MWAHA WA EKAAPA | MULUKU ONOONA HAI IKHOCO?

Muluku Onoona Hai Ikhoco Olelo?

Olelo achu annahooxiwa. Ancipale wiiliwiili annamveka Muluku wi awoopole nave annakhwa minikwa waakhanle wi onnaawiriyana. Apwanne Muluku onnawiriyana oveka waya nikhaviheryo? Hanka vooloca sa yaale anapaka ikhoco wi emalihe ohooxeya waya? Apwanne Muluku onnakhaviherya wiilipixerya waya, oonaka ikhoco saya ntoko soophwanelela?

Voopacerya, mulipiheye ni ela: Muluku onnoona onanara wa elapo, nave onnalakelela weeravo echu. (Salumu 72:13, 14) Mmasu awe, Piipiliya, Muluku onnalaiherya wi yaale ‘anahawa, onamwavaha witxhuwa.’ Liini? “Nihiku onereiye oneye wirimu Pwiya Yesu Kristu ni Ankelo a owerya wawe . . . wi awonihe ekoi yale anamukhotxa Muluku, ni yale ahiniwelela Mutxhaka Waphama wa Apwiya Yesu Kristu.” (2 Tesalónika 1:7, 8) Elukuluku eyo ti ya omwaahiyu yeeyo Piipiliya oniichaneiye “ekhotxho ya nihiku ntokotoko na Muluku a ikuru sothene,” nave tho esuweliwe ntoko Armaketo.​—Wupulula 16:14, 16.

Mu ekhoco eyo yoomwaahiyu, Muluku hanii aapharihele achu, nyenya onahaala ompharihela mwanawe Yesu Kiristu, ni soopatuxiwa sikina soomunepani wi ewane ni mwiicani. Ikuru sa wirimu inahaala oruuha makuchuwelo wa onanara woothene.​—Isaiya 11:4; Wupulula 19:11-16.

Olelo, moonelo wa Muluku vooloca sa ikhoco hotoroken’ye. Owo nlelo onoona ekhoco ntoko mukhalelo wa omaliha onanara ni amwiicani. Nyenya eparipari ti yawi, ovinyerya khalai, Muluku mwaneene tonalakelela elukuluku ene enahaalaaya weereya ni taani onahaala owana. Ntoko noonnaahu, Muluku oolakelela elukuluku onahaaleiye owaniha ekhoco wi amalihe oonanara vamoha ni mwiicani mu ekhoco ya omwaahiyu nave owo onahaala ompharihela Mwanawe, Yesu Kiristu. Eyo enataphulela wi ikhoco sa olelo hasineemereryiwa ti Muluku, moohipwacha waakhanle wi eneeriwa ni nthowa noophwanelela.

Wi nlikanyihe: Mwaanyiherye anamwane eeli anawana eniiha tiithi aya ahirivo. Awo annahiyererya nave annawiichana atiithi aya ni telefone. Mmoha onaloca wi munnawe taapaceryinhe owana, nave mukina onaloca wi aamuhooxiwa. Oopiili annaveka nikhaviheryo na tiithi aya, nave annaweherya nikhaviheryo ntakhara owana waya. Vano, amanle waawiriyana oopiili, tiithi onnaaleela wi ehiye owana nave wi enweherye tiithi aphiye owaani. Mu elukuluku yavakhaani anamwane oopiili annaweherya. Moohilekela, awo annapacerya owana wanaawiili. Vaavaa tiithi onaphiyeiye, hanasiveliwa ni mwaana mmoharu mano nave onnaalaka nthowa na ohiiwelela waya.

Olelo, maloko anawana, wiiliwiili annamveka Muluku wi aakhaviherye. Nyenya Muluku hanakhaviherya ikhoco inawaniwa olelo. Ohiya yeeyo, Mmasu awe, Piipiliya, owo onnaloca: “Muhilive yonanara ni yonanara,” nave, “Muhiwinlele ikuhu akhwinyu.” (Aroma 12:17, 19) Mwawaaceererya, Muluku ooloca wi achu anaphwanela ‘omulipelela Yowo’ wi eerevo echu, mu Armaketo. (Salumu 37:7, Nlakano Nahihano) Maloko hananweherya Muluku wi eerevo echu nave annawana, mwawiihiiha, owo onoona ikhoco iho ntoko ohiiwelela ni omwaryeya. Mu Armaketo, Muluku onahaala wooneiha esara awe wi amalihe owana wa maloko moomalela moorweela wa “omaliha ikhotxho ophiyerya onakomelawo elapo.” (Salumu 46:9; Isaiya 34:2) Chiryene, Armaketo enahaala okhala ekhoco wi amalihe ikhoco soothene.

Omala wa ikhoco mareeliho mamoha a Omwene wa Muluku. Yesu aaloca sa omwene ola mu nivekelo na ntakiheryo: “Omwne anyu orwe. Okhwela wanyu wereye, ntoko wirimu hiha vathiva.” (Mateu 6:10) Omwene wa Muluku tahi wi pahiru onahaala omaliha ikhoco soothene nyenya tho onahaala ommaliha mwiicani yoowo onatetheerela ikhoco.a (Salumu 37:9, 10, 14, 15) Hiwaavo minikwa wi oomuchara a Yesu annawehererya mareeliho a Omwene wa Muluku.​—2 Pedro 3:13.

Ophiyerya liini nnaphwanelaahu oweherya Omwene wa Muluku wi oruuhe makuchuwelo a makacamiho, ohooxa ni mwiicani? Waakhwaniheryeya wa sooloherya sa Mpiipiliyani sinnooniherya wi nnakhala mu “mahiku òmaliherya” a mukhalelo yoola wa ichu. (2 Timóteo 3:1-5)b Moohilekela, Omwene wa Muluku onahaala oruuha makuchuwelo a mahiku yaala oomaliherya mu ekhoco ya Armaketo.

Ntoko noonnaahu wuupaceryani, yaale enii ekhwe mu ekhoco yeela yookuchula ti yaawo “ahiniwelela Mutxhaka Waphama wa Apwiya ahu Yesu Kristu.” (2 Tesalónika 1:8) Nyenya muupuwele wi Muluku hanasiveliwa ni okhwa wa muchu ori oothene, ophitaanyerya oonanara. (Ezekiyeli 33:11) Woona wi owo ‘hanakhwela wi mutxhu arimele’ mu ekhoco yeeyo yookuchula, owo onneeriha wi michaka saphaama sa Apwiya ahu Yesu ‘ilaleyiwe mwelaponi yothene wi ivahe onamona maloko othene’ makuchuwelo ehaakumve ophiya. (2 Pedro 3:8, 9; Mateu 24:14; 1 Timóteo 2:3, 4) Aai, moorweela wa muteko wa olaleerya wa elapo yoothene oneeriwa ni Anamoona a Yehova, achu aakhalano ekari ya omusuwela Muluku, wiiwelela michaka saphaama sa Yesu, ni okhala wi yoone elukuluku ikhoco ihinahaalaaya okhala.

[Masu a vathi]