YAWEEREYA YA OKUMI

Kohiiseera ‘Sothene Mwa Othene’

Elociwe ni Denton Hopkinson

“Wakhala wi woopatisiwa, kinahaala woohiya!” Ala yaari masu awoopopiha atiithaaka yaalocenlaaya amama mu eyaakha ya 1941. Moohipwacha woopopiha waya amama yaalakelela opatisiwa. Ntoko yookhumelela, atiithaaka yaahaahiya amama. Kaarino pahiru iyaakha thanu nachaaru elukuluku yeele.

EHAAKUMVE weereya yeela, kaanasiveliwa ni eparipari. Amama yaanaakhela soolaleeryiwa sa Piipiliya, nave kaanatepa otikhiniheya ni seiyo. Kaasiveliwa xaxaxa ni iruku. Atiithi hiyaachuna wi amama ekileeleke yeeyo yaahuseryaaya. Nyenya woona wi kaanachuna osuwela kaanaapakela makoho, mwawiihiiha yaanakihusiha vaavaa atiithaaka yaakhumaaya vaate. Ntoko yookhumelela, kaalakelela oveleela ekumi aka wa Yehova. Kaapatisiwa o Blackpool, Inklatera, mu eyaakha ya 1943 vaavaa kaaryaakano iyaakha khumi sa oyariwa.

KAAPACERYA OMURUMEELA YEHOVA

Ovinyerya elukuluku yeeyo, kaanaya moohihiyererya mmuteko woolaleerya ni amama. Mu elukuluku yeele, naanapharihela ekhankoonya yooruma wi nlaleerye. Yaari etokweene nave yaanalimela ikiilu sese ni emeya. Nkaanyiheryani, mmiravo ntoko miyaano ateexaka emoha!

Kirino iyaakha 14 sa oyariwa, kaanachuna okhala piyoneero. Amama yaakileela wi woopaceryani kaaphwanela oloca ni kapuro a anna (vano oniichaniwa ooweherya a ekulucu). Aakivaha sooleeliherya wi keererye ohuserya muteko waahaala okikhaviherya mmuteko woopiyoneero. Kaaheerano. Kimanle olapa iyaakha piili, kaaloca ni ooweherya a ekulucu mukina vooloca sa opiyoneero. Owo aaloca, “Opacerye!”

Mwawiihiiha mu Apirili a 1949, amama ni miyaano naatumiha sookhalano sahu ikina nivaha nave naathaamela o Middleton, waacamela o Manchester weiwo naapacenryaahuwo opiyoneero. Ivinre miyeeri mithanu nammoha, kaamuthanla munna mmoha wi akhale nthamwene aka mmuteko wa opiyoneero. Efiliyale yaaniveka wi nthaamele muloko yoowo waampaceraru o Islam. Amama yaanalapa mmuteko woopiyoneero vamoha ni murokora mmuloko mukina.

Kaarino pahiru iyaakha 17 sa oyariwa, nyenya vamoha ni nthamwene aka naakhalano murici wa weeciha mithukumano nthowa nawi muloko yoowo muvyaani yaariwo anna vakhaani yaarino mavyakelo. Voocharela, kaathamela Muloko wa o Buston, yaarino alaleeryi vakhaani nave naanachuneya nikhaviheryo. Saweereya seiya saakireherya wi kikhaleno mirici muhoolo.

Mu eyaakha ya 1951 kaahaakhela nwopelo wa ovolowa Exikola ya Piipiliya ya Kiliyati ya Torre de Vigia. Voocharela, mu eyaakha ya 1952, kaahiichaniwa ovolowa muteko wa akhoco. Kaaveka wi kihivolowe mmuteko yoowo, woona wi kaari murummwa a elukuluku yoothene, nyenya olamulelo waakhooca yooveka aka nave kaawaleliwa mukalaposo miyeeri mithanu nammoha. Kiri weiwo, kaahaakhela nwopelo wa ovolowa nikhuuru na 22 na exikola ya Kiliyati. Mu Yulyu a 1953, kimanle okhuma mukalaposo, kaanwela pophoro iichaniwa Georgic nave kaaya o Nova York.

Kaaphin’yaaka, kaawiriyana muthukumano wa eyaakha ya 1953 Assembleia da Sociedade do Novo Mundo. Voocharela, kaanwela kumpoiyu kiyaaka o South Lansing, Nova York, weiwo yaapakiwawo exikola. Woona wi kaamukhumaru mukalaposo, kaarino ikhorowa vakhaani. Vaavaa kaakhummaaka mu kumpoiyu, kaawela ekaaro yaaya o South Lansing. Nkaarino ikhorowa sawaakhwanela wi kilivele ekaaro, mwawiihiiha kampoleya nthamwene aka a mukwaha.

ORUMEELA ELAPO YOOKHOPELA

Mu Exikola ya Kiliyati naahaakhela ovyakiha wootikhiniha wi onikhaviherye ‘wisera sothene mwa othene.’ (1 Korinto 9:22) Paul Bruun, Raymond Leach, ni miyaano naathanleliwa orumeela o Filipina, nyenya naawehererya ipaaso miyeeri sincipale wi nivolowe mu elapo yookhopela. Voocharela naanwela pophoro o Rotertã, n’yaaka o Holanta. Ovinyerya vaava naavira mu Eniya Metiteraaneyo, Muhice Sues, Oseyano Intiku oya o Malasiya nave voocharela o Honk Konk. Wookuchulani, nimalinhe mahiku 47 mu eniya, mu 19 a Novempuru a 1954 naaphiya o Manila.

Weiwo, naaphwanela opaka matorokelo vooloca sa yookhovelela evyaani, elapo, ni elocelo evyaani. Nyenya, woopaceryani, ooraaru ahu naathanleliwe muloko wa Epooma ya Quezon weiwo achu ancipale yaalocaaya Enklesi. Nyenya ivinre miyeeri mithanu nammoha, kaasuwenle pahiru masu vakhaani a elocelo ya Takalok. Voocharela, muteko ahu waahaala otorokeya.

Nihiku nimoha mu Maiyu a 1955, nimanle ophiya owaani nrwaka mmuteko woolaleerya, Munna Leach ni miyaano naaphwanya ikaarata saaloca wi naathanliwa orumeela ntoko ooweherya a ekulucu. Kaarino iyaakha 22 pahiru, nyenya mmuteko yoowo kaahaala ohuserya mikhalelo mivyaani sa ‘wisera sothene mwa othene.’

Ntoko yootakiherya, mwaha aka woopacerya wa vanlakani ntoko ooweherya a ekulucu kaaperenkhe vanlakani va nipuro na maroca. Mu elukuluku yeele o Filipina, miyaha sa vanlakani saaperekhiwa mmapuro a vanlakani! Vaavaa kaaxekuryaaka miloko soohiyana hiyana mu ekulucu, kaanaperekha miyaha vaate va misakala, mmisikani, ohoolo wa ipa, mmapuro aavonyiwamo mphirya, mmaparkini ni mmakhwaalani. Ekwaha emoha o Epooma ya San Paplo, nkaawenrye operekha mwaha omusika nthowa na epula etokweene. Mwawiihiiha kaaloca ni anna yaahoolela wi kaloce mwaha mu Empa ya Omwene. Waamanlaaya mwaha, anna yaakikoha waakhanle wi yaanaphwanela orepela ntoko muthukumano wa vanlakani, woona wi nkaaperenkhe vanlakani!

Wiiliwiili kaakhala mu ichoko sa anna. Naamwi ipa saari ikhaani, saakhala sooreheryeya. Ikwaha sincipale munli aka naakhala niphaani nikhaani naateleliwa vachayani. Nipuro na orapavo naakhala vaate va empa weiwo achu yaaweryaaya okoona, mwawiihiiha kaahuserya orapa mwawiipitheya. Kaanapaka mikwaha ni ekaaro nave mu ikwaha ikina ni mwaaceya wi kiye ivilivili ikina. Iyaakha soothene sa muteko aka, nkintonko okhalano ekaaro.

Kaahuserya elocelo ya Takalok, naamwi kahivolonwe mu esikola ya elocelo. Kaahusenrye moorweela wa waawiriyana anna mmuteko woolaleerya ni mmithukumano. Anna yaanasiveliwa okikhaviherya, nave kinnathamalela opisa waya murima ni okithamalela waya.

Vaavaa elukuluku yaaviraaya, kaanaphwanela opaka matorokelo nthowa na mirici mivyaani. Mu eyaakha ya 1956, vaavaa Munna Nathan Knorr aanixekuryeiye, naakhalano muthukumano wa muceche. Kaathanliwa olokoha muthukumano o raatiyu. Nkaarino mavyakelo, nyenya anna yaakikhaviherya wi kihuserye. Voocharela vaya, naakhalano muthukumano mukina wa muceche, nave kaarumeela ntoko ooweherya a muthukumano. Munna Frederick Franz a nipuro ntokotoko na Anamoona a Yehova aanixekurya, nave kaahuserya sincipale ni yoowo. Elukuluku aaperenkheiye mwaha wa vanlakani, aawanre soowara sa o Takalok, soowara sawunlaana wa achu o Filipina. Eyo yaaweeriha anna a vanipuroni ohakalala vancipale, nave yaakihusiha okhweleya waya wiilipiserya opaka matorokelo mwawiiwanana ni achu.

Kaanachuna opaka matorokelo mancipale vaavaa kaarumeelaaka ntoko ooweherya muceche. Mmahiku yaale, naahooniha exilema A Felicidade da Sociedade do Novo Mundo. Wiiliwiili nooniha vanlakani vene, mweelukuluku yeeyo atupusi yaananuukhula. Onyaari wa ekhankoonya waanawiichana atupusi, nave yaanasareya mu ekhankoonya. Waakhala muteko mutokweene opupucha nimanle wooniha! Waakhala woovila orehererya mithukumano seiyo, nyenya yaakhala echu yoohakalaliha owoona achu erwaaka ni ehuseryaka vooloca sa marehereryo a Yehova a elapo yoothene.

Mmapuro makina, ahooleli a Katoolika yaanaakhinyererya alamuleli ohineemererya opaka mithukumano. Wi achu ehiwiriyane mwaha, awo yaanamana esino okerexa vaavaa naapakaahu miyaha waacamela ikerexa saya. Moohipwacha nikacamiho nenlo, achu yaanatitelela ohuserya eparipari, nave ancipale mmapuro yaawo vano annamulapela Yehova.

MUTEKO MUVYAANI, MATOROKELO MANCIPALE

Mu eyaakha ya 1959, kaathanliwa orumeela ofiliyale. Weiwo kaahuserya sincipale. Evinre elukuluku, kaavekiwa oxekurya ilapo ikina, ntoko ooweherya a ilapo. Mmukwaha mmoha, kaamusuwela Janet Dumond, misiyonaaria aarumeela o Tailantiya. Naanarepelana ikaarata, nave voocharela vaya naapaka othela. Ninnahakalala omaliha vamoha iyaakha 51 ivinre nimurumeelaka Yehova.

Kinnahakalala waaxekurya achu a Yehova mu ilapo 33. Kinnathamalela mirici saka soopacerya ikikhavihenrye ohuserya mukhalelo wa waakhaliha achu a ilapo ni sookhovelela soohiyana hiyana! Oxekurya yoola, wookikhaviherya wiiwexexa mwawooneya wi Yehova onnaasivela achu a mukhalelo woothene.—Saweriwa T’arummwa 10:34, 35.

NLELO NINNAPAKA MATOROKELO

Miyaano ni mwaaraka ninnahakalala waarumeela anna o Filipina wenno, nave nlelo nnarumeela ofiliyale o Epooma ya Quezon. Vano aakhalawo alaleeryi ancipale opwaha vaavale kaapacenryaaka orumeelawo mu iyaakha 60 sivinre. Naamwi ivinre iyaakha seiya, nlelo kinnachuna okhala ooreheryeya opaka matorokelo wa yeeyo Yehova onachuneiye. Ntoko yootakiherya, nthowa na matorokelo akhumelenle hiihaanoru mmarehereryo a Yehova, ninniilipiserya opaka matorokelo mancipale.

Ninnapaka soothene nnaweryaahu wi ncharihe ohoolela wa Yehova, nave ola onakhala mukhalelo woohakalalihaxa wa okumi. Ninneererya tho opaka matorokelo vyakala anachuneya wi niwerye waarumeela phaama anna. Aai ophiyerya elukuluku Yehova onaneemereryeiye, nri oolakelela ‘wisera sothene mwa othene.’