Munii Muwerye Hai Okhala Nthamwene A Muluku?

1, 2. Taani yaari asinthamwene a Yehova?

TAANI munachunaanyu wi akhale nthamwene anyu? Muchu yoowo munamuchunaanyu, munakhalaanyuno vamoha, nave owo tho anamaliha elukuluku ni nyuwaano. Muchu yoowo orino omuchu ni makhalelo yaawo anoosivelaani.

² Yehova Muluku onnaathanla asinthamwene awe. Ntoko yootakiherya, Aaparahamu aari mmoha asinthamwene a Muluku. (Isaiya 41:8; Tiyako 2:23) Yehova tho aanasiveliwa ni Tavite. Owo aaloca wi Tavite aari “mutxhu a vamurimani” vawe. (Saweriwa T’arummwa 13:22) Nave tho Yehova ‘anatepa omukhwela’ mulipa a miririmu Taniyeli.​—Daniyeli 9:23.

 3. Ntakhara heeni Aaparahamu, Tavite, ni Taniyeli yaakhanlaaya asinthamwene a Yehova?

³ Yaawenrye hai Aaparahamu, Tavite, ni Taniyeli okhala asinthamwene a Yehova? Yehova aaloca wa Aaparahamu: “Ntakhara weyano wohìwelela nsu naka.” (Maphatxuwelo 22:18) Yehova onnapaka onthamwene ni yaale anamwiiwelela mwawiiyeviha. Naari achu a maloko makina, yaanawerya tho okhala asinthamwene awe. Yehova aaloca ni nloko na Aisarayeli: “N’wiriyane nsu naka! Hiha kinamukhala Muluku anyu nave nyuwano munamukhala nloko naka.” (Yeremiya 7:23) Mwawiihiiha, wakhala wi munnachuna okhala nthamwene a Yehova, munaphwanela omwiiwelela.

4, 5. Yehova onaakhapelela hai asinthamwene awe?

⁴ Piipiliya onnaloca wi Yehova onnaavarerya “nave annàkhaviherya yale anàroromela yawo ni murima wothene.” (2 Matharihelo 16:9) Mu Salumu 32:8, Yehova onnaroromeliha asinthamwene awe ariki: “Kinamohusiha ni kinan’woniha ephiro yotxhara; kinnatxhuna wovaha miruku; mitho aka ari wa weyano.”

⁵ Mwiicani ahu akuru onachuna onihiiha opaka onthamwene ni Muluku. Nyenya Yehova onachuna onikhapelela. (Mwaalakhanye Salumu 55:22.) Ntoko asinthamwene a Yehova, ninnamurumeela ni murima ahu woothene. Ninnamwiiwelela naamwi nikumanaka ni makacamiho. Nave nrino nroromelo nimohamoha nenlo oomurepa a salumu aareiyeno. Owo aaloca wi Apwiya Yehova: “ari omononi waka wolopwana, nkirwa kòtxeya.” (Salumu 16:8; 63:8) Tiheeni Satana oneereiye wi aakanyerye onthamwene ahu ni Muluku?

 6. Tiheeni Satana olonceiye wa achu oothene?

⁶ Mu Mwaha 11 noohuserya wi Satana aamwaakaaha Yehova nave aamphuca wi aari mulipa awootha ni ohikhala eekhaikhai moorweela wa ohimuhiya Aatamu ni Haava othanla mukhataaya yeeyo eri yaphaama ni yoonanara. Piipiliya mu liivuru a Yuupu onnanihusiha wi Satana tho annawaakhaaha achu oothene anachuna okhala asinthamwene a Muluku. Satana aaloca wi awo anamurumeela Muluku nthowa na mphurelo anaakhelaaya, ohiya nthowa na osivela. Satana aaloca wi onanwerya omuhuweliha muchu ori oothene ohimwiiwelela Muluku. Hankooni noone tiheeni nnahuseryaahu orweela wa Yuupu ni mukhalelo Yehova aamukhapelenleiye.

7, 8. (a) Yehova aamoona hai Yuupu? (b) Tiheeni Satana aalonceiye sa Yuupu?

⁷ Yuupu aari taani? Owo aari mulopwana aphaama yoowo akhanle iyaakha 3.600 ivirale. Yehova aaloca wi mu elukuluku yeele haarivo muchu oolikana ni yoowo mweelaponi yoothene. Yuupu aanamucicimiha Muluku, nave aaniica yeeyo yaari yoonanara. (Yobi 1:8) Aai, Yuupu aari chiryene nthamwene a Yehova.

⁸ Satana aalonce wi Yuupu onamurumeela Muluku ni mathowa oonanara. Owo aahi wa Yehova: “Nyuwano onnamukhapelela yowo, etxeko awe ni itxhu sawe sothene! Onnarèliha itxhu sothene onereiye, nave hiha muhuwo awe onnarelana. Nto vano nkererya ni onanariha muhakhu awe nave munammona aruwanaka.”​—Yobi 1:10, 11.

 9. Yehova eemerenrye wi Satana eere eheeni?

⁹ Satana aamootherya Yuupu wi aamurumeela Yehova pahiru nthowa na ichu aakheleiye wa Yoowo. Satana tho aaloca wi ahaala omweeriha Yuupu ohiya omurumeela Yehova. Yehova heemerenrye yeeyo Satana aalonceiye, nyenya aaheemererya wi Satana amweehe wi yooneye waakhanle wi onthamwene Yuupu aareiyeno ni Muluku waari nthowa na osivela chiryene.

10. Satana aamuhoonxe hai Yuupu, nave tiheeni Yuupu eenreiye?

¹⁰ Woopacerya, Satana aawiipha asinama oothene a Yuupu. Voocharela Satana aawiipha anamalapa oothene a Yuupu. Yuupu aayeleela ichu soothene. Wookuchulani, Satana aawiipha anamwane khumi a Yuupu ni echeku etokweene. Nyenya Yuupu aatitelela okhala oororomeleya wa Yehova. “Wa itxhu sothene seiha simphatxuwenle Yobi, owo hatxhenke, nari mano hananariwe ni Muluku.”​—Yobi 1:12-19, 22.

11. (a) Echu taani ekina Satana aamweerenleiye Yuupu? (b) Tiheeni Yuupu eenreiye?

¹¹ Satana haavelavenle. Owo aamwaakaaha Muluku ariki: “Nto mwerere ophoreiha mwili awe ni makhuva awe, hiha munammona oruwanakani.” Mwawiihiiha Satana aamphoreiha Yuupu ni ereca makhwaca awiicela. (Yobi 2:5, 7) Nlelo, Yuupu aari oororomeleya wa Yehova. Owo aaloca: “Ophiyerya okhwa waka, nkirwa kihiya okhala oororomeleya!”​—Yobi 27:5, Tradução do Novo Mundo.

12. Yuupu oonihenrye hai wi waakaaha wa Satana waari watheru?

¹² Yuupu haasuwela echu vooloca sa waakaaha wa Satana naari mathowa a ohooxeya wawe. Owo uupuwela wi aari Yehova aatannya makacamiho awe. (Yobi 6:4; 16:11-14) Nyenya naamwi hiiha, Yuupu aatitelela okhala oororomeleya wa Yehova. Mwawiihiiha hiwaarivo minikwa. Yuupu amurumeela Yehova ohiya ni mathowa oonanara. Owo aari chiryene nthamwene a Muluku nthowa nawi aanamusivela. Waakaaha wa Satana waari watheru!

13. Tiheeni yaari yookhumelela ya ororomeleya wa Yuupu?

¹³ Naamwi Yuupu ahisuwenle yeeyo yeereya wirimu, aatitelela okhala oororomeleya wa Muluku ni wooniherya wi Satana nawoothe. Yehova aamureeliha Yuupu nthowa na okhala nthamwene oororomeleya.​—Yobi 42:12-17.

14, 15. Waakaaha taani Satana onapakeiye wa achu oothene?

¹⁴ Nyuwaano munanwerya ohuseryavo echu mwa yeeyo yeerenye ni Yuupu. Olelo, Satana onnanootherya wi nnamurumeela Yehova nthowa na ichu nnaakhelaahu orweela wa Yoowo. Mu Yobi 2:4, Satana onnaloca: “Atxhu hanapwatxha oyelèla itxhu sothene, nto anapwatxha okhapelela ekumi aya.” Mwawiihiiha, Satana olonce wi achu oothene alopwana ni athiyana anamurumeela Yehova ni mathowa oonanara. Ivinrevo iyaakha sincipale Yuupu amanle okhwa, nlelo Satana onnamunyemula Yehova ni owaakaaha akapuro awe. Ntoko yootakiherya, Masiposipo 27:11, onii: “Mwan’aka, okhale ni miruku, kinamwèliwa murima, ni kinammwakhula yole onakinyemula.”

¹⁵ Nyuwaano munanwerya othanla omwiiwelela Muluku ni okhala nthamwene awe oororomeleya, mooniheryaka wi Satana mulipa awootha. Naamwi ochuneyaka opaka matorokelo matokweene mu okumi anyu wi mukhale nthamwene a Muluku, eyo yoolakelela yaphaama munahaalaanyu opaka! Yoolakelela eyo mwaha mutokweene. Satana onaloca wi nyuwaano hamuni mukhale oororomeleya wakhala wi munnakumana ni makacamiho. Owo onneererya onihuweliha wi nimuchekele Muluku. Mwawiihai?

16. (a) Miraakho taani Satana onaphariheleiye wi aahiihe achu omurumeela Yehova? (b) Tiheeni Satana onaphariheleiye wi oohiiheni omurumeela Yehova?

¹⁶ Satana onnapharihela miraakho soohiyanahiyana wi ananarihe onthamwene ahu ni Muluku. Owo onnahiphela “ntoko mwatxho onopa murika, amwasyaka mutxhu omukhura.” (1 Pedro 5:8) Muhitikhine wakhala wi asinthamwene anyu, amusi naari achu akina anneererya woohiihaani omuhuserya Piipiliya ni weera yeeyo eri yaphaama. Iwo ori ntoko ohipheliwa.a (Yohani 15:19, 20) Satana tho “onìtatusa [okhala] munkelo a ekamama.” Mmukhalelo yoola onneererya onihuweliha wi nimuchekele Yehova. (2 Korinto 11:14) Muraakho mukina Satana onaphariheleiye wi nihiye omurumeela Yehova ori onivololiha, wuupuwela wi haniwerya omurumeela Yehova mwaphaama.​—Masiposipo 24:10.

17. Ntakhara heeni ninnamwiiwelela Yehova?

¹⁷ Vaavaa nnamwiiwelelaahu Yehova, ninnooniherya wi Satana mulipa awootha. Nyenya tiheeni enii enikhaviherye okhala awiiwelela? Piipiliya onii: “Wakhweleke Apwiya, Muluku-à ni murima-à wothene, ni ekumi-à yothene, ni ikuru sà sothene.” (Malamulo 6:5) Ninnamwiiwelela Yehova nthowa nawi ninnamusivela. Vaavaa osivela wahu onannuwaaya, nnahaala weera echu eri yoothene onanivekeiye wi neere. Murummwa Yohani aarepa: “Okhwela wa Muluku ti wu: okhapelela malamulo awe. Nave malamulo awe hanalimela.”​—1 Yohani 5:3.

18, 19. (a) Ichu taani ikina seiho Yehova onaloceiye wi ti soonanara? (b) Nnasuwela hai wi Yehova hananiveka echu nihinaweryaahu weera?

¹⁸ Mano ichu taani ikina Yehova onanleeleiye wi ti soonanara? Iho sinnooniheryiwa va ekaaxa “Musepe Yeeyo Enamunanara Yehova.” Woopaceryani, akhweya munoona wi ichu iho tahi soonanara. Nyenya vaavaa munahaalaanyu waalakhanyaka iciciri sa Piipiliya moomaleleya ni wuupuwelela, munahaala wiiwexexa ochuneya waya wa wiiwelela malamulo a Yehova. Akhweya munahaala woona okhala woochuneya opaka matorokelo mu okumi anyu. Naamwi okhalaka ntoko ti woovila, wakhala wi moopaka matorokelo yaawo, munahaala okhalano murecele onarweela wa okhala nthamwene oororomeleya a Muluku. (Isaiya 48:17, 18) Nnasuwela hai wi ti wooweryeya opaka matorokelo?

¹⁹ Yehova hananiveka weera echu nihinaweryaahu weera. (Malamulo 30:11-14) Ntoko nthamwene eeparipari, owo oonisuwela phaama opwaha hiyaano mukhatiihu. Owo oosuwela owerya ni oceecheya wahu. (Salumu 103:14) Murummwa Paulo onnanilipiha: “Muluku ti òroromeleya, nave hohiyani wi mwereryiwe opwaha ikuru sanyu. Nto owo n’wereryiwani onamovahanitho ikuru wi n’werye ovilela.” (1 Korinto 10:13) Ti yaphaama okhalano nroromelo wi Yehova onahaala onivaha ikuru wi niwerye weera yeeyo eri yaphaama. Owo onahaala woovahaani “owerya . . . otokotoko” wi mvileleno. (2 Akorinto 4:7) Amanle waakhela nikhaviheryo na Yehova variyari va makacamiho, Paulo aaloca: “Kinanwerya itxhu sothene mwa yowo onakilipiha.”​—Filipi 4:13.

20. Mikhalelo taani nnaphwanelaahu otakiherya, nave ntakhara heeni?

²⁰ Wakhala wi ninnachuna okhala asinthamwene a Muluku, nnaphwanela ohiya weera yeeyo Yehova onanleeleiye wi ti yoonanara, nyenya tho nnaphwanela weera opwaha vaavaa. (Aroma 12:9) Asinthamwene a Muluku annasivela yeeyo owo onasiveleiye. Awo annalociwa mu Salumu 15:1-5. (Mwaalakhanye.) Asinthamwene a Yehova annatakiheya makhalelo awe nave annooniherya “okhwela, ohakalala, muretxele, ovilela, wilakelela, orèra murima, ororomeleya, opisa murima, wisumaliha.”​—Galasya 5:22, 23.

21. Munii muwerye hai wooniherya mikhalelo inamusivela Muluku?

²¹ Munii muwerye hai wooniherya mikhalelo seiha? Nyuwaano munaphwanela ohuserya yeeyo enamusivela Yehova moorweela wa omwaalakhanya ni omuhuserya Piipiliya moohihiyererya. (Isaiya 30:20, 21) Vaavaa muneeranyuno yeele, omusivela wanyu Yehova onahaala waacereryeya, nave vaavaa osivela wanyu onaaceereryeyaaya, munahaala okhalano nchuno na omwiiwelela.

22. Tiivi eri yookhumelela ya omwiiwelela Yehova?

²² Matorokelo munahaalaanyu opaka mu okumi anyu analikana ni orula soowara sakhalai ni owara sa hiihaano. Piipiliya onnanceenyerya: “Mmurule mutxhu a khalai ni miteko sawe” nave “mun’ware mutxhu ahihano.” (Kolosi 3:9, 10) Naamwi ohiri wookhweya, vaavaa nnapakaahu matorokelo yaawo ni omwiiwelela Yehova, owo onnaroromeliha onivaha “muhakhu wothanliwa.” (Salumu 19:11) Aai, nthanle omwiiwelela Yehova, ni wooniherya wi Satana Mulipa awootha. Mmurumeele Yehova, ohiya nthowa na mareeliho a omwaahiyu, nyenya nthowa na osivela. Mweerano hiiha munahaala okhala chiryene nthamwene a Muluku!