MWAHA 17

Yesu Aari a Mukhalelo Taani?

Nikupa na Wimprimiiriwa

Vaavaa nnahuseryaahu ichu Yesu olonceiye ni enreiye ari veelaponi ya vathi, ninnasuwela mikhalelo seiho inanaacameliha wa yoowo ni wa Atiithi awe, Yehova. Mikhalelo taani seiho? Nave nni nimutakiherye hai Yesu mu okumi ahu?

1. Mmikhalelo taani Yesu onalikaneiye ni Atiithi awe?

Ari wirimu, Yesu aanawoona Atiithi awe oosivela nave aahuserya ni yaawo mu iyaakha sincipale. Ntoko yookhumelela, owo onnuupuwela, onnoona, ni onneerano ichu ntoko Atiithi awe. (Mwaalakhanye Yohani 5:19.) Mweeparipari, Yesu onnatakiherya mikhalelo sa Atiithi awe mwawaakhwanela, ophiyerya wi aaloca ariki: “Yoowo onakoona miyo, onnawoona Atiithi.” (Yohani 14:9) Vaavaa munahuseryaanyu vooloca sa mikhalelo sa Yesu, nyuwaano munahaala omusuwela phaameene Yehova. Ntoko yootakiherya, mukhalelo Yesu aathokororyeiye achu ennooniherya mukhalelo Yehova onoothokororyeiyeni.

2. Mmukhalelo taani Yesu oonihenryeiye wi onnamusivela Yehova?

Yesu oriye: “Kineerano yeeyo Atiithi akirummaaya wi elapo ya vathi esuwele wi miyo kinnaakhwela Atiithi.” (Yohani 14:31) Ari veelaponi ya vathi, Yesu aahooniherya osivela wawe otokweene ntakhara Atiithi awe moorweela wa owiiwelela yaawo naamwi waari woovila weerano yeeyo. Yesu aanasiveliwa tho oloca sa Atiithi awe, ni waakhaviherya akina okhalano onthamwene ni Yaawo.—Yohani 14:23.

3. Mmukhalelo taani Yesu oonihenryeiye wi onnaasivela achu?

Piipiliya onaloca wi Yesu ‘aanahakalala aawooneiye achu.’ (Masiposipo 8:31) Owo aahooniherya osivela yoola moorweela wa waalipiha ni waakhaviherya achu ahoonihenrye nthalu. Owo aapaka sootikhiniha sooniherya ohiya pahiru ikuru sawe, nyenya tho ikharari sawe. (Marko 1:40-42) Owo aanaakhaliha achu mooreera murima ni moohikhala nthalu. Masu awe yaanaahakararya ni waavaha ewehereryo oothene a murima waphaama yaawo yanwiriyana. Yesu aahiiveleela ohooxeya ni okhwa wa nthowa na waasivela achu oothene. Nyenya owo onaasivela xaxaxa yaale aniiwelela mahusiheryo awe.—Mwaalakhanye Yohani 15:13, 14.

OHUSERYA MWAWIISEELA

Muhuserye sincipale vooloca sa mikhalelo sa Yesu. Nave muthokororye mukhalelo wa wooniherya osivela ni mahala hiiha ntoko owo enreiye.

4. Yesu onnaasivela Atiithi awe

Yootakiherya ya Yesu ennanihusiha mukhalelo wa wooniherya osivela wahu wa Muluku. Mwaalakhanye Luka 6:12 ni Yohani 15:10; 17:26. Mwamala waalakhanya yoorepa ti yoorepa, muthokororye nikoho nla:

Nimutakiheryaka Yesu, nni nooniherye hai wi ninnamusivela Yehova?

Yesu avekelaka. — Yesu aanaasivela Atiithi awe awirimu nave aanalocano wiiliwiili mu nivekelo

5. Yesu onnaathokororya achu anachuna nikhaviheryo

Yesu aanaathokororya vancipale achu opwaha wiithokororya mukhateiye. Naamwi avelavenle, owo aanapharihela elukuluku ni ikuru sawe wi aakhaviherye achu. Mwaalakhanye Marko 6:30-44, nave voocharela muthokororye makoho ala:

Mu yaweereya yeela, mmikhalelo taani Yesu oonihenryeiye waapwacha akina?—Moone iversikulu 31, 34, 41 ni 42.
Tiheeni yaamuceenyenrye Yesu waakhaviherya achu?—Moone eversikulu 34.
Woona wi Yesu aatakiherya mikhalelo sa Yehova, mwa soothene seiya tiheeni muhusenryaanyu vooloca sa Yehova?
Mmikhalelo taani nneeraahu nimutakiherye Yesu mu waathokororya wawe akina?

Mootikhiniha Yesu onnaavakulela achu ancipale ni iphaawu thanu ni ihopa piili ikhaani. Oohuserya annakawa yoolya wa alopwana, athiyana ni anamwane.

6. Yesu ta mahala

Yesu aari a mahala naamwi ahaarino ichu sincipale soomwiilini, nave owo onnanceenyerya okhala a mahala. Mwaalakhanye Saweriwa T’arummwa 20:35, nave voocharela muthokororye nikoho nla:

Mwawiiwanana ni Yesu, nni niwerye hai okhala oohakalala?

Moone EXILEMA, nave voocharela muthokororye nikoho nnacharela.

EXILEMA: “Há mais felicidade em dar do que em receber”—Trecho (4:00)

Naamwi nihirino ichu sincipale soomwiilini, mmikhalelo taani nneeraahu nooniherye mahala?

Nyuwaano mwaanasuwela?

Piipiliya onnanihusiha ovekela wa Yehova mu nsina na Yesu. (Mwaalakhanye Yohani 16:23, 24.) Vaavaa nnavekelaahu mmukhalelo yoola, ninnooniherya wi hiyaano ninnathamalela yeeyo Yesu opankeiye wi anikhaviherye okhala asinthamwene a Yehova.

ACHU AKINA ANI: “Muluku hanathokororya ohooxeya wahu.”

Woona wi Yesu onatakiherya mikhalelo sa Atiithi awe, mmukhalelo taani saweera sawe inooniheryaaya wi Yehova onnanthokororya?

MUKWASU

Yesu onnamusivela Yehova, nave tho onnaasivela achu. Woona wi Yesu onalikana ni Atiithi awe, vaavaa munamusuwelaanyu vancipale Yesu, munahaala tho omusuwela vancipale Yehova.