Mukhale Oororomeleya mu Ichu Soothene

Achu oothene annachuna okhalano asinthamwene oororomeleya. Ti yeeyo tho Yehova onachuneiye. Nyenya okhala oororomeleya mu elapo yeeyo achu ancipale aryaaya oohiroromeleya tahi wookhweya. Naamwi hiiha, ntakhara heeni ti waphaama okhala oororomeleya?

1. Nthowa taani noochuneya nnaneeriha okhala oororomeleya?

Vaava nnakhalaahu oororomeleya, ninnooniherya wi ninnamusivela ni omucicimiha Yehova. Muupuwele ela: Yehova onnasuwela soothene nnuupuwelaahu ni seiho nnapakaahu. (Ahebri 4:13) Owo onnoona vaavaa nnalakelelaahu okhala oororomeleya nave onnavaha esisapo sa yeeyo. Masu awe ani: “Tiwi Apwiya annamuthanya mulavilavi nto anniiwananano awookololowa murima.”—Masiposipo 3:32.

2. Mmikhalelo taani nnahaalaahu wooniherya ororomeleya mu okumi ahu wa nihiku ti nihiku?

Yehova onachuna wi nyuwaano “muloceke eparipari mukina ni mukhwaawe.” (Zakariya 8:16, 17) Eyo enataphulela eheeni? Eyo enataphulela wi hannaphwanela woothaka naari ovirikanyiha eparipari vaavaa nnalocaahu ni, amusi, asinthamwene oomutekoni ni ooxikola, naari vaavaa nnalocaahu ni anna mmulokoni, ni alamuleli. Muchu oororomeleya haniiya naari wiiphwanyerya orweela wa akina. (Mwaalakhanye Masiposipo 24:28 ni Éfeso 4:28.) Nave tho muchu oororomeleya, onnaliva misokho soothene. (Aroma 13:5-7) Naari wi, “ninnakhwela wetxa ni wokololowa mwa sothene.”—Ahebri 13:18, BNM.

3. Miphurelo taani sinakhalavo wa nthowa na okhala oororomeleya?

Vaavaa nnakhalaahuno meecelo oororomeleya, achu anamunroromelaka. Mmukhalelo yoola, ninnamukhaviherya mmoha ti mmoha wiisoona okhala ookhapeleleya mmulokoni, yoowo ori emusi ahu yeeparipari. Ohiya yeeyoru, nnamukhalano yawuupuxerya ya murima yaphaama. Ororomeleya wahu onanwerya tho ‘oreeriha soohusiha sa Muluku, mvulusha ahu,’ ni oweeriha akina ochuna omulapa Yehova.—Tito 2:10.

OHUSERYA MWAWIISEELA

4. Ororomeleya onnamuhakalaliha Yehova

Mwaalakhanye Salumu 44:21 ni Malakiya 3:16, nave voocharela muthokororye makoho ala:

• Mmoonelo anyu, ntakhara heeni hannaphwanela wuupuwela wi nnanwerya okhuwa echu vyakala wa Yehova?

• Munuupuwela wi Yehova onoona hai vaavaa nnalakelelaahu oloca eparipari, naamwi okhalaka woovila?

5. Mukhale oororomeleya mu soothene

EXILEMA: O que nos dá alegria? — Uma consciência limpa (2:32)

Mwaalakhanye Ahebri 13:18, voocharela muthokororye mukhalelo nnahaalaahu okhala oororomeleya . . .

• ni amusi ahu.

• omutekoni naari oxikola.

• mmikhalelo mikina.

6. Ororomeleya onnanruuhela mphurelo

Eparipari wi okhala ororomeleya onanwerya okumiherya makacamiho makina. Naamwi hiiha, teri echu yoophwanelela weera ilukuluku soothene. Mwaalakhanye Salumu 34:12-16, nave voocharela muthokororye nikoho nnacharela:

• Ti mwawiihai ororomeleya onahaalaaya weeriha okumi anyu okhala waphaama?

1. Alopwana ni athiyana oororomeleya annalipiha othela waya

2. Anamalapa oororomeleya annaroromeliwa ni mapatarawu aya

3. Achu oororomeleya annacicimihiwa ni alamuleli

SMUKWASU

Yehova onachuna wi asinthamwene awe ekhale oororomeleya mu soothene analocaaya ni weera.

Makoho awuuluulela

• Mmikhalelo taani nnahaalaahu wooniherya ororomeleya?

• Ntakhara heeni tahi yamiruku wuupuwela wi nnanwerya omukhuwa Yehova ichu ikina?

• Ntakhara heeni munachunaanyu okhala oororomeleya ilukuluku soothene?

OTHOLATHOLA

Ti mwawiihai asitiithi anahaalaaya waahusiha anamwane aya okhala oororomeleya?

Fale a verdade (1:44)

Ntakhara heeni ti woochuneya waakhwaniherya malakano ahu?

Cumpra suas promessas e seja abençoado (9:09)

Moone ntakhara heeni nnaphwanelaahu oliva musokho naamwi ohiphariheliwaka wiiliwiili.

“Você deve pagar impostos?” (A Sentinela, 1.º de setembro de 2011)

Tiheeni yaamuceenyenrye mulopwana mmoha oohiroromeleya otoroka okumi awe?

“Aprendi que Jeová é misericordioso e perdoador” (A Sentinela, 1.º de Maio de 2015)