Okumi Woohakalaliha Mmuteko wa Yehova

Eyaakha emoha ohoolo waya, anna yaapaka yoolokoha wa emusi yo Peteli wi o filiyale yo Afrika tu Suli, waanachuneyawo alipa awiiveleela nthowa nawi yaakhalawo maakina mavyaani a wimpirimiira. Kaarepiha nsina naka wi kiyewo, nave kaatepa ohakalala vaavaa kaathanliwaaka. Mapetelita akina araru o Kanata yaathanliwa tho—Dennis Leech, Bill McLellan, ni Ken Nordin. Naaleeliwa wi mmoha ti mmoha aahaala waakhela epilyeti!

Kaahaalikaarela amama aka: “Mama, kookhalano muchaka muvyaani wi kooleeleeni. Kinaya o Afrika tu Suli!” Amama aka yaari oomaala nyenya yaakhalano nroromelo ni onthamwene woolipa ni Yehova. Awo hiyaalonce ichu sincipale, nyenya kaanasuwela wi yaahaala okikhaviherya. Naamwi amama aka ni apapa yaari awuukhuwa wi kaahaala oya ociiwene, awo hiyaakaanhe yoolakelela aka.

Woopaceryani naaya o Peteli yo Brooklyn, weiwo naakhenlaahuwo ovyakiha mu miyeeri miraru vooloca sa maakina avameekhaaya a wimpirimiira. Voocharela naanwela mwaaceya n’yaaka opooma yo Cape, o Afrika tu Suli. Kaarino pahiru iyaakha 20. Naavinya opooma yo Cape n’yaaka waakhela ovyakiha o Johannesburg, nave naacimunle ohiyu. Woopaceryani oyaaka nooxa naaheemela mu epooma ekhaani ya Karoo, yeeyo yaacamenle ntakhwa nikhaani. Eyo yaari ya nchupi ni yooviha. Ooseese ahu naathurumela orweela vaxanelani, nave naatikhiniheya ni mukhalelo nipuro nle naakhanlaaya. Naahuukhuwa vooloca sa mukhalelo muteko yoola muvyaani waahaalaaya okhala. Ohoolo waya, vaavaa naakelaahu mukuma yoola wanaawiili, naahoona wi epooma yeela ekhaani yaari yoohakalaliha ni yoomaaleleya.

Muteko aka waari olapa ni maakina ootikhiniha ni ookacamiha awiichaniwa Linotype, yaawo yaarehererya ipapeli wi yimpirimiire irevista sa Mulipeleli ni Vinyani! Efiliyale yaanimpirimiira irevista mu ilocelo sincipale so Afrika ohiya pahiru o Afrika tu Suli nyenya tho sa ilapo sincipale so Afrika Oomoko. Naahakalala woona wi maakina yaala mavyaani a wimpirimiira yaaruule o Kanata yaanaphariheleya vancipale!

Ohoolo waya, kaalapa mu Ekupweete yeeyo yaakhapelela miteko mincipale ntoko wimpirimiira, orumiha soolaleeryiwa, ni muteko wootaphulela. Okumi aka waari wooweiwa, woohakalaliha, nave tho waakhalano yootaphulela.

Mu 1968, kaamuthela murokora yoowo aari piyoneera, Laura Bowen, yoowo aakhala waacamela o Peteli. Owo tho aalapa mu Ekupweete Yootaphulela. Mu elukuluku yeele, atheli avyaani hiyeemereryiwa okhala o Peteli, mwawiihiiha efiliyale yaanileela wi narumeele ntoko mapiyoneero avameekhaaya. Kaakhala awuukhuwa, woona wi saavira iyaakha khumi kiri o Peteli weiwo naavahiwaahuwo yoolya nnipuro nookhalavo, naahaala owerya hai othumaka echu eri yoothene yeeyo naachunaahu pahiru ni ikhorowa vakhaani seiho naavahiwaahu mmuteko ahu wa opiyoneero wavameekhaaya? Hiyaano naahaala okhaviheryiwaka ni atoolare $35 o Amerika mweeri ti mweeri nyenya tho waanachuneya waakhwaniherya iwora saachuneya, opaka oxekurya, ni okawa soolaleeryiwa. Ni ikhorowa seiha waanachuneya olivano empa, othumano yoolya, opakano mikwaha, othumano murece ni ichu ikina soochuneya.

Naathanleliwa nikhuuru nikhaani waacamela epooma yo Durban, o Oseyano Intiku. Achu ancipale a mukuma yoole yaari o Intiya, ancipale a yaawo yaari muyareriwo wa anamalapa yaawo yaaya o Afrika tu Suli wi yalape mu fapirika a asukari variyari va 1875. Hiihaano awo annalapa miteko mikina, nyenya nlelo aakhalano sookhovelela saya ni mukhalelo aya wa waapeya, ophitaanyerya mathaapa oosiva. Nave awo annaloca Enklesi, yeeyo yeerinhe wi okhale wookhweya wa hiyaano.

Mapiyoneero avameekhaaya yaaweheryiwa wi emaliheke iwora 150 mweeri ti mweeri mmuteko woolaleerya, mwawiihiiha miyaano ni Laura naapaka marehereryo wi nilapeke iwora thanu nammoha nihiku ti nihiku. Yaanakhala elukuluku yooriirya ni yooviha. Hiyaano hinaarino oxekurya naari soohuserya sa Piipiliya—pahiru naaphwanela omaliha iwora thanu nammoha mmuteko woolaleerya empa ni empa. Nihiku nenlo naapacenryaahu, nlaleenrye vakhaani kaaweha ewora aka nave koona wi pahiru yaavinre aminutu 40! Kaahuukhuwa vooloca sa mukhalelo naahaalaahu owerya opaka opiyoneero wavameekhaaya.

Moohilekela, naapaka marehereryo aphaama. Nihiku ti nihiku naanarehererya yoolya nave naanamuhela chaaya mu etermo. Nachuna olya, naaneemexa ekaaro ahu va muuruxi. Ilukuluku ikina anamwane akhaani ooreera o Intiya yaanakiraathi ni hiyaano nave enaniweha nthowa nawi naari oohiyana ni yaawo! Mahiku vakhaani ohoolo waya, naahoona wi vaavaa naamalihaahu iwora piili naari raru, naanoona wi nihiku naanaakuvela omala.

Yaari yoohakalalihaxa ohuserya iparipari sa Mpiipiliyani ni achu yaawo yaari oowaakhela aleco mu ekulucu yeele! Naahoona wi achu ancipale o Intiya yaari oocicimiha, oothamalela, nave yaanamoova Muluku. Ahintu ancipale yaanaakhulela michaka seiho naaleelaahu. Awo yaanasiveliwa ohuserya vooloca sa Yehova, Yesu, Piipiliya, omwaahiyu wa elapo evyaani ya murecele, ni ewehereryo ya alipa ookhwa. Eyaakha emoha ohoolo waya, naakhalano soohuserya sa Piipiliya 20. Nihiku ti nihiku, naanalya vamoha ni emoha wa imusi seiho naahuseryaahuno. Naari oohakalala.

Nyenya moohilekela naahaakhela murici mukina. Naaleeliwa wi nakhale ooweherya a ekulucu o Oseyano Intiku. Esumana ti esumana, naanakhala aleco mmavaate mwa imusi seiho naaxekuryaahu nave naanalapa vamoha ni alaleeryi a mmulokoni wi naalipihe. Awo yaananikhaliha ntoko achu a veemusini vaya, nave naanahakalala omaliha elukuluku ni yaawo, anaaya, ni mihuwo saya. Saaviravo iyaakha piili soohakalaliha. Voocharela, mootutuxa naahaakhela wiichana orweela o filiyale. Munna aahi: “Nnachuna wi mukookele o Peteli.” Kaahaakhula, “Moosuwela, hiyaano ninnahakalala vancipale wenno nryaahuwo.” Nyenya mweeparipari, hiyaano naaphwanela ophariheliwa mmuteko ori woothene yoowo neeraahu nivahiwe.

O Peteli kaalapa mu Etepartamentu ya Muteko, nave kaakhalano ekari ya olapa vamoha ni anna awunnuwa omunepani, nave tho a mavyakelo. Mmahiku yaale, ooweherya a ekulucu amanle oxekurya muloko owo aanavonya yoolokoha o filiyale. Voocharela masekeretaariyu yaanavonya ekaarata wa muloko mwawiiwanana ni yoolokoha ya ooweherya a ekulucu. Yoolakelela ya ikaarata iho waari olipiha ni ovaha ohoolela vyakala yoowo waachuneya. Masekeretaariyu yaanalapa vancipale wi etaphulele soolokoha sa ooweherya a ekulucu orweela elocelo Xhosa, Zulu ni ilocelo ikina oyano o Enklesi. Voocharela awo yaanataphulela ikaarata soorweela o filiyale mu ilocelo so Afrika. Kaanathamalela vancipale muteko mutokweene wa alipa ootaphulela yoowo waakikhavihenrye wiiwexexa makacamiho yaawo annihu ni arokora ahu o Afrika yaahoolelaaya.

Mu elukuluku yeele, o Afrika tu Suli naakhalawo nlamulo vooloca sa achu oohiyana mahimo. Nihimo ti nihimo naavahiwa mukuma aya, mwawiihiiha achu a nihimo nikina hiyaaphwanela okhala vamoha ni achu a nihimo noohiyana. Annihu o Afrika yaaloca ilocelo saya, yaalaleerya mu ilocelo saya, nave yaapaka mithukumano mu ilocelo saya.

Miyaano nkaasuwenle anna ancipale o Afrika, woona wi ekulucu ya muloko aka yaaloca pahiru Enklesi. Naamwi hiiha, kaakhalano ekari ya osuwela sa anna o Afrika ni sookhovelela saya. Kaahuserya vooloca sa makacamiho yaawo annihu yaahoolelaaya nthowa na sookhovelela sa vanipuroni ni soororomela sa malapelo. Awo yaari oolipa murima! Awo yaanakhooca sookhovelela seiho saahiiwanana ni Soorempwa. Nave tho yaanakhooca ochariha ichu seiho siiwanana ni onamulosiwe naamwi awo yaavilela ni wiiciwa orweela wa imusi saya ni muceche woothene. Achu ancipale a mmawaani yaari oohaawa vancipale. Ancipale yaahusenrye vakhaani nave akina hiyaahusenryeru, nyenya awo yaanamucicimiha Piipiliya.

Kaakhalano ekari ya olapa mmiyaha mikina seiho saavolowela otaphuwa wa malapelo ni ohivolowela miyaha sa epoliitika. Yaari yoolipiha vancipale woona ororomeleya ni olipa murima wa anamwane yaari Anamoona a Yehova yaawo yiikariwa oxikola nthowa na okhooca ovekela ni omwiipa iinu.

Anna yaahoolela nikacamiho nikina mu elapo ekhaani yo Afrika yiichaniwa Suwasilantiya. Vaavaa Mwene Sobhuza II aakhwileiye, anamurala oothene yaaleeliwa wi yaaphwanela opaka sookhovelela ikina seiho achu yaapakaaya muchu amanle okhwa. Alopwana yaaphwanela ocema miihi aya, nave athiyana yaaphwanela okwata miihi aya nave ekhale ookhuveya. Anna ni arokora ancipale yaahiikariwa nthowa na okhooca opaka makupa mu yaweereya yeela yooniherya waalapela makholo. Ororomeleya waya ntakhara Yehova waananihakalaliha vancipale! Naahuserya sincipale vooloca sa ororomeleya ni opisa murima wa annihu o Afrika, nave eyo yaalipiha nroromelo nahu.

Mu 1981, kaavekiwa wi kakhaviherye mmuteko wa ohela meerelo mavyaani a wimpirimiira mu akomputatore. Mwawiihiiha kaachikela muteko wa wimpirimiira. Ela yaari elukuluku yoohakalalihaxa! Meerelo a wimpirimiira yaatorokeya vancipale. Alipa ootumiha a vanipuroni yaavaha efiliyale maakina mavyaani yaawo yaalapa ohirivo nikacamiho. Ela yaaheeriha wi nraceelihe maakina mathanu naxexe a Linotype naaryaahuno ni maakina mathanu mavyaani. Naapacerya opharihela maakina yaala mavyaani nave naanimpirimiira vancipale opwaha khalai!

Muteko wa olapa ni akomputatore waaheeriha wi erehereryiwe meerelo mavyaani a komposisão aphariheliwaka MEPS, Sistema Electrônico de Fotocomposicão Multilíngue. Mukhalelo wa opharihela ikhankoonya, waaya vahoolo ovinyerya vaavaa hiyaano mapetelita axexe o Kanata naaruulaahu olapa o Afrika tu Suli! (Isa. 60:17) Nave voocharela ooseese ahu naahaathela mapiyoneera aphaama yaawo yaamusivela Yehova vancipale. Bill ni miyaano nlelo naanarumeela o Peteli. Nyenya Ken ni Dennis yaahiya orumeela o Peteli nave epacerya okhapelela imusi saya.

Waakhalavo muteko muncipale wi opakiwe va efiliyale. Soolaleeryiwa sa Piipiliya saanataphuleliwa ni wimpirimiiriwa mu ilocelo sincipale, nave saanaphwanela orumihiwa mu ifiliyale ikina. Mwawiihiiha, yaanachuneya Epeteli evyaani etokotoko. Anna yaateka emoha yooreera makupa onaneela nsuwa a Johannesburg, nave yaaveleeliwa mu 1987. Yaari yoohakalaliha opakano makupa mu waaceereryeya wa ichu soothene seiha ni orumeela mu Nikhuuru na Efiliyale o Afrika tu Suli mu iyaakha sincipale.

Naatikhiniheya vancipale mu 2001 nthowa nawi naawompwa wi narumeele mu Nikhuuru na Efiliyale o Estatu Unitu nenlo naatikitheryiwe hiihaanoru. Naamwi nahaasiveliwe ohiya muteko ahu ni asinthamwene ahu o Afrika tu Suli, naahakalala oya opacerya okumi muvyaani wa opaka makupa a emusi yo Peteli o Estatu Unitu.

Nyenya tho naahuukhuwa nthowa nawi naahaala orakamela ni amama awe Laura yaawo yaari awuuluvala. Hiyaano hinaahaala oweryaka oweerela sincipale nri o Nova York, nyenya asirokora awe araru a Laura yaahiivaha wi yaahaala waakhaviheryaka wa soothene seiho saathowa. Awo yaahi: “Hiyaano hanri mmuteko wa elukuluku yoothene, nave wakhala wi hiyaano ninnaakhapelela amama, nyuwaano munanwerya otitelela mmuteko anyu.” Naahaathamalela vancipale.

Munnaka ni mwaariye, yaawo yaakhala o Toronto, o Kanata, yaaheerano tho emohamoha moorweela wa waakhapelela amamaaka yaawo yaari naamukhwele. Mu elukuluku yeele, awo yiiha yaakhapelelaka iyaakha opwaha 20. Ninnathamalela vancipale nthowa na osivela ni opwacha yoowo yoonihenryaaya wa yaawo ophiyerya okhwa waya. Nave ela yeeren’ye nrikimphiyaru o Nova York. Nreeliho ntokweene okhalano achu a veemusini yaawo aneemererya opaka matorokelo mu ikumi saya wi yaakhapelele asitiithi awunnuwelavo, echu yeeyo ilukuluku ikina enakhala yoovila!

Mu iyaakha ikina, muteko aka o Estatu Unitu waari opaka soolaleeryiwa, seiho saarehereryiwa mmukhalelo wahiihaano ni wookhweya. Mwa hiihaanoru, kaalapa mu Etepartamentu ya Othuma Ichu. Yaari yoohakalaliha vancipale mu iyaakha 20 opaka makupa a efiliyale yeela etokweene, yeeyo vano eri emusi ya achu 5.000 ophitaanyerya akhaviheryi 2.000!

Iyaakha 60 muculi, nkaantonko wuupuwela wi kaahaala okhala mmukhalelo kikhanlaaka. Laura ookikhaviherya ni murima awe woothene mu iyaakha soothene seiha. Okumi aka waari woohakalala! Ninnathamalela vancipale wa mirici seiho naaryaahuno ni achu oothene yaawo naalapaahuno vamoha, ophitaanyerya mu ifiliyale soothene seiho naarummwaahu oxekurya mmakupa mancipale a elapo. Nthowa nawi vano kirino iyaakha opwaha 80, muteko aka ti wavakhaani, woona wi aakhalavo anna yaawo ari amiravo avyakihiwe ophara muteko yoola.

Mulipa masalumu oorepa: “Nooreeriwa nloko nenlo Apwiya [Yehova] aryaaya Muluku aya.” (Sal. 33:12) Ela eparipari chiryene! Kinnathamalela vancipale woona wi koowerya omurumeela Yehova vamoha ni achu awe yaawo ari oohakalala.