MWAHA 45
Enataphulela Eheeni Ohipaka Makupa a Elapo?
Yesu aahaaleela oomuchara awe wi ‘hari a elapo ya vathi.’ (Yohani 15:19, NN) Ela enaphitaanyerya ohipaka makupa a elapo, naari wi, ohipaka makupa a ipoliitika ni ikhoco sa mweelaponi. Oloca eparipari, ilukuluku soothene tahi wookhweya ohipaka makupa a elapo. Akhweya nnanwerya ophuciwa nthowa na yeela. Nni ntitelele hai okhala oororomeleya wa Yehova ni ohipaka makupa a elapo?
1. Tuuvi ori moonelo wa Akristu eeparipari vooloca sa alamuleli a elapo?
Akristu eeparipari annaacicimiha alamuleli. Mwawiihiiha ninnapaka yeeyo Yesu olonceiye nave ‘ninnaveleela wa Kaisara ichu sa Kaisara.’ Ela enataphulela wi hiyaano ninniiwelela malamulo a elapo, ntoko oliva musokho. (Marko 12:17) Piipiliya onnahusiha wi alamuleli a elapo ekhanle pahiru nthowa nawi Yehova onnaweemererya awo wi elamuleleke. (Aroma 13:1) Mwawiihiiha, ninnasuwela owerya alamuleli aryaayano. Nyenya ninniiwexexa wi awo hiyaano owerya ompwaha Muluku. Hiyaano noosuwela wi pahiru Muluku ni Omwene awe tonahaala orehererya makacamiho a achu.
2. Nni nooniherye hai wi hannapaka makupa a elapo?
Moolikana ni Yesu, hiyaano hinniivoliiherya mu ipoliitika. Vaavaa achu yoonnaaya yootikhiniha emoha ya Yesu nave yeererya wi emweere okhala mwene, owo haawemerenrye. (Yohani 6:15) Ntakhara heeni? Yeeyo owo aalonceiye voocharela ennanivaha naakhulo: “Omwene aka hori wa elapo ela ya vathi.” (Yohani 18:36, NN) Nthowa na okhala oohuserya a Yesu, ninnooniherya ohipaka makupa a elapo mmikhalelo soohiyanahiyana. Ntoko yootakiherya, hiyaano hannaya okhoconi. (Mwaalakhanye Mikeya 4:3.) Nave hannaakaaha naari weemererya epartitu vyakala ya epoliitika naari mulamuleli aya. Hiyaano ninnooniherya ncicimiho wa elapo nnakhalaahuwo, nyenya hannalapela nipantera naari hinneera echu yoolikana ni yeeyo. (1 Yohani 5:21) Iha mikhalelo mikina seiho nnooniheryaahu wi nri oororomeleya pahiru wa olamulelo wa Muluku.
OHUSERYA MWAWIISEELA
Moone mikhalelo taani saahaala weeha ohipaka wanyu makupa a elapo ni mukhalelo munahaalaanyu opaka soolakelela sinahaala omuhakalaliha Yehova.
3. Akristu eeparipari hanapaka makupa a elapo
Yesu ni oomuchara awe hiyaapaka makupa a elapo nave tho hiyaano nnaphwanela ochariha yootakiherya aya. Mwaalakhanye Aroma 13:1, 5-7 ni 1 Pedro 2:13, 14. Voocharela, moone EXILEMA nave muthokororye makoho anacharela.
Ntakhara heeni nnaphwanelaahu waacicimiha alamuleli a elapo?
Mmikhalelo taani mikina nnooniheryaahu wi ninnawiiwelela yaawo?
Mu elukuluku ya ekhoco, maloko makina yaawo analoca wi hanapaka makupa a elapo, annamala okhaviherya mmakupa oomeeli a owanawana. Vano, ohipaka makupa a elapo onataphulela eheeni chiryene? Mwaalakhanye Yohani 17:16. Voocharela, moone EXILEMA nave muthokororye nikoho nnacharela.
Enataphulela eheeni ohipaka makupa a elapo?
Hanka wakhala wi mulamuleli ooloca wi neere echu yeeyo ehiniiwanana ni nlamulo na Muluku? Mwaalakhanye Saweriwa T’arummwa 5:28, 29. Voocharela, moone EXILEMA nave muthokororye makoho anacharela.
Wakhala wi nlamulo na achu nooniveka weera echu emoha, nyenya nlamulo na Muluku nniveka weera echu ekina, wa yaala meeli, tinivi nnaphwanelaahu wiiwelela?
Apwanne munnuupuwela mmikhalelo taani Akristu eeparipari ahinaphwanelaaya owiiwelela alamuleli?
4. Muhipake makupa a elapo mmuupuweloni ni mu saweera
Mwaalakhanye 1 Yohani 5:21. Voocharela, moone EXILEMA nave muthokororye makoho anacharela.
Mu exilema, ntakhara heeni Ayenge aalakelenleiye ohiivoliiherya mu epartitu ya epoliitika naari mano mu ichu ntoko olapela nipantera?
Apwanne nyuwaano munoona wi owo aahipaka yoolakelela yaphaama?
Mikhalelo taani mikina saahaala weeha ohipaka wahu makupa a elapo? Moone EXILEMA, nave voocharela muthokororye makoho anacharela.
Wakhala wi elapo ahu yoovootha elapo ekina, ti mwawiihai nneeraahu ntitelele ohipaka makupa a elapo?
Ti mwawiihai nneeraahu ntitelele ohipaka makupa a elapo vaavaa soolakelela sa mulamuleli a epoliitika sinanivolowelaaya?
Ti mwawiihai ichu nniiwaahu ni achu akina vamoha ni anotiisiya ineeraaya ivolowele ohipaka wahu makupa a elapo?
Mmikhalelo taani Mukristu eeparipari onaphwaneleiye otitelela ohipaka makupa a elapo mmuupuweloni ni mu saweera?
ACHU AKINA ANANWERYA OKOHA: “Ntakhara heeni nyuwaano hamunapaka ichu ntoko olapela nipantera ni omwiipa iinu nasiyonaale?”
Mwaahaala waakhula hai?
MUKWASU
Akristu eeparipari anniilipixerya vancipale wi ehipake makupa a elapo mmuupuweloni, mmalocelo, ni mu saweera saya.
Makoho awuuluulela
Tiheeni nnaphwanelaahu waavaha alamuleli?
Ntakhara heeni nihinapakaahu makupa a elapo?
Mikhalelo taani saahaala weeha ohipaka wahu makupa a elapo?
OTHOLATHOLA
Wiilipixerya taani akhweya neenraahu wi ntitelele ohipaka makupa a elapo?
Tiheeni emusi enaphwanelaaya opaka wi yiirehererye ntakhara saweeha sa ohipaka makupa a elapo?
Ntakhara heeni waakiha elapo ohiryaaya ncicimiho ntokweene muchu onaphwaneleiye okhalano?
Moone mukhalelo muneeraanyu muhipake makupa a elapo vaavaa munapakaanyu yoolakelela vooloca sa muteko.
“Cada um levará sua própria carga” (A Sentinela, 15 de março de 2006)