MWAHA WA EKAAPA​—MUNII MPUHE HAI MUTEKO ANYU

Mukhalelo wa Opuha Muteko Wakuru

“Olya ni owurya, opuha wa itxhu sa muteko ahu, ti yovaha ya Muluku.” (Eklesiyaste 3:13; Bibiliya Nsu na Muluku, BNM) Woona wi Muluku onnachuna wi nipuheke muteko ahu, apwanne tahi yoophwanelela wi onahaala onooniherya mukhalelo wa ophwanya ohakalala yoowo? (Yesaya 48:17) Mweeparipari onneerano yeeyo moorweela wa Masu awe, Piipiliya. Muthokororye ikano sa Piipiliya inacharela sa ophwanya ohakalala mmuteko anyu.

MUKHALENO MOONELO WAPHAAMA NTAKHARA MUTEKO

Moohipwacha muteko anyu waari wa opharihela muupuwelo, ophara ni mata naari mukina, musuwele wi “muteko wothene wokhalano nlivelo naya.” (Masiposipo 14:23, BNM) Mukhalelo taani wa nlivelo? Muteko wakuru onnanikhaviherya waakhwaniherya soothowa soomwiilini. Chiri, Muluku onnaroromeliha waakhwaniherya soothowa sa yaale anamurumeela mweeparipari. (Mateyu 6:31, 32) Nyenya tho owo onachuna wi nipake makupa ahu moorweela wa wiilipixerya okhalano okumi wawookololowa.​—2 Atesalonika 3:10.

Mwawiihiiha, nnaphwanela woona muteko ahu ntoko mukhalelo wa ophwanya mphurelo. Muteko, mukhalelo onanikhaviherya waakhwaniherya mirici sahu. Yosuwa a iyaakha 25 onnaloca: “Echu yoohakalaliha owerya wiivakulela. Wakhala wi muchu onnawerya olivela yeeyo enamuthowa, mwawiihiiha muteko awe wookhalano mphurelo.”

Mwawaacererya, muteko wakuru onnanikhaviherya okhalano ncicimiho wa hiyo mukhatiihu. Opwaha soothene, muteko wakuru chiryene onachuneya ikuru. Vaavaa nnuumelelaahu muteko ahu​—naamwi okhalaka wi ti wooceecheiha naari woovila​—ninnaphwanya ohakalala onarweela wa osuwela wi nnakhala mwawiiwanana ni meecelo a vasulu. Ninnavootha mathitimaleno a ochara meerelo ookhweya. (Masiposipo 26:14) Mmukhalelo yoowo, muteko onnakumiherya ohakalala. Aaroni oromoliwe mmwaha ovinre onnaloca: “Kinnasiveliwa ni moonelo kinakhalaakano omakuchuwelo wa nihiku na muteko. Kinnakhala oovelavela​—nave muteko aka akhweya honooniwa ni akina​—nyenya kinnasuwela wi koheera echu.”

NWETHE MMUTEKO ANYU

Piipiliya onnamuloca mulopwana yoowo “onaphara phama muteko awe” ni muthiyana yoowo “mahiku othene onakhala òweiwa.” (Masiposipo 22:29; 31:13, BNM) Mweeparipari, mavyakelo hanamoona ophacuwa. Nave haavo mmoha a hiyo onasiveliwa weera echu ohinasuweleiye weerano phaama. Akhweya ti nthowa nenlo ancipale ahinasiveliwaaya ni muteko aya; awo pahiru hanawetha wi esuwele weerano phaama.

Chiryene, muchu onahaala osiveliwa ni muteko vyakala wakhala wi oneerano ni muupuwelo waphaama​—eyo ti wi, wakhala wi muchu onnateteiwa ochuna ohuserya mukhalelo wa weerano phaama. Wiliyamu a iyaakha 24 onnaloca: “Ti yoohakalaliha vaavaa muchu onawetheiye mmuteko ni woona sookhumelela sene. Muchu hanakhalano ohakalala yoowo moorweela wa ochara meerelo ookhweya naari ohiilipixerya.”

MUTEKO ANYU ONNAAKHAVIHERYA AKINA

Musepe muraakho wa wuupuwelela pahiru waaca wa ikhorowa munaakhelaanyu. Ohiya yeeyo, mwiipakele makoho ntoko ala: ‘Ntakhara heeni muteko ola ti woochuneya? Tiheeni yaahaala weereya waakhanle wi hiweeriweno​—naari hiweeriweno phaama? Muteko aka onaakhaviherya hai akina?’

Ti woophwanelela wuupuwelela nikoho nookuchula, ntakhara wi muteko ti woohakalaliha vaavaa nnoonaahu mukhalelo onaakhaviheryaaya akina. Yesu aaloca: “Ovaha onnan’réliha opwaha ni wakhela.” (Saweriwa Tarummwa 20:35) Ophitaanyerya yaale anaphura orweela wa muteko ahu​—ntoko alipa oothuma ni asipwiya​—aakhalavo achu akina anaphura orweela wa muteko ahu wakuru. Awo anaphitaanyerya achu a veechokoni vahu ni ale oothoiwa.

Achu a veechokoni vahu. Vaavaa muhooleli a echoko onalaepeiye wi avakulele echoko awe, owo onnaakhaviherya mmikhalelo miili. Woopacerya, onniilipixerya wi akhwaaniherye soothowa saya soomwiilini​—yoolya, yoowara ni wookhalavo. Mwawiihiiha owo onnaakhwaniha murici awe woorweela wa Muluku wa ‘ovakulela empáwesha.’ (1 Timoteo 5:8) Wanaawiili, muhooleli a echoko onnahusiha ochuneya waya olapa mwakuru moorweela wa yootakiherya. Shane oromoliwe mmwaha ovinre ooloca: “Apapa aka yootakiherya yaphaama ya muchu orino meerelo aphaama a muteko. Awo mulopwana oororomeleya analapa mwakuru, elukuluku yincipale elapaka ni ithaapwa. Moorweela wa yootakiherya aya, koohuserya esisapo ya ophara muteko ni mata, oteka ichu inahaala ophariheliwa ni akina.”

Ale oothoiwa. Murummwa Paulo aahaaceenyerya Akiristu ‘ophara muteko worera ni mata aya wi ekhaleno yomvakulela mulipa-othowiwa.’ (Aefeso 4:28) Chiryene, vaavaa nnalapaahu mwakuru wi niivakulele vamoha ni echoko ahu, nnahaala owerya tho waakhaviherya ale oothoiwa. (Masiposipo 3:27) Mwawiihiiha olapa mwakuru onahaala onikhaviherya opuha ohakalala otokweene onarweela wa ovaha.

MPWAHIHERYE

Va Mwaha wa Mwaako, Yesu aaloca: “Nave yowo ówatetela omhóla ephiro emoha, oroweno pili.” (Mateyu 5:41) Munii mpharihele hai nlakiheryo na masu yaala mmuteko anyu? Ohiya pahiru weera vakhaani, mwaavyaavye weera moopwahiherya opwaha yeeyo enachuneya. Mutikitherye soolakelela sanyu; nwethe ophara muteko anyu phaama naari mwamvai opwaha enawehereryiwa. Muhakalale ni makhalelo oothene a muteko anyu.

Vaavaa munapwahiheryaanyu, munahaala opuha muteko anyu. Ntakhara heeni? Nthowa nawi nyuwaano munnawerya ovareryela saweera sanyu. Munneerano ni murima anyu woothene, ohiya nthowa na okhinyereryiwa ti muchu mukina. (Filemoni 1:14) Mmwaha yoola, nnaphwanela wuupuwelela nlakiheryo nnaphwanyeya mu Masiposipo 12:24, BNM: “Mutxhu awilipixerya mmutekoni, onamulamula; ntata noporora, nnamukhala kapuro.” Mweeparipari, haavo mmoha a hiyo onahaala okhala kapuro naari okhinyereryiwa muteko. Nyenya muchu yoowo oneerano yavakhaani onahaala wiisoona okhala kapuro, wiiliwiili alamuleliwaka ni akina. Nyenya muchu yoowo onapwahiherya​—eerakano sincipale moochuna mwawe​—onnavareryela okumi awe. Owo onnakhala mwaneene a saweera sawe.

MUHELE MUTEKO VA NIPURO NOOPHWANELELA

Olapa mwakuru ti waphaama, nyenya nnaphwanela wuupuwela wi okumi onnavolowela sincipale opwaha muteko. Chiryene, Piipiliya onnaceenyerya mvai. (Masiposipo 13:4) Nyenya Piipiliya hanaceenyerya okhala namalapa oohiichuuwa. Eklesiyaste 4:6, BNM, onii: “Ti yotxhuneyasa mutxhu witxhùwa vakhani, èliwaka murima ni itxhu vakhani, ohiya muxthu olapa ahiphurak’etxhu.” Yoohuserya ene? Namalapa oohiichuuwa harwa apuha yookhumelela ya muteko awe wakhala wi onnamaliha elukuluku ni ikuru sawe soothene. Ntoko yookhumelela, muteko awe honakhalano mphurelo onakhala ntoko “wikara etxheku.”

Piipiliya onnanikhaviherya okhalano moonelo woophimelela ntakhara muteko. Naamwi Piipiliya alocaka wi nnaphwanela owetha mmuteko ahu, onnanceenyerya tho “othalela yaphama.” (Filipi 1:10, BNM) Tiivi iri ichu saphaama? Ichu iho inaphitaanyerya omaliha elukuluku ni emusi naari asinthamwene. Ichu soochuneyaxa iri miteko soomunepani, ntoko waalakhanya Masu a Muluku ni wuupuwelela.

Yaale arino moonelo woophimelela annapuha vancipale muteko aya. Wiliyamu oromoliwe omapacereryo ooloca: “Namalapa aka mmoha yootakiherya yaphaama ya muchu orino meerelo oophimelela a muteko. Owo onnalapa mwakuru, nave onnalociwa phaama ni anamathuma awe nthowa na oreera wa muteko awe. Nyenya omakuchuwelo wa nihiku, wamala muteko, owo onnahiya muteko awe oculi nave onnathokororya emusi ni malapelo awe. Nave echu yootikhiniha ti yawi: owo muchu oohakalalaxa kimusuwenlaaka!”

[Ekaaxa va epaaxina 5]

Anoona Hai Muteko Wakuru

“Vaavaa kinakhalaaka oovelavela omakuchuwelo wa nihiku, kinnoona okhala oohakalala. Koosuwela wi koolapa chiryene mu nihiku nenle.”​—Nick.

“Olapa mwakuru mukhalelo waphaamaxa wa olapa. Wakhala wi munaya opaka echu yasisapo, mweereno yeeyo phaama.”​—Kristina.

“Mwiili wa muchu onnawerya weera ichu sootikhiniha. Kinnasiveliwa wooniherya othamalela yamahala ya okumi moorweela wa opharihela okumi wi kalape mwakuru ni waakhaviherya achu akina.”​—Tavite.