MWAHA WA EKAAPA

Ntakhara Heeni Yesu Aahooxeya Nave Akhwa?

“Vano ntoko wa nthowa na mutxhu mmoha pahi [Aatamu] yòvolowa mwelaponi yotxheka, navetho ni yotxheka wòvolowa mwelaponi okhwa, hihatho okhwa wòhaphwanya atxhu othene, ntakhara atxhu othene àtxheka.”—Aroma 5:12

Tiheeni mwaahaalaanyu oloca waakhanle wi mookohiwa, “Munnachuna okhalano ekumi yoohimala?” Achu ancipale akhweya yaahaala oloca wi annachuna, nyenya awo anoona wi tahi yaphaama othokororya sa yeeyo. Okhwa makupa a okumi wa nihiku nnihiku, awo analoca wi, muyareriwo ahu ovinyerya khalai.

Vano nkuupuwelani waakhanle wi moopakeliwa nikoho nla, “Muri ooreheryeya wi mukhwe?” Achu ancipale yaahaala waakhula, hooye. Ela enooniherya eheeni? Naamwi nihooxeyaka ni makacamiho nnakumanaahuno mapakeliwo, ni mukhalelo ahu ori okhala. Piipiliya onnooniherya wi Muluku onipatunxe ni nchuno na okhala. Chiryene Piipiliya onnaloca: “Mw’atxhu Muluku òkuhamo otxhuna” okhala wookhala.—Eklesiyaste 3:11.

Eparipari ti yawi achu hanakhala okhala wookhala. Vano, tiheeni enananre? Apwanne Muluku onnapaka echu wi arehererye mukhalelo yoola? Maakhulo a Mpiipiliyani toohakalaliha, nave mwemmo wookhalamo otharihiwa wookwakwaleya ntakhara heeni Yesu aahooxeya nave akhwa.

TIHEENI ENANANRE?

Icima raru soopacerya sa liivuru a Mpiipiliyani Maphatxuwelo onnaleela wi woopaceryani Muluku ahaakumve ompaka mutheli oopacerya Aatamu ni Haava, aatikitherya ekumi yoohimala nave aaloca yeeyo yaahaalaaya weera wi ekhaleno. Voocharela saweereya sinnaloca mukhalelo awo ahensaaya omwiiwelela Muluku ni oyeleela ewehereryo yeela. Saweereya sinalociwa mookhweya—ophiyerya wi akina annakuvela okhooca ntoko soororomela satheru. Nyenya Maphatxuwelo, hiiha ntoko Michaka sinnavaha sawooniherya sincipale opacerya wa saweereya sa miyaha.a

Teevi eri yookhumelela ya ohiiwelela wa Aatamu? Piipiliya onnaakhula mmukhalelo ola: “Vano ntoko wa nthowa na mutxhu mmoha pahi [Aatamu] yòvolowa mwelaponi yotxheka, navetho ni yotxheka wòvolowa mwelaponi okhwa, hihatho okhwa wòhaphwanya atxhu othene, ntakhara atxhu othene àtxheka.” (Aroma 5:12) Moorweela wa ohimwiiwelela Muluku, Aatamu aacheka. Hiiha owo ooyeleela ewehereryo ya okumi woohimala nave ookhwa. Nave nloko nawe, noorava mukhalelo awe woocheka. Ntoko yookhumelela hiyaano ninniiceliwa, wuuluvala ni okhwa. Otharihiwa wuuwu ntakhara heeni nnakhwaahu onniiwanana ni yeeyo alipa oohuserya yoonnaaya vooloca sa mukhalelo anamwane anaravaaya mikhalelo sa asitiithi aya. Apwanne Muluku onnapaka echu wi arehererye mukhalelo yoola?

YEEYO MULUKU ONEEREIYE

Aai, Muluku oopaka marehereryo wi oopole, naari alive, yeeyo Aatamu oyeleelinheiye nloko nawe, ewehereryo ya okumi woohimala. Muluku onakhwaaniherya hai yeela?

Piipiliya onnaloca mu Aroma 6:23: “Nlivelo na yotxheka ti okhwa.” Ela enataphulela wi okhwa yookhumelela ya yoocheka. Aatamu aacheka, mwawiihiiha ookhwa. Moolikana, hiyaano ninnacheka nave ntoko yookhumelela ya yoocheka, ninnakhwa. Nyenya nnayariwa oochekeeni tahi nthowa nahu. Moosivela Muluku aamurumiha Mwanawe, Yesu, wi aakhwaniherye “nlivelo na yotxheka” wa hiyo. Eyo eneereya hai?

Ovinyerya wa muchu mmoha, Aatamu oophaameya, oonruuhela yoocheka ni okhwa nthowa na ohiwiiwelela, waari woochuneya okhwa muchu oophaameya awiiwelela, wi noopoliwe wa nlivelo na yoocheka. Piipiliya onnathariha mmukhalelo ola: “Vamohamoha, ntoko eryaya atxhu othene ekhala òtxheka wa nthowa na ohiwelela wa mutxhu mmoharu, hihatho wa nthowa wa wiwelela wa mutxhu mmoha atxhu othene annokololiwa ti Muluku.” (Aroma 5:19) Yesu aari “mutxhu mmoharu” yoowo. Owo aakhuma wirimu, akhala muchu oophaameyab, nave akhwa wa nthowa nahu. Ntoko yookhumelela, yooweryeya wa hiyaano weeriwa achu eekhaikhai vamiithoni va Muluku ni okhalano ewehereryo ya okumi woohimala.

NTAKHARA HEENI YESU AAHOOXEYA NAVE AKHWA

Vano, ntakhara heeni waaryaaya woochuneya wi Yesu akhwe wi aakhwaniherye yeela? Apwanne hiwaari wookhweya wa Muluku Aikuru Soothene weeriha wi anamwane a Aatamu ekhaleno ekumi yoohimala? Owo chiryene aakhalano owerya wa weerano hiiha. Nyenya haahaala ohicicimiherya nlamulo aalonceiye sa nlivelo na yoocheka ori okhwa. Mu nlamulo nla hiyaavo echu yaahaala otoroka waakhwanela waya. Ala mathipelo a ekhaikhai yeeparipari.—Salumu 37:28.

Waakhanle wi Muluku oohiya okhwipi ekhaikhai mmwaha yoola, achu yaahaala wiikoha wakhala wi owo aahaala weerano phaama mmikhalelo mikina. Ntoko yootakiherya, apwanne aahaala okhala eekhaikhai mu olakelela wi variyari va nloko na Aatamu taani ahaala ophwanelela okhalano ekumi yoohimala? Ahaala okhwaaniherye yoolaiherya awe? Muluku, moorweela wa weerano ekhaikhai ni olapa moowetha ntakhara ovuluxiwa wahu ennaniroromeliha wi owo onahaala weeraka yeeyo eri yaphaama.

Moorweela wa okhwa wa Yesu, Muluku oohula ephiro ya ya ekumi yoohimala Mparataiso veelaponi yavathi. Moone masu a Yesu anaphwanyeya va Yohani 3:16: “Muluku òtepa wakhwela atxhu a mwelaponi, ophiyerya onvaha Mwana awe mmoharu, wi mutxhu onamwemererya yowo, ahirimele, nto akhaleno ekumi yohimala.” Mwawiihiiha okhwa wa Yesu yawooniherya ohiya pahiru ya ekhaikhai ya Muluku, nyenya osivela otokotoko oreiyeno ntakhara achu.

Vano, ntakhara heeni Yesu aahooxeya nave akhwa mmukhalelo woohooxa onalociwa mu Michaka? Vaavaa eehiweiye nave iikhalelaru oororomeleya, Yesu aakhooca masu a Musaserya awi achu hiyaahaala okhalaka oororomeleya wa Muluku vaavaa anakumanaayano ni makacamiho. (Yobi 2:4, 5) Masu ala akhweya yaakumiherya mphurelo Satana amanle omuhuweliha Aatamu wi acheke. Nyenya Yesu—yoowo aari Aatamu oophaameya oolikana—ahiikhalelaru oororomeleya naamwi aahooxeya vancipale. (1 Korinto 15:45) Owo ahooniherya wi Aatamu tho aahaala omwiiwelela Muluku waakhanle wi oothanla weerano hiiha. Moorweela wa ovilela ni soohooxa, Yesu oonihiyerya nooniheryo wi ncharihe. (1 Pedro 2:21) Muluku oomvaha phatamari Mwanawe oophaameya ni awiiwelela, morweela wa omvaha okumi woohikhwa wirimu.

NYUWAANO MUNII MPHURE HAI

Okhwa wa Yesu woheereya chiryene. Ephiro ya ekumi yoohimala eri yoohuliwa ene. Munnachuna okhalano ekumi yoohimala? Yesu ohooniherya yeeyo enakhweleya wi neere, vaavaa owo olonceiye: “Ekumi yohimala ti ela: wi yawo yosuwele weyano Muluku mmoharu ni a eparipari, ni emusuwele yole omurummawe, Yesu kristu.”—Yohani 17:3.

Alaleeryi a erevista ela annoowopaani wi muhuserye sincipale vooloca sa Yehova, Muluku eeparipari, ni Mwanawe Yesu Kiristu. Anamoona a Yehova a ekulucu anyu anahaala osiveliwa wookhaviheryaani. Munanwerya tho waakhela miyaha sookhaviherya moorweela wa ompharihela site ahu www.jw.org/ngl.

[Masu a vathi]

[Ekaaxa va epaaxina 7]

“Mwereke Yela”

Mu ohiyu ahaakumve ovaha ekumi awe, Yesu aathukumana ni arummwa awe oororomeleya nave aahipaceryiha Wuupuwelela okhwa wawe. Owo aaloca wa yaawo ariki: “Mwereke yela mukupuwelaka miyano.” (Luka 22:19) Mu wiiwelela nlamulo nla, Anamoona a Yehova a elapo yoothene annathukumana eyaakha eri yoothene mu wuupuwelela okhwa wa Yesu. Eyaakha evirale, achu awaakhwana 19.862.783, yaaphiya va yaweereya yeela.

Eyaakha yeela, Wuupuwelela okhwa wa Yesu onii okhale NANEERARU, 23 A MARSU A 2016, namala oneela nsuwa. Nyuwaano ni emusi vamoha ni asinthamwene anyu munnawompwa wi mphiye nave muwiriyane mwaha onarweela Mpiipiliyani. Onahaala othariha ntakhara heeni okhwa wa Yesu ti woochuneyaxa ni mukhalelo onahaalaaya woovahaani mphurelo. Ovolowa ti wa mahaleene, hamuvekiwa ikhorowa. Wi musuwele elukuluku nnipuro na yaweereya yeela, khwoo muloce ni Anamoona a Yehova a ekulucu anyu. Naari muye mu www.jw.org/ngl.