“Tithi, Ntakhara Yosivenle Hiha”

“Ntakhara wòvitha itxhu iha wa alipa a miruku ni òsuwela, nave owonin’he seiho atxhu akhani.”​—LUKA 10:21, BNM.

MWAHAALA WAAKHULA HAI?

Sootakiherya taani sa hiihaanoru inooniherya wi Yehova onnavaha ohusiha wookwakwaleya ni wookhweya?

Mukhalelo wa othariha saweereya sa Mpiipiliyani onatorokeya hai vakhaani vakhaani?

Wiiwexexa wahu maphwanaphwaniho a Yesu onookololiwa mwawiihai?

 1. Ntakhara heeni Yesu “àhèliwa murima mwa Munepa Wawela”? (Moone eruku yoopacerya.)

MUNNAWERYA waanyiherya mukhalelo Yesu Kiristu aakhanleiye vaavaa ‘èliweiye murima mwa Munepa Wawela’? Akhweya munnaanyiherya otheya wawe, miitho awe yaaryaka nthowa na ohakalala. Tiheeni yaamweerinhe otannyeya murima? Owo aamanle waarumiha oohuserya 70 wi yalaleerye michaka yaphaama ya Omwene wa Muluku. Owo aanachuna woona mukhalelo yaahaalaaya weerano orummwa waya. Yaakhalavo amwiicani awuupa a michaka yaphaama, ntoko anamarepa ni Afarisi yaawo yaari oohusiheya. Awo yaaweeriha ancipale omoona Yesu ntoko mulipa a ithaapwa pahiru ni owoona oohuserya awe ntoko ‘atchu óhihuserya ni óhísuwela.’ (Saw. 4:13; Mar. 6:3) Naamwi hiiha, oohuserya ale yaakooka oosareya ohakalala. Awo yaalaleerya moohipwacha wiiciwa, ophitaanyerya wiica woorweela wa masololo! Tiheeni yeerinhe wi ekhale oohakalala ni oolipa murima?​—Mwaalakhanye Luka 10:1, 17-21.

 2. (a) Mukhalelo taani oohuserya a Yesu yaaryaaya ntoko makwiya? (b) Tiheeni yaakhavihenrye oomuchara a Kiristu wiiwexexa iparipari soomunepani?

² Muthokororye yeeyo Yesu aalonceiye wa Yehova: “Kinákhulelana ni Nyuwo, Atithi, Mwanene Wirimu ni vathi vano, wi mwákhuwa hiho wa alipa-miruku ni ósuwelasha, nave mwáhupululela hiho wa makwiya. Ai, Atithi, ntakhara yawihihá yákhala yohakalaliha va mithoni vanyu.” (Mat. 11:25, 26) Chiri, Yesu haachuna oloca wi oohuserya awe yaari makwiya chiryene. Moohiyana, owo aasuwela wi yaari makwiya moolikanyiha ni achu oohusiheya a veelaponi, yaawo yiisoona okhala amiruku. Echu yoochuneyaxa, Yesu aahaahusiha oomuchara awe okhala ntoko makwiya, ekhalaka awiiyeviha ni awiiwelela mahusiheryo. (Mat. 18:1-4) Yaaphunre hai moorweela wa okhala awiiyeviha? Moorweela wa munepa waweela, Yehova aahaakhaviherya wiiwexexa iparipari soomunepani, nyenya alipa oohuserya yaawo yaawiica, yaatitelela wuumihiwa miitho ti Satana ni wiirumiha waya.

 3. Tiheeni nnayaahu othokororya mmwaha yoola?

³ Tahi yootikhiniha wi Yesu aatepa ohakalala! Woona mukhalelo Yehova uupulunleiye ichu sawiiseela sa iparipari soomunepani wa achu awiiyeviha a mukhalelo woothene moohipwacha mavyakelo aya, yaamweeriha Yesu ohakalala. Owo aanahakalala nthowa na Tiithi awe weerano mukhalelo yoola wa ohusiha. Apwanne Yehova ootoroka, nave onooniherya hai wi nlelo onneerano mukhalelo yoola wa ohusiha? Vaavaa nnaalikhelaahu naakhulo, nnahaala ophwanya ohakalala, hiiha ntoko Yesu.

WUUPULULA IPARIPARI SAWIISEELA WA ACHU OOTHENE

 4. Mukhalelo taani Mulipeleli ookhweya omwaalakhanya oreiye yamahala yoosivela?

⁴ Mu iyaakha sahiihaanoru, ohusiha woomunepani yoowo onavahiwa ni marehereryo a Yehova onnakhala wookhweya ni wookwakwaleya. Muthokororye sootakiherya raru. Yoopacerya, ookhalavo Mulipeleli ookhweya omwaalakhanya.a Mulipeleli owo yamahala yoosivela wa yaale arino makacamiho a elocelo naari waalakhanya. Ahooleli a ichoko annoona wi anamwane aya vano anniivoliiherya mu yoohuserya ya Mulipeleli okhanle ephiro etokweene ya yoolya ahu yoomunepani. Ancipale annarepa ikaarata yooniheryaka othamalela waya. Murokora mmoha aarepa wi aahiya waakhula mu yoohuserya ya Mulipeleli. Owo oorepa: “Kaakhala oomaala ene.” Vano amanle ompharihela Mulipeleli ookhweya, owo oorepa: “Vano kinnaakhula opwaha ekwaha emoha, nave woova waka wookuukunuwa! Kinnamuthamalela Yehova vamoha ni nyuwaano.”

 5. Tuuvi ori mphurelo wa Tradução do Novo Mundo muvyaani?

⁵ Yanaawiili, ookhalavo Tradução do Novo Mundo das Escrituras Sagradas ookhweya, yoowo ovonyiwe mu Enklesi va muthukumano wa vayaakhani wa 5 a Otupuru a 2013.b Soorepa sincipale vano irino masu vakhaani, nave yootaphulela aya emohamoha nave yookwakwaleya. Ntoko yootakiherya, Yupu 10:1 aarino masu 27 vano orino masu 19; Masiposipo 8:6 aarino masu 20 vano orino masu 13. Soorepa soopiili iha ti sookwakwaleya mu Piipiliya muvyaani. Munna mmoha awoocihiwa onarumeela iyaakha sincipale ooloca: “Kaamwaalakhannyaaka liivuru a Yupu mu Piipiliya muvyaani, kaamwiiwexexa ntoko kampaceryaru omwaalakhanya!” Ancipale annaloca emohamoha.

 6. Munoona hai vooloca sa wiiwexexa ovyaani wa Mateyu 24:45-47?

⁶ Yaneeraru, muthokororye matorokelo ahiihaanoru a wiiwexexa wahu. Ntoko yootakiherya, wiiwexexa wahu ovyaani vooloca sa “kapuro óroromeleya” ni amiruku, olaleeryiwe mu Mulipeleli 15 a Yulyu a 2013 waanitikhiniha. (Mat. 24:45-47) Yaalociwa wi kapuro oororomeleya ti Nikhuuru Noolamulela, nave “nloko” anaahiwa oothene yaale analyihiwa omunepani, awoocihiwa ni “ipuchepuche sikina.” (Yoh. 10:16) Echu yoohakalaliha ohuserya iparipari seiya ni waahusiha ale avyaani! Mikhalelo taani Yehova onooniheryeiye wi onnahusiha mmukhalelo wookhweya ni wookwakwaleya?

OTHARIHA WOOKHWEYA NI WOOKWAKWALEYA WA SAWEEREYA SA PIIPILIYA

7, 8. Tiivi siri sootakiherya sa saweereya soosiphela sa Mpiipiliyani?

⁷ Waakhanle wi munnamurumeela Yehova ovinyerya khalai, akhweya mohoona matorokelo mmukhalelo soolaleeryiwa sahu inatharihaaya saweereya sa Mpiipiliyani. Mwawiihai? Khalai, yaari yawunlaana soolaleeryiwa sahu othokororya soosiphela sa saweereya sa mu Soorempwa. Yaweereya ya Piipiliya yiichaniwa ntoko muuruchi, nave waakhwanela waya wa omwaahiyu yiichaniwa ntoko eparipari ene. Apwanne Piipiliya ookhalano saweereya irino sootaphulela soosiphela? Aai. Ntoko yootakiherya, Yesu aaloca sa “eneneryo ya Yona mulipa-miririmo’wo.” (Mwaalakhanye Mateyu 12:39, 40.) Yesu aathariha wi Yoona okhala wawe mmirimani mwa ehopa​—naahaala okhala nihiye nawe waakhanle wi Yehova haamooponle​—yaari yoosiphela ya elukuluku ya Yesu okhala mu nihiye.

⁸ Piipiliya ookhalano saweereya soosiphela ikina. Murummwa Paulo aathokororya sincipale sa seiyo. Ntoko yawooniherya, wiiwanana variyari va Aaparahamu, Hakari ni Saara yaasiphela wiiwanana variyari va Yehova ni nloko na Isarayeli ni nikupa na wirimu na marehereryo a Muluku. (Akal. 4:22-26) Moolikana, tapernaakulu ni empa ya Muluku, Nihiku na Okhurumuweliwa, mulipa eephepa ni mikhalelo mikina sa Nlamulo na Moose saari “muruli wa itchu sorera sinorwa iho.” (Ahe. 9:23-25; 10:1) Ti yootikhiniha ni yoolipiha nroromelo ohuserya saweereya seiya soosiphela. Apwanne nnanwerya oloca wi, achu, saweereya ni miyaha soothene inaromoliwa Mpiipiliyani saasiphela echu ekina?

 9. Yaweereya ya Mpiipiliyani ya Napoti yaatharihiwa hai khalai?

⁹ Khalai, olikanela weiwo waanathokororyiwa wiiliwiili. Ntoko yootakiherya, muthokororye yaweereya ya Napoti, yoowo wiiphiwa wawe waarehereryiwe ni mulipa oonanara Yesapeli mwaara a mwene wi iyawe Akape akuxe emaca ya Napoti. (1 Mam. 21:1-16) Mu 1932 oya oculi, yaweereya yeela yaatharihiwa wi yaari yoosiphela. Yaalociwa wi Akape ni Yesapeli yaasiphela Satana ni marehereryo awe; wi Napoti aasiphela Yesu; wi okhwa wa Napoti waasiphela wiiphiwa wa Yesu. Ohoolo waya, mu liivuru “Nsina Nanyu Nélihiwe,” aavonyiwe mu 1961, yaalociwa wi Napoti aasiphela awoocihiwa, nave Yesapeli aasiphela malapelo atheru. Hiiha, Yesapeli omwiikara wawe Napoti waasiphela wiikariwa wa awoocihiwa mmahiku ookuchula. Mu iyaakha sincipale, achu a Muluku yaanoona okhala yoolipiha nroromelo olikanela wuuwu. Nave ntakhara heeni ichu sootorokeya?

10. (a) Ephoole taani miruku inavahaaya vooloca sa othariha saweereya ikina sa Piipiliya? (b) Olelo soolaleeryiwa sahu sinateteiwa ni eheeni?

¹⁰ Moophwanelela, moovira wa iyaakha Yehova onnamukhaviherya “kapuro óroromeleya” ni amiruku opwahiherya okhala amiruku. Miruku sinneeriha okhalano ephoole etokweene vooloca sa othariha yaweereya ya Piipiliya ntoko yoosiphela waahikhala wi aakhalavo mathipelo awooneya a Piipiliya a weerano yeeyo. Mwawaacererya, enooneya wi matharihelo akhalai vooloca sa saweereya ni soosiphela saya toovila wiiwexexa wa achu ancipale. Ichu sa mahusiheryo yaawo​—ichu ntoko yoosiphela naari echu enasiphela ni mathowa aya​—ti soovila okhapelela, wuupuwelela ni opharihela. Echu etokweenexa ti yawi, soohuserya soophara muteko sa saweereya sa Piipiliya inanwerya okhala sooriipiheya naari oyeleela mphurelo aya nthowa na othokororyiwa soosiphela ni waakhwaniheryeya waya. Mwawiihiiha, soolaleeryiwa sahu olelo sinavuwiha soohuserya soophara muteko vooloca sa nroromelo, ovilela, omulapa Muluku ni mikhalelo mikina soochuneya nnahuseryaahu orweela wa saweereya sa Mpiipiliyani.c

11. (a) Vano nniiwexexa mwawiihai yaweereya ya Napoti, nave ntakhara heeni yootakiherya ya mulopwana yoola ennanihusiha echu? (b) Ntakhara heeni soolaleeryiwa sahu samutano hasinaloca ikwaha sincipale soosiphela sa saweereya? (Moone “Makoho a Alipa Waalakhanya” mu Mulipeleli yoola.)

¹¹ Vano, nniiwexexa mwawiihai yaweereya ya Napoti? Mmukhalelo wookhweya ni wookwakwaleya. Mulopwana ola eekhaikhai ookhwa, ohiya wi akhale yoosiphela ya Yesu naari ya awoocihiwa, nyenya nthowa nawi aahuumelela ekhaikhai. Owo aahiiwelela Nlamulo na Yehova naamwi ahooxeyaka ni wiikariwa. (Nam. 36:7; 1 Mam. 21:3) Yootakiherya awe ennanihusiha echu ntakhara mmoha a hiyo akhweya onahaala wiikariwa ni mathowa mamohamoha. (Mwaalakhanye 2 Timoteo 3:12.) Achu a mukhalelo woothene ananwerya wiiwexexa, wuupuwela ni opharihela yoohuserya yeela yoolipiha nroromelo.

12. (a) Muupuwelo taani nihinaphwanelaahu okhalano vooloca sa saweereya sa Piipiliya? (b) Ntakhara heeni ninnawerya wiiwexexa phaama ichu sawiiseela? (Moone masu a vathi.)

¹² Mano nnaphwanela wuupuwela wi saweereya sa Piipiliya inaphariheleya mu echu emoharu nave hisaano yootaphulela ekina? Hooye. Olelo soolaleeryiwa sahu inanihusiha wi yaweereya emoha ennanuupuxerya echu naari ennalikanela ni echu ekina. Inathokororya vakhaani saweereya sa Piipiliya seiyo irino soosiphela. Ntoko yootakiherya, nnanwerya oloca wi ororomeleya wa Napoti variyari va wiikariwa ni okhwa ennanuupuxerya ororomeleya wa Kiristu ni awoocihiwa awe. Ennanuupuxerya tho ororomeleya wa “ipuchepuche sikina” sa Apwiya. Olikanela wuuwu wookhweya ni wookwakwaleya onnavaha onamoona wawi owo ohusiha woomuluku.d

OTHARIHA WOOKHWEYA WA MAPHWANAPHWANIHO A YESU

13. Sootakiherya taani inooniherya wi vano ninnathariha maphwanaphwaniho makina a Yesu mmukhalelo wookhweya ni wookwakwaleya?

¹³ Yesu Kiristu aari Muhusiha mutokotoko yoowo aakhanle veelaponi yavathi. Mukhalelo awe woohusiha waavolowela opharihela maphwanaphwaniho. (Mat. 13:34) Maphwanaphwaniho yaanaakhaviherya alipa oowiriyana ohela mmuupuwelo miyaha nave yaanatannya murima. Apwanne soolaleeryiwa sahu tho sinnathariha maphwanaphwaniho a Yesu mmukhalelo wookhweya ni wookwakwaleya? Naakhulo ti nawi aai! Hiyaano hanaahakalanle wiiwexexa maphwanaphwaniho a Yesu vooloca sa yooruruvaliha, mwaammiso wa evai, ni moowaya mu Mulipeleli 15 a Yulyu a 2008? Vano ninnoona phaama wi maphwanaphwaniho yaala anaphariheleya Omwene wa Muluku ni yookhumelelaaya ya waathukumanya oomuchara eeparipari a Yesu mu elapo yeela yoonanara.

14. (a) Naathariha hai niphwanaphwaniho na Musamariya? (b) Vano nniiwexexa hai niphwanaphwaniho nenla na Yesu?

¹⁴ Hanka vooloca sa maphwanaphwaniho yaawo Yesu aalonceiye? Maphwanaphwaniho makina a yaawo, toosiphela ni ooloherya; makina anaceenyerya soohuserya soophara muteko. Mwawiihai? Voovira wa iyaakha, naakhulo ninnakhala nawooneya. Ntoko yootakiherya, muthokororye mukhalelo naatharihaahu mwaha wa Yesu vooloca sa Musamariya. (Luka 10:30-37) Mu 1924, Mulipeleli aaloca wi Musamariya aamusiphela Yesu; mphiro wookhuma o Yerusalemu oya o Yeriko waakhuruwela opopani waasiphela meecelo oonanara a achu opacerya omwaryeya o Eeteni; ampava mu ephiro yaasiphela marehereryo matokweene a maroca naari awiiya; nave mulipa eephepa ni Muleevi yaasiphela marehereryo a malapelo atheru a mukhalelo yoola wa ichu. Olelo, soolaleeryiwa sahu inapharihela miyaha seiya wi iwuupuxerye Akiristu oothene wi hannaphwanela okhalano nthalu mu waavaha nikhaviheryo ale oothoiwa, xaxaxa mmukhalelo woomunepani. Apwanne hannahakalala woona mukhalelo Yehova oneeriheiye mahusiheryo awe okhala ookwakwaleya wa hiyo?

15. Tiheeni nnahaalaahu othokororya mmwaha onacharela?

¹⁵ Mmwaha onacharela, nnahaala waalikhela niphwanaphwaniho nikina na Yesu​—na asimwali khumi. (Mat. 25:1-13) Yesu onachuna wi oomuchara awe a mahiku ookuchula yiiwexexe hai niphwanaphwaniho nenla? Ntoko yooloherya erino yootaphulela yoosiphela yeeyo enaphariheleya wa muchu, echu naari yaweereya? Naari onachuna wi oomuchara awe epharihele yoohusiha aya wi yaahoolele mmahiku ookuchula? Hankooni noone.

[Masu a vathi]