Achu o Nasareti Annamukhooca Naamwi Apakaka Sootikhiniha

Yesu ootepa waaceliwa. Amanle okhumawo o Tekapoli, owo aahimpenusa muthiyana aakhuma nikhami nave aahimviiha mwaana mwaamuthiyana a Xairo. Nyenya hiwaakumve osekuwavo. Vaavaa Yesu onakhumeiye vaate va Xairo, alopwana eeli eevaasi annamuchara, ekhuwelaka: “Mwana a Davide, onimorele ikharari!”—Mateu 9:27.

Moorweela wa omwiichana Yesu “Mwana a Davide,” alopwana ala annooniherya weemererya waya wi Yesu ti mukelampa wa omwene wa Tavite nave wi ti Mesiya. Yesu onakhala wi hanapwacha okhuwela waya, akhweya wi oone waakhanle wi awo anahaala okhalano nthiti, nave awo annatitelela. Vaavaa Yesu onavoloweiye mpa, alopwana oopiili annamuchara. Yesu onnaakoha: “Munnaroromela wi miyo kòkhalano ikuru sawera yeyo?” Awo annaakhula moororomela: “À, Pwiya!” Voocharela, Yesu onnatannya miitho aya ariki: “Yereye ntoko muroromenlanyu.”—Mateu 9:28, 29.

Moohilekela miitho aya annahuleya! Hiiha ntoko aalenleiye akina, Yesu onnaaleela wi ehimuleele muchu yeeyo oweerenleiye. Nyenya esaren’ye ohakalala, awo annamvuwiha Yesu ophiyerya ociiwene.

Vaavaa alopwana ala apiili anapwahaaya, achu annamuruuha mulopwana yoowo ohinawerya oloca ntakhara wi ophariwe ti nsololo. Yesu onnakumiha nsololo, nave moohilekela mulopwana onnapacerya oloca. Muloko onnatikhiniheya ni yeela, olocaka: “Nari khalai henoneye yawihihá mwa Israyeli.” Afarisi aritho vaava. Awo hanawerya ovaanya sootikhiniha, mwawiihiiha annuuluulela masu aya ntoko ehime ya miteko sa Yesu: ‘Onakumiha minepa yonanara ni ikuru sawe sa mwene a minepa yonanara.’—Mateu 9:33, 34, Nlakano Nahihano.

Vahilekelen’yevo, Yesu onnaya elapo oyariweiyewo, o Nasareti, vano ahooliwaka ni amuhuserya awe. Ehivinrevo eyaakha emoha, owo aahihusiha mu esinakooka yeele. Wuupaceryani achu yaahitikhiniheya mwa yeeyo aalonceiye, nyenya ohoolo waya awo yaahinyeenyeya ni mahusiho awe nave yaaheererya omwiipha. Vano Yesu oneererya waakhaviherya wanaawiili amwaacamani awe akhalai.

Nawoorowa, owo onnakookela o sinakooka wi ahusihe. Ancipale ari oohaleeliheya, ophiyerya okoha: “lnarwa wowi miruku ni ikuru iho sawerano sotikiniha?” Awo annaloca: “Owo tahi mwana a karpintero? Nave amannya tahi Maria, ni asinnawe tahi Tiyako, Yosefe, Simoni ni Yuda? Nave arokoriye hanakhala othene ni hiyo? Vano ophwannye wowi itxhu sothene iho?”—Mateu 13:54-56.

Achu anoona wi Yesu mulopwana vyakala a vanipuroni. Awo annuupuwela, ‘Noomoona unnuwaka vano oni awerye hai okhala Mesiya?’ Naamwi hiiha, moohipwacha sawooniherya soothene—ophitaanyerya miruku ni miteko soowerya sa Yesu—awo annamukhooca. Nthowa na omukhovelela Yesu, ophiyeryatho amusi awe annakwaculeya ni yene, emweerihaka owo oloca: “Alipa a miririmu othene ananyemuliwa pahi mwelaponi mwaya ni vate vaya.”—Mateu 13:57.

Mweeparipari, Yesu ori ootikhiniheya ni oyeleela waya nroromelo. Mwawiihiiha owo hanapaka sootikhiniha weiwo “nto apenunse atxhu vakhani, akuheryaka mata.”—Marko 6:5, 6.