Yehova Onanaacamela Mwawiihai?

“Mwachameleni Muluku, nave anarwa-awachamelani nyuwo.”​—YAK. 4:8.

MUNOONA HAI VOOLOCA SA . . . 

nwopelo wa Yehova wi mmwaacamele?

yoovaha ya Muluku ya mukucho wa woopola?

okhalano Masu oorempwa a Muluku mmukhalelo nnaweryaahu wiiwexexa?

 1. Nchuno taani achu aryaayano, nave taani onii akhwaaniherye nchuno nenlo?

ACHU aakhalano nchuno ntokweene na owaacamela achu akina. Enalociwa wi achu “annaacamelana vaavaa awo anachunanaaya vancipale mukina ni mukhwaawe ni yasuwelana phaama mukina ni mukhwaawe.” Mwa muyareriwo, hiyaano ninnakhapelela waataana wahu ni amusi ni asinthamwene yaawo ananisivela, ananicicimiha, ni ananiiwexexa. Nyenya, Muchu nnachunaahu opakano onthamwene wavamurimani ti Mpatuxa ahu Mutokotoko.​—Ekle. 12:1.

 2. Tiheeni Yehova onaniroromeliheiye, nyenya ntakhara heeni achu ancipale haneemererya yoororomeliha yeeyo?

² Yehova onnaniwopa mu Masu awe wi ‘nimwachamele’ owo, nave owo onnaniroromeliha wi wakhala wi noheerano, owo ‘anarwa-anachamela’ hiyo. (Yak. 4:8) Muupuwelo ola onnalipiha vancipale! Nyenya, achu ancipale anuupuwela wi tahi eparipari wi Muluku onnachuna owaacamela yaawo; awo anuupuwela wi hanaphwanelela omwaacamela Muluku naari wi Muluku ori ocaiwene. Apwanne ti wooweryeya omwaacamela Yehova chiryene?

 3. Tiheeni nnaphwanelaahu osuwela vooloca sa Yehova?

³ Eparipari ti yawi Yehova hari “ochiwene ni othene yehu” nnachuna omwaacamela; ti wooweryeya omusuwela yoowo. (Mwaalakhanye Saweriwa Tarummwa 17:26, 27; Salmo 145:18.) Muluku ahu oolakelela wi naari achu oohiphaameya anaphwanela omwaacamela yoowo, nave owo onnachuna owaakhela awo ni mahala awe ntoko asinthamwene avamurimani. (Yes. 41:8; 55:6) Orweela wa yaweereya awe mukhateiye, namarepa a salmo aawerya orepa vooloca sa Yehova: “Awiwa nivekelo Nyuwo, Ikumi sothe sene sini sirwe wa Nyuwo. Óréla mutchu yowo munamuthanlanyu, ni omwachameliha.” (Sal. 65:2, 4) Yaweereya ya Mpiipiliyani vooloca sa Mwene Asa o Yuuta ennooniherya yootakiherya ya muchu yoowo aamwaacamenle Muluku, nave eyo ennooniherya waakhulela wa Yehova.a

MUHUSERYE ORWEELA WA YOOTAKIHERYA YAKHALAI

 4. Yootakiherya taani Mwene Asa aavanheiye achu a Yuuta?

⁴ Mwene Asa aahooniherya mvai wootikhiniha vooloca sa malapelo aweela, orweela wa otoloxa ocapaheya mu empa ya Muluku ni olapela soophwaniherya seiyo saasaren’ye mulaponi. (1 Mam. 15:9-13) Alocaka mootaphuwa, owo aahaawopa achu wi “yatxhareke Apwiya, Muluku a makholo aya ni etxhariheke ikano ni malamulo aya.” Yehova aareeliha iyaakha khumi soopacerya sa olamulela wawe ni murecele wawaakhwanela. Mano taani aaruuha murecele yoowo? Asa aahaaleela achu: “Hiyano mwa sothene nanasya owiwelela Apwiya nave awo, ànivaha muretxele mminlanoni mwahu mothemwene.” (2 Matharihelo 14:1-7, BNM.) Thokororyani yeeyo yeeren’ye voocharela.

 5. Mukhalelo taani waamweenhe Asa omuroromela wawe Muluku?

⁵ Mwiihele mmukhalelo wa Asa. Sera o Etiopiya oorwa ni alopwana 1.000.000 ni ikaaro 300 wi ewane ni Yuuta. (2 Math. 14:8-10) Tiheeni mwaahaalaanyu weera moonaka muloko mutokweene wa anakhoco erwaaka mu omwene anyu? Anakhoco anyu ari 580.000 pahiru! Waalakhanyerya apiili wa mmoha, apwanne mwahaala wiikoha ntakhara heeni Muluku oneemereryeiye wi amwiicani awo ephiye? Apwanne mwaahaala weererya weeravo echu mwawiiwanana ni miruku anyu? Yaweera ya Asa enooniherya ororomela wawe ni onthamwene awe wavamurimani ni Yehova. Moolucuwa owo aakhuwela: “[Yehova] Muluku ahu, munikhaviherye, ntakhara hiyano nnororomelani nyuwano nave hiyano nnawana ni akhotxo ala antxipale mwa nsina nanyu. [Yehova], ti nyuwano Muluku ahu, ehereye wi mutxhu òvotheni.” Muluku aakhulenle hai nivekelo na Asa ni murima woothene? “Atxhu a w’Etiyopiya yàthowa othene: havoru akophonle.” Haavovo mwiicani aakophonle ekhoco eyo naari mmoharu mano!​—2 Math. 14:11-13, BNM.

 6. Tiheeni nnaphwanelaahu otakiherya vooloca sa Asa?

⁶ Tiheeni yaamweerinhe Asa ororomela phaama ohoolela ni okhapelela wa Muluku? Piipiliya onnaloca wi “Asa ànera mahiku othene otxhuna w’Apwiya” nave wi owo “àkhanle òroromeleya mwa ekumi awe yothene vamithoni v’Apwiya.” (1 Mam. 15:11, 14, BNM.) Hiyaano tho nnaphwanela omurumeela Muluku ni murima woothene. Ti woochuneya weerano hiihaa wakhala wi hiyaano nnachuna opuha onthamwene wavamurimani ni yoowo hiihaano ni omwaahiyu. Hiyaano ninnathamalela vancipale wi Yehova topacenrye onaacamela nave onnanikhaviherya okhalano ni okhapelela onthamwene wavamurimani ni yoowo! Muthokororye makhalelo meeli mummo Muluku oneereiyeno yeeyo.

YEHOVA ONNANAACAMELA MOORWEELA WA WOOPOLA

 7. (a) Tiheeni Yehova enreiye enanaacameliha wa yoowo? (b) Mukhalelo taani woopwahaxa mummo Muluku onanaacameliheiye wa yene meekheiye?

⁷ Yehova ohooniherya osivela wawe ntakhara emusi yaachu moorweela wa opaka elapo yavathi yooreera. Owo nlelo onnooniherya osivela wawe ntakhara hiyo moorweela wa okhapelela okumi ahu ni soovaha sawe soomwiilini sootikhiniha. (Saw. 17:28; Yaw. 4:11) Opwaha soothene, Yehova onnathokororya soothowa sahu soomunepani. (Luka 12:42) Owo tho onnaniroromeliha wi onnawiriyana mukhateiye mavekelo ahu. (1 Yoh. 5:14) Nyenya, mukhalelo woopwahaxa mummo Muluku onanaacameliheiye wa yene meekheiye ni hiyaano nnamwaacamelaahu yoowo ti osivela onooniheryeiye moorweela wa woopola. (Mwaalakhanye 1 Yohane 4:9, 10, 19.) Yehova aamuruma “Mwana we óyariwa mekhiye” arwa veelaponi yavathi wi noopoliwe mwa yoocheka ni okhwa.​—Yoh. 3:16.

8, 9. Murici taani Yesu oreiyeno mu yookhwela ya Yehova?

⁸ Yehova oheeriha wi achu yaawo yaakhanle khalai Kiristu ahaakumve orwa ewerye ophura moorweela wa woopola. Opacerya elukuluku Yehova aalohenryeiye vooloca sa Mvuluxa a achu oomwaahiyu, woopola waakhanle ntoko wooliviwa mmoonelo awe, ntakhara owo aanasuwela wi yookhwela awe yaahaala okhumelela phaama. (Map. 3:15) Iyaakha masaneene muhoolo, murummwa Paulo aamuthamalela Muluku ntakhara “wopola wa mwa Kristu Yesu.” Paulo aahaaceererya: “Muluku múleva wawe áleva sotcheka hiho seriwe khalaisha.” (Arom. 3:21-26) Yesu ookhalano murici woochuneya mu omwaacamela wahu Muluku!

⁹ Pahiru moorweela wa Yesu achu awiiyeviha annawerya omusuwela Yehova ni opuha onthamwene wavamurimani ni yoowo. Soorempwa inavuwiha hai eparipari yeela? Paulo aarepa: “Muluku annan’chichimiheryela hiyo osivela wawe wa mwanene mekhiye mummo, wi vokhala hiyo okhala wokhala ótcheka Kristu ánikhwela hiyo.” (Arom. 5:6-8) Noovahiwa mukucho wa woopola wa Yesu, ohiya wi hiyaano ninnaphwanela, nyenya nthowa nawi Muluku onnanisivela vancipale. Yesu aaloca: “Havovo mmoha anawerya orwa wa Miyo nyenya Atithaka ókiruma Miyo yampurula yowo.” Mu elukuluku ekina, owo aaloca: “Havovo mutchu anarwa wa Atithi, nyenya mwa Miyo.” (Yoh. 6:44; 14:6) Ti orweela wa munepa waweela Yehova onaapuruleiye achu wa yene meekheiye orweela wa Yesu ni waakhaviherya wiikhalelaru mu osivela Wawe ewehereryaka okumi woohimala. (Mwaalakhanye Yuta 20, 21.) Muthokororye mukhalelo mukina mummo Yehova onanaacameliheiye wa yene meekheiye.

YEHOVA ONNANAACAMELA MOORWEELA WA MASU AWE OOREMPWA

10. Tiheeni Piipiliya onanihusiheiye enanikhaviherya omwaacamela Muluku?

¹⁰ Mmwaha yoola, hiyaano nooromola soorempwa sa aliivuru 14 oohiyana a Mpiipiliyani. Nahaarino Piipiliya, naahaala osuwela hai wi hiyaano nnanwerya omwaacamela Mpatuxa ahu? Nahaarino Piipiliya, naahaala ohuserya hai vooloca sa woopola ni vooloca sa omwaacamela Yehova moorweela wa Yesu? Moorweela wa munepa awe, Yehova ooveerela orempwa wa Piipiliya, yoowo onanileela omuchu awe wooreera vamoha ni yookhwela awe etokotoko. Ntoko ntakiheryo, mu Mukwaha 34:6, 7 (BNM.), Yehova aahiithariha meekheiye wa Moose ntoko “Muluku a ikharari, òrèra murima, òvilela ni òroromeleya . . . kinnavilela sòhiwelela, sònanara ni sòtxheka.” Taani ii ahimwaacamele muchu ntoko yoola? Yehova onnasuwela wi nahuserya sincipale sa yoowo moorweela wa Piipiliya, owo onahaala okhala eeparipari wa hiyo nave nnahaala wiisoona okhala vakhiviru vawe.

11. Ntakhara heeni nnaphwanelaahu wiilipixerya wi nihuserye vooloca sa mikhalelo ni iphiro sa Muluku? (Moone eruku yoopacerya.)

¹¹ Liivuru Achegue-se a Jeová onnathariha mummo nneeraahu niwerye oteka onthamwene wavamurimani ni Muluku: “Mu onthamwene woothene nryaahuno, waataana onarweela wa omusuwela muchu owo, otikhina ni ocicimiha mikhalelo sawe. Mikhalelo ni iphiro sa Muluku, ntoko inuupululiwaaya Mpiipiliyani, ti sookhweleya ohuserya.” Mwawiihiiha, ninnathamalela vancipale wi Yehova oorepiha Masu awe mmukhalelo nnaweryaahu wiiwexexa!

12. Ntakhara heeni Yehova aahaapharihela achu wi emurepe Piipiliya?

¹² Yehova anwerya waapharihela ankeelo wi erepe Soorempwa. Chiri, awo annasiveliwa ni hiyaano ni miteko sahu. (1 Pet. 1:12) Moohikhwa minikwa, ankeelo yanwerya orepa muchaka wa Muluku ntakhara achu. Apwanne awo yanwerya woona ichu mmoonelo wa achu? Mano awo yanwerya wiisooneiha ni soothowa sahu, sooceecheya sahu, ni minkhela sahu? Hooye, Yehova aanasuwela okotakota waya mmukhalelo yoola. Moorweela wa waapharihela achu wi emurepe Piipiliya, Yehova aaheeriha wi Piipiliya akhale awihu. Hiyaano ninnawerya wiiwexexa muupuwelo ni moonelo wa anamarepa a Piipiliya ni akina anaromoliwa mu Soorempwa. Hiyaano nnanwerya othanana ni soopwata, minikwa, woova, ni sooceecheya saya, navetho nnanwerya ohakalala ni soohakalaliha saya ni okhumelela waya phaama. Ntoko mulipa miririmo Eliya, anamarepa a Piipiliya oothene yaari “awóna ntoko hiha n’nonahu.”​—Yak. 5:17.

13. Nivekelo na Yona nnatannya hai murima anyu?

¹³ Ntoko ntakiheryo, muthokororye wakhala wi munkeelo anwerya wooniherya phaama moonelo wa Yona vaavaa mulipa miririmu owo aachanweiye muteko aarummweiye ti Muluku. Ti waphaama wi Yehova aamuruma Yona wi arepe mwaha awe meekheiye, ophitaanyerya nivekelo nawe nawiiseela wa Muluku ari vathi va eniya! Yona aahi: “Elukuluku konnaka wi yanavukuwa ekumi aka, kahovekelani nyuwano.”​—Yona 1:3, 10; 2:1-9, BNM.

14. Ntakhara heeni nnanwerya wiisooneiha ni yeeyo Yesaya aarempeiye vooloca sa yene mukhateiye?

¹⁴ Muthokororye tho yeeyo Yehova aamurummeiye Yesaya orepa vooloca sa yene mukhateiye. Amanle woona ncicimiho na Muluku, mulipa miririmo aakuxeya oloca sa soocheka sawe: “Kòrimela ntakhara ka mutxhu òtxheka nave komona ni mitho aka Mwene, [Yehova] a owerya wothene!” (Isa. 6:5, BNM.) Munkeelo taani aahaala orummwa oloca masu yaala? Nyenya Yesaya aawerya oloca, nave hiyaano ninnawerya wiisooneiha ni moonelo awe.

15, 16. (a) Nnii niwerye hai wiisooneiha ni moonelo wa achu akhwiihu? (b) Tiheeni enahaala onikhaviherya omwaacamela Yehova?

¹⁵ Munkeelo anwerya oloca wi ‘haphwanela’ ntoko Yaakopo aalonceiye, naari wi aari “mutchu ótcheka” ntoko Petro ooneiye? (Map. 32:11, BNM; Luka 5:8) Awo yanwerya ‘woova’, ntoko oohuserya a Yesu, naari ankeelo eekhaikhai yaamuchuna ‘onyesererya’ ekumanaka ni ovaanyiwa wi elaleerye michaka yaphaama, ntoko Paulo ni akina yenraaya? (Yoh. 6:19; 1 Ates. 2:2) Hooye, ankeelo ti oophaameya mmukhalelo woothene nave ti awaapwaha achu. Nyenya, vaavaa achu oohiphaameya anooniheryaaya moonelo yoola, hiyaano ninniiwexexa mwawaakuveya moonelo aya ntakhara hiyaano naachu. Vaavaa nnaalakhanyaahu Masu a Muluku, chiri ninnawerya ‘otheya ni yawo enatheya nave wunla ni yawo enanla.’​—Arom. 12:15.

¹⁶ Wakhala wi ninnuupuwelela yeeyo Piipiliya onaloceiye vooloca sa meerelo a Yehova ni arummwa awe akhalai, hiyaano nnahaala ohuserya ichu sootikhiniha soohaalakhanyeya vooloca sa Muluku ahu, yoowo moopisa murima ni moosivela onawaacamela achu oohiphaameya. Hiihaa nnahaala omusuwela phaama Yehova ni omusivela owo mwawiiseela. Ntoko yookhumelela, hiyaano nnahaala owerya omwaacamela yoowo.​—Mwaalakhanye Salmo 25:14.

MUTEKE ONTHAMWENE WOOLIPA NI MULUKU

17. (a) Ekano taani yaphaama Asariya aamvanheiye Asa? (b) Asa aavevunle hai ekano ya Asariya, nave ni yookhumelela taani?

¹⁷ Mwene Asa amanle waavootha anakhoco a Etiopiya, Asariya, mulipa mirimo a Muluku, aakhalano masu amiruku wa yene ni achu awe. Asariya aaloca: “Apwiya [Yehova] ari ni nyuwano, nyuwano munakhala ni yawo, munamwaphwanya. Mwànyanyala, awotho anamonyanyalani.” (2 Math. 15:1, 2) Nyenya, muhoolo mu okumi awe, Asa aahesa wiiwelela ekano yeeyo yaphaama. Vaavaa oopopihiweiye ni omwene wa Isarayeli oomoko, Asa aavenke nikhaviheryo wa Asiiriya. Ohiya okhuwela wanawiili wa Yehova avekaka nikhaviheryo, owo aahaavya waataana ni amalapo. Moophwanelela, Asa aaleeliwa: “Elukuluku ela wenre itxhu s’ololo. Wa nthowa na yeyo, ovinya vano oyaka muholo, onan’wana ikhotxo.” Iyaakha soohalela sa olamulela wa Asa saasareya ni ikhoco. (2 Math. 16:1-9, BNM.) Tiheeni nnahuseryaahu?

18, 19. (a) Tiheeni nnaphwanelaahu weera wakhala wi noheemererya okhala oorakamelana ni Muluku? (b) Nnii niwerye hai omwaacamela Yehova vakhivirukhiviru?

¹⁸ Hiyaano hinnaphwanela omuhiya Yehova. Wakhala wi noheemererya okhala oorakamelana ni yoowo, nnaphwanela weeravo echu mwawiiwanana ni Oseya 12:7 (BNM.), enii: “Mmukòkele Muluku anyu, mukhale òroromeleya ni awokololowa, mun’wehereryeke mahiku othene Muluku anyu.” Vanonto, hankooni naacamele vakhivirukhiviru ni Yehova moorweela wa wuupuwelela vooloca sa woopola ni moorweela wa ohuserya Masu awe, Piipiliya.​—Mwaalakhanye Malamulo 13:4.

¹⁹ “Nyenya miyo, onnakirerela omwachamela Muluku,” oorepa namarepa a salmo. (Sal. 73:28) Hankooni oothene ahu ntitelele ohuserya ichu ivyaani vooloca sa Yehova ni othamalela mathowa mancipale a omusivela yoowo. Nave Yehova onahaala onaacamela vakhivirukhiviru hiihaano ni okhala wookhala!

[Nsu na vathi]