MWAHA 9

Hiyaano Nnakhala ‘Mmahiku Òmaliherya’?

Ichu taani ineereya mmahiku ahu saalociwe Mpiipiliyani?

Masu a Muluku analoca wi achu yaahaala okhala awiihai ‘mmahiku òmaliherya’?

Ichu taani saphaama Piipiliya aalonceiye saahaala weereya ‘mmahiku òmaliherya’?

 1. Mano nnahaala ohuserya woowi vooloca sa muhoolo?

MONTOKO owiriyana miselo mu televisau naari mu raatio nave mukoha: ‘Tiheeni enahaala weereya ni elapo ela muhoolo?’ Ichu soonanara sinneereya mootutuxa ni moohiwehererya, haavovo muchu onawerya oloca tiheeni enahaala weereya omeelo. (Tiyako 4:14) Nyenya, Yehova onnasuwela tiheeni enahaala weereya muhoolo. (Isaiya 46:10) Khalai Masu awe, Piipiliya, yaaloca ichu soonanara ineereya mmahiku ahu, nyenya tho ichu saphaama saahaala weereya muhoolo.

2, 3. Nikoho taani oohuserya yaampakenlaaya Yesu, nave owo aakhunle hai?

² Yesu Kiristu ooloca sa Omwene wa Muluku, yoowo onahaala omaliha onanara ni weeriha elapo yavathi okhala parataiso. (Luka 4:43) Achu yaanachuna osuwela ti liini Omwene owo waahaalaaya orwa. Mwevelevelo, oohuserya a Yesu yaamukoha yoowo: “T’evi eneneryo ya orwa wà, ni yomaliha elapo?” (Mateu 24:3) Yesu awaakhulaka aahaaleela wi Yehova Muluku pahiru taasuwela ti liini enahaalaaya orwa makuchuwelo a elapo ela ya Satana. (Mateu 24:36) Nyenya Yesu aahaaleela ichu seiyo sahaala weereya veelaponi yavathi, Omwene ohaakumve oruuha murecele weeparipari ni ohuukhuwa wa achu. Hiihaano sinneereya ichu seiyo owo aalonceiye!

³ Nihaakumve othokororya mathipelo awi hiyaano nnakhala mweelukuluku “yomaliha elapo,” hankooni nthokororye mwawaakuveya ekhoco ehooniwe ni muchu. Ekhoco eyo yeeren’ye wirimu, nave yookhumelelavo aya ennanivolowela hiyo.

EKHOCO WIRIMU

4, 5. (a) Tiheeni yeeren’ye wirimu Yesu amanle otikitheryiwa ntoko Mwene? (b) Mwawiiwanana ni Wupulula 12:12, tiheeni yaahaala okhumelelavo nthowa na ekhoco wirimu?

⁴ Mwaha ovinre wa liivuru ola woothariha wi Yesu Kiristu oopacerya olamula wirimu ntoko Mwene mu eyaakha ya 1914. (Mwaalakhanye Daniyeli 7:13, 14.) Vahilekenle, amanle waakhela owerya wa Omwene, Yesu aaheera echu. Piipiliya onnaloca: “Wàkhalawo ekhotxo wirimu. Miguel [nsina nikina na Yesu] ni ankelo awe yàwana ekhotxo ni enama yawopiha [Satana Musaserya], nave yeyo ni ankelo aya yàwanano.”a Satana ni ankeelo awe oonanara, masololo, aayeleela ekhoco eyo nave ahiikariwa wirimu eriheliwa veelaponi yavathi. Ankeelo oororomeleya a Muluku yaahakalala nthowa nawi Satana ni masololo awe ahiikariwa. Nyenya, achu hiyaaya okhalano murecele ntoko yoowo. Moohiyana, Piipiliya ooloca: “Otakhaliwa ti wa elapo . . . ntakhara musaserya okhuruwela sa nyuwo ni owali mutokwene vosuwela wi elukuluku awe ehanle vakhani.”—Wupulula 12:7, 9, 12.

⁵ Khwoo nkoonani yeeyo yaahaala okhumelelavo nthowa na ekhoco wirimu. Mu esara awe, Satana aahaala oruuha otakhaliwa, naari makacamiho ntakhara achu veelaponi yavathi. Ntoko munahaalaanyu woona, hiyaano nnakhala mu elukuluku yeeyo ya makacamiho. Nyenya ela enahaala okhala yawaakuveya—“elukuluku . . . vakhani” pahiru. Satana onnasuwela wi elukuluku ya makacamiho enahaala okhala yawaakuveya. Piipiliya oniichana elukuluku ela ntoko “mahiku òmaliherya.” (2 Timoteo 3:1) Hiyaano ninnahakalala nthowa nawi moohilekela Muluku onahaala omaliha ovolowela wa Musaserya veelaponi yavathi! Hankooni nthokororye ichu ikina ilociwe Mpiipiliyani seiyo ineereya hiihaano. Ichu seiya sinathoonyerya wi nnakhala mmahiku ookuchula nave Omwene wa Muluku moohilekela onahaala oruuha mareeliho oohimala wa yaale anamusivela Yehova. Voopacerya, hankooni naalikhele makhalelo maxexe a eneneeryo yeeyo Yesu aalonceiye wi yahaala wooniherya elukuluku yeela nnakhalaahu.

SAWEEREYA ITOKOTOKO MMAHIKU OOKUCHULA

6, 7. Masu a Yesu vooloca sa ikhoco ni etala anakhwaaniheryeya hai olelo?

⁶ “Nloko nnamurosa nloko nikina, nave omwene onamurosa omwene.” (Mateu 24:7) Macikhwi aachu ahiiphiwa mu ikhoco sa nsana nivinre. Mulipa a miyaha o Kra-pretanya oorepa: “Mu nsana 20 nootepa oyeehiwa nikhami na achu. . . . Naari nsana na ekhoco yoohimala, ni ilukuluku vakhaani pahiru sa wiichuuwa.” Yoolokoha ya marehereryo anahuserya Saweereya sa Mulaponi enii: “Achu ancipale akhwile ni ekhoco mu [nsana 20] aaphiyerya wuuluulela oraru opwaha achu akhwile mu ikhoco soothene ovinyerya nsana noopacerya E.K. ophiyerya 1899.” Achu oopwaha macikhwi 100 aakhwa nthowa na ekhoco opacerya eyaakha ya 1914. Achu ancipale aahaawa nave aahooxeya nthowa na orimeeliwa oosiveliwa aya mukhoconi. Akhweya nyuwo moomuyeleela muchu mwaamusivelaanyu mmukhalelo yoola.

⁷ “Onamukhalamo etala.” (Mateu 24:7) Alipa ootholathola annaloca wi olimmwa wa soolya wohaacereryeya vancipale mu iyaakha 30 ivinre. Naamwi hiiha, etala enamvira eriki mutepa nthowa nawi achu ancipale haanono ikhorowa sawaakhwanela wi ethume soolya, naari haanono imaca wi yaalemo soolya. Macikhwi aachu annahooxeya nthowa na etala yoohimala. Marehereryo a Okumi Veelaponi Yoothene annaloca wi anamwane oopwaha macikhwi mathanu annakhwa eyaakha ni eyaakha.

8, 9. Tiheeni enooniherya wi sooloherya sa Yesu vooloca sa ocikinyeya wa elapo ni ireca sinnakhwaaniheryeya?

⁸ “Elapo enarwa etxikinyeya.” (Luka 21:11) Mwawiiwanana ni Nikhuuru na Alipa Oohuserya, ocikinyeya otokotoko wa elapo woophiyerya 19 onneereya eyaakha ni eyaakha. Owo ocikinyeya otokweene onawerya onyaanya ipa soothitaanyeryiwa ni okumuwa wa echaya yoowo oneereya eyaakha ni eyaakha. Soorepela soophwanyeya sinnooniherya wi ocikinyeya wa elapo woowiipha achu macikhwi meeli opacerya 1900. Nikhuuru nikina ninnaloca: “Oya vahoolo wa ikhankoonya ovukunle vakhaani pahiru waaca wa achu ookhwa.”

⁹ “Anarwa ekhalamo . . . ipahu.” (Luka 21:11) Naamwi oloola ireca oyaaka vahoolo, ireca sakhalai ni sahihano sinnaahooxa achu. Yoolokoha emoha enaloca wi ireca soosuweliwa phaama—ophitaanyerya okothomola otokotoko, korowesa, ni nammirima—sootepa wunlaana mu iyaakha seiha sookuchula, nave ireca ikina ti soovila oloola ni mirece irivovo. Mwevelevelo, soophacuwa ireca ivyaani sawaakhwana 30. Ikina sa seiyo hasinaweryeya oloola.

MAKHALELO AACHU ANAKHALA MMAHIKU OOKUCHULA

10. Makhalelo taani alociwe mu 2 Timóteo 3:1-5, munoonaanyu achu yooniheryaka olelo?

¹⁰ Ohiya oloca saweereya sa mweelaponi pahiru, Piipiliya ooloca tho wi mahiku ookuchula yahaala wooniheryiwa ni otorokeya wa nloko naachu. Murummwa Paulo ooloca mukhalelo achu ancipale yaahaalaaya okhala. Ninnaalakhanya: “Mahiku òmaliherya inamphiya ilukuluku sokatxamiha.” (Mwaalakhanye 2 Timóteo 3:1-5.) Paulo oriye wi achu yahaala okhala a mukhalelo ola:

▪ awiisivela mukhataaya

▪ oosivela icarama

▪ oohiwiiwelela asitiithi

▪ ooheela murima

▪ oohikhalano osivela woophacuwano

▪ oohiwerya wiihiiha

▪ ooximwa

▪ oosivela ichu soohakalaliha, ohiya omusivela Muluku

▪ yooneihaka ethooni ya ovekela, nyenya ekhoocaka ikuru sa ovekela weiwo

11. Salumu 92:8 onathoriha hai yeeyo enahaala weereya wa achu oonanara?

¹¹ Onipuro munakhalaanyu aakhalawo achu ntoko yaala? Moohikhwa minikwa aakhalawo. Makupa ari oothene aakhalawo achu yaawo arino makhalelo oonanara. Ela enooniherya wi moohilekela Muluku onahaala weera echu, nthowa nawi Piipiliya onii: “Namwi amutakhali emelaka ntoko manasi, nave ethapuluwaka yale anera sonanara, anaweherya otolosiwa wa mahiku òhimala.”—Salumu 92:8.

SAWEEREYA SAPHAAMA!

12, 13. Mano nsuweliho neeparipari nsaren’ye hai ‘mmahiku òmaliherya’?

¹² Mwevelevelo mahiku ookuchula ari oosareya makacamiho, hiiha ntoko Piipiliya aalonceiye. Nyenya mu elapo yeela ya makacamiho, sookhalamo saweereya saphaama variyari va arummwa a Yehova.

¹³ Liivuru a Mpiipiliyani a Daniyeli ooloca wi nsuweliho neeparipari naahaala osareya. Mano eyo yahaala weereya liini? Mu “nihiku nomaliha.” (Daniyeli 12:4) Opacerya 1914, Yehova onnaakhaviherya oothene yaale anachuna chiryene omurumeela owo wi yunnuwe mu omwiiwexexa Piipiliya. Awo annapwahiherya wiiwexexa iparipari vooloca sa nsina na Muluku ni yoochuna awe, mukucho wa woopola wa Yesu Kiristu, mukhalelo wa alipa ookhwa, ni ovinya muukhwani. Mwa waacererya, arummwa a Yehova aahuserya meecelo aphaama a okumi, anaruuha mareeliho nave anamucicimiha Muluku. Awo tho anniiwexexa phaama muteko wa Omwene wa Muluku, nave ti mwawiihai Omwene owo onahaalaya omaliha makacamiho veelaponi yavathi. Tiheeni awo aneeraaya ni nsuweliho nenla? Nikoho nla ninnanruuhela yooloherya ekina enakhwaaniheryeya mmahiku ookuchula ala.

14. Olelo michaka yaphaama inalaleeryiwa ophiyerya woowi, nave taani analaleerya michaka seiyo?

¹⁴ “Mutxhaka ola wa omwene onamulaleyiwa mwelapo yothene wi ovahe onamona maloko othene,” ooloca Yesu Kiristu mu yooloherya awe ntakhara makuchuwelo a elapo ya Satana. (Mwaalakhanye Mateu 24:3, 14.) Sinnalaleeryiwa michaka yaphaama ya Omwene veelaponi yoothene mu ilapo soopwaha 230 mu ilocelo masana. Ennalaleeryiwa vooloca sa tiheeni Omwene owo, yeeyo onahaalaaya weera ni vooloca sa mareeliho onahaalaaya oruuha. Macikhwi a Anamoona a Yehova annalaleerya mwamvai michaka yaphaama ya Omwene. Awo anarweela “wa atxhu wa ilapo, mahimo, maloko ni ilocelo sothene.” (Wupulula 7:9) Anamoona a Yehova annavaha mahusiheryo a Piipiliya a veechokoni oohiliveliwa wa macikhwi aachu yaawo anachuna osuwela yeeyo Piipiliya onahusiheiye chiryene. Mwevelevelo okhwaaniheryeya wa yooloherya ela ennatikhiniha vancipale, vawoona wi Yesu aaloca wi Akiristu eeparipari yaahaala ‘witxiwa t’atxhu othene’!—Luka 21:17.

TIHEENI MUNAPHWANELAANYU WEERA?

15. (a) Nyuwo munneemererya wi hiyaano nnakhala mmahiku ookuchula, nave ntakhara heeni? (b) “Okutxhula” onahaala otaphulela eheeni wa achu oothene yaale anakhala moovanyihana ni Yehova ni wa achu oothene yaale anacicimiha olamulela wa Omwene wa Muluku?

¹⁵ Woona wi sooloherya sincipale sa Piipiliya sinnakhwaaniheryeya, nyuwo hamuneemererya wi nnakhala mmahiku ookuchula? Yamala olaleeryiwa michaka yaphaama ophiyerya Yehova ohakalala, “okutxhula” onarwa ophiya chiryene. (Mateu 24:14) “Okutxhula” enataphulela elukuluku yeeyo Muluku onahaaleiye omaliha onanara veelaponi yavathi. Yehova onahaala ompharihela muteko Yesu ni ankeelo wi aatoloxe achu oothene yaale enakhala moovanyihana ni Yoowo. (2 Tesalónika 1:6-9) Satana ni masololo awe herwa tho yaahuweliha achu. Voocharela vaya, Omwene wa Muluku onahaala oruuha mareeliho wa achu oothene yaale anacicimiha olamulela wa Omwene owo.—Wupulula 20:1-3; 21:3-5.

16. Echu taani ya miruku nyuwo munaphwanelaanyu weera?

¹⁶ Woona wi makuchuwelo a elapo ya Satana ari vakhiviru, nnaphwanela wiikoha: ‘Tiheeni kinaphwanelaaka weera?’ Ti wa miruku opwahiherya ohuserya sincipale vooloca sa Yehova ni malamulo awe wa hiyaano. (Yohani 17:3) Mmuhuserye Piipiliya mwamvai. Khovelelani othukumana moohihiyererya ni akina yaawo anaavyaavya weera yookhwela ya Muluku. (Mwaalakhanye Ahebri 10:24, 25.) Pwahiheryani waacererya nsuweliho nenlo Yehova Muluku onaavaheiye achu veelaponi yoothene, nave mutoroke makhalelo a okumi anyu wi mweemereryiwe ti Muluku.—Tiyako 4:8.

17. Ntakhara heeni otoloxiwa wa achu oonanara onahaala waaphwanya achu ancipale mootutuxa?

¹⁷ Yesu aaloca wi achu ancipale yaahaala onyemula eneneeryo yawi hiyaano nnakhala mmahiku ookuchula. Otoloxiwa wa achu oonanara onahaala orwa mootutuxa nave moohiwehererya. Ntoko mpava ohiyu, onahaala waaphwanya achu ancipale mootutuxa. (Mwaalakhanye 1 Tesalónika 5:2.) Yesu oolopola: “Ntoko saphatxun’waya khalai wa elukuluku ya Noè, hihatho enahawela yereye elukuluku ya orwa wa Mwana a mutxhu. Ntoko senren’yaya mwa elukuluku ya mahi òsasa ehiphiyale, atxhu yànalya, yànawurya, yànathela, ni yànatheliwa, ophiyerya nihiku Noè avolonweiye mmwatxeyani ni hiyasuwela etxhu ophiyerya orwa wa mahi yatolonse atxhu othene; oni wereye hihatho orwa wa Mwana a mutxhu.”—Mateu 24:37-39.

18. Yoolopola taani elociwe ni Yesu nnaphwanelaahu ohela mmurimani?

¹⁸ Yesu aahaaleela alipa oowiriyana awe: “Mwikosopeke wi mirima sanyu ihilimeliwe ni sotxapaheya, ohapaliwa, ni oteteiwa wa ekumi, wi nihiku nenlo nihotutuseni, ntakhara nni nikhale ntoko murakho oni ophiye wa atxhu othene amanke mwelapo ya vathi. Vano mwiwehereryeke ni nvekeleke elukuluku yothene wi mukhale ni ikuru sotxhawano sothene seiyo inahawela ophatxuwa, nave wi mphwanele wemela vamithoni va Mwana a mutxhu.” (Luka 21:34-36) Ti wa miruku ohela mmurimani Masu a Yesu. Ntakhara heeni? Nthowa nawi yaale aneemereryiwa ti Yehova Muluku ni “Mwana a mutxhu,” Yesu Kiristu, aakhalano ewehereryo ya ovuluwa omakuchuwelo wa elapo ya Satana wi ekhale okhala wookhala mu elapo yahiihaano yootikhiniha yeeyo eri vakhiviru!—Yohani 3:16; 2 Pedro 3:13.

[Nsu na vathi]

PIIPILIYA ONAHUSIHA EHEENI

▪ Mahiku ookuchula aasareya ni ikhoco, etala, ocikinyeya wa elapo, ni ireca.—Mateu 24:7; Luka 21:11.

▪ Mmahiku ookuchula, achu ancipale anniisivela mukhataaya, annasivela icarama, annasivela ohakalala nyenya hanamusivela Muluku.—2 Timoteo 3:1-5.

▪ Mmahiku ookuchula ala, michaka yaphaama ya Omwene sinnalaleeryiwa veelaponi yoothene yavathi.—Mateu 24:14.

[Eruku va ipaaxina 90, 91]

[Eruku va epaaxina 93]

“Mutxhaka ola wa omwene onamulaleyiwa mwelapo yothene.”—Mateu 24:14