Mmurumeele Yehova Muhirino Sooweiha

“Maria . . . ànawiriyana masu [a Yesu]. Marta . . . àtepa oweiwa ni miteko.”​—LUKA 10:39, 40.

MACIPO: 94, 134

MWAAHAALA WAAKHULA HAI?

Ti mwawiihai Marta ni Mariya avanhaaya yootakiherya yaphaama wa hiyo?

Tiheeni nnapharihelaahu mweelaponi, nave tiheeni nnaphwanelaahu osepa?

Hiiha ntoko Yesu ni Paulo, ancipale anamurumeela hai Muluku ehirino sooweiha?

1, 2. Ntakhara heeni Yesu aanamusivela Marta, nave yoohesa taani aapankeiye enooniherya wi aari oohiphaameya?

VAAVAA munamuupuwelaanyu Marta murokora a Lasaro, munamoona okhala muchu a mukhalelo taani? Piipiliya onnooniherya wi Marta aari nthamwene a Yesu, nave wi Yesu aanamusivela Marta. Tahi wi Yesu aamusivela pahiru Marta. Ntoko yootakiherya, murokora a Marta iichaniwa Mariya aari tho nthamwene a Yesu. Nave Yesu aanaasivela amannya, Mariya. (Yohani 11:5; 19:25-27) Ntakhara heeni Yesu aanamusivela Marta?

² Yesu aanamusivela Marta ntakhara aari eepewe ni a mahala, nave tho aanalapa mwakuru. Opwaha soothene, Yesu aanamusivela ntakhara aakhalano nroromelo noolipa. Owo aanaroromela soothene Yesu aahusiheiye, nave haarino minikwa wi aari Mesiya aalaiheryiwe. (Yohani 11:21-27) Naamwi hiiha, Marta haari oophaameya. Moolikana ni hiyo, owo aanahesa. Ntoko yootakiherya, ekwaha emoha vaavaa Yesu aaxekunryeiye, Marta aanyeenyeya ni murokora awe Mariya nave aamuleela Yesu wi amookolole. Marta aaloca: “Pwiya, honapwatxha wi munnaka yowo okihiherya mekhaka miteko? Omulèle wi arwe akikhaviherye.” (Mwaalakhanye Luka 10:38-42.) Ntakhara heeni Marta aalonceiye yeela, nave tiheeni nnahuseryaahu orweela wa naakhulo na Yesu?

MARTA AARI OOWEIWA

3, 4. Tiheeni Mariya enreiye yaamuhakalalinhe Yesu, nave tiheeni Marta aahusenryeiye? (Moone eruku yoopacerya.)

³ Vaavaa Marta ni Mariya yaanwompaaya Yesu vaate vaya, owo aahakalala nave aachuna opharihela ekari yeeyo wi aahusihe iparipari soochuneya. Mariya aakiraathi vakhiviru vawe ‘awiriyanaka masu [a Yesu].’ Owo aanachuna ohuserya soothene aaweryeiye orweela wa Muhusiha Mutokotoko. Marta tho anaphwanela onwiriyana Yesu. Nave Yesu aahaala omuthamalela waakhanle wi Marta oohiya aapakeiye wi anwiriyane.

⁴ Nyenya Marta aari ooweiwa. Aaweiwa ni oreherya yoolya yavameekhaaya ni opaka ichu ikina wi ooniherye omwaakhela phaama Yesu. Vaavaa onneiye wi Mariya hanamukhaviherya, owo aanyeenyeya nave aaloca ni Yesu. Yesu aanasuwela wi Marta eererya opaka ichu sincipale, mwawiihiiha mweepewe aaloca: “Marta, Marta, weyano onnateteiwa ni onnukhuwa wa itxhu sintxipale.” Owo tho aaloca wi yoolya yookhweya yaahaala waakhwana. Voocharela Yesu aamuthamalela Mariya nthowa na onwiriyana. Owo aaloca: “Maria, othanla etxhu yaphamasa onereiye ahakhiwe.” Mariya akhweya aacuwala yeeyo aalyileiye nihiku nenle, nyenya haacuwanle ichu aahusenryeiye orweela wa Yesu ni omuthamalela wawe. Iyaakha 60 ohoolo waya, murummwa Yohani aarepa: “Yesu ànàkhwela Marta, munnawe Maria.” (Yohani 11:5) Masu ala anooniherya wi Marta aaheemererya wookolola wa Yesu nave aamurumeela Yehova mu okumi awe woothene.

 5. Ntakhara heeni olelo ti woovila oteteiwa ni ichu soochuneyaxa, nave nikoho taani nnahaalaahu waakhula?

⁵ Noosuwela wi hiihaano opwaha khalai sookhalavo ichu sincipale inawerya onihiiha omurumeela Yehova. Mulipeleli 15 a Setempuru a 1958, (a ekunya) aahaalopola anna ni arokora wi eheemererye wi ikhankoonya saahiihe omurumeela Yehova. Mweelukuluku yeele, nihiku nnihiku saanakhalavo ichu ivyaani. Ichu ntoko aliivuru, araatio, ixilema, ni televisau saari sawunlaana. Mulipeleli owo aaloca wi vaavaa nnaacamelaahu makuchuwelo a mukhalelo ola wa ichu, “sooweiha saahaala waaceereryeya.” Olelo, opwaha khalai, sookhalavo ichu sincipale inawerya oniweiha. Tiheeni nnaphwanelaahu weera wi nikhale ntoko Mariya ni otitelela omurumeela Yehova?

MUHIPHARIHELE ELAPO MOOMALELA

 6. Alapeli a Yehova anapharihela hai ikhankoonya?

⁶ Alapeli a Yehova annapharihela ikhankoonya sa elapo wi elaleerye michaka yaphaama. Ntoko yootakiherya, ehaakumve ni variyari va ekhoco etokweene ya elapo yoothene alapeli a Yehova yaahooniha “Fotodrama da Criação.” Moorweela wa opharihela exilema yooruma, yaawerya olaleerya wa macikhwi aachu mu ilapo sincipale. Omakuchuwelo wa “Fotodrama” yaanaloca elukuluku ya murecele yeeyo Yesu Kiristu onahaaleiye olamulela elapo ya vathi. Ohoolo waya, alapeli a Yehova yaampharihela raatio wi elaleerye michaka sa Omwene orukurerya elapo. Olelo, ninnaapharihela akomputatore ni interneti wi naaphwanye achu mmapuro oothene.

 7. (a) Ntakhara heeni ti yawoopiha opharihela elapo moomalela? (b) Tiheeni nnaphwanelaahu osepa?

⁷ Piipiliya onnanlopola vooloca sa opharihela elapo moomalela. Ela enaphitaanyerya omaliha elukuluku yincipale ni ichu sa elapo. (Mwaalakhanye 1 Korinto 7:29-31.) Ichu ikina tahi soonanara, nyenya sinanwerya omaliha elukuluku ahu yincipale. Ntoko yootakiherya, akhweya ninnasiveliwa ochekula, owaalakhanya aliivuru, omoona televisau, weecelela mapuro ooreera, othuma naari waavya ekhankoonya yamutano naari yooreera. Ancipale annasiveliwa ompharihela interneti, ovonya michaka naari owiriyana miselo vooloca sa mapokha. Akina annakhalano yookhovelela ya weera ichu seiya. (Eklesiyaste 3:1, 6) Wakhala wi ninnamaliha elukuluku ahu yincipale ni ichu ihiri soochuneya, haniwerya othokororya yeeyo eri yoochuneyaxa, omulapa wahu Yehova.​—Mwaalakhanye Éfeso 5:15-17.

 8. Ntakhara heeni ti woochuneya ohisivela ichu sa mweelaponi?

⁸ Satana onnawetha wi aneerihe osivela ichu sa elapo ni onihiiha omurumeela Yehova. Satana aaheerano yeeyo mu nsana noopacerya, nave tho onneerano olelo. (2 Timóteo 4:10) Mwawiihiiha, nnaphwanela wiisaalikhela moohihiyererya vooloca sa moonelo ahu ntakhara ichu sa elapo ni opaka matorokelo anachuneya. Piipiliya onnanleela wi hannaphwanela osivela ichu sa mweelaponi. Moohiyana, nnaphwanela okhapelela osivela wahu wa Yehova. Neerano yeeyo, onahaala okhala wookhweya omwiiwelela Yehova ni waataana ni yoowo.​—1 Yohani 2:15-17.

MUTETEIWE NI YEEYO ERI YOOCHUNEYAXA

 9. Yesu aahusinhe wi oomuchara awe eteteiweke ni eheeni, nave ovanhe hai yootakiherya yaphaama?

⁹ Hiiha ntoko aamuhusinheiye Marta wi ahiweiwe ni ichu sincipale, Yesu aahaahusiha oomuchara awe echu emohamoha. Aahaaceenyerya oteteiwa ni omurumeela Yehova ni Omwene awe. (Mwaalakhanye Mateu 6:22, 33.) Yesu aavaha yootakiherya yaphaama. Owo haarino ichu sincipale, owo haarino empa naari emaca.​—Luka 9:58; 19:33-35.

10. Yootakiherya taani yaphaama Yesu otikithenryeiye wa hiyo?

¹⁰ Yesu heemerenrye wi echu vyakala emuhiihe ophara muteko wa olaleerya. Ntoko yawooniherya, omapacereryo wa muteko awe, muloko wa o Kafarnau waachuna wi Yesu amalihe elukuluku yincipale mu epooma aya. Tiheeni Yesu enreiye? Aatitelela okhala ooteteiwa ni muteko awe. Owo aaloca: “Kinnaphwanela olaleryatho Mutxhaka Waphama wa omwene wa Muluku ipoma ikina, ntakhara ti yela kirumeliwaka.” (Luka 4:42-44) Yesu aaheeca mikwaha soorakama wi alaleerye michaka yaphaama ni waahusiha achu ancipale aaphwanyeiye. Owo aari oophaameya, nyenya aanavelavela nave aanachuna wiichuuwa.​—Luka 8:23; Yohani 4:6.

11. Tiheeni Yesu eenreiye vaavaa mulopwana mmoha aamulenleiye makacamiho awe? Tiheeni Yesu aahusinheiye oomuchara awe?

¹¹ Ohoolo waya, vaavaa Yesu aahusiheiye oomuchara awe, mulopwana mmoha aamukwatelela nave aloca: “Muhusiha, omulèle munnaka akikawele muhakhu wohiyeriwa.” Yesu heerenrye omaliha mwaha wa mulopwana ole. Owo haahiyale waahusiha oomuchara awe. Moohiyana, owo aapharihela ekari yeele wi aahusihe wi wakhala wi annateteiwa ni okhalano ichu sincipale, yaahaala ohiya omurumeela Muluku.​—Luka 12:13-15.

12, 13. (a) Tiheeni Yesu enreiye yaatikhininhe Akiriki o Yerusalemu? (b) Yesu aakhunle hai vaavaa Filipi aamulenleiye wi akumane ni achu?

¹² Mahiku ookuchula a Yesu veelaponi ya vathi yaari ookacamiha. (Mateu 26:38; Yohani 12:27) Owo aanasuwela wi aahaala ohooxeya ni okhwa. Aanasuwela tho wi aakhalano muteko mutokweene aaphwaneleiye ophara ahaakumve wiiphiwa. Wi nooniherye, Murunku wa 9 a Nisani, Yesu aavolowa mu Yerusalemu amuwenle mwaasana a puuru. Achu yaamwaakhela phaama ntoko Mwene aya. (Luka 19:38) Nihiku noocharela, moolipa murima Yesu aawiikara mu empa ya Muluku alopwana a nrima yaawo yaatumiha ichu ni esisapo yoowalamela ni owiiyerya achu.​—Luka 19:45, 46.

¹³ Akiriki akina, yaawo yaakele o Yerusalemu wi empake Paska, yaahoona yeeyo Yesu aapankeiye nave yaatikhina. Mwawiihiiha yaamveka murummwa Filipi wi ekumane ni Yesu. Nyenya tahi wi Yesu awaavya achu wi emwaakihe wa amwiicani awe. Owo aasuwela yeeyo yaari yoochuneya. Aateteiwa ni yoochuna ya Yehova wa yoowo ya ovaha okumi awe ntoko mukucho. Mwawiihiiha aawuupuxerya oohuserya awe wi moohilekela aahaala wiiphiwa nave wi oothene yaaphwanela ovaha ikumi saya ntoko mukucho. Owo aaloca: “Mutxhu onasiveliwa ti ekumi awe, yeyo enammurimela; nto yowo onakhotxa ekumi awe mwelaponi mu, onamukhapelela mwa ekumi yohimala.” Yesu tho aaroromeliha wi ‘Atithi awe anamwatxitximiha’ oomuchara awe ni waavaha okumi woohimala. Filipi anwerya waaleela Akiriki michaka seiya soolipiha.​—Yohani 12:20-26.

14. Naamwi Yesu aakunhe muteko wa olaleerya makupa oopacerya a okumi awe, ichu taani ikina eereiye?

¹⁴ Vaavaa Yesu aareiye veelaponi yavathi muteko awe mutokweene waari olaleerya michaka saphaama. Naamwi aateteiwa ni olaleerya, tahi wi elukuluku yoothene uupuwela sa muteko. Ntoko yootakiherya, owo aaya ochapela othela ekwaha emoha, weiwo aatatunxeiye maahi ekhala eviinyu yaphaama. (Yohani 2:2, 6-10) Owo tho aanapuha yoolya vaate va asinthamwene awe ni akina yaawo yaasiveliwa ni michaka yaphaama. (Luka 5:29; Yohani 12:2) Yesu tho aanaavya elukuluku ya wiichuuwa wi uupuwelele ni ovekela.​—Mateu 14:23; Marko 1:35; 6:31, 32.

‘ORIHA MURITXI WOTHENE’

15. Paulo aalonce wi Akiristu anaphwanela weera eheeni, nave owo ovanhe hai yootakiherya yaphaama?

¹⁵ Murummwa Paulo aaloca wi Akiristu ari ntoko alipa oochimaka mmukipici mutokweene nave wi yaakhwanihe anaphwanela ohiya echu vyakala yaahaala owuukhula. (Mwaalakhanye Ahebri 12:1.) Paulo oovaha yootakiherya yaphaama. Owo anwerya okhala ooreela ni oovuwa ntoko muhooleli a malapelo a Ayuuta, nyenya aahiya soothene wi eereno yeeyo “eri yaphama.” Aalapa mwakuru mmuteko wa olaleerya nave aaphiya mmapuro mancipale ophitaanyerya Siriya, Asiya Mukhaani, Maketooniya, ni Yuteya. Paulo aanamvarerya phatamari oomwaahiyu a okumi wirimu. Owo aaloca: “Kinnatxuwala itxhu sotxuli, nave kinnilipiserya oya oholo, hiha kinnetxa kiyaka oriwo ekhomo wi kiphwanye ntxhuwelo.” (Filipi 1:10; 3:8, 13, 14) Paulo haathenle, nave ela yaamukhaviherya waarumeela Apwiya ‘ahiteteiwaka.’​—1 Korinto 7:32-35.

16, 17. Moohipwacha wakhala wi noothela naari hooye, nnii nimutakiherye hai Paulo? Marko ni Claire yenreno ela mwawiihai?

¹⁶ Moolikana ni Paulo, alapeli akina a Yehova annathanla okhala aciye wi yeere sincipale mmuteko wa Yehova. (Mateu 19:11, 12) Moohiyana ni atheli, aciye wiiliwiili hanakhalano mirici sincipale sa emusi. Nyenya moohipwacha waakhanle noothela naari hooye, oothene hiyo nnaphwanela ‘oriha muritxi wothene’ yoowo waahaala onihiiha omurumeela Yehova. Nnaphwanela otoroka sookhovelela sahu wi nsepe oyeeha elukuluku yincipale wi neere sincipale mmuteko wa Yehova.

¹⁷ Ntoko yootakiherya, Marko ni Claire, yaawo annuwale o Wales, yaapacerya opiyoneero vaavaa yaakuchunlaaya exikola. Emanle othela yaatitelela opiyoneero. Awo yaanachuna weera sincipale. Marko onnathariha: “Naakhweiha okumi moorweela wa ohiya empa ahu ni muteko ahu wi nivolowe mmuteko wa oteka.” Mu iyaakha 20, awo anneeca mmakupa mancipale a Afrika wi ekhaviherye otekiwa wa Ipa sa Omwene. Ilukuluku ikina awo yaanarammwa ikhorowa, nyenya Yehova aanaakhapelela ikwaha soothene. Claire onnaloca: “Omaliha nihiku noothene nimurumeelaka Yehova ennanivaha ohakalala otokweene. Nookhalano asinthamwene ancipale mmapuro oohiyana hiyana, nave henanithowa echu. Ichu vakhaani seiyo naahin’yaahu hasinalikana ni mareeliho anarweela wa omurumeela Yehova elukuluku yoothene.” Arummwa ancipale a elukuluku yoothene annoona mmukhalelo woolikana.a​—Moone masu a vathi.

18. Makoho taani nnaphwanelaahu wiipakela?

¹⁸ Nyuwaano munoona wi munanwerya okhala oohakalala mmuteko anyu wa Yehova? Sookhala ichu inooweihaani opaka yeeyo eri yoochuneyaxa? Wakhala wi ti hiiha, tiheeni munahaalaanyu weera? Akhweya murehererye mukhalelo anyu wa omuhuserya ni omwaalakhanya Piipiliya. Mwaha onacharela onahaala othariha mukhalelo wa weerano yeela.

[Nsu na vathi]

[Ekaaxa va epaaxina 26]

MASU ATHARIHIWE

Mmurumeele Yehova Muhirino Sooweiha: Nnaphwanela okuha omulapela wahu Yehova mmakupa oopacerya mu okumi ahu ni opharihela phaama elukuluku ni ikuru sahu. Eparipari wi nnaphwanela opharihela elukuluku ni ikuru sahu wi nikhwaaniherye mirici sahu, nyenya ti woochuneya opaka matorokelo mu okumi ahu wi nimalihe elukuluku yincipale nimurumeelaka Yehova