Yesu, muteko taani waari woochuneya mu okumi awe?

5. Opatisiwa yoolakelela nyuwaano munaweryaanyu ophwanya

Oloca sa wiiveleela wa Yehova ni opatisiwa enanwerya okhala ntoko murici mutokweene. Nyenya vaavaa nyuwaano munahuseryaanyu sincipale vooloca sa Yehova ni opharihela muteko yeeyo owo onaloceiye, himoovelela opaka yoolakelela yeela yoochuneya. Wi nwoone achu akina yeenreno yeela, moone EXILEMA.

EXILEMA: Como podemos fortalecer nossa amizade com Jeová (1:11)

Mwaalakhanye Yohani 17:3 ni Tiyako 1:5, nave voocharela muthokororye nikoho nla:

• Tiheeni eni emukhaviherye muchu wiirehererya wi apatisiwe?

1. Nniiveleela wa Yehova vaavaa nnamuleelaahu yoowo wi ninnachuna omurumeela yoowo okhala wookhala

2. Variyari va opatisiwa, ninnooniherya wa achu wi nooveleela okumi ahu wa Muluku

6. Vaavaa nnapatisiwaahu ninnapaka makupa a emusi ya Yehova

Vaavaa nnapatisiwaahu, ninnapaka makupa a emusi ya wiiwanana ya elapo yoothene. Moohipwacha elapo ahu naari sookhovelela, oothene ahu ninnaroromela ichu imohamoha nave ninniiwelela malamulo mamohamoha a Muluku. Mwaalakhanye Salumu 25:14 ni 1 Pedro 2:17, voocharela muthokororye nikoho nla:

• Opatiso onavolowela hai onthamwene wa muchu ni Yehova vamoha ni akina anamulapela Yoowo?

MUKWASU

Yesu oohusiha wi Akristu annaphwanela opatisiwa. Wi muchu aphwanelele opatisiwa, onaphwanela okhalano nroromelo noolipa mwa Yehova, okhala mwawiiwanana ni malakiheryo awe, ni omwiiwelela Yoowo.

Makoho awuuluulela

• Opatiso tiheeni, nave ntakhara heeni oryaaya woochuneya?

• Wiiveleela oniiwanana hai ni opatiso?

• Ichu taani muchu onaphwaneleiye weera ahaakumve wiiveleela wa Yehova ni opatisiwa?

OTHOLATHOLA

Muhuserye opatiso tiheeni ni yeeyo ohiryaaya.

“O que é o batismo?” (Artigo do jw.org)

Moone yeeyo muchu onaphwaneleiye weera wi apatisiwe.

“Osivela ni Omuthamalela Yehova Onnahoolela Opatiso” (Mulipeleli a Marsu a 2020)

Mwaalakhanye mukhalelo yoolakelela ya mulopwana mmoha ya opatisiwa yaaryaaya yoothanla ya muchu mukhateiye.

“Eles queriam que eu provasse a verdade por mim mesmo” (A Sentinela, 1.º de fevereiro de 2013)

Muthokororye ntakhara heeni opatiso eryaaya yoolakelela yoophwanelela ni mukhalelo muneeraanyu mwiirehererye.

“Devo me batizar?” (Os Jovens Perguntam—Respostas Práticas, Volume 2, capítulo 37)