“Atxereryà Mwa Hiyo Nroromelo”

“Khaviheryà ohiroromela waka”!​—MARKO 9:24.

MACIPO: 81, 135

MWAAHAALA WAAKHULA HAI?

Ntakhara heeni ti woochuneya olipiha nroromelo nahu?

Nnii nteke hai nroromelo nahu?

Nnooniherya hai wi nookhalano nroromelo noolipa?

 1. Ntakhara heeni nroromelo ti noochuneya? (Moone eruku yoopacerya.)

APWANNE montoko wiikoha: ‘Khwino Yehova onahaala okivuluxa mu yoohooxa etokotoko?’ Murummwa Paulo ooloca wi echu yoochuneyaxa wi nivuluwe ori okhalano nroromelo. Owo aaloca: “Mutxhu ohirino [nroromelo] hanawerya omusiveliha Muluku.” (Ahebri 11:6) Ela enakhala ntoko ti yookhweya, nyenya eparipari ti yawi “tahi wi othene arimukhalano nroromelo.” (2 Tesalónika 3:2) Soorepa seiya piili sinnanikhaviherya wiiwexexa wi ti woochuneya olipiha nroromelo nahu.

2, 3. (a) Teevi eri esisapo ya nroromelo nahu? (b) Tiheeni nnahaalaahu othokororya?

² Murummwa Petro aaloca sa nroromelo ‘nawereryiwa.’ (Mwaalakhanye 1 Pedro 1:7.) Yoohooxa etokotoko yohaacamela, nave nnachuna okhala “òroromela wi nivuluse” okumi ahu. (Ahebri 10:39) Mwawiihiiha, ti woochuneya owetha wi nlipihe nroromelo nahu. Ninnachuna okhala variyari va yaale anahaala omwaakhela phatamari vaavaa Mwene ahu Yesu Kiristu oneereiye isooneihe. Moolikana ni mulopwana amveke Yesu nroromelo nawaaca, hiyaano tho nnaphwanela oloca: “Khaviheryà ohiroromela waka!” (Marko 9:24) Nave moolikana ni arummwa, nnaphwanela tho oloca: “Atxereryà mwa hiyo nroromelo.”​—Luka 17:5.

³ Mmwaha yoola, nnahaala othokororya makoho ala: nnii nteke hai nroromelo nahu? Nnii nooniherye hai wi nroromelo nahu ti noolipa? Nave mathowa taani anaphwanela oneeriha ororomela wi Muluku onahaala onaakhula vaavaa nnamvekaahu nroromelo?

MULUKU ONNAHAKALALA VAAVAA NNATEKAAHU NROROMELO NAHU

 4. Sootakiherya taani inahaala onikhaviherya olipiha nroromelo nahu?

⁴ Woona wi nroromelo ti noochuneya, Yehova oonivaha sootakiherya sincipale sa nroromelo orweela Mpiipiliya. Iho “irepeliwe wi inihusihe.” (Aroma 15:4) Sootakiherya sa Aprahaamu, Saara, Isaki, Yakopo, Moose, Rahapi, Kiteyoni, Parukhi ni akina, inahaala onikhaviherya olipiha nroromelo nahu. (Ahebri 11:32-35) Mwawaaceererya, nookhalano tho sootakiherya saphaama sa anna ni arokora amutano.a (Moone masu a vathi.)

 5. Eliya oonihenrye hai wi aakhalano nroromelo noolipa wa Yehova, nave tiheeni nnaphwanelaahu wiikoha?

⁵ Yootakiherya emoha ya Mpiipiliya ti ya mulipa a miririmu Eliya. Vaavaa munuupuwelaanyu yootakiherya awe, muthokororye mikhalelo mithanu oonihenryeiye nroromelo noolipa wa Yehova. (1) Vaavaa Eliya aamulenleiye Mwene Akape wi Yehova aahaala oruuha elimwi, moolipa murima aaloca: “Kinnolopola mwa nsina n’Apwiya, Muluku a Isarayele, . . . miyano mulapeli awe: miyakha sa mmwahiyu herupa epwila nari hinimà nikami.” (1 Mamwene 17:1) (2) Eliya aanaroromela wi Yehova aahaala omvaha owo ni akina echu yaachunaaya variyari va elimwi. (1 Mamwene 17:4, 5, 13, 14) (3) Eliya tho aaroromela wi Yehova aahaala omviiha mookhwani mwaana a naamukhwele. (1 Mamwene 17:21) (4) Haarino minikwa wi mooro wa Yehova waahaala weeyela mukucho awe o Mwaako Karmelo. (1 Mamwene 18:24, 37) (5) Naamwi epwila ehaakumve opacerya orupa, ni nroromelo Eliya aahi wa Akape: “Hawe walye ni wawurye, ntakhara onniweya oruma wa epwila.” (1 Mamwene 18:41) Nimanle othokororya saweereya seiya, nnanwerya wiikoha: ‘Apwanne nroromelo naka ti noolipa ntoko na Eliya?’

TIHEENI NNAPHWANELAAHU WEERA WI NTEKE NROROMELO NAHU?

 6. Tiheeni enachuneya wi nteke nroromelo nahu?

⁶ Woona wi hannawerya oteka nroromelo ni ikuru sahu, nnaphwanela omveka Muluku wi anivahe munepa waweela. Ntakhara heeni? Nthowa nawi nroromelo makupa a sawiima sa munepa waweela. (Galasya 5:22) Ti yaphaama ochariha ekano ya Yesu ni oveka munepa waweela mu nivekelo. Yesu oororomeliha wi Yehova onahaala waavaha “munepa wawela yawo ananveka.”​—Luka 11:13.

 7. Mutharihe ti mwawiihai nnahaalaahu okhapelela nroromelo nahu wi nikhale noolipa.

⁷ Nimanle okhalano nroromelo noolipa wa Muluku, nnaphwanela okhapelela. Nnanwerya olikanyiha nroromelo ni mooro. Vaavaa nniiseelaahu mooro, makalume anakhala matokweene. Nyenya wakhala wi hannahelavo ikhuuni, owo onahaala okukuceya ophiyerya oxipha. Nto wakhala wi ninnahelavo ikhuuni, owo onahaala otitelela ovarela. Moolikana, wakhala wi ninnatitelela waalakhanya ni ohuserya Masu a Muluku mahiku oothene, omusivela wahu Piipiliya ni Yehova onahaala wunnuwa. Ntoko yookhumelela, nnahaala okhapelela ni olipiha nroromelo nahu.

 8. Echu taani enahaala wookhaviheryaani oteka ni okhapelela nroromelo nanyu?

⁸ Moohuserya ichu sincipale muhaakumve opatisiwa nyenya muhikotele vaava. (Ahebri 6:1, 2) Ntoko yootakiherya, ohuserya sooloherya ikhwaanenle, enahaala wookhaviheryaani oteka ni okhapelela nroromelo nanyu. Mpharihele tho Masu a Muluku wi moone waakhanle wi nroromelo nanyu ti noolipa chiryene.​—Mwaalakhanye Tiyako 1:25; 2:24, 26.

9, 10. Nroromelo nahu nnalipiheya hai moorweela wa (a) asinthamwene aphaama? (b) mithukumano Seekiristu? (c) olaleerya?

⁹ Murummwa Paulo aaloca wi Akiristu ananwerya ‘olipihana va nthowa na nroromelo’ naya. (Aroma 1:12) Ela enataphulela eheeni? Vaavaa nnamalihaahu elukuluku ni annihu ninnalipiha nroromelo na mukina ni mukhwaawe. Ela enneereya xaxaxa vaavaa nnakhalaahu ni yaale arino nroromelo ‘nawehiwa’. (Tiyako 1:3) Asinthamwene oonanara annapahula nroromelo nahu, nto asinthamwene aphaama annateka. (1 Korinto 15:33) Ti nthowa nene nnaceenyeryiwaahu ophiya mmithukumano moohihiyererya. Mwemmo, ninnatitelela ‘olipihana.’ (Mwaalakhanye Ahebri 10:24, 25.) Mwawaaceererya, sooleeliherya nnaakhelaahu mmithukumano sinnalipiha nroromelo nahu. Piipiliya onaloca wi “wemererya onarwa onlaleryoni.” (Aroma 10:17) Mwawiihiiha, mwiikohe: ‘Apwanne mithukumano Seekiristu ti soochuneya mu okumi aka?’

¹⁰ Ninnalipiha tho nroromelo nahu vaavaa nnalaleeryaahu michaka yaphaama ya Mpiipiliya. Moolikana ni Akiristu a khalai, ninnahuserya omuroromela Yehova nave ninnalaleerya moolipa murima mmikhalelo soothene.​—Saweriwa T’arummwa 4:17-20; 13:46.

11. Ntakhara heeni Kalepi ni Yosuwa yaakhalano nroromelo noolipa, nave nnii naatakiherye hai?

¹¹ Nroromelo nahu wa Yehova ninnannuwa vaavaa nnoonaahu mukhalelo onanikhaviheryeiye ni waakhula mavekelo ahu. Ti yeeyo yeeren’ye ni Kalepi ni Yosuwa. Awo yaahooniherya nroromelo wa Yehova vaavaa yaakelaaya ohocela Elapo ya Nlakano. Moovira wa elukuluku, nroromelo naya naanaaceereryeya vaavaa yoonaaya nikhaviheryo na Yehova. Ni nroromelo, Yosuwa aahaaleela Aisarayeli: “Maroromeliho othene awerenlayani Apwiya, Muluku anyu, hinavo nroromeliho nimoharu niheren’ye: othene ahereya.” Ohoolo waya aaloca: “Tiva, mwatxitximiheke Apwiya ni mwalapeke yawo ni murima waphama ni wa eparipari.” Owo aahaaceererya: “Ntakhara miyano ni ahima aka nni nalapeke Apwiya.” (Yosuwa 23:14; 24:14, 15) Vaavaa nnamuroromelaahu Yehova ni woona mukhalelo onanikhaviheryeiye, nroromelo nahu nnahaala okhala noolipa.​—Salumu 34:8.

NNII NOONIHERYE HAI NROROMELO NAHU

12. Nnii nooniherye hai wi nookhalano nroromelo noolipa?

¹² Nnii nooniherye hai wi nookhalano nroromelo noolipa? Murummwa Yakopo ooloca: “Nave miyano kini kiwonihe ni miteko nromelo naka.” (Tiyako 2:18) Saweera sahu sinnooniherya wi nookhalano nroromelo noolipa. Noone ti mwawiihai.

13. Nnooniherya hai nroromelo vaavaa nnalaleeryaahu?

¹³ Olaleerya mukhalelo waphaamaxa wa wooniherya nroromelo nahu. Ntakhara heeni? Nthowa nawi vaavaa nnalaleeryaahu, ninnooniherya wi ninnaroromela wi makuchuwelo ahaacamela nave wi “helekelà”! (Habakukhi 2:3) Wi nsuwele waakhanle wi nroromelo nahu ti noolipa, nnaphwanela wiikoha: ‘Apwanne olaleerya ti woochuneya wa miyo? Kinnawetha waaleela akina sa Muluku? Kinnaavya ikari sa opaka sincipale mmuteko wa Yehova?’ (2 Korinto 13:5) Hankooni nooniherye wi nookhalano nroromelo noolipa moorweela wa ‘olokoha ni masu anakeriha wovuluwani,’ ela ti wi, olaleerya michaka yaphaama.​—Mwaalakhanye Aroma 10:10.

14, 15. (a) Nnii nooniherye hai nroromelo mu okumi ahu wa nihiku nnihiku? (b) Muloce yaweereya enooniherya nroromelo noolipa.

¹⁴ Ninnooniherya tho nroromelo nahu wa Yehova vaavaa nnavilelaahu sawuukhula sa okumi mweelapo yeela. Vaavaa nnakhalaahu oohaawa, awiiceliwa, oothanana naari makacamiho makina, nnaphwanela ororomela wi Yehova ni Yesu anahaala onivaha “nikhaviheryo wa elukuluku yophwanelela.” (Ahebri 4:16) Ninnooniherya nroromelo wa Yehova vaavaa nnamvekaahu nikhaviheryo. Yesu aaloca wi nimveke Yehova wi anivahe “yolya ahu ya nihiku ti nihiku.” (Luka 11:3) Saweereya sa Mpiipiliya sinnooniherya wi Yehova onanwerya onivaha yeeyo enanthowa. Ntoko yootakiherya, variyari va elimwi etokweene o Isarayeli, Yehova aamvaha Eliya yoolya ni maahi. Piipiliya onaloca wi “anakhuku yànamuruhela ephau ni emetxe wosiselo ni osekuwa. Awurya mahi a muhitxe.” (1 Mamwene 17:3-6) Ninnaroromela tho wi Yehova onahaala onivaha yeeyo enanthowa.

¹⁵ Ninnaroromela wi vaavaa nnapharihelaahu malakiheryo a Piipiliya, nnahaala owerya okhwaaniha soothowa sa echoko ahu. Repeka, murokora ootheliwa onakhala o Asiya, onnathariha mukhalelo owo ni echoko awe yaapharihenlaaya malakiheryo anaphwanyeya mu Mateu 6:33 ni Masiposipo 10:4. Owo ooloca wi iyawe aahoona wi muteko awe waanananariha onthamwene aya ni Yehova. Mwawiihiiha, iyawe aahiya muteko. Nyenya yaakhalano anamwane axexe yaaphuwaaya, mwawiihiiha yaapacerya omweeca nakoso. Ntoko yookhumelela, awo annawerya okhwaaniha soothowa sa echoko ni ikhorowa anaphwanyaaya. Repeka onnaloca: “Naahoona wi Yehova haaninyanyanle. Hinitonko okona nihilyile.” Mookhalano yaweereya yoolikana yeeyo yaalipinhe nroromelo nanyu?

16. Tiheeni enahaala weereya wakhala wi ninnamuroromela Muluku?

¹⁶ Nihikhwe minikwa wi nachara ohoolela wa Yehova, owo onahaala onikhaviherya. Paulo aaromola masu a Hapakukhi vaavaa aalonceiye: “Awokololowa anamukhala wa nthowa na wemererya [nroromelo].” (Galasya 3:11; Habakukhi 2:4) Ti nthowa nene nnaphwanelaahu okhalano nroromelo noolipa wa Yoole chiryene onawerya onikhaviherya. Paulo onnanuupuxerya wi Muluku “onawerya wera sothene opwahasa nnavekahu ni nnupuwelahu, ntoko ikuru inereya mwa hiyano.” (Éfeso 3:20) Alapeli a Yehova anneera yoothene anaweryaaya wi epake yoochuna ya Muluku, nyenya tho annasuwela wi aakhalano sookotakota saya. Ninnathamalela woona wi Muluku ori ni hiyo nave onnareeliha wiilipixerya wahu.

WAAKHULIWA WA YOOVEKA

17. (a) Yesu aawaakhunle hai arummwa? (b) Ntakhara heeni nnaphwanela oweherya wi Yehova onahaala waakhula yooveka ahu ya nroromelo nawaaca?

¹⁷ Orweela wa yeeyo nthokoronryaahu, nnanwerya okhalano moonelo woolikana ni wa arummwa vaavaa yaamvenkaaya Yesu: “Atxereryà mwa hiyo nroromelo.” (Luka 17:5) Yesu aawaakhula oohuserya awe mmukhalelo wavameekhaaya mu Pentekoste a 33, vaavaa yaakhenlaaya munepa waweela ni owerya wiiwexexa yookhwela ya Muluku. Ela yaalipiha nroromelo naya. Teevi yaari yookhumelela ene? Awo yaapaceryiha mukipici mutokweene wa olaleerya mweelukuluku yeele. (Kolosi 1:23) Apwanne nnaphwanela oweherya wi yooveka ahu ya nroromelo enahaala waakhuliwa? Yehova onnaniroromeliha wi onahaala waakhula “nanveka etxhu ntoko okhwela wawe.”​—1 Yohani 5:14.

18. Yehova onaareeliha hai yaale anateka nroromelo naya?

¹⁸ Wakhala wi ninnamuroromela Yehova ni murima woothene, owo onahaala ohakalala. Owo onahaala waakhula yooveka ahu ya nroromelo nawaaca, nroromelo nahu nnahaala olipa, nave nnahaala ‘ophwanelela omwene’ wa Muluku.​—2 Tesalónika 1:3, 5.

[Nsu na vathi]

[Ekaaxa va epaaxina 21]

MASU ATHARIHIWE

Ninnateka, naari olipiha nroromelo nahu moorweela wa oveka munepa waweela, omwaalakhanya Piipiliya mahiku oothene, ophiya mmithukumano, okhala ni anna ni olaleerya michaka yaphaama