MWAHA 26

Ntakhara Heeni Wookhalavo Ichu Soonanara ni Ohooxeya?

Nikupa na Wimprimiiriwa

Vaavaa eneereyaaya echu yoonanaraxa, wiiliwiili achu annakoha: “Ntakhara heeni yeeren’yaaya echu yeela?” Ninnahakalala osuwela wi Piipiliya ookhalano naakhulo na nikoho nenla!

1. Tiheeni Satana eenreiye wi ichu soonanara seereyeke veelaponi yavathi?

Satana Musaserya aammwareela Muluku. Satana aachuna waalamulela akina, mwawiihiiha, owo aahaawoka achu oopacerya, Atamu ni Eva, wi awo tho emmwareele Muluku. Satana aaheerano yeela moorweela wa onwoka Eva. (Maphatxuwelo 3:1-5) Owo aamweeriha Eva wuupuwelaka wi Yehova haachuna wi owo akhaleno echu yeeyo yaari yaphaama. Owo aahooniherya wi achu yaahaala okhala oohakalala wakhala wi hanamwiiwelela Muluku. Satana aaloca yawootha yoopacerya moorweela wa omuleela Eva wi haahaala okhwa. Mwawiihiiha, Piipiliya onnamwiichana Satana “nawoothe, tiithi a wootha.”—Yohani 8:44.

2. Tiheeni Atamu ni Eva yaathanlilaaya weera?

Yehova aari amahalaxa wa Atamu ni Eva. Owo aaloca wi awo yaanwerya olya sawiima sa mwiri ori woothene mu emaca ya Eteni, nyenya hiyaaphwanela olya yawiima ya mwiri mmoha. (Maphatxuwelo 2:15-17) Naamwi hiiha, awo yaalakelela olya yawiima ya mwiri yoole. Eva “aakusha, alya.” Voocharela Atamu “aalya.” (Maphatxuwelo 3:6) Oopiili awo hiyaamwiiwelenle Muluku. Woona wi Atamu ni Eva yaari oophaameya, hiwaari woovila opaka yeeyo eri yaphaama. Nyenya moorweela wa ohimwiiwelela Muluku mwaayiini, awo yaacheka nave ekhooca olamulelo awe. Yoolakelela eyo yaahaaruuhela makacamiho mancipale.—Maphatxuwelo 3:16-19.

3. Ti mwawiihai yoolakelela ya Atamu ni Eva enivolowenlaaya?

Vaavaa Atamu ni Eva yaachenkaaya, awo yaahikhala oohiphaameya. Nave mwawiihiiha, awo yaahaaraviha ohiphaameya anamwane aya oothene. Vooloca sa Atamu, Piipiliya oni: “Ocheka woovolowela mweelapo yavathi mwa muchu mmoha, nave okhwa woovolowa mwa ocheka wu. Hiihaa okhwa, ohaaphwanya achu oothene.”—Aroma 5:12.

Ninnahooxeya ni mathowa oohiyanahiyana. Ikwaha ikina ninnahooxeya ni soolakelela soonanara nipankaahu. Vakina vaya, ninnahooxeya wa nthowa na soolakelela soonanara akina apankaaya. Ilukuluku ikina ninnahooxeya nthowa nawi nri va nipuro ni elukuluku yoohiphwanelela.—Mwaalakhanye Eklesiyaste 9:11.

OHUSERYA MWAWIISEELA

Muthokororye ntakhara heeni Muluku haano nthowa wa ichu soonanara ni ohooxeya nnoonaahu mweelaponi olelo ni mukhalelo owo onooneiye vaavaa nnahooxeyaahu.

4. Mmusuwele yoowo orino nthowa wa ohooxeya wahu

Achu ancipale aneemererya wi Muluku tonalamulela elapo yoothene. Apwanne ela eparipari? Moone EXILEMA.

EXILEMA: Quem controla o mundo? (1:24)

Mwaalakhanye Tiyako 1:13 ni 1 Yohani 5:19, nave voocharela mvaanele sa nikoho nla:

Apwanne Muluku tonatannya ohooxeya ni ichu soonanara ineereya?

5. Muthokororye sookhumelela sa olamulelo wa Satana

Moone EXILEMA.

EXILEMA: Por que existe tanto sofrimento?—Trecho (3:07)

Mwaalakhanye Maphatxuwelo 3:1-6, nave voocharela mvaanele sa makoho ala:

Yawootha taani Satana aalonceiye?—Moone iversikulu 4 ni 5.
Ti mwawiihai Satana oonihenryeiye wi Yehova aavitha echu yaphaama wa achu?
Mwawiiwanana ni Satana, apwanne achu annamuchuna Yehova ntoko mulamuleli aya wi ekhale oohakalala?

Mwaalakhanye Eklesiyaste 8:9, nave voocharela mvaanele nikoho nla:

Variyari va elukuluku yeela Yehova ohireiye Mulamuleli a elapo yeela, tiheeni eneereya?

Eruku: Ichu inooniherya mukhalelo wa elapo ovinyerya vaavaa yaaphuciwaaya ophiyerya mu elapo evyaani ya Parataiso. 1. Elapo ya parataiso orimo miri sooreeraxa. 2. Mu iyaakha sincipale, olamulelo wa achu onnasareiha elapo yavathi ni malapelo atheru, okawanyeya, ikhoco, ni onanariha elapo. Akina a alamuleli oowerya analociwa ti Yikuputu, Xina, Kresiya, Roma, Krapretanya, ni Estatu Unitu. 3. Achu ekhalaka mu Parataiso oorehereriwa veelaponi yeela yavathi.

Atamu ni Eva yaari oophaameya nave yaari mu Parataiso. Nyenya awo yanwiriyana Satana nave emmwareela Yehova
Emanle omwareya, elapo yaasareya ni ocheka, ohooxeya ni okhwa
Yehova onahaala omaliha yoocheka, ohooxeya ni okhwa. Achu anahaala okookela okhala oophaameya ni okhala Mparataiso

6. Yehova onnoona ohooxeya wahu

Apwanne Yehova onnoona ohooxeya wahu? Muthokororye yeeyo Mwene Tavite ni murummwa Petru arempaaya. Mwaalakhanye Salumu 31:7 ni 1 Pedro 5:7, nave voocharela muthokororye nikoho nla:

Munoona hai vaavaa musuwenlaanyu wi Yehova onnoona makacamiho ahu nave onnachuna onikhaviherya?

7. Muluku onahaala omaliha ohooxeya woothene wa achu

Mwaalakhanye Isaiya 65:17 ni Wuupulula 21:3, 4, voocharela muthokororye nikoho nla:

Ntakhara heeni ti yoolipiha osuwela wi Yehova onahaala oviihavo ohooxeya woothene achu anahoolelaaya?

Nyuwaano mwaanasuwela?

Vaavaa Satana aalonceiye yawootha yoopacerya, owo aamootherya Yehova. Ela tiwi, owo aaweeriha achu wuupuwela soonanara vooloca sa Yehova moorweela wa oloca wi Yehova tahi Mulamuleli aphaama ni oosivela. Vaavaa Yehova onahaaleiye omaliha makacamiho aachu muhoolo, owo onahaala weeliha nsina nawe. Mmasu makina, owo onahaala wooniherya wi olamulelo awe chiryene ti waphaama. Weelihiwa wa nsina na Yehova ori mwaha woochuneya mweelapo yoothene.—Mateu 6:9, 10.

ACHU AKINA ANI: “Yoochuna ya Muluku ntakhara hiyo ori wi nihooxeyeke.”

Mwaahaala wi hai?

MUKWASU

Satana Musaserya, Atamu ni Eva tarino nthowa ntokweene wa makacamiho a mweelaponi. Yehova onnanipwacha vancipale, nave voohilekela owo onahaala omaliha makacamiho.