Yehova Onnaloca ni Soopatuxiwa Sawe

“Mwakiveka wi kowiriyanekeni mulotxaka.”​—YOBI 42:4.

MACIPO: 113, 114

MWAAHAALA WAAKHULA HAI?

Ntakhara heeni Muluku onnapharihela masu ookhweya vaavaa onaloceiye ni achu?

Ntakhara heeni ohiyana wa ilocelo sa achu tahi nikacamiho wa Yehova?

Yoolakelela taani marehereryo a Yehova yaaryaayano empakaka Tradução do Novo Mundo?

1-3. (a) Ntakhara heeni muupuwelo ni elocelo ya Muluku ti ya vasulu waapwaha achu? (b) Tiheeni nnahaalaahu othokororya mmwaha yoola?

YEHOVA aachuna waavaha akina ekumi ni ohakalala, mwawiihiiha, aahaapatuxa ankeelo ni achu. (Salumu 36:9; 1 Timóteo 1:11) Woopaceryani Yehova aampatuxa Yesu yoowo murummwa Yohane omwiichanneiye ntoko “Nsu.” (Yohani 1:1; Wupulula 3:14) Yehova aanaloca ni Yesu nave aanamuleela muupuwelo awe ni soolakelela sawe. (Yohani 1:14, 17; Kolosi 1:15) Murummwa Paulo ooloca tho wi ankeelo annalocihana nave wi aakhalano elocelo yoohiyana ni elocelo ya achu.​—1 Korinto 13:1.

² Yehova oosuwela ichu soothene vooloca sa ankeelo ni achu yaawo aapatunxeiye. Owo onnawerya owiriyana mavekelo a achu ancipale mweelukuluku emohamoha nave onniiwexexa mavekelo aya moohipwacha elocelo ene. Ohiya pahiru owiriyana mavekelo, Yehova tho onnaloca ni ankeelo nave onnaahoolela. Wi awerye weerano yeeyo, Yehova onapharihela muupuwelo ni elocelo Awe ya vasulu waapwaha achu. (Mwaalakhanye Isaiya 55:8, 9.) Mwawiihiiha, vaavaa onaloceiye ni achu, owo onnakhweiha michaka sawe wi niwerye wiiwexexa.

³ Mmwaha yoola, nnahaala othokororya mukhalelo Yehova onaloceiye ni achu mookwakwaleya. Nnahaala tho woona matorokelo Muluku onapakeiye wi aloce ni achu mwawiiwanana ni mikhalelo saya.

MULUKU ONNALOCA NI ACHU

 4. (a) Elocelo taani Yehova aapharihenleiye wi aloce ni Moose, Samuwele ni Tavite? (b) Ichu taani inaphwanyeya Mpiipiliyani?

⁴ Vaavaa aaloceiye ni mulopwana oopacerya Aatamu mu emaca ya Eeteni, Yehova akhweya aapharihela Eheepri ya khalai. Ohoolo waya, Yehova aanaloca ni achu ntoko Moose, Samuwele ni Tavite. Naamwi yaarempe malamulo a Muluku mu elocelo ya Eheepri epharihelaka masu aya, awo yaarepa muupuwelo wa Muluku. Awo yaanarepa masu yaalociwa ti mwaneene Yehova nave tho yaarepa mukhalelo Muluku aakhalinheiye achu awe. Ntoko yootakiherya, Piipiliya onnaloca nroromelo ni omusivela waya Muluku, onnaloca tho soohesa ni soocheka saya. Soothene seiya irempwe wi inihusihe.​—Aroma 15:4.

 5. Apwanne Muluku aapharihenle pahiru Eheepri wi aloce ni achu? Mutharihe.

⁵ Tahi wi Yehova ilukuluku soothene onaloca ni achu apharihelaka Eheepri. Mweelukuluku Aisarayeli yoopoliwaaya o Paapulu, akina yaanaloca Aramaiko nihiku nnihiku. Akhweya ti nthowa nene Taniyeli, Yeremiya ni Estra yaarempaaya makupa a Piipiliya mu elocelo ya Aramaiko.​—Esdra 4:8; 7:12; Yeremiya 10:11; Daniyeli 2:4.

 6. Ntakhara heeni Soorepa sa Eheepri saataphuleliwa mu Ekiriki?

⁶ Ohoolo waya, vaavaa Alexantre Mutokweene aalamuleleiye makupa mancipale, Koini naari Ekiriki yaari elocelo yawunlaana mu ilapo sincipale. Ayuuta ancipale yaapacerya oloca Ekiriki, nave moovira wa elukuluku Soorepa sa Eheepri saataphuleliwa mu Ekiriki. Soorepa iho sootaphuleliwa iniichaniwa Septuaginta. Owo aari Piipiliya oopacerya otaphuleliwa nave toochuneya. Alipa ootholathola annaloca wi Septuaginta aarempwe ni alipa ootaphulela awaakhwana 72.a (Moone masu a vathi.) Akina yaataphulenle masu ti masu a Soorepa sa Eheepri, nyenya akina hooye. Naamwi hiiha, Ayuuta ni Akiristu yaawo yaaloca Ekiriki yaanaroromela wi Septuaginta aari Masu a Muluku.

 7. Elocelo taani Yesu aapharihenleiye wi aahusihe arummwa awe?

⁷ Vaavaa Yesu aareiye veelapo yavathi, owo akhweya aaloca Eheepri. (Yohani 19:20; 20:16; Saweriwa T’arummwa 26:14) Ti wooweryeya wi aapharihela tho masu a Aramaiko yaawo yaari oosuweliwa mweelukuluku yeele. Owo tho aasuwela Eheepri ya khalai yeeyo Moose ni alipa a miririmu yaalocaaya yaawo soorepa saya saalakhanyiwa mu asinakooka isumana soothene. (Luka 4:17-19; 24:44, 45; Saweriwa T’arummwa 15:21) Nave naamwi Ekiriki ni Elatin yaanalociwa mweelukuluku ya Yesu, Piipiliya hanaloca waakhanle wi Yesu aapharihela ilocelo seiya.

8, 9. Ntakhara heeni Akiristu ancipale yaanaloca Ekiriki, nave eyo enanihusiha eheeni vooloca sa Yehova?

⁸ Arummwa oopacerya a Yesu yaaloca Eheepri, nyenya amanle okhwa, arummwa awe yaanaloca ilocelo ikina. (Mwaalakhanye Saweriwa T’arummwa 6:1.) Vaavaa michaka yaphaama yaaceereryeyaaya, Akiristu ancipale yaanaloca Ekiriki ohiya Eheepri. Nthowa na Ekiriki okhala elocelo yawunlaana, aliivuru a Mateu, Marko, Luka ni Yohani yaarempwe mu Ekiriki.b (Moone masu a vathi.) Nave tho, ikaarata sa murummwa Paulo ni aliivuru akina a Mpiipiliya yaarempwe mu Ekiriki.

⁹ Vaavaa anamarepa a Soorepa sa Ekiriki yaaromolaaya Soorepa sa Eheepri, awo yaanampharihela Septuaginta. Moovira wa elukuluku masu yaawo yaanakhala oohiyana ni marepeliwo oopacerya a Eheepri. Mwawiihiiha, muteko wa achu oohiphaameya onnapaka makupa a Piipiliya nryaahuno olelo. Ela ennanihusiha wi Yehova hanoona elocelo emoha okhala yaphaamaxa opwaha ekina.​—Mwaalakhanye Saweriwa T’arummwa 10:34.

10. Tiheeni nnahuseryaahu orweela wa mukhalelo Yehova onaloceiye ni achu?

¹⁰ Nohoona wi Yehova onnaloca ni achu mwawiiwanana ni mikhalelo saya. Owo hanalamulela wi nsuwele elocelo yammoori wi niwerye ohuserya vooloca sa yoowo ni yoochuna awe. (Mwaalakhanye Zakariya 8:23; Wupulula 7:9, 10.) Nohoona tho wi Yehova aahaaveerela anamarepa a Piipiliya, nyenya aaheemererya wi erepe muupuwelo awe epharihelaka masu aya.

MULUKU ONNAKHAPELELA MASU AWE

11. Ntakhara heeni ohiyana wa ilocelo sa achu tahi nikacamiho wa Yehova?

¹¹ Achu annaloca ilocelo soohiyana hiyana, nyenya eyo tahi nikacamiho wa Yehova. Nnasuwela hai? Piipiliya orino masu vakhaani a Yesu yaawo aalonceiye mu elocelo yoopacerya. (Mateu 27:46; Marko 5:41; 7:34; 14:36) Nyenya Yehova aaheeriha wi michaka sa Yesu irempwe nave itaphuleliwe mu Ekiriki ni mu ilocelo ikina. Nave tho Masu a Muluku yaakhapeleliwa moorweela wa okopiyaariwa yoowo weeriweno ni Ayuuta vamoha ni Akiristu. Soorepa iho sookopiyaariwa saataphuleliwa mu ilocelo sincipale. Sivinre iyaakha 400 Kiristu aruule, John Chrysostom aaloca wi mahusiheryo a Yesu yaataphuleliwa mu ilocelo sa Siriya, Yiikuputu, Intiya, Persiya, Etiopiya ni ilocelo ikina.

12. Piipiliya onaakaahiwa hai?

¹² Mu iyaakha sincipale, Piipiliya ni yaale anamutaphulela ni yaale anamukawa, annaakaahiwa. Mu iyaakha 300 Yesu ayariwe, Mutokweene a Roma Diocleciano aalamulela wi Apiipiliya oothene etoloxiwe. Ivinre iyaakha 1.200 ohoolo waya, William Tyndale aapacerya omutaphulela Piipiliya mu Enklesi. Aaloca wi wakhala wi Muluku oomukhaviherya, aahaala wiilipixerya wi namalima awerye omwiiwexexa phaama Piipiliya ompwaha muhooleli a malapelo. Nthowa na wiiciwa, Tyndale aachawa o Inklatera ayaaka o Europa wi amutaphulele ni ompaka Piipiliya. Naamwi ahooleli a malapelo yiilipixenrye waatoloxa Apiipiliya oothene, Piipiliya aapakiwe ni Tyndale aakaiwa wa achu ancipale. Voocharela, Tyndale aakhomeliwa ni weeyeliwa va mwirini. Nyenya soorepa sawe saahiikhalelaru, nave saaphariheliwa wi apakiwe Piipiliya oniichaniwa King James Version.​—Mwaalakhanye 2 Timóteo 2:9.

13. Otholathola weeriweno ni Piipiliya akhalai onooniherya eheeni?

¹³ Eparipari wi soorepa seiya sa khalai, sookhalano sooheseya vakhaani ni ohiyana. Nyenya alipa ootholathola ahaalikhela soorepa sincipale seiyo saarempwe ni mata ni Apiipiliya akhalai. Emanle olikanyiha, yaahoona wi pahiru yaari makupa vakhaani yaawo yaari oohiyana. Nyenya michaka sa Piipiliya hitoroken’ye. Otholathola yoola onnaalekecha anamahuserya a Piipiliya wi yeeyo aryaayano olelo chiryene Masu ooveereliwa a Yehova.​—Isaiya 40:8.c (Moone masu a vathi.)

14. Tuuvi ori waaca wa Apiipiliya olelo?

¹⁴ Naamwi Piipiliya aakaahiwaka, owo ootaphuleliwa mu ilocelo soopwaha 2.800. Piipiliya onnampwaha liivuru vyakala okhanle olelo. Naamwi achu ancipale ehimuroromelaka Muluku, Masu awe annatitelela okaiwa mmakupa oothene a elapo. Naamwi Apiipiliya akina ehiri ookhweya owaalakhanya, oothene aakhalano michaka sa ewehereryo ya okumi woohimala.

AANACHUNEYA PIIPILIYA MUVYAANI

15. (a) Opacerya 1919 soolaleeryiwa sahu soorweela Mpiipiliya sitoroken’ye hai? (b) Ntakhara heeni soolaleeryiwa sahu sinarempwa mu Enklesi?

¹⁵ Mu 1919, nikhuuru nikhaani na oohuserya a Piipiliya, naathanliwa ntoko “mulapeli òroromeleya ni awisuwela.” Mweelukuluku yeeyo, nikhuuru nlo naanaloca ni achu a Muluku epharihelaka Enklesi. (Mateu 24:45) Nyenya olelo, soolaleeryiwa soorweela Mpiipiliya sinnaphwanyeya mu ilocelo soopwaha 700. Moolikana ni Ekiriki ya khalai, olelo Enklesi yoosuweliwa mmakupa mancipale nave ennaphariheliwa mu anakoso ni mu ohusiha. Mwawiihiiha, soolaleeryiwa sahu inarempwa mu Enklesi voocharela sinnataphuleliwa mu ilocelo ikina.

16, 17. (a) Tiheeni yaari yoochuneya wa achu a Muluku? (b) Yoochuna eyo yaakhwaniheryiwe hai? (c) Tiivi yaari yoochuna ya Munna Knorr?

¹⁶ Soolaleeryiwa sahu soothene inarweela Mpiipiliya. Omapacereryo, achu a Muluku yampharihela Piipiliya King James Version, yoowo aakuchuliwe mu 1611. Nyenya masu awe yaari akhalai ni oovila wiiwexexa. Nsina na Muluku naaromoliwa ikwaha vakhaani, naamwi soorepa sa khalai saapharihenle nsina nlo ikwaha sincipale. Piipiliya owo aakhalano sooheseya ni soorepa sawaaceererya seiyo sahaaphwanyeya mu soorepa sa khalai. Apiipiliya akina a Enklesi yaakhalano makacamiho oolikana.

¹⁷ Chiryene, achu a Muluku yaanamuchuna Piipiliya awaakhwanela ni ookhweya omwiiwexexa. Mwawiihiiha naapakiwa Nikhuuru na Omutaphulela Piipiliya, nave anna a nikhuuru nenla yaavonya makupa mathanu nammoha a Piipiliya opacerya 1950 ophiyerya 1960. Nikupa noopacerya naavonyiwe va muthukumano wa muceche wa 2 a Akostu a 1950. Mmuthukumano yoowo, Munna Knorr aaloca wi ti woochuneya achu a Muluku okhalano Piipiliya awaakhwanela ni ookhweya omwiiwexexa yoowo aahaala waakhaviherya osuwela phaama eparipari. Aanachuneya Piipiliya ookhweya omwaalakhanya ni omwiiwexexa ntoko soorepa soopacerya sa oomuchara a Yesu. Yoochuna ya Munna Knorr yaari wi Tradução do Novo Mundo aakhaviherye achu ancipale omusuwela Yehova.

18. Tiheeni enakhaviherya otaphuleliwa wa Piipiliya?

¹⁸ Mu 1963, yoochuna ya Munna Knorr yaahaakhwanela. Tradução do Novo Mundo das Escrituras Gregas Cristãs aanaphwanyeya mu elocelo ya Dutch, Efransesi, elocelo ya Alemanya, Italiya, Ekunya ni Espanyola. Mu 1989, Nikhuuru Noolamulela na Anamoona a Yehova naapaka ekupweete o nipuro nahu ntokotoko wi yaakhaviherye alipa oomutaphulela Piipiliya. Mu 2005, yaaheemereryiwa omutaphulela Piipiliya mu ilocelo saataphuleliwamo Mulipeleli. Ntoko yookhumelela, Tradução do Novo Mundo anteero naari makupa awe vano onnaphwanyeya mu ilocelo soopwaha 130.

19. Echu taani yoochuneya yeeren’ye mu 2013, nave tiheeni nnayaahu ohuserya mmwaha onacharela?

¹⁹ Tradução do Novo Mundo aavonyiwa, nyenya moovira wa elukuluku maloceliwo a Enklesi yaatorokeya yeerihaka wi okhale woochuneya otoroka masu. Nihiku na 5 ni 6 a Outupuru a 2013 achu 1.413.676 oorweela ilapo 31 yaakhala vamoha mmuthukumano wa Sociedade de Tratados da Torre de Vigia. Munna a Nikhuuru Noolamulela aalokoha ovonyiwa wa Tradução do Novo Mundo muvyaani a Enklesi. Alipa oowiriyana yaatepa ohakalala, nave ancipale yaahinla yaamwaakhenlaaya Piipiliya muvyaani. Vaavaa anamaloca yaalakhanyaaya soorepa sa Piipiliya yoowo, oothene yaanawerya woona wi aari ookhweya omwaalakhanya ni omwiiwexexa. Mmwaha onacharela, nnahaala ohuserya sincipale sa yeela ni mukhalelo onataphuleliweiye mu ilocelo ikina.

[Masu a vathi]

[Eruku va epaaxina 12]

MASU ATHARIHIWE

[Eruku va epaaxina 12]

Yehova onnaloca ni achu mmukhalelo wookhweya wiiwexexa. Woopaceryani, owo aapharihela Eheepri ya khalai wi aloce ni Aatamu, nyenya Yehova onnawerya oloca ni achu mu elocelo vyakala. Echu onachuneiye ori wi hiyaano niiwexexe muupuwelo awe ni ohoolela onaavaheiye alapeli awe

[Eruku va epaaxina 10]